26 ni Tiseba–1 ni Janueri

Sa Noda iTavi Meda Vakavulici Keda Ga

Ni o wilika na ivolanikalou ena ituvatuva oqo, vola na veivakauqeti vakayalo o ciqoma. O na raica ni ituvatuva yadua ena ivolavakarau oqo e tiko kina na itaviqaravi baleti ira na gone sobu kei na qase cake, ia e rawa ni o moica e dua ga na itaviqaravi e rawa me baleta nomu kalasi.

Sureta na Veiwasei

Ena itekivu ni veikalasi yadua, solia na madigi vei ira na gone me ra wasea na veika era sa vulica tiko me baleta na kosipeli. Me ivakaraitaki, ena macawa oqo e rawa ni o sureti ira me ra wasea nodra italanoa taleitaki baleti Jisu Karisito.

Vakavulica na iVunau: Gone Sobu

E vinakati au o Jisu Karisito meu muri Koya.

Ena yabaki oqo o na wilika vata kei ira na gone e levu na italanoa mai na bula nei Jisu Karisito. Vukei ira na gone me ra kila na vuna eda vulica tiko kina na italanoa eso oqo baleta me da muria vakavinaka cake kina na ivakaraitaki uasivi i Jisu Karisito.

iTaviqaravi e Rawa ni Caka

• Tukuna vei ira na gone me baleta na veisureti ni iVakabula, “Muri au,” e kunei ena Maciu 4:18–22. Cakava e dua na qito, me kitaka kina e dua na gone e dua na ivukivuki ka qai tukuna vei ira na vo ni gone, “Muri au.” Sureti ira na vo ni gone me ra cakava talega na ivukivuki vata oya.

• Vakaraitaka na iyaloyalo ni tamata era muria tiko na iVakabula ena sala duidui eso, ena Nona a veiqaravi voli e vuravura kei na noda gauna oqo. E rawa ni o kunea na iyaloyalo eso ena iVola ni iYaloyalo Vakosipeli se ena mekesini ni Lotu. E rawa talega ni o vakaraitaka na vidio “Light the World” (ChurchofJesusChrist.org). Me ra raica na gone na ivakarau era muria tiko kina na iVakabula ko ira na tamata.

• Vukei ira na gone me ra vakasamataka eso na ka era sa cakava tiko me ra muria na iVakabula. Na lagati ni “Meu na Vaqara na Turaga” (iVolanisere ni Gonelalai,, 67) ena rawa ni solia vei ira eso na vakasama. Me ra droinitaka eso na kedra iyaloyalo ni ra cakava tiko na veika oqo.

E rawa ni ra rawata na gone na nodra ivakadinadina vakai ira ena dina ni ivolanikalou.

E dina na ivolanikalou.

E rawa ni ra rawata na gone e dua na ivakadinadina ni dina na ivolanikalou ni se bera sara mada ga ni ra wilika rawa. Ni o vulica vata kei ira na gone na ivolanikalou ena yabaki oqo, e rawa ni o vukei ira me ra kila vakataki ira ni dina na ivolanikalou.

iTaviqaravi e Rawa ni Caka

• Sureti ira na gone me ra tukuna na isolisoli taleitaki era sa ciqoma ena nodra siganisucu se ena so tale na gauna. Kauta mai e dua na ilavelave ni ivolanikalou olo-vakailoloma, me dolava e dua na gone, ka vakadinadinataka ni ivolanikalou era sa iloloma vei keda mai vei Tamada Vakalomalagi.

• Vakaraitaka vei ira na gone eso na ivola e tu kina eso na italanoa buli, ka taroga vei ira baleta nodra italanoa taleitaki. Vakaraitaka vei ira na ivolanikalou, ka vakadinadinataka ni ivolanikalou era tu kina na vosa ni Kalou me baleti keda. Era tukuni ira na tamata era a bula dina tu kei na veika a yaco dina.

• Wasea na itukutuku e kunei ena 2 Timoci 3:15 kei na Moronai 10:3–5, ka vukei ira na gone me ra tokaruataka e vica na qaqana. Vukei ira me ra kila ni ra rawa ni kila vakataki ira ni dina na ivolanikalou.

• Vunia e dua na iyaloyalo ni iVakabula, ka solia vei ira na gone eso na ivakatakilakila me vukea nodra kunea. Vukei ira na gone me ra kila na ivakarau ena vukei keda kina na vakasaqaqara ena ivolanikalou me da kilai Jisu Karisito. Me ra veivukevuke na gone ena vunitaki ni iyaloyalo kei na soli ivakatakilakila vei ira eso tale na gone.

• Lagata vata e dua na sere me baleta na vulici ni kosipeli, me vaka na “Vaqara ka Masu” (iVolanisere ni Gonelalai, 66), ka vukei ira na gone me ra matanataka me salavata kei na qaqana. Wasea vata kei ira na gone e dua se rua na nomu ivolanikalou taleitaki, ka tukuna vei ira na sala a yaco kina mo kila ni dina na ivolanikalou. Kevaka e tiko na nodra tikina se italanoa ni ivolanikalou taleitaki na gone, sureti ira me ra wasea.

Vakavulica na iVunau: Gone Qase Cake

E vinakata o Jisu Karisito meu vulica me baleti Koya ka muri Koya.

Vakasamataka na sala sa yaco kina mo kilai Jisu Karisito. Na cava e rawa ni o cakava mo vukei ira na gone me ra vulica baleti Koya ka muri Koya?

iTaviqaravi e Rawa ni Caka

• Sureti ira na gone me ra tukuna baleta e dua na nodra itokani voleka era kila ka vakamacalataka na sala a yaco kina me nodra itokani. Wilika ka veivosakitaka na Joni 5:39 kei na Joni 14:15 mo kunea na sala eda rawa ni voleka kina vei Jisu. Kerei ira na gone me ra wasea na gauna era vakila kina ni ra a voleka Vua.

