Luwas diha sa Kwadra, ni Dan Burr

Disyembre 16–22

Pasko

“Maayong Balita sa Dakong Kalipay”

Kini nga leksyon usa ka oportunidad sa pagtabang sa mga bata nga imong gitudloan sa pagsaulog sa pagkatawo, kinabuhi, ug misyon sa Manluluwas panahon sa Pasko. Hinumdumi kini samtang mangandam ka sa pagtudlo.

Irekord ang Imong mga Impresyon

Awhaga ang Pagpaambit

Ipakita ang hulagway diha sa outline niini nga semana sa Dali, Sunod Kanako—Alang sa mga Indibidwal ug mga Pamilya, ug dapita ang mga bata sa pagpaambit sa unsay ilang nahibaloan mahitungod sa pagkatawo sa Manluluwas.

Itudlo ang Doktrina

Mas Gagmay nga mga Bata

Mateo 2:1–12; Lucas 2:1–14

Si Jesukristo mianhi sa yuta isip usa ka masuso.

Ang istorya sa pagkahimugso ni Jesukristo makadani sa mga bata. Unsa nga mga kamatuoran sa doktrina ang imong nakita niini nga istorya nga gibati nimo nga angayang masabtan sa mga bata?

Posible nga mga Kalihokan

• Basaha ang Lucas 2:1–14 ngadto sa mga bata, o ihulagway ang mga panghitabo niini nga mga bersikulo pinaagi sa paggamit sa “Kapitulo 5: Jesukristo Natawo,” Mga Istorya sa Bag-ong Tugon, 13–15. Dapita ang mga bata sa pagdrowing og mga hulagway niini nga mga hitabo ug sa paggamit sa mga hulagway aron sa pagsaysay sa istorya sa ilang kaugalingon. Nganong malipayon kamo nga si Jesus mianhi sa yuta isip usa ka masuso?

• Hangyoa ang mga bata sa pagsaysay kanimo sa istorya sa Mga Mago [Maalamon nga mga Tawo] nga misunod sa bitoon aron sa pagpangita kang Jesus. Kon kinahanglan silang pahinumduman sa istorya, tan-awa ang Mateo 2:1–12 o ang “Kapitulo 7: Ang Maalamon nga mga Tawo,” Mga Istorya sa Bag-ong Tugon, 18. Pagtago og usa ka hulagway ni Jesus diha sa kwarto. Pagdrowing o paggunting og usa ka bitoon nga papel ug kupti kini pataas. Dapita ang mga bata nga magpakaaron-ingnon nga mao ang maalamon nga mga tawo nga nagdala og mga gasa, ug giyahi sila libut sa kwarto aron sa pagpangita kang Jesus. Unsa ang pipila ka mga gasa nga atong ikahatag kang Jesus sa atong kinabuhi karon?

• Pagkanta og pipila ka mga awit sa Pasko uban sa mga bata, sama sa “Mahilum nga Gabii” (Mga Himno ug mga Awit sa mga Bata, nu. 53) o “Kabitoonan Misanag,” “Didto sa Pasungan,” ug “Hilum na Anak Ko” (Songbook sa mga Bata, 24, 26–27, 30–31).

Juan 3:16

Gihimong posible ni Jesukristo nga makapuyo ako pag-usab uban sa akong Langitnong Amahan sa umaabut.

Nakasabut ba ang mga bata nga imong gitudloan nganong mianhi si Jesukristo sa yuta? Paggahin og panahon sa pagpamalandong kon unsay nabuhat sa Manluluwas alang kanimo sa personal nga paagi ug unsaon nimo pagtabang ang mga bata nga makasabut kon unsay Iyang nabuhat alang kanila.

Posible nga mga Kalihokan

• Pagdala sa klase og pinutos nga regalo nga dunay litrato ni Jesukristo sa sulod. Butangi og tag ang gasa nga adunay “Juan 3:16” nga nakasulat niini, ug sultihi ang mga bata nga usa kini ka timailhan kon unsa ang gasa. Basaha ang Juan 3:16 uban sa mga bata, ug dapita sila sa pagtag-an kon unsa ang gasa ug ablihi kini. Nganong gipadala sa Dios kanato ang Iyang Anak?

• Pagpili og mga hulagway gikan sa Libro sa mga Hulagway sa Ebanghelyo (sama sa nu. 1, 30, 35–66, 84) nga naghulagway sa pipila ka mga paagi nga si Jesus mipanalangin sa ubang mga tawo samtang nagpuyo Siya sa yuta. Paguniti sa mga bata ang mga hulagway samtang imong isaysay ang mga istorya. Mahimo kang mopili og mga hulagway nga motakdo sa mga pulong sa “Mipadala sa Bugtong Anak” ug “Suginli Ko sa mga Kaagi ni Jesus” (Songbook sa mga Bata, 20–21, 36) ug ipaisa sa mga bata ang mga hulagway samtang manganta sila niini nga mga kanta.

