Unta Magpakabuhi Kita sa Ingon, ni Sam Lawlor

Hulyo 8–14

Mga Buhat 6–9

“Unsay Gusto Nimo nga Akong Buhaton?”

Sugdi pinaagi sa pagbasa sa Mga Buhat 6–9. Ang outline niini nga semana gikan sa Dali, Sunod Kanako—Alang sa mga Indibidwal ug mga Pamilya makatabang kanimo nga makasabut niini nga mga kapitulo. Ang mga kalihokan alang sa gagmayng mga bata niini nga outline mahimo usab nga mapahiangay alang sa mas dagko nga mga bata, ug vice versa.

Irekord ang Imong mga Impresyon

Awhaga ang Pagpaambit

Isulat ang pipila sa mga ngalan sa mga tawo gikan sa Mga Buhat 6–9 diha sa pisara—tingali si Saulo o si Esteban. Dapita ang mga bata sa pagpaambit sa bisan unsa nga ilang nahibaloan mahitungod sa usa niining mga tawhana.

Itudlo ang Doktrina

Mas Gagmay nga mga Bata

Mga Buhat 6–7

Makasunod ako ni Jesukristo pinaagi sa pagpanalipod sa matarung.

Unsa ang makat-unan sa mga bata gikan ni Esteban mahitungod sa pagkahimong sumusunod ni Jesukristo?

Posible nga mga Kalihokan

• Tabangi ang mga bata sa paghimo og mga aksyon nga mobagay sa usa ka awit kalabut sa pagpili sa matarung, sama sa “Barugan ang Kamatuoran” (Songbook sa mga Bata, 81). Gamita ang Mga Buhat 7:51–60 sa pagsulti sa mga bata kon sa unsang paagi si Esteban mitudlo mahitungod ni Jesukristo, bisan og ang pagbuhat niini nakapasuko pag-ayo sa mga lider nga Judeo (tan-awa usab sa “Kapitulo 57: Dautang mga Tawo Mipatay kang Esteban,” Mga Istorya sa Bag-ong Tugon, 150–51, o ang katugbang nga video sa LDS.org). Giunsa ni Esteban sa pagpanalipod sa matarung?

• Hatagi ang mga bata og pipila ka mga sitwasyon mahitungod sa mga bata nga kinahanglang mopili tali sa matarung ug sayop. Pangutan-a ang mga bata unsa ang ilang buhaton aron sa pagpanalipod sa matarung.

Mga Buhat 8:26–39

Ang Espiritu Santo nagdasig kanato sa pagpaambit sa ebanghelyo ngadto sa uban.

Gisunod ni Felipe ang mga pag-aghat sa Espiritu ug mitabang og Etiopiahanon nga tawo nga naglisud sa pagsabut sa mga kasulatan. Unsa nga mga leksyon ang atong makat-unan gikan niini nga istorya alang sa mga bata nga imong gitudloan?

Si Felipe Nagtudlo sa Etiopiahanon, ni Robert T. Barrett

Posible nga mga Kalihokan

• I-abut ang duha ka lingkuranan aron makahimo og karwahe. Pagdapit og duha ka bata nga molingkod diha sa karwahe, ang usa morepresentar ni Felipe ug ang usa morepresentar sa Etiopiahanon. Dayon isaysay ang istorya kon sa unsang paagi gitudlo ni Felipe ang ebanghelyo ngadto sa tawo gikan sa Ethiopia.

• Nabati ba ninyo sukad nga ang Espiritu Santo misulti kaninyo sa pagpaambit sa ebanghelyo ngadto sa usa ka tawo, susama sa kasinatian ni Felipe diha sa Mga Buhat 8:29? Ipaambit ang imong kasinatian sa mga bata.

Mga Buhat 9:1–20

Kon makahimo ko og sayop, ang Langitnong Amahan modapit kanako sa paghinulsol ug sa pag-usab.

