Hulyo 29–Agosto 4

Mga Buhat 22–28

“Sa Pag-alagad ug Pagpanghimatuod”

Samtang mobasa ka og mga istorya gikan sa pagpangalagad ni Apostol Pablo diha sa Mga Buhat 22–28, pangita og mga baruganan nga makahuluganon ngadto sa mga bata nga imong gitudloan.

Irekord ang Imong mga Impresyon

Awhaga ang Pagpaambit

Pag-display og mga hulagway sa sulod sa bilanggoan, sakayan, ug bitin. Dapita ang mga bata sa pagpaambit og mga istorya nga ilang nahibaloan mahitungod ni Pablo nga dunay kalabutan niini nga mga hulagway.

Itudlo ang Doktrina

Mas Gagmay nga mga Bata

Mga Buhat 23:10–11

Ang Langitnong Amahan ug si Jesus nagpakabana kanako ug motabang kanako sa mga panahon sa kalisud.

Ang pagkat-on kon sa unsang paagi ang Manluluwas mitabang kang Pablo nga makatabang sa mga bata nga masayud nga ang Langitnong Amahan ug si Jesus nagpakabana kanila.

Posible nga mga Kalihokan

• Ipaambit ang istorya sa Mga Buhat 23:10–11 mahitungod sa Manluluwas nga mibisita ni Pablo sa bilanggoan. Pagpaambit og panahon nga ikaw adunay kalisdanan ug nakadawat og giya ug kahupayan gikan sa Dios. Hangyoa ang mga bata sa pagpaambit og mga panahon nga mibati sila nga gihupay sa Dios.

• Tabangi ang mga bata sa pagsag-ulo sa gisulti ni Jesus kang Pablo: “Sumalig ka.” Hangyoa ang mga bata sa paghunahuna og usa ka tawo nga mahimo nilang dapiton sa pagsalig—tingali usa ka tawo nga naguol o nabalaka.

Mga Buhat 26:1–29

Mahimo akong mopaambit sa akong pagpamatuod sa uban.

Ang pagribyu sa pagpamatuod ni Pablo sa atubangan ni Haring Agripa makatabang sa mga bata nga makat-on unsaon sa pagpaambit sa unsay ilang nahibaloan nga tinuod.

Posible nga mga Kalihokan

• Pagdala og korona sa klase ug ipasul-ob kini sa usa ka bata ug magpakaaron-ingnon siya nga si Haring Agripa. Dapita ang laing bata sa pagbarug atubangan sa hari nga morepresentar ni Pablo samtang imong i-summarize ang pagpamatuod ni Pablo ug ang reaksyon ni Haring Agripa, nga makita diha sa Mga Buhat 26:1–29 (tan-awa sa “Kapitulo 63: Pablo Mitapos sa Iyang Misyon,” Mga Istorya sa Bag-ong Tugon, 162–66). Ipasabut nga makahimo kita sa pagpaambit sa atong mga pagpamatuod sa uban, sama sa gibuhat ni Pablo.

• Hangyoa ang mga bata sa pagpaminaw samtang imong kantahon o basahon ang usa ka kanta mahitungod sa pagpamatuod, sama sa bersikulo 2 sa “Testimony” (Hymns, nu. 137) o “Ako Nasayud Akong Amahan Buhi” (Songbook sa mga Bata, 8). Dapita ang mga bata sa pag-isa sa ilang mga kamot kon makadungog sila og usa ka butang nga makahimo sila sa pagpamatuod. Mahimo nimong kantahon ang awit sa makadaghang higayon; dapita ang mga bata sa pag-apil kanimo sa higayon nga mapamilyar na sila sa mga pulong. Hangyoa sila sa pagpaambit og pipila ka mga butang mahitungod sa ebanghelyo nga ilang nahibaloan nga tinuod.

• Gamita ang pahina sa kalihokan karong semanaha aron sa pagtabang sa mga bata sa paghunahuna og usa ka butang nga mahimo nilang isulti kon mohatag sila sa ilang pagpamatuod. Dapita sila sa pagpaambit sa ilang pagpamatuod ngadto sa usa ka tawo sa ilang pamilya.

