Pebrero 27–Marso 5

Mateo 8; Marcos 2–4; Lucas 7

“Ang Imong Pagtuo Nagluwas Kanimo”

Samtang basahon nimo ang Mateo 8; Marcos 2–4; ug Lucas 7 niini nga semana, hunahunaa ang mga bata nga imong gitudloan. Pag-ampo nga ang Espiritu Santo modasig kanimo og mga ideya nga makatabang kanila nga makadiskobre sa mga kamatuoran niini nga mga kapitulo.

Dapita ang Pagpaambit

Hangyoa ang mga bata sa pagpaambit og istorya ni Jesus nga nagpahigayon og milagro (tan-awa ang lista sa mga milagro diha sa latid niini nga semana diha sa Dali, Sunod Kanako—Alang sa mga Indibidwal ug mga Pamilya). Makapakita usab ka og may kalabotan nga mga hulagway (sama sa Libro sa mga Hulagway sa Ebanghelyo, nu. 40).

Itudlo ang Doktrina: Mas Gagmay nga mga Bata

Mateo 8; Marcos 2–3; Lucas 7

Si Jesus adunay gahom sa paghimo og mga milagro.

Samtang magbasa ka mahitungod sa mga milagro sa Manluluwas bahin sa pag-ayo, pamalandongi unsa nga mga milagro ang ipaambit. Unsaon nimo pagtabang ang mga bata nga imong gitudloan nga makasabot sa tahas sa hugot nga pagtuo diha sa mga milagro nga gihimo ni Jesus?

Posible nga mga Kalihokan

• Ipaambit ang istorya sa tawo nga paralitiko gikan sa Marcos 2:1–12. Alang sa tabang, tan-awa ang “Kapitulo 23: Ang Tawo nga Dili Makalakaw” (diha sa Mga Istorya sa Bag-ong Tugon, 57–58). Ipasabot sa mga bata nga dili makalakaw ang tawo nga paralitiko. Tabangi sila nga makasabot nga kini nga tawo giayo sa Manluluwas.

• Dapita ang mga bata sa paghisgot og higayon sa dihang nasakit sila. Isaysay ang usa sa mga istorya ni Jesus nga miayo sa masakiton, sama sa Mateo 8:1–4, 5–13, 14–15; Marcos 3: 1–5; Lucas 7:11–16. Dapita ang mga bata sa pagsaysay og usab sa istorya gamit ang ilang kaugalingon nga mga pulong. