Adlaw sa Pentecostes, ni Sidney King

Hulyo 1–7

Mga Buhat 1–5

“Kamo Mao Unya ang Akong mga Saksi”

Sugdi ang imong pagpangandam pinaagi sa pagbasa sa Mga Buhat 1–5. Tinguhaa sa mainampoong paagi nga makasabut sa mga panginahanglan sa mga bata nga imong tudloan. Ang Dali, Sunod Kanako—Alang sa mga Indibidwal ug mga Pamilya ug kini nga outline makatabang usab kanimo.

Irekord ang Imong mga Impresyon

Awhaga ang Pagpaambit

Isulat ang Kinsa man Ko? diha sa pisara. Paghatag og pipila ka mga pamahayag mahitungod ni Pedro ug pangutan-a ang mga bata mahitungod kang kinsa ang mga pamahayag. Unsa pa ang ilang nahibaloan mahitungod ni Pedro?

Itudlo ang Doktrina

Mas Gagmay nga mga Bata

Mga Buhat 1:1–11

Si Jesukristo nangulo sa Iyang Simbahan pinaagi sa mga propeta ug mga apostoles.

Ang pagkat-on kon sa unsang paagi ang Manluluwas nangulo sa Iyang karaan nga Simbahan pinaagi sa mga apostoles makatabang sa mga bata nga makaangkon og pagpamatuod mahitungod sa mga propeta ug mga apostoles sa atong panahon.

Posible nga mga Kalihokan

• Ipakita ang tibuok pahina nga hulagway diha sa outline niini nga semana sa Dali, Sunod Kanako—Alang sa mga Indibidwal ug mga Pamilya. Pangutan-a ang mga bata kon ngano kaha nga nagtan-aw sa langit ang mga lalaki. I-summarize ang istorya diha sa Mga Buhat 1:1–11. Tan-awa usab sa “Kapitulo 55: Ang mga Apostoles Nangulo sa Simbahan,” Mga Istorya sa Bag-ong Tugon, 145–47, o ang katugbang nga video (LDS.org).

• Samtang ang klase motan-aw sa hulagway gikan sa outline niini nga semana sa Dali, Sunod Kanako—Alang sa mga Indibidwal ug mga Pamilya, dapita ang usa ka bata sa pagpataas og usa ka litrato sa kasamtangan nga mga Apostoles. Kinsa ang mangulo sa Simbahan kon si Kristo wala dinhi sa yuta? Unsaon nila sa pagpangulo ang Simbahan?

• Pagdula og pares-pares gamit ang duha ka hut-ong sa mga hulagway sa buhi nga Unang Kapangulohan ug Napulog Duha ka mga Apostoles. Kon adunay mahimo nga pares, isulti ang ngalan sa Apostol o Presidente ug usa ka butang mahitungod kaniya.

• Sa luyo sa usa ka hulagway ni Jesus, pagpapilit og gagmay nga mga hulagway sa mga butang nga mahimong itudlo sa usa ka propeta, sama sa bunyag o usa ka templo. Papuli-puliha ang matag bata sa pagtan-aw og usa sa mga hulagway ug sa pagsulti ngadto sa klase, “Ang propeta nagtudlo kanato mahitungod sa [ang hilisgutan diha sa hulagway].”

Mga Buhat 3:1–10

Ang Langitnong Amahan makapanalangin sa uban pinaagi kanako.

Unsay imong mabuhat sa pagtabang sa mga bata nga mahibalo og mga paagi nga makapanalangin sila niadtong naglibut kanila? Tabangi sila nga makat-on gikan sa ehemplo ni Pedro ug Juan nga nag-ayo sa bakol nga tawo.

Posible nga mga Kalihokan

• Dapita ang mga bata sa paghimo og mga aksyon nga mobagay sa istorya sa Mga Buhat 3:1–10, sama sa pagtuyhad sa ilang kamot aron mangayo og kwarta ug sa paglukso sa kalipay. Giunsa sa Langitnong Amahan pagpanalangin ang tawo nga dili makalakaw?

• Pagdala og bag nga gisudlan og mga hulagway nga nagrepresentar sa mga paagi nga makapanalangin ug makaserbisyo kita sa uban. Papuli-puliha ang mga bata sa pagpili og mga hulagway gikan sa bag ug sa pagpaambit kon sa unsang paagi makapanalangin sila sa uban nianang paagiha.

• Hangyoa ang mga bata sa pagpaambit og higayon sa dihang mitabang sila og tawo.

Mga Buhat 5:1–11

Mahimo akong magmatinuoron.

Ang unang mga Kristiyano nagsunod og usa ka matang sa balaod sa pagpahinungod aron sa pagtabang sa pag-atiman sa mga kabus. Kadtong nanag-iya og yuta mibaligya niini ug mihatag sa kwarta ngadto sa mga Apostoles aron iapud-apod tali sa mga Santos sumala sa ilang mga panginahanglan. Si Ananias ug Safira dili matinuoron sa ilang mga kontribusyon, nagtuo nga malingla nila ang mga sulugoon sa Ginoo.

Posible nga mga Kalihokan

• Tabangi ang mga bata nga idrama ang istorya ni Ananias ug Safira. Ipasabut nga bisan tuod dili kita mamatay kon mamakak kita, kini nga istorya nagpakita kon unsa ka importante ang pagkamatinuoron ngadto sa Langitnong Amahan.

• Kantaha og dungan ang usa ka kanta mahitungod sa pagkamatinuoron, sama sa “I Believe in Being Honest” (Children’s Songbook, 149). Tabangi ang mga bata nga makasabut nga usa ka parte sa pagkamatinuoron nagpasabut nga kanunay nga mosulti sa kamatuoran ug dili mokuha sa mga butang nga gipanag-iya sa laing tawo.

