Agosto 12–18

Mga Taga-Roma 7–16

“Dag-a ang Dautan pinaagi sa Maayo”

Samtang imong basahon ang Mga Taga-Roma 7–16, irekord ang bisan unsa nga mga impresyon nga imong madawat kon unsaon nimo pagtudlo ang mga bata sa mga kamatuoran niini nga mga kapitulo.

Irekord ang Imong mga Impresyon

Awhaga ang Pagpaambit

Pangutan-a ang mga bata kon mipaambit ba sila sa ilang pamilya og usa ka butang nga ilang nakat-unan sa Primary sa miaging semana. (Tingali kinahanglan nimong ribyuhon kadali ang leksyon sa miaging semana.) Kon mao, unsa man ang ilang gipaambit?

Itudlo ang Doktrina

Mas Gagmay nga mga Bata

Mga Taga-Roma 8:35–39

Ang akong Langitnong Amahan nahigugma kanako.

Unsaon nimo paggamit ang mga pulong ni Pablo aron sa pagtudlo sa mga bata nga ang Langitnong Amahan kanunay nga mohigugma kanila?

Ang Langitnong Amahan nahigugma sa matag usa sa Iyang mga anak.

Posible nga mga Kalihokan

• Tabangi ang mga bata sa pagsag-ulo sa mga pulong nga “[Walay] makapahimulag kanato gikan sa gugma sa Dios” (Mga Taga-Roma 8:39). Aron sa paghulagway niini nga kamatuoran, ilansang sa usag usa ang duha ka tabla, ug sulati ang usa og “kita” ug ang lain og “ang gugma sa Dios.” Pasulaya ang mga bata sa pagbulag sa duha ka tabla.

• Dad-a ang mga bata sa gawas aron mabatyagan ang init sa adlaw, o pakit-a og hulagway sa adlaw. Sa unsang paagi ang adlaw sama sa gugma sa Langitnong Amahan? Tabangi sila nga makakita nga bisan ang adlaw layo ra, makatabang kini kanato nga mobati og kainit. Atong mabati ang gugma sa Langitnong Amahan sa tanang panahon, bisan og dili nato Siya kauban sa pisikal nga paagi. Mahimo usab kamong manganta og dungan sa “Gihigugma Ako sa Langitnong Amahan,” (Songbook sa mga Bata, 16–17).

Mga Taga-Roma 10:17

Ang hugot nga pagtuo mabatunan pinaagi sa pagpaminaw sa pulong sa Dios.

Samtang ang mga bata makadungog sa pulong sa Dios ug maminaw og maayo niini, ang ilang pagtuo sa Dios modako. Unsaon nimo sila pagtabang nga makasabut sa kaimportante sa pagpaminaw sa pulong sa Dios?

Posible nga mga Kalihokan

• Basaha ang Mga Taga-Roma 10:17 ngadto sa mga bata, ug pakit-a sila og mga hulagway sa mga sitwasyon diin makadungog sila sa pulong sa Dios (sama sa pagtuon sa kasulatan, simbahan, o kinatibuk-ang komperensya; tan-awa ang pahina sa kalihokan karong semanaha). Pangutan-a ang mga bata kon kanus-a sila nakadungog sa pulong sa Dios.

• Pagsaysay og istorya mahitungod sa usa ka bata nga naminaw sa pulong sa Dios sa lain-laing paagi. Samtang imong isaysay ang istorya, paburota sa hinay-hinay ang usa ka balloon nga nagrepresentar kon sa unsang paagi modako ang pagtuo sa usa ka bata sa matag higayon nga makadungog siya sa pulong sa Dios.

• Aron matabangan ang mga bata nga makasabut nga modako ang ilang pagtuo, tabangi sila sa pagkanta sa “Hugot nga Pagtuo” (Songbook sa mga Bata, 50–51). Samtang manganta sila, hangyoa sila nga magpakaaron-ingnon nga mga liso pinaagi sa paghupo. Sa matag higayon nga ilang kantahon ang pulong nga pagtuo, pabaruga sila og gamay sama sa nagtubo nga tanom.

