Septyembre 23–29

Mga Taga-Galacia

“Managgawi diha sa Espiritu”

Samtang imong basahon ang Mga Taga-Galacia, unsa ang imong mga impresyon mahitungod sa gikinahanglan nga makat-unan sa mga bata sa imong klase?

Irekord ang Imong mga Impresyon

Awhaga ang Pagpaambit

Hatagi ang mga bata og pipila ka minuto sa pagdrowing og usa ka butang nga ilang nakat-unan gikan sa bag-o lang nga diskusyon sa ebanghelyo diha sa panimalay o sa simbahan. Kolektaha ang mga drowing, ug pasulaya og tag-an ang mga bata kon unsa ang girepresentar sa kada drowing.

Itudlo ang Doktrina

Mas Gagmay nga mga Bata

Mga Taga-Galacia 5:22–23

Ang Espiritu Santo nagtabang kanako nga mobati og gugma, kalipay, ug kalinaw.

Ang gagmay nga mga bata makaila sa bunga sa Espiritu. Mag-andam kini kanila sa pagtinguha sa impluwensya sa Espiritu Santo sa tibuok nilang kinabuhi.

Posible nga mga Kalihokan

• I-display o ipakita ang mga hulagway sa pipila ka mga matang sa bunga, ug hangyoa ang mga bata sa paghulagway kon unsay lami sa matag bunga. Ipasabut nga sama nga ang mga bunga adunay lain-laing mga lami, atong mabati ang Espiritu Santo sa lain-laing mga paagi, sama sa gugma ug kalinaw. Hangyoa sila sa paghulagway kon sa unsang paagi mabati nila ang Espiritu Santo.

  

  Ang mga bata sa tanang edad makasinati sa bunga sa Espiritu.

• Basaha ang Mga Taga-Galacia 5:22–23 uban sa mga bata, ug ipasabut ang mga pulong nga tingali dili sila pamilyar. Dapita ang matag bata sa pagpili og usa ka bunga sa Espiritu nga gihisgutan niini nga mga bersikulo ug sa paghisgot og panahon sa dihang nasinati niya kana nga bunga sa Espiritu. Dapita ang mga bata sa pagdrowing og yano nga mga hulagway sa ilang mga kasinatian.

Mga Taga-Galacia 6:2

Gusto ni Jesukristo nga motabang ako niadtong nanginahanglan.

Ang instruksyon diha sa Mga Taga-Galacia 6:2 susama sa pagtulun-an ni Alma diha sa Mosiah 18:8 ngadto sa mga tawo kinsa hapit na nga bunyagan. Gamita kini nga oportunidad sa pagtabang sa mga bata nga mangandam alang sa mga pakigsaad sa bunyag.

Posible nga mga Kalihokan

• Pagpakita og hulagway sa usa ka bata nga gibunyagan (sama sa Libro sa mga Hulagway sa Ebanghelyo, nu. 104). Pangutan-a ang mga bata kon unsa ang gibuhat sa bata. Ipasabut nga kon kita bunyagan, mohimo kita og mga pakigsaad, o mga saad. Basaha ang Mga Taga-Galacia 6:2 o ang Mosiah 18:8 aron sa pagtabang sa mga bata nga makakat-on sa usa sa mga butang nga misaad kita nga buhaton: makigtambayayong sa alantuson sa usag usa. Dapita ang mga bata sa pagdrowing og mga paagi nga makatabang sila sa uban kinsa nagdala og mga alantuson.

• Basaha ngadto sa mga bata kini nga mga pulong gikan sa Mga Taga-Galacia 6:2: “Magyayongay kamo sa mga kabug-at sa usa ug usa.” Aron sa paghulagway kon unsay gipasabut niini, hatagi ang usa sa mga bata og bug-at nga butang nga bitbiton. Dayon paghangyo og usa ka volunteer [moboluntaryo] nga motabang sa bata sa pagbitbit sa butang. Ipasabut sa mga bata nga daghang mga butang mabati nga sama sa usa ka palas-anon, sama sa pagkasakit o pagbati nga magul-anon o nag-inusara. Unsay atong mabuhat aron sa pagtabang og tawo nga anaa niini nga matang sa palas-anon?