• Kauta nomu kalasi ka taubale wavokita na valenilotu. Sureti ira na gone me ra lave liga ni ra raica e dua na ka ena nodra lako tiko ka vakananuma vei ira e dua na sala e rawa ni ra muria kina na iVakabula (me vaka na tobu ni papitaiso se dua na iyaloyalo).

• Lagata vata kei ira na gone e dua na sere me baleta na muri Jisu Karisito, me vaka na “Muri Au Mai” (Sere ni Lotu, naba 63). Sureti ira na gone me ra wasea na veigauna eso era muria kina na ivakaraitaki ni iVakabula.

Au rawa ni vulica na ivolanikalou me baleti au ga.

Ni o wilika na ivolanikalou kei ira na gone ka vakatarogi ira, e rawa ni o vakayaloqaqataki ira ni rawa ni ra vuli mai na ivolanikalou ka kunea kina na iyautalei ni kilaka.

iTaviqaravi e Rawa ni Caka

• Wilika vata na Joni 5:39 kei na Cakacaka 17:10–11, ka tarogi ira na gone na cava era sa vulica me baleta na ivakarau ni kena vulici na ivolanikalou.

• Digitaka e vica na ivolanikalou rawarawa ka mana mai na Veiyalayalati Vou, volai ira yadua ena vei tikinipepa, ka vunitaki ira. Cakava na ivakatakilakila eso ena muataki ira na gone ena dua na “vaqaqara iyautalei” ena loma ni valenivuli se valenilotu me ra kunea na ivolanikalou eso oqori. Ni ra sa kunea na ivolanikalou yadua, veivosakitaka na kena ibalebale kei na vuna e sa rui iyautalei kina.

• Wasea e vica na ivolanikalou e iyautalei vei iko ka vakamacalataka na vuna era sa rui vakaibalebale kina vei iko. Va‑kalasi, maroroya toka e dua na lisi ni ivolanikalou iyautalei era kunea na gone ena Veiyalayalati Vou ena yabaki oqo—mai vale se ena Lalai.

• Veivosakitaka kei ira na gone na vuna e dau dredre kina ena so na gauna me da wilika na ivolanikalou. Kerei ira na gone me ra veivakasalataki vakai ira me baleta na vuli ivolanikalou. Kerei ira talega me ra wasea na veika vinaka era sa sotava ena ivolanikalou.

• Vukei ira na gone me ra cakava na ivolanivula rawarawa e rawa ni ra vakayagataka me makataki kina na wasoma ni nodra wilika na ivolanikalou. Na ivolanivula oqo e rawa ni vakananuma vei ira me ra dau wili ivolanikalou e veisiga.

Au gadreva na noqu ivakadinadina vakataki au.

Era na gadreva na gone o vakavulica na nodra dui ivakadinadina me baleta na Tamada Vakalomalagi kei Jisu Karisito. Na cava e rawa ni o cakava mo vakauqeti ira kina me ra vulica vakataki ira na dina?

iTaviqaravi e Rawa ni Caka

• Wasea na italanoa ni goneyalewa le tini (raica na Maciu 25:1–13; raica talega na “Wase e 47: Goneyalewa e Lewe Tini,” e Na iTukuni ena Veiyalayalati Vou, 118–20, se na kena vidio ena ChurchofJesusChrist.org). Tarogi ira na gone vakaoqo: E tautauvata vakacava kei na cina vakawaiwai na noda ivakadinadina? Na cava e bibi kina me tu na noda ivakadinadina?

• Veivosakitaka na cava eda rawa ni cakava me vaqaqacotaki kina na noda ivakadinadina. Me baleta na vakasama eso, sureti ira na gone me ra vaqaqara ena Joni 7:17 kei na Moronai 10:3–5. Sureti ira me ra wasea na veika era kila ni dina.

• Kerei ira na gone me ra vukei iko mo vakayacana na buloko ni tarai cake ni dina eso e bulia na noda ivakadinadina (raica na iUlutaga Vakosipeli, “iVakadinadina,” topics.ChurchofJesusChrist.org). Me ra vakayagataka na gone na buloko me tara e dua na vale ka matataka e dua na ivakadinadina.

Vakauqeta na Vuli e Vale

E rawa vakacava ni o vakauqeti ira na gone kei na nodra itubutubu me ra vulica na Veiyalayalati Vou e vale? Me ivakaraitaki, e rawa ni o sureti ira na gone me ra cavuqaqataka e dua na ivolanikalou o ni sa veivosakitaka ena kalasi (ena veivuke beka me vidai na ivolanikalou ki na veimalanivosa leleka) ka wasea na tikina oqori ki na matavuvale.

Vakatoroicaketaki Ni Noda Veivakavulici

Moica na itaviqaravi me ganita nodra yabaki kei na rawaka na gone o vakavulica. O ira na gone sobu era gadreva na ivakamacala matailalai ka dau vuli mai na iwalewale duidui ni veivakavulici. Ni ra sa matua na gone, sa rawa ni ra cau vakalevu cake ka rawa ni vinaka sara ni wasea nodra vakasama. Solia vei ira na madigi me ra veiwasei, soli ivakadinadina, ka vakaitavi. Vakarautaka na veivuke ke gadrevi. (Raica na Veivakavulici ena iVakarau ni iVakabula, 25–26.)