• Tagui diha sa lawak klasehanan ang usa ka hugpong sa mga kasulatan, usa ka litrato sa Presidente sa Simbahan, ug usa ka kopya sa Friend o Liahona nga magasin. Hangyoa ang mga bata sa pagpangita niini nga mga butang ug sa pagpaambit kon sa unsang paagi ang matag usa naghimong posible alang kanato nga makadungog sa pulong sa Dios.

Mga Taga-Roma 16:1–4

Makapasalamat ako niadtong motabang kanako.

Mapasalamaton si Pablo sa mga tawo nga mitabang kaniya. Matabangan nimo ang mga bata nga makamatikod sa maayong mga butang nga gibuhat sa uban alang kanila ug mahinumdom sa pagpasalamat kanila.

Posible nga mga Kalihokan

• Ipasabut nga si Pablo mapasalamaton sa tabang nga iyang nadawat gikan sa usa ka babaye nga ginganlan og Febe ug sa magtiayon nga ginganlan og Prisca ug Aquila (tan-awa sa Mga Taga-Roma 16:1–4). Hangyoa ang mga bata sa pagdrowing og mga hulagway ni Pablo ug niining tulo ka mga tawo samtang mopaambit ka og mga pulong gikan sa mga bersikulo.

• Dapita ang matag bata sa pagpaambit og usa ka maayong butang nga bag-o lang gibuhat sa usa ka tawo alang kaniya. Tabangi ang mga bata sa paghimo og mga kard sa pasalamat alang niadto nga mga tawo.

• Tabangi ang mga bata nga makakat-on unsaon sa pagsulti og salamat sa lain-laing pinulongan. Ang kanta nga “Mga Bata sa Tibuok Kalibutan” (Songbook sa mga Bata, 4–5) makatabang.

Itudlo ang Doktrina

Mas Dagko nga mga Bata

Mga Taga-Roma 8:16–18

Gusto sa Langitnong Amahan nga mangandam ko sa pagdawat sa tanan nga anaa Kaniya.

Ang plano sa Langitnong Amahan makahimong posible kanato nga mahimong sama Kaniya ug makapanunod sa tanan nga anaa Kaniya. Kini nga kamatuoran makadasig sa mga bata nga imong gitudloan nga mas matinud-anon nga mosunod sa ebanghelyo.

Posible nga mga Kalihokan

• Basaha og dungan ang Mga Taga-Roma 8:16–18. Unsa ang atong makat-unan gikan niini nga mga bersikulo kon si kinsa kita ug si kinsa kita nga mamahimo? Ipasabut nga ang “manununod” mao ang usa ka tawo kinsa makapanunod, o makadawat, sa unsay anaa sa iyang mga ginikanan. Isulat diha sa pisara ang Unsay kinahanglan natong buhaton aron makapanunod sa tanan nga anaa sa atong Amahan sa Langit? Kantaha og dungan ang usa ka kanta mahitungod sa pagkamasulundon, sama sa “Sundon Ko ang Plano sa Dios” (Songbook sa mga Bata, 86–87), nga mangita sa mga tubag. Unsa pa nga mga tubag ang mahimong mahunahunaan sa mga bata?

• Hangyoa ang mga bata sa paghunahuna og usa ka hari kinsa gusto nga ang iyang mga anak maoy magmando sa iyang gingharian sa umaabut. Ipasabut nga ang Langitnong Amahan sama sa usa ka hari, ug kita Iyang harianon nga mga anak. Mahimo nimong ipaambit ang istorya sa anak nga lalaki ni Haring Louis XVI sa France, nga makita diha sa pakigpulong ni Sister Elaine S. Dalton nga “Hinumdumi kon Kinsa Kamo!” (Liahona, Mayo 2010, 120). Sa unsang paagi ang paghinumdom nga kita mga anak sa Langitnong Amahan ug natawo aron sa umaabut mahimong sama Kaniya makatabang kanato nga magpakabuhi nga matarung dinhi sa yuta? (Alang sa dugang nga impormasyon, tan-awa sa Matinud-anon sa Tinuhoan, 24–26.)

