Ang Maayong Magbalantay, ni Del Parson

Disyembre 9–15

Pinadayag 1–11

“Ang Himaya, ug ang Gahum, [ngadto sa Kordero] sa Kahangturan”

Ang simbolismo diha sa Pinadayag mahimong lisud masabtan sa mga bata, apan ang Pagpadayag naglangkob usab og importante nga doktrina nga maanindot ug yano.

Irekord ang Imong mga Impresyon

Awhaga ang Pagpaambit

Dapita ang mga bata sa pagpaambit unsa kaha ang ilang bation kon makita nila si Jesukristo sa usa ka panan-awon. Ipasabut nga diha sa basahon sa Pinadayag, gihulagway ni Juan ang usa ka panan-awon diin iyang nakita si Jesus ug daghang importante nga mga butang kabahin sa nangagi ug sa umaabut.

Itudlo ang Doktrina

Mas Gagmay nga mga Bata

Pinadayag 3:20

Makadapit ko ni Jesukristo nganhi sa akong kinabuhi.

Ang pasumbingay ni Jesus nga nagbarug sa may pultahan ug nanuktok makatabang sa mga bata sa pagsabut nga gusto Niya nga mapaduol kanila.

Posible nga mga Kalihokan

• Ipakita ang hulagway gikan sa outline niini nga semana sa Dali, Sunod Kanako—Alang sa mga Indibidwal ug mga Pamilya ug basaha ang Pinadayag 3:20. Dapita ang mga bata sa paghanduraw nga si Jesus nanuktok sa pultahan sa ilang mga panimalay. Pasudlon ba nila Siya? Unsay ilang hunahuna nga Iyang isulti o buhaton?

• Dapita ang mga bata sa pagsulti kanimo mahitungod sa mga panahon nga naghulat sila og tawo nga mobisita sa ilang panimalay nga naghinam-hinam sila nga makita. Sama sa unsa man nga maghulat nianang tawhana nga manuktok sa pultahan? Unsa kaha kon dili gayud nila pasudlon ang tawo? Basaha ang Pinadayag 3:20, ug papuli-puliha ang mga bata sa paggunit og hulagway ni Jesus ug sa pagpakaaron-ingnon nga nanuktok sa pultahan. Ang ubang sakop sa klase mahimong magpakaaron-ingnon nga moabli sa pultahan. Unsay atong mabuhat aron tugutan nga mapaduol si Jesus kanato, bisan tuod dili kita makakita Kaniya? Ikonsiderar ang paghatag sa matag bata og hulagway ni Jesus aron madala sa panimalay.

Pinadayag 5:1–10

Si Jesukristo mao lamang ang takus nga mahimo nakong Manluluwas.

Nakat-unan ni Juan gikan sa iyang panan-awon nga si Jesukristo lamang (girepresentaran sa usa ka kordero) ang mahimo natong Manluluwas ug makatuman sa plano sa Amahan (girepresentaran sa tinimrihan nga basahon).

Posible nga mga Kalihokan

• Sa dili pa magklase, pangita og mga hulagway nga nagrepresentar sa mga panalangin nga anaa tungod sa Pag-ula ni Jesukristo (sama sa templo, bunyag, ug mga pamilya), ibutang kini sa usa ka basahon ug pusta sa papel o hilo ang basahon. Gamit ang pipila ka importanting mga pulong gikan sa Pinadayag 5:1–10, ihulagway ang panan-awon nga nakita ni Juan. Ipakita sa mga bata ang basahon, ug sultihi sila nga ang bugtong paagi sa pag-abli sa basahon mao ang pagpangita sa hulagway ni Jesus nga imong gitaguan diha sa kwarto. Kon makit-an nila ang hulagway, ablihi ang basahon ug ipaambit sa mga bata ang mga hulagway diha sa basahon. Pagpamatuod nga ang Manluluwas lamang ang bugtong makahimong posible niadto nga mga butang.

• I-summarize ang panan-awon nga gihulagway diha sa Pinadayag 5:1–10, ug dapita ang mga bata sa pag-aksyon kon unsay gibati ni Juan ug sa uban atol sa lain-laing mga parte sa panan-awon. Pananglitan, mahimo silang magpakaaron-ingnon nga mohilak kon walay makaabli sa basahon, o mahimo silang maglipay sa dihang giablihan kini sa Manluluwas.

Pinadayag 7:9, 13–14

Si Jesukristo nagtabang kanako nga mahimong limpyo gikan sa sala.

Si Juan nakakita sa daghang mga tawo nga nagsul-ob sa tag-as nga bisti nga “gipaputi diha sa dugo sa Kordero” (bersikulo 14). Ikonsiderar kon sa unsang paagi kini nga panan-awon makatabang sa mga bata nga makasabut sa kaimportante nga malimpyuhan gikan sa atong mga sala pinaagi sa Pag-ula ni Jesukristo.

Posible nga mga Kalihokan

• Pakit-a ang mga bata og mga sinina sa bunyag o ubang puti nga mga sinina ug usa ka hulagway ni Jesus. Basaha ang Pinadayag 7:9, 13–14 ngadto sa mga bata, ug hangyoa sila sa pagtudlo ngadto sa litrato ug mga sinina sa matag higayon nga makadungog sila sa pulong puti. Ipasabut nga ang puti nga mga sinina nagrepresentar sa kalimpyo ug nagpahinumdom kanato nga si Jesukristo makahimo kanato nga limpyo gikan sa atong mga sayop.