Sa dihang gisultihan ni Jesus si Saulo sa paghunong sa pagpanglutos sa Simbahan sa Ginoo, si Saulo diha-diha dayon naghinulsol ug nag-usab. Sa unsang paagi kini nga istorya makatabang sa mga bata nga imong gitudloan nga magtinguha nga mag-usab dayon kon makahimo sila og sayop?

Posible nga mga Kalihokan

• I-summarize ang istorya sa pagkakabig ni Saulo, nga makita diha sa Mga Buhat 9:1–20 (tan-awa usab sa “Kapitulo 59: Saulo Nahibalo mahitungod ni Jesus,” Mga Istorya sa Bag-ong Tugon, 154–55, o ang katugbang nga video sa LDS.org).

• Pagsulat o pagdala og mga hulagway sa mga butang nga mausab, sama sa usa ka pito-pito, nga mausab ngadto sa usa ka baki, o sa mga kahoy atol sa lain-laing panahon. Sa unsang paagi nausab si Saulo sa dihang gibisitahan siya ni Jesukristo?

• Pagdrowing og nagsanga nga dalan diha sa pisara. Dapita ang mga bata sa pagngalan og mga dapit nga gusto nilang bisitahon, ug sa pagsulat niini sa ibabaw sa usa ka dalan. Unsa ang mahitabo kon moliko kita ngadto sa sayop nga dalan? Sa unsang paagi ang paghinulsol susama sa pagbalik ngadto sa sakto nga dalan?

• Hangyoa ang mga bata sa pagsulti sa unsay gisulti ni Saulo ngadto sa Ginoo: “Unsay gusto nimo nga akong buhaton?” Unsa ang gusto sa Ginoo nga atong buhaton?

Itudlo ang Doktrina

Mas Dagko nga mga Bata

Mga Buhat 6–7

Mahimo akong saksi ni Jesukristo.

Sa unsang paagi nimo matabangan ang mga bata nga imong gitudloan nga makakat-on gikan sa ehemplo ni Esteban nga mobarug isip saksi ni Jesukristo?

Posible nga mga Kalihokan

• Basaha ang Mga Buhat 6:5–15 ug 7:51–60 uban sa mga bata. Sa unsang paagi si Esteban usa ka saksi ni Jesukristo? Dapita ang usa o daghan pa nga mga bata nga magpakaaron-ingnon nga si Esteban ug mopaambit sa ilang gituohan ug ngano.

• Dapita ang mga bata nga magpuli-puli sa pagbasa sa Mga Buhat 6:3–10, nga mangita sa mga kinaiya ni Esteban nga nakatabang kaniya sa pagserbisyo.

• Hangyoa ang mga bata sa pagtabang nimo sa paghunahuna og mga sitwasyon diin makabarug sila isip saksi ni Jesukristo ug sa Iyang ebanghelyo. Tabangi sila sa pagdrama-drama sa pipila niini nga mga sitwasyon. Hangyoa ang mga bata sa pagbasa sa Mosiah 18:9. Ipasabut nga ang pagkahimong saksi ni Jesukristo nalakip sa mga saad nga atong himoon sa bunyag.

• Isulat ang mga pulong nga Esteban ug Felipe diha sa pisara. Ubos sa ngalan ni Esteban, pagsulat og mga paagi nga mamahimo kitang ehemplo ngadto sa uban. Ubos sa ngalan ni Felipe, pagsulat og mga paagi nga makapaambit kita sa ebanghelyo ngadto sa uban. Sa unsang paagi ang pagkahimong ehemplo sa usa ka disipulo ni Jesukristo makatabang kanato sa pagpaambit sa ebanghelyo?

Mga Buhat 8:5–24

Ang priesthood usa ka bililhon kaayo nga gasa gikan sa Dios.

Mipasiugda si Satanas sa mensahe nga ang materyal nga mga butang makahatag nato og kalipay. Unsaon nimo paggamit sa istorya ni Simon sa pagtabang sa mga bata nga hatagan og bili ang espiritwal nga mga butang sama sa priesthood ug mga panalangin niini?