Mga Taga-Roma 10:17

Ang hugot nga pagtuo mabatunan pinaagi sa pagpaminaw sa pulong sa Dios.

Ang mga bata adunay daghang mga oportunidad sa pagpaminaw sa pulong sa Dios. Tabangi sila nga makakita kon sa unsang paagi ang pagpaminaw sa pulong sa Dios makapalig-on sa ilang pagtuo.

Posible nga mga Kalihokan

• Isulat ang mosunod nga sentence diha sa pisara: Ang moabut pinaagi sa , ug ang pinaagi sa sa . Hangyoa ang mga bata nga sulatan og tubag ang mga blangko human mabasa ang Mga Taga-Roma 10:17. Pagpaambit og panahon sa dihang ang usa ka tawo mitudlo og kamatuoran sa ebanghelyo nga nakatabang sa paglig-on sa imong pagtuo—tingali mahimo ka nga mopaambit og paborito nga kasulatan o kinutlo gikan sa kinatibuk-ang komperensya. Dapita ang mga bata sa pagpaambit sa ilang kaugalingon nga mga kasinatian.

• Sulati ang pipila ka mga baso sa tubig sa ngalan sa mga butang diin atong makita ang mga pulong sa Dios (sama sa mga kasulatan, mga miting sa simbahan, ug kinatibuk-ang komperensya). Hisguti kon sa unsang paagi ang pulong sa Dios makadugang sa atong pagtuo samtang imong ibu-bu ang matag baso ngadto sa usa ka sudlanan nga ginganlan og “Pagtuo.”

• Hatagi ang usa ka bata og hulagway sa Manluluwas nga nag-ayo og usa ka tawo nga dili pakit-on ang ubang mga bata sa hulagway. Hangyoa ang bata sa paghatag og clue aron matabangan ang ubang mga bata sa pagtag-an kon unsa ang gipakita sa hulagway. Unsaon nato sa pagpaambit ngadto sa uban sa unsay atong nahibaloan mahitungod sa Manluluwas aron makabaton sila og pagtuo diha Kaniya?

Mga Taga-Roma 14:10, 13

“Kinahanglan dili na kita maghinukmanay ang usa sa usa.”

Kon ang mga bata adunay inter-aksyon sa uban nga mohimo og lahi nga mga pagpili kay kanila, tingali matintal sila nga manghukom. Ikonsiderar kon sa unsang paagi ang tambag ni Pablo ngadto sa mga taga-Roma makatabang kanila nga makalikay niana nga pagpanghukom.

Posible nga mga Kalihokan

• Dapita ang usa ka bata sa pagbasa sa Mga Taga-Roma 14:10, 13. Hangyoa ang mga bata sa pag-ihap kon kapila gigamit ni Pablo ang pulong nga hukom. Unsa ang gipasabut sa paghukom sa uban? Nganong kinahanglan man natong likayan ang pagpanghukom sa uban?

• Pagpakita og litrato sa usa ka tawo, ug pangutan-a ang mga bata kon unsay atong mahibaloan niining tawhana pinaagi lamang sa pagtan-aw sa litrato. Unsa ang pipila ka butang nga wala nato mahibaloi mahitungod niya? Nganong ang Ginoo man ang labing maayo nga makahukom niining tawhana? (tan-awa sa 1 Samuel 16:7).

Awhaga ang Pagkat-on diha sa Panimalay

Hangyoa ang mga bata sa pagpili og kalihokan nga inyong gibuhat isip tibuok klase ug sa pagbuhat niini uban sa ilang mga pamilya. Sultihi sila nga sa sunod semana mahimo nilang mapaambit kon unsay ilang gibuhat.

Pagpalambo sa Atong Pagtudlo

Paapila ang mga bata sa mga diskusyon sa ebanghelyo. Kinahanglan tingali nimong maghunahuna og mamugnaon nga mga paagi aron mapaapil ang mas gagmayng mga bata sa mga diskusyon sa ebanghelyo. Usahay mahimo ka nga mobuhat og sama ka yano sa pagdapit sa mga bata nga manglingkod sa salog nga mag-alirong kay sa diha sa ilang mga lingkuranan.