Mga Buhat 27

Ang mga propeta mopasidaan kanako sa kakuyaw.

Ikonsiderar kon sa unsang paagi ang istorya sa pagkaguba sa barko nga gisakyan ni Pablo makatudlo sa mga bata nga ang mga propeta makakita sa kakuyaw nga dili nato makita.

Posible nga mga Kalihokan

• Dapita ang mga bata nga magpakaaron-ingnon nga anaa sila sa usa ka barko nga naguba sa unos. Basaha ang pasidaan ni Pablo ngadto sa mga tawo, nga makita diha sa Mga Buhat 27:9–10, ug ipaambit ang istorya sa pagkaguba sa barko nga nahitabo tungod kay wala sila maminaw sa iyang pasidaan (tan-awa sa mga bersikulo 11, 39–44). Pagpakita og hulagway sa Presidente sa Simbahan. Unsa nga mga matang sa mga pasidaan ang iyang gihatag kanato?

• Pagbutang og pipila ka mga hulagway o mga butang libut sa kwarto nga nagrepresentar sa mga butang nga gitudlo sa mga propeta nga atong buhaton, sama sa pagtambong sa simbahan o pagpabunyag. Uban sa tibuok klase, lakaw libut sa kwarto, nga mohunong sa matag hulagway o butang aron hisgutan kon sa unsang paagi ang pagsunod sa mga pagtulun-an sa propeta makatabang kanato nga magpabiling luwas.

Ang pagsunod sa mga pagtulun-an sa propeta makatabang kanato nga magpabiling luwas.

Itudlo ang Doktrina

Mas Dagko nga mga Bata

Mga Buhat 23:10–11; 27:18–26; 28:1–6

Kon mag-atubang ko og kalisdanan, ang Dios dili mobiya kanako.

Sa tanang pagsulay nga nasinati ni Pablo, giubanan siya sa Ginoo. Unsaon nimo pagtabang ang mga bata nga magamit ang mga kasinatian ni Pablo diha sa ilang kinabuhi?

Posible nga mga Kalihokan

• Gamit ang Mga Buhat 23:10, ipasabut nga gibilanggo si Pablo tungod kay gitudloan niya ang mga tawo mahitungod ni Jesus. Dayon basaha ang Mga Buhat 23:11 uban sa mga bata. Nganong makahimo man sa “pagsalig” si Pablo bisan og anaa siya sa bilanggoan?

• Isulat diha sa pisara ang Mga Buhat 23:10–11; Mga Buhat 27:18–26; ug Mga Buhat 28:1–6. Pagpakita og mga hulagway sa bilanggoan, barko, ug bitin, ug dapita ang mga bata sa pagribyu niini nga mga bersikulo ug ipares kini ngadto sa mga hulagway. Sa matag usa niini nga mga istorya, sa unsang paagi gipakita sa Ginoo kang Pablo nga anaa Siya uban kaniya?

• Pagdapit og usa ka tawo sa ward nga mopaambit og kasinatian sa dihang giubanan siya sa Ginoo panahon sa kalisud. Tingali ikaw o ang mga bata makapaambit usab og mga kasinatian.

Mga Buhat 26:1–29

Makapaambit ako sa akong pagpamatuod mahitungod ni Jesukristo sa maisugong paagi.

Ang kaisug ni Pablo sa pagpaambit sa iyang pagpamatuod makatabang sa mga bata nga magmaisugon kon mopaambit sa ilang mga pagpamatuod.

Posible nga mga Kalihokan

• Dapita ang mga bata sa pagbasa sa Mga Buhat 26:1–29 ug mangita og mga kamatuoran sa ebanghelyo nga gitudlo ni Pablo ngadto ni Haring Agripa. Nganong makahahadlok kaha alang kang Pablo ang pagpaambit niini nga mga butang ngadto sa hari? Dapita ang mga bata sa paglista og pipila ka mga baruganan sa ebanghelyo nga ilang nahibaloan nga tinuod. Hangyoa sila sa paghunahuna og tawo nga ilang kaila nga kinahanglang makadungog sa ilang pagpamatuod niini nga mga kamatuoran.

