Ecce Homo, ni Antonio Ciseri

Hunyo 17–23

Mateo 27; Marcos 15; Lucas 23; Juan 19

“Tapus na”

Sugdi ang imong pagpangandam pinaagi sa pagbasa sa Mateo 27; Marcos 15; Lucas 23; ug Juan 19. Tinguhaa sa mainampoong paagi nga makasabut sa mga panginahanglan sa mga bata.

Irekord ang Imong mga Impresyon

Awhaga ang Pagpaambit

Pagunita ang matag bata sa hulagway gikan sa outline niini nga semana sa Dali, Sunod Kanako—Alang sa mga Indibidwal ug mga Pamilya. Samtang naggunit sa litrato, ang matag bata mahimong mopaambit og usa ka butang nga iyang nasayran kon sa unsang paagi namatay si Jesus.

Itudlo ang Doktrina

Mas Gagmay nga mga Bata

Mateo 27:11–66; Lucas 23; Juan 19

Tungod kay si Jesus namatay alang kanako, ako mabanhaw.

Ang gagmay nga mga bata tingali maguol sa mga istorya sa Pagkalansang ni Jesus sa Krus. Ang “Kapitulo 52: Ang mga Husay ni Jesus” ug “Kapitulo 53: [Si] Jesus gilansang sa Krus, Mga Istorya sa Bag-ong Tugon, 133–38, naghatag og maayo nga ehemplo kon unsaon nimo sa pagpaambit niini nga istorya ngadto kanila sa angay nga paagi.

Posible nga mga Kalihokan

• Ipakita ang litrato sa outline niini nga semana diha sa Dali, Sunod Kanako—Alang sa mga Indibidwal ug mga Pamilya samtang imong isaysay ang mahitungod sa husay, Pagkalansang sa Krus, ug paglubong ni Jesus (tan-awa usab sa Libro sa mga Hulagway sa Ebanghelyo, nus. 57 ug 58). Dapita ang mga bata sa pagpaambit sa unsay ilang nahibaloan mahitungod niini nga mga panghitabo. Hatagi og gibug-aton nga sa ikatulo nga adlaw, si Jesus nabanhaw, nagpasabut nga Siya nabuhi pag-usab.

• Hangyoa ang mga bata sa pagngalan og pipila ka butang nga gihimo sa ilang mga ginikanan alang kanila nga dili nila mahimo sa ilang kaugalingon. Pagpakita og usa ka hulagway sa Manluluwas. Ipasabut nga tungod ni Jesus, kita mabanhaw—usa ka butang nga dili nato mahimo sa atong kaugalingon.

• Pagpakita og litrato sa usa ka tawo nga imong kaila nga namatay. Ipaambit ang imong pagpamatuod nga tungod ni Jesus kana nga tawo mabuhi pag-usab.

Ang Paglubong, ni Carl Heinrich Bloch

Mateo 27:26–37; Lucas 23:34

Makapasaylo ako sa uban sama sa gibuhat ni Jesus.

Unsaon nimo pagtabang ang mga bata nga makasabut kon unsaon sa pagpasaylo niadtong mga dili maayo, sama sa gibuhat ni Jesus?

Posible nga mga Kalihokan

• Ihulagway kon sa unsang paagi ang mga sundalo dili maayo ngadto ni Jesus (tan-awa sa Mateo 27:26–37), ug dayon basaha ang Lucas 23:34. Ipasabut nga kon mopasaylo kita sa uban, atong mawagtang ang dili maayo nga mga pagbati ngadto kanila ug mopakita og gugma.

• Pagpaambit og mga sitwasyon diin ang usa ka tawo adunay gisulti o gibuhat nga dili maayo. Dapita ang mga bata sa pagpakita kon unsaon nila sa pagpasaylo nianang tawhana.