• Pakit-a ang mga bata og usa ka piraso nga puting panapton, ug pahugawi kini kanila pinaagi sa pagmarka niini gamit ang bolpen o sa pagbutang og hugaw niini. Ipasabut nga ang sala makahimo sa atong mga espiritu nga hugaw. Pagpakita og hulagway ni Jesus diha sa Getsemani (sama sa Libro sa mga Hulagway sa Ebanghelyo, nu. 56), hipusa ang hugaw nga panapton, ug pakit-a sila og limpyo, puting panapton. Pagpamatuod nga pinaagi sa Pag-ula ni Jesukristo, mamahimo kitang limpyo.

• Pagkanta og usa ka awit mahitungod sa bunyag, sama sa “Kon Ako Bunyagan” (Songbook sa mga Bata, 53), ug hisguti kon sa unsang paagi si Jesus nagtabang kanato nga mahimong limpyo sa dihang kita gibunyagan.

Itudlo ang Doktrina

Mas Dagko nga mga Bata

Pinadayag 3:20

Makapili ako nga himoong parte sa akong kinabuhi si Jesukristo.

Sa unsang paagi nimo matabangan ang mga bata nga imong gitudloan nga ablihan ang ilang kasingkasing ug kinabuhi alang sa gahum ug impluwensya ni Jesukristo?

Posible nga mga Kalihokan

• Ipakita ang hulagway gikan sa outline niini nga semana sa Dali, Sunod Kanako—Alang sa mga Indibidwal ug mga Pamilya samtang imong basahon ang Pinadayag 3:20. Aron sa pagtabang nga mahimong makahulugan ang hulagway ngadto kanila, dapita sila nga magpares sa pagtubag sa mga pangutana nga sama niini: Ngano kaha nga si Jesus nanuktok sa pultahan? Nganong wala may ablihanan [doorknob] sa gawas sa pultahan? Unsay buot ipasabut nga pasudlon si Jesus sa atong kinabuhi?

• Hangyoa ang mga bata sa pagsulat diha sa pisara og lain-laing mga paagi sa “pag-abli sa pultahan” alang kang Jesus. Ang pipila ka mga ehemplo mahimong maglakip sa pagserbisyo sa uban, pagbasa sa mga kasulatan, ug pag-ambit sa sakrament.

Pinadayag 5:1–10

Si Jesukristo mao lamang ang takus nga mahimo nakong Manluluwas.

Ang panan-awon nga gihulagway diha sa Pinadayag 5 mitudlo nga si Jesukristo lamang ang takus ug makahimo sa pagpahigayon sa Pag-ula ug sa pagluwas kanato gikan sa sala.

Posible nga mga Kalihokan

• Dapita ang mga bata sa pagsulti mahitungod sa usa ka panahon dihang nagkinahanglan sila og tawo nga mobuhat og butang nga dili nila mahimo sa ilang kaugalingon. Hangyoa sila sa pagbasa sa Pinadayag 5:1–10 ug sa pagpangita sa unsay gikinahanglang buhaton nga usa ka tawo lamang ang bugtong makahimo (ipasabut nga ang Kordero mao si Jesukristo ug ang basahon nagrepresentar sa plano sa Dios). Unsa ang gibuhat ni Jesus alang kanato nga walay laing tawo ang makahimo?

• Hangyoa ang mga bata sa pagpangita og usa ka himno o kanta sa mga bata nga nagpamatuod kabahin ni Jesukristo. Unsa ang gitudlo sa mga pulong sa kanta mahitungod ni Jesukristo? Sa unsang paagi kini nga kanta sama sa himno sa pagdayeg nga gikanta mahitungod ni Jesukristo diha sa Pinadayag 5:9–10?

Pinadayag 9:1–2

Ang ebanghelyo makatabang kanako sa pagbuntog sa tintasyon.

Ang aso nga nagpangitngit sa kahanginan diha sa Pinadayag 9:2 makumpara sa mga tintasyon (tan-awa sa 1 Nephi 12:17).

Posible nga mga Kalihokan

• Pagdrowing og mga hulagway sa adlaw ug ngitngit nga panganod, ug guntinga kini. Dapita ang mga bata sa pagbasa sa Pinadayag 9:2 ug 1 Nephi 12:17 ug isulat diha sa ngitngit nga panganod kon unsa ang girepresentaran sa aso o gabon dinhi niini nga mga bersikulo. Ibutang ang ngitngit nga panganod diha sa pisara, ug dapita ang mga bata sa paghimo og lista sa mga tintasyon nga giatubangan sa mga bata nga ilang kaedad. Dayon ibutang ang adlaw diha sa pisara ug hangyoa sila sa paghimo og lista sa mga himan nga gihatag sa Langitnong Amahan kanato aron sa pagbuntog sa kangitngit sa kalibutan.

• Sa unsang paagi ang mga bata makatabang sa uban kinsa anaa sa espiritwal nga kangitngit? Aron sa pagtabang kanila nga maghunahuna niini nga pangutana, dapita ang mga bata sa paghisgut kon unsaon nila sa pagtabang ang uban kinsa anaa sa espiritwal nga kangitngit.

Awhaga ang Pagkat-on diha sa Panimalay

Dapita ang mga bata sa pagpaambit sa ilang mga pamilya sa mga paagi nga makadapit sila sa impluwensya sa Manluluwas diha sa ilang mga panimalay.

Pagpalambo sa Atong Pagtudlo

I-awhag ang balaang pagtahud. Usa ka importante nga aspeto sa balaang pagtahud mao ang paghunahuna mahitungod sa Langitnong Amahan ug ni Jesukristo. Mahimo nimong pahinumduman ang mga bata nga magbaton og balaang pagtahud pinaagi sa hinay nga pagkanta o paglaylay og usa ka awit o sa pag-display og hulagway ni Jesus.