Posible nga mga Kalihokan

• I-summarize ang istorya ni Simon, nga makita diha sa Mga Buhat 8:5–24 (tan-awa usab sa “Kapitulo 58: Simon ug ang Priesthood,” Mga Istorya sa Bag-ong Tugon, 152–53, o ang katugbang nga video sa LDS.org). Nganong dili man nato madawat ang priesthood pinaagi sa pagpalit niini? Unsaon man gayud pagdawat sa usa ka tawo sa priesthood? (tan-awa sa Mga Artikulo sa Hugot nga Pagtuo 1:5).

• Hatagi ang mga bata og dulaan nga kwarta, ug pagpakita og mga hulagway sa mga butang nga mahimong mapalit og kwarta. Pangutan-a ang mga bata kon pila ang ilang ibayad nga kwarta alang niini nga mga butang. Dayon pagpakita og mga hulagway sa sakrament, sa templo (nga nagrepresentar sa mga panalangin sa templo), sa bunyag, ug uban pang mga panalangin nga atong madawat pinaagi sa priesthood. Ipasabut nga kini nga mga gasa nga gikan sa Dios bililhon kaayo ug dili mapalit sa kwarta.

Mga Buhat 9:1–20

Kon makahimo ko og sayop, ang Langitnong Amahan modapit kanako sa paghinulsol ug sa pag-usab.

Sa dihang gisultihan ni Jesus si Saulo sa paghunong sa pagpanglutos sa Simbahan sa Ginoo, si Saulo diha-diha dayon naghinulsol ug nag-usab. Sa unsang paagi kini nga istorya makatabang sa mga bata nga imong gitudloan nga magtinguha nga mag-usab dayon kon makahimo sila og sayop?

Posible nga mga Kalihokan

• Dapita ang mga bata nga tungaon pagpilo ang usa ka piraso nga papel. Hangyoa sila sa pagsulat og Wala Pa sa usa ka tunga ug Pagkahuman diha sa pikas tunga. Basaha uban sa mga bata ang Mga Buhat 8:1–3; 9:1–2; ug 9:17–22, nga mangita sa mga pulong nga naghulagway ni Saulo sa wala pa ug sa pagkahuman niya nakita ang Ginoo.

• Dapita ang usa ka miyembro sa ward sa pagpaambit sa iyang istorya sa pagkakabig ug sa unsang paagi ang pagkamiyembro sa Simbahan nakapausab sa iyang kinabuhi, sama nga nausab ang kinabuhi ni Saulo.

• Pagdrowing og “dalan padulong sa Damasco” diha sa pisara. Dapita ang mga bata sa pagbasa sa Mga Buhat 9:6, 11, 18, 20–22, nga mangita kon unsay gibuhat ni Saulo aron maghinulsol ug modangup ngadto ni Kristo, ug isulat kini nga mga buhat diha sa dalan. Unsa ang atong makat-unan gikan ni Saulo kon unsaon nato nga mahimong mas mahisama ni Kristo?

• Dapita ang mga bata sa pagdrowing sa ilang paborito nga bahin sa istorya sa pagkakabig ni Saulo ug sa pagpaambit sa ilang drowing diha sa klase.

Awhaga ang Pagkat-on diha sa Panimalay

Awhaga ang mga bata sa pagsulti ngadto sa ilang pamilya sa ilang paborito nga kalihokan sa klase karon ug unsa ang gitudlo niini kanila.

Pagpalambo sa Atong Pagtudlo

Tabangi ang mga bata nga makat-on gikan sa mga kasulatan. Ang gagmayng mga bata tingali dili pa kaayo makabasa, apan mahimo gihapon nimo silang malakip diha sa pagkat-on gikan sa mga kasulatan. Sama pananglit, mahimo ka nga mobasa og usa ka tudling ug dapiton sila sa pagbarug o sa pagpataas sa ilang kamot kon makadungog sila og piho nga pulong o hugpong sa mga pulong nga gusto nimong tutukan (tan-awa sa Pagtudlo sumala sa Pamaagi sa Manluluwas, 20).