Mga Taga-Galacia 6:7–9

Ang atong mga lihok, maayo ug dautan, adunay mga sangputanan.

Importante nga masabtan sa mga bata nga ang atong mga pagpili adunay mga sangputanan. Mahimo nimong gamiton ang Mga Taga-Galacia 6:7–9 sa paghulagway niini nga kamatuoran.

Posible nga mga Kalihokan

• Pagpakita og usa ka liso ug usa ka utanon. Basaha ang Mga Taga-Galacia 6:7–9 ngadto sa mga bata. Hangyoa ang mga bata nga magpakaaron-ingnon nga nagtanom sa liso kon madungog nila ang pulong nga “pugas.” Hangyoa sila nga magpakaaron-ingnon nga nangutlo og utanon gikan sa usa ka tanom kon madungog nila ang pulong nga “ani.”

• Pakit-a ang mga bata og pipila ka matang sa mga utanon, ug tabangi sila sa pagpangita sa mga liso sa matag usa. Ibutang ang mga liso sa usa ka sudlanan, ug papuli-puliha ang mga bata sa pagpili og usa ug sa pagsulti kon unsa nga utanon ang motubo kon ila kining itanom. Tabangi sila nga makakita nga sama nga ang liso nga atong itanom motino sa utanon nga atong makuha, ang mga pagpili nga atong gihimo motino sa mga sangputanan ug mga panalangin nga atong madawat sa kaulahian.

• Paghimo og linya diha sa salog gamit ang tape. Pagbutang og usa ka malipayon nga nawong ug usa ka subo nga nawong sa isigka tumoy sa linya. Dapita ang usa ka bata sa pagbarug sa tunga-tunga sa linya, ug pasultiha ang ubang mga bata og mga pagpili nga mosangput sa kalipay o kaguol (magkinahanglan tingali nga mohatag ka og pipila ka mga ehemplo). Alang sa matag pagpili, hangyoa ang bata sa tunga sa paglakang paingon sa malipayon nga bahin o sa masulub-on nga bahin. Balika ang kalihokan sa pipila ka higayon, ug papuli-puliha ang ubang mga bata sa pagbarug diha sa tape.

Itudlo ang Doktrina

Mas Dagko nga mga Bata

Mga Taga-Galacia 5:1

Si Jesukristo mihimo kanatong gawasnon.

Ang ubang mga tawo naghunahuna nga ang ebanghelyo ni Jesukristo nagpugong sa ilang kagawasan. Pamalandungi kon unsaon nimo sa pagtabang ang mga bata nga makakita nga naghatag hinoon kini og kalingkawasan gikan sa sala ug kamatayon.

Posible nga mga Kalihokan

• Dapita ang mga bata sa pagbasa sa Mga Taga-Galacia 5:1. Sa unsang mga paagi nga gihimo kitang gawasnon ni Jesukristo aron makabalik kita ngadto sa Langitnong Amahan? Pagpakita og mga hulagway sa pag-antus ni Jesus sa Getsemani ug sa Iyang Pagkabanhaw aron sa pagtabang sa mga bata nga makasabut kon sa unsang paagi si Jesus mipalingkawas kanato gikan sa sala ug kamatayon (tan-awa sa Libro sa mga Hulagway sa Ebanghelyo, nu. 56, 59).

• Kantaha og dungan ug ribyuha ang mga pulong sa kanta mahitungod sa Manluluwas, sama sa “Ako Nasayud Nga ang Akong Manunubos Buhi” (Mga Himno ug mga Awit sa mga Bata, nu. 38). Hangyoa ang mga bata sa pagpangita og mga pulong niini nga awit nga naghulagway sa mga paagi nga si Jesukristo makapalingkawas kanato gikan sa espiritwal nga pagkaulipon.

Mga Taga-Galacia 5:22–23

Kon ako “managgawi diha sa Espiritu,” matagamtam nako ang “bunga sa Espiritu.”