• Dapita ang mga bata sa paggamit sa pahina sa kalihokan karong semanaha aron sa pagsulat og usa ka butang nga mahimo nilang isulti sa ilang pagpamatuod.

Mga Buhat 27

Ang mga propeta mopasidaan kanako sa kakuyaw.

Ang mga bata makapaminaw sa mga mensahe sa modernong mga propeta ug mahibalo sa ilang mga pasidaan. Unsaon nimo pagtabang ang mga bata nga makakat-on unsaon sa pagpatalinghug niadto nga mga pasidaan?

Posible nga mga Kalihokan

• Guntinga ang usa ka piraso nga papel nga giporma og barko ngadto sa mga piraso sa puzzle. Dapita ang mga bata sa pagsulat sa mga pasidaan ni Pablo nga anaa sa Mga Buhat 27:9–11 diha sa mga piraso ug han-ayon ngadto sa saktong porma ang puzzle. Nganong wala man maminaw ang mga tawo kang Pablo? (tan-awa sa bersikulo 11). Dapita ang mga bata sa pagbasa sa mga bersikulo 18–20 ug 40–44 aron mahibaloan kon unsay nahitabo isip resulta. (Ipasabut nga tungod kay ang mga tawo misunod sa ulahing tambag ni Pablo nga magpabilin sa barko, walay usa nga namatay sa pagkaguba sa barko; tan-awa sa mga bersikulo 30–32.) Unsa ang atong makat-unan gikan niini nga kasinatian mahitungod sa pagsunod sa propeta?

• Pagdala og usa ka bag-ong mensahe sa komperensya sa Presidente sa Simbahan ug ipaambit sa mga bata ang bisan unsa nga mga pasidaan o tambag nga iyang gihatag. Dapita ang mga bata sa paghunahuna og mga paagi nga makahimo sila sa pagsunod sa propeta.

• Sa unsang paagi ang mga propeta sama sa tawo nga adunay teleskopyo?

• Pagsulat og pipila ka mga kalihokan nga mahimong mabuhat sa mga bata nga makatabang kanila nga makakat-on mahitungod sa tahas sa usa ka propeta—sama pananglit, “Basaha ang Doktrina ug mga Pakigsaad 21:4–7” o “Kantaha ang ‘Sunda ang Propeta’” (Songbook sa mga Bata, 58–59, o paggamit og laing kanta mahitungod sa mga propeta). Ibitay ang lista sa mga kalihokan gawas sa klasehanan, ug dapita ang usa ka bata nga mobarug sa may pultahan ug mobasa og usa ka kalihokan matag higayon ngadto sa ubang mga bata, nga tugutan sila nga kompletuhon ang kalihokan sa dili pa mobasa og lain. Ipasabut nga sama nga ang usa ka bata mihatag og direksyon ngadto sa uban, ang usa ka propeta motudlo kanato unsay gusto sa Dios nga atong buhaton. Hangyoa ang mga bata sa pagpaambit sa unsay ilang nahibaloan mahitungod sa mga propeta gikan sa mga kalihokan.

Awhaga ang Pagkat-on diha sa Panimalay

Hangyoa ang mga bata sa paggamit sa unsay ilang nakat-unan mahitungod ni Pablo sa pag-awhag sa ilang mga pamilya nga magtuon sa labing bag-o nga mensahe sa propeta ug hisgutan kon sa unsang paagi sila makasunod sa iyang tambag.

Pagpalambo sa Atong Pagtudlo

Ilakip ang mga balatian [senses]. “Kadaghanan sa mga bata (ug mga hamtong) labing makakat-on kon maapil ang daghang mga balatian. Pangita og mga paagi sa pagtabang sa mga bata nga magamit ang ilang mga balatian sa pangtan-aw, pangdungog, ug panghikap samtang nagkat-on sila. Sa pipila ka mga sitwasyon, mahimo gani nga makakita ka og mga paagi nga malakip ang ilang mga balatian sa pangsimhot ug pangtilaw!” Pagtudlo sumala sa Pamaagi sa Manluluwas, 25).