• Pagsulat og mga pulong o hugpong sa mga pulong gikan sa “Tabangi Ko, Mahal nga Amahan,” Songbook sa mga Bata, 52, diha sa pisara. Dapita ang mga bata sa pagkanta sa awit sa makadaghang higayon, nga papason ang pipila ka mga pulong sa matag higayon hangtud nga ilang nakat-unan ang tibuok kanta. Sumala niini nga kanta, kinsa ang kinahanglan natong pasayloon? Kinsa ang makatabang kanato kon ang pagpasaylo lisud?

• Siksika ang bag-ong isyu sa Liahona aron mangita og istorya mahitungod sa usa ka bata kinsa mipasaylo sa usa ka tawo. Ipaambit kini nga istorya sa mga bata.

Lucas 23:32–33, 39–43

Tungod kay si Jesus nag-antus ug namatay alang kanako, makahinulsol ako ug mapasaylo.

Bisan og ang ubos sa otso anyos nga mga bata wala pay tulubagon, importante nga sugdan na nila karon ang pagkat-on unsaon sa paghinulsol sa sayop nga mga pagpili nga ilang nahimo.

Posible nga mga Kalihokan

• I-summarize ang Lucas 23:32–33, 39–43, ug itudlo ang duha ka kawatan diha sa litrato 57 sa Libro sa mga hulagway sa Ebanghelyo. Ipasabut nga sa dihang ang unang kawatan mibugal-bugal ni Jesus, ang ikaduhang kawatan miangkon nga nakahimo siya og sayop—misugod na siya sa paghinulsol.

• Basaha ang Doktrina ug mga Pakigsaad 19:16 ngadto sa mga bata. Nganong nag-antus man si Jesus alang kanato?

• Ipasabut nga ang Langitnong Amahan ug si Jesukristo makatabang kanato nga matarung ang atong mga sala ug mga sayop ug modawat og kapasayloan.

• Pahimoa ang mga bata og mga marka sa chalk diha sa pisara aron morepresentar sa sayop nga mga pagpili. Dayon hangyoa sila sa pagpapas sa pisara aron sa pagrepresentar sa paghinulsol. Pagpakita og hulagway sa Manluluwas, ug pagpamatuod nga makahinulsol kita tungod Kaniya.

Itudlo ang Doktrina

Mas Dagko nga mga Bata

Mateo 27:11–66; Lucas 23; Juan 19

Si Jesus namatay alang kanako tungod kay nahigugma Siya kanako.

Nganong mapasalamaton man ka nga si Jesukristo namatay alang kanimo? Ikonsiderar kon unsaon nimo pagtabang ang mga bata nga makasabut sa kamahinungdanon sa sakripisyo sa Manluluwas alang kanila.

Posible nga mga Kalihokan

• Paglista og importante nga mga panghitabo gikan sa Mateo 27:11–66 (alang sa tabang sa pagbuhat niini, tan-awa ang “Kapitulo 52: Ang mga Husay ni Jesus” ug “Kapitulo 53: [Si] Jesus Gilansang sa Krus,” Mga Istorya sa Bag-ong Tugon, 133–38). Dapita ang mga bata sa pagtuon niini nga mga bersikulo ug sa pagbutang sa mga panghitabo sa tukma nga han-ay.

• Kantaha uban sa mga bata ang “Ako Nahingangha, Nahibulong,” Mga Himno ug mga Awit sa mga Bata, 22–23. Nganong andam man si Jesus sa pag-antus alang kanato?

• Hangyoa ang usa ka bata sa pagbasa sa Mateo 27:54, ug dapita ang mga bata sa pagpaambit sa mga butang mahitungod ni Jesus nga nakatabang kanila nga masayud nga Siya mao ang Anak sa Dios.

• Pangutan-a ang mga bata unsay ilang nakat-unan mahitungod sa Pagkalansang sa Krus gikan sa “Sud-onga ang Halangdong Manunubos Namatay,” Mga Himno ug mga Awit sa mga Bata, nu. 16–17, o laing himno sa sakrament.

Mateo 27:26–37; Lucas 23:34

Makapasaylo ako sa uban sama sa gibuhat ni Jesus.