• Paggamit og mga puppet nga hinimo sa bulsita aron idrama ang yano nga mga sitwasyon diin ang usa ka tawo nagmatinuoron o dili matinuoron. Hangyoa ang mga bata sa pagbarug kon ang tawo nagmatinuoron o sa paglingkod sa salog kon ang tawo dili matinuoron.

Itudlo ang Doktrina

Mas Dagko nga mga Bata

Mga Buhat 1:8, 22–26

Si Jesukristo nangulo sa Iyang Simbahan pinaagi sa mga propeta ug mga apostoles.

Ang mga bata nga imong gitudloan makasabut nga ang Simbahan sa Manluluwas karon gipangulohan sa mga propeta ug mga apostoles, sama sa karaang panahon.

Posible nga mga Kalihokan

• Isulat diha sa pisara Sa unsang paagi pangulohan ni Jesukristo ang Simbahan kon wala Siya dinhi sa yuta? Dapita ang mga bata sa pagpangita og mga tubag sa pangutana samtang imong basahon ang mga pulong sa Manluluwas ngadto sa mga Apostoles diha sa Mga Buhat 1:8.

• Basaha og dungan ang Mga Buhat 1:22–26. Uban sa tibuok klase, hibaloi kon sa unsang paagi ang mga Apostoles mitawag og usa ka bag-ong Apostol.

• Sa wala pa kini, hangyoa ang usa ka bata ug ang iyang ginikanan sa pagbasa mahitungod sa usa ka bag-o lang nga gitawag nga Apostol (tingali diha sa LDS.org). Dapita ang bata sa pagpaambit sa iyang nakat-unan ngadto sa klase ug, kon mahimo, unsay gisulti sa Apostol kabahin sa iyang tawag sa iyang unang mensahe sa kinatibuk-ang komperensya.

Ang mga Apostoles nangulo sa Simbahan human misaka si Kristo sa langit.

Mga Buhat 3:1–10

Ang Langitnong Amahan mopanalangin sa uban pinaagi kanako, bisan kon dili ako adunahan.

Unsaon nimo pagtudlo ang mga bata nga makapanalangin sila sa uban, bisan kon wala silay “salapi ug bulawan”? (Mga Buhat 3:6). Unsaon nimo sa pagtabang nila nga makakita og mga oportunidad sa pagserbisyo sa Dios pinaagi sa pagserbisyo sa uban?

Posible nga mga Kalihokan

• Hangyoa ang usa ka bata sa pagbasa sa Mga Buhat 3:1–10 samtang ang ubang mga bata modrama sa istorya. (Alang sa tabang, tan-awa usab ang “Kapitulo 56: Si Pedro Miayo sa usa ka Tawo,” Mga Istorya sa Bag-ong Tugon, 148–49, o ang katugbang nga video sa LDS.org.) Sa unsang paagi ang panalangin nga nadawat niining tawhana mas dako kay sa kwarta nga iyang gipangayo?

• Ipasa palibut ang usa ka bag sa mga sinsilyo. Samtang mogunit ang mga bata sa bag, pangutan-a sila kon unsa ang ilang mapalit sa kwarta. Dayon kuhaa og balik ang bag sa mga sinsilyo ug pangutan-a ang mga bata kon unsa nga mga panalangin ang dili nila mapalit. Dapita sila sa pagpaambit unsaon nila sa pagserbisyo og tawo nga dili mogamit og kwarta (Mga Buhat 3:6).

Mga Buhat 2:36–47

Ang Espiritu Santo mosaksi sa akong kasingkasing sa mga kamatuoran sa ebanghelyo.

Kon ang mga bata makat-on sa pag-ila kon sa unsang paagi ang Espiritu Santo mamulong diha kanila, madasig sila sa pagpaminaw ug sa pagsunod sa inspirasyon nga ilang nadawat.

Posible nga mga Kalihokan

• Basaha og dungan ang Mga Buhat 2:36–37. Sama sa unsa ang bation kon ang Espiritu Santo adunay isulti diha sa atong kasingkasing?

• Uban sa tibuok klase, paghimo og poster nga dunay mga pulong nga Unsa ang atong buhaton? sa ibabaw. I-display ang poster kada semana, ug pagdugang og mga paagi nga ang mga bata mahimong mosunod sa unsay ilang nakat-unan sa leksyon matag semana.

• Dapita ang mga bata sa pagpangita sa maayo nga mga butang nga gibuhat sa mga tawo human sila nabunyagan diha sa Mga Buhat 2:41–47. Unsa nga maayong mga butang ang atong mahimo aron mapakita nga mapasalamaton kita sa gasa sa Espiritu Santo nga atong nadawat sa dihang kita gibunyagan?

Awhaga ang Pagkat-on diha sa Panimalay

Awhaga ang mga bata sa pagplano og usa ka paagi nga makaserbisyo sila sa Langitnong Amahan pinaagi sa pagtabang og usa ka sakop sa ilang pamilya karong semanaha.

Pagpalambo sa Atong Pagtudlo

Pagmemorya og kasulatan. Pagpili og usa ka tudling sa kasulatan nga sa imong hunahuna makatabang sa mga bata sa imong klase, sama sa Mga Buhat 2:38 o Mga Buhat 3:19, ug tabangi sila sa pagmemorya og usa ka hugpong sa mga pulong gikan sa kasulatan. Ang mga visual aid, mga paglihok sa kamot, o mga aksyon makatabang usab sa mga bata nga makasag-ulo sa mga kasulatan.