Unsaon nimo pagtabang ang mga bata nga makabantay nga gibati nila ang Espiritu Santo?

Posible nga mga Kalihokan

• Hatagi ang matag bata og usa ka piraso sa papel nga giporma og bunga, ug hangyoa ang mga bata sa pagpangita og usa ka “bunga sa Espiritu” nga gilista diha sa Mga Taga-Galacia 5:22–23. Dapita sila sa pagsulat sa usa sa mga bunga sa pikas bahin sa ilang papel ug usa ka pulong nga nagpasabut sa sukwahi niini diha sa pikas nga bahin. (Tabangi sila nga makasabut sa mga pulong nga dili sila pamilyar.) Dapita sila sa pagpaambit sa ilang mga prutas diha sa klase.

• Dapita ang mga bata sa pagbasa mahitungod sa bunga sa Espiritu diha sa Mga Taga-Galacia 5:22–23 ug sa pagsulat o sa pagdrowing og hulagway sa usa ka panahon dihang ang Espiritu Santo mitabang kanila nga mobati sa usa niadto nga mga bunga. Hangyoa sila sa pagpaambit sa ilang istorya o litrato ngadto sa laing tawo sa klase. Nganong ang bunga usa ka maayong paagi sa pagtabang kanato nga makasabut kon sa unsang paagi ang Espiritu nag-impluwensya kanato?

Mga Taga-Galacia 6:7–9

Ang atong mga lihok, maayo ug dautan, adunay mga sangputanan.

Tabangi ang mga bata nga makasabut nga ang mga sangputanan sa atong kinaiya usahay moabut diha-diha dayon ug usahay moabut “sa nahaigo nga panahon” (bersikulo 9).

Posible nga mga Kalihokan

• Basaha og dungan ang Mga Taga-Galacia 6:7–9. Dapita ang mga bata sa pagdrowing og yano nga mga hulagway diin ang usa ka tawo mitanom og liso sa usa ka bunga ug miani og lahi nga bunga. Nganong imposible man kini? Sa unsang paagi nga ang paghimo og sayop nga mga pagpili ug pagsinati og positibo nga mga sangputanan sama ka imposible?

• Apil ang tibuok klase, paghimo og usa ka maze sama sa usa nga anaa sa pahina sa kalihokan karong semanaha. Dapita ang mga bata sa paghunahuna og uban pa nga mga pulong kay sa niadtong anaa sa maze nga nagrepresentar sa maayong mga pagbati gikan sa Espiritu Santo o ngil-ad nga mga pagpili nga mahimong mobugaw Kaniya palayo. Hisguti ang mga sangputanan sa mga pagpili nga ilang nahunahunaan.

• Dapita ang mga bata sa paglista sa pipila sa mga panalangin nga ilang gilauman nga madawat gikan sa Langitnong Amahan. Tabangi sila sa paghunahuna sa “mga liso” nga kinahanglan nilang ipugas aron “makaani” niini nga mga panalangin.

Awhaga ang Pagkat-on diha sa Panimalay

Dapita ang mga bata sa pagbantay sa maayo nga mga sangputanan, o “bunga,” nga moabut tungod sa maayong mga desisyon nga ilang himoon karong semanaha. Sultihi sila nga sa sunod semana mahimo nilang mapaambit ang ilang mga kasinatian.

Pagpalambo sa Atong Pagtudlo

Ipahaum ang mga kalihokan sa edad sa mga bata. Hatagi ang mga bata og mga oportunidad sa pag-apil, apan hinumdumi nga ang ilang abilidad sa pagbuhat niini magkalahi sumala sa ilang edad ug kahingkod. Ang mas gagmay nga mga bata tingali magkinahanglan og dugang nga giya ug direksyon. Samtang magkahingkod sila, ang mga bata mas daghan na og matampo ug mahimong mas maayo sa pagpaambit sa ilang mga hunahuna. (Tan-awa sa Pagtudlo sumala sa Pamaagi sa Manluluwas, 25–26.)