Ikaw Usa ka Magtutudlo sa mga Bata

Gitawag ka sa Dios sa pagtudlo sa Iyang mga anak sumala sa pamaagi sa Manluluwas. Ikaw gi-set apart ngadto niini nga calling pinaagi sa awtoridad sa Iyang balaan nga priesthood. Bisan kon dili ka sinati nga magtutudlo, samtang magpuyo ka nga takus, mag-ampo matag adlaw, ug magtuon sa mga kasulatan, ang Dios mohatag kanimo sa impluwensya ug gahum sa Espiritu Santo (tan-awa sa 2 Nephi 33:1).

Kadtong gisalig sa imong pag-atiman mao ang mga anak sa Langitnong Amahan, ug nasayud Siya kon unsay ilang gikinahanglan ug unsaon sa pagtabang nila sa labing maayong paagi. Pinaagi sa Espiritu Santo, ang Dios mogiya kanimo panahon sa imong pagpangandam ug samtang magtudlo ka. Iyang ipadayag kanimo kon unsa ang kinahanglan nimong isulti ug unsay kinahanglan nimong buhaton.

Sa tanang aspeto sa ilang mga kinabuhi, kining bililhon nga mga bata kanunay nga nagkat-on og impormasyon, naghulma ug naghashas sa ilang mga opinyon, ug naghimo ug nagpaambit sa ilang mga nadiskubrihan. Labi kining tinuod diha sa ebanghelyo, tungod kay ang mga bata andam ug naghinam-hinam nga makakat-on sa yano nga mga kamatuoran niini. Ang ilang pagtuo sa espiritwal nga mga butang lig-on ug putli, ug nagkat-on sila sa matag higayon. Andam silang molihok sumala sa unsay ilang nakat-unan, bisan kon ang ilang panabut dili pa kompleto. Kinahanglan nga ingon niini ang pagdawat natong tanan sa ebanghelyo. Sama sa gitudlo sa Manluluwas: “Bisan kinsa nga dili modawat sa gingharian sa Dios maingon sa dinawatan sa gamayng bata, siya dili makasulod niini” (Lucas 18:17).

Ang calling sa pagtudlo sa mga bata usa ka sagrado nga pagsalig. Normal lamang nga mobati nga mabug-atan usahay. Apan hinumdumi nga ang imong Langitnong Amahan mitawag kanimo, ug dili gayud Siya mosalikway kanimo. Kini ang buhat sa Ginoo, ug samtang ikaw moserbisyo “sa tibuok [nimo] nga kasingkasing, gahum, hunahuna ug kusog” (DP 4:2), Iyang padak-an ang imong kapasidad, mga gasa, ug mga talento, ug ang imong pagserbisyo mopanalangin sa kinabuhi sa mga bata nga imong gitudloan.