• Dapita ang mga bata sa pagpaambit sa ilang paborito nga mga istorya mahitungod ni Jesus. Human masaysay ang matag istorya, tabangi ang mga bata sa paghuman niini nga sentence: “Si Jesukristo mianhi sa yuta aron .” Dayon pagpakita og mga hulagway nga may kalabutan sa maulaong sakripisyo, kamatayon, ug Pagkabanhaw sa Manluluwas (tan-awa sa Libro sa mga Hulagway sa Ebanghelyo, nu. 56, 57, 58, 59) ug isaysay sa daklit kini nga mga panghitabo. Ihatag ang imong pagpamatuod nga si Jesukristo mianhi sa yuta aron mamatay alang kanato ug mabanhaw aron kita makabalik sa Langitnong Amahan.

  

  Getsemani, ni J. Kirk Richards

Itudlo ang Doktrina

Mas Dagko nga mga Bata

Mateo 1:18–25; 2:1–12; Lucas 1:26–38; 2:1–20

Si Jesukristo mianhi sa yuta isip usa ka masuso.

Unsaon nimo pagtabang ang mga bata nga makatutok kang Jesukristo panahon sa Pasko?

Posible nga mga Kalihokan

• Dapita ang usa sa mga bata sa pagbasa mahitungod sa mga panghitabo kalabut sa pagkahimugso sa Manluluwas diha sa Mateo 1:18–25; 2:1–12; Lucas 1:26–38; 2:1–20. Hangyoa ang ubang mga bata nga magpuli-puli sa pagdrowing og mga hulagway diha sa pisara sa unsay gihulagway sa mga kasulatan. Unsa ang gitudlo niini nga mga bersikulo kanato mahitungod ni Jesukristo?

• Hangyoa ang mga bata sa pagsulat og mga butang nga ilang mahimo nga makatabang kanila sa pagtutok kang Jesukristo panahon sa Pasko. Dapita sila sa pagpaambit sa unsay ilang gisulat.

• Dapita ang mga bata sa pagsulat diha sa pipila ka piraso nga papel sa mga butang nga ilang mahimo nga makatabang kanila nga nakatutok sa Manluluwas panahon sa Pasko. Ibutang ang ilang mga papel diha sa bag o laing sudlanan aron madala sa mga bata sa pag-uli. Ang pipila ka mga ideya mahimong maglakip sa pagbasa sa mga kasulatan, pagkanta og mga himno sa Pasko, ug paghimo og sinsero nga mga buhat sa gugma.

• Pagkanta og mga awit sa Pasko mahitungod sa Manluluwas (tan-awa ang Songbook sa mga Bata, 22–32 ), ug dapita ang mga bata sa pagpaambit og paborito nga linya o hugpong sa mga pulong gikan sa mga kanta.

Juan 3:16

Gihimong posible ni Jesukristo nga makapuyo ako pag-usab uban sa akong Langitnong Amahan sa umaabut.

Unsaon nimo pagtabang ang mga bata sa pagribyu sa unsay ilang nakat-unan niining tuiga ug sa pagsabut nganong nagkinahanglan sila ni Jesukristo diha sa ilang kinabuhi?

Posible nga mga Kalihokan

• Sulati ang duha ka piraso sa papel og Kinsa si Jesukristo? ug Nganong mianhi Siya sa yuta? ug ipapilit kini sa managlahing bong-bong sa klasehanan. Dapita ang matag bata sa pagbasa og usa sa mosunod nga mga kasulatan: Mateo 16:15–16; Juan 3:16; 1 Nephi 10:4; Mosiah 3:8; Alma 7:10–13; 3 Nephi 27:14–15. Hangyoa sila sa pagpangita og mga tubag diha sa mga kasulatan nga ilang basahon sa duha ka pangutana diha sa mga bong-bong. Dapita sila sa pagsulat sa ilang mga tubag sa mga piraso sa papel ug ipapilit kini sa bong-bong tupad sa tukma nga pangutana. Unsaon man nato sa pagpakita sa atong pasalamat alang sa nahimo ni Jesukristo kanato?

• Dapita ang mga bata sa paglista diha sa pisara sa tanang ngalan o titulo ni Jesus nga ilang mahunahunaan (tan-awa sa Giya ngadto sa mga Kasulatan, “Jesukristo”). Unsa ang gitudlo niini nga mga ngalan kanato mahitungod ni Jesukristo ug sa Iyang misyon? Nganong gikinahanglan man nato si Jesukristo sa atong kinabuhi?

Awhaga ang Pagkat-on diha sa Panimalay

Awhaga ang mga bata sa pagpangita og labing minos usa ka paagi sa pagserbisyo sa laing tawo o mas magpaduol kang Jesukristo niini nga Pasko.

Pagpalambo sa Atong Pagtudlo

Ang mga bata ganahan nga mopaambit sa unsay ilang nakat-unan. Bisan ang gagmay nga mga bata makapalig-on sa mga sakop sa ilang pamilya. Awhaga ang mga bata nga imong gitudloan sa pagpaambit ngadto sa ilang mga pamilya og usa ka butang nga ilang nakat-unan sa Primary. (Tan-awa sa Pagtudlo sumala sa Pamaagi sa Manluluwas, 30)