Mahimong lisud ang pagpasaylo sa uban. Ang mga bata nga imong gitudloan mapanalanginan samtang mosunod sila sa ehemplo sa Manluluwas ug mopasaylo sa tanang tawo.

Posible nga mga Kalihokan

• Dapita ang mga bata nga magpuli-puli sa pagbasa mahitungod sa mga sundalo nga dili maayo ngadto ni Jesus diha sa Mateo 27:26–37 ug ni Jesus nga mipasaylo kanila diha sa Lucas 23:34.  Unsa ang atong makat-unan gikan sa ehemplo ni Jesus?

• Isulat diha sa pisara Unsa ang inyong mabuhat aron makapasaylo sa tawo nga dili maayo kaninyo? Papuli-puliha ang mga bata sa pagsulat og mga ideya diha sa pisara, sama sa Pag-ampo aron makabaton og maayo nga mga pagbati ngadto sa tawo o Paghunahuna og maayong butang mahitungod sa tawo.

• Dapita ang mga bata sa pagdrowing og mga hulagway sa mga sitwasyon diin ang usa ka tawo dili maayo ug sa unsang paagi ilang pasayloon kanang tawhana. Ipaambit nila ang ilang mga drowing diha sa klase.

Lucas 23:32–33, 39–43

Tungod kay si Jesus nag-antus ug namatay alang kanako, makahinulsol ako ug mapasaylo.

Kini nga leksyon usa ka maayong panahon sa pagpamatuod nga tungod ni Jesukristo, makahinulsol kita sa atong mga sala ug mapasaylo.

Posible nga mga Kalihokan

• Dapita ang usa ka bata sa pagbasa sa Lucas 23:32–33, 39–43. Ipasabut nga ang duha ka mga tawo nga gilansang sa krus uban ni Jesus mga kawatan. Sa unsang paagi ang usa sa mga kawatan mipakita nga misugod na siya sa paghinulsol?

• Isulat ang mosunod nga sentence diha sa pisara, nga mobilin og mga blangko alang sa naka-italicize nga mga pulong: “Mahimo akong mapasaylo kon maghinulsol ko tungod sa Pag-ula ni Jesukristo.” Hatagi ang mga bata og mga clue sa pagtabang nga mabutangan og tubag ang mga blangko.

• Dapita ang usa ka bata nga mogunit og bag, ug sudli kini og gagmay nga mga bato samtang ang ubang mga bata mohingalan og sayop nga mga pagpili nga mabuhat sa usa ka tawo. Tabangi ang mga bata sa pagtandi sa bag ngadto sa espiritwal nga palas-anon nga atong dad-on kon makasala kita. Sa unsang paagi ang paghinulsol sama sa pagkuha sa mga bato gikan sa bag?

• Gamita ang artikulo “Makahinulsol ug Makapasaylo Kamo” (Liahona, Ago. 2015, 75) aron sa pagtudlo sa mga bata kon unsaon sa paghinulsol.

Awhaga ang Pagkat-on diha sa Panimalay

Awhaga ang mga bata sa paghunahuna og usa ka tawo nga kinahanglan nilang mapasaylo ug sa pagdesisyon sa usa ka butang nga ilang buhaton aron sa pagpakita niana nga tawo nga mipasaylo na sila kaniya.

Pagpalambo sa Atong Pagtudlo

Pagkat-on sa pag-ila og pagpadayag. Ang pagpadayag sa kasagaran moabut “pagtulun-an human sa usa ka pagtulun-an” (2 Nephi 28:30), dili nga kausahon ra. Samtang mag-ampo ug mamalandong ka sa mga kasulatan ug niini nga outline, imong makaplagan nga ang mga ideya ug mga impresyon mahimong moabut bisan kanus-a ug bisan asa—samtang mopadulong ka sa trabaho, magbuhat sa mga buluhaton sa balay, o makig-istorya sa pamilya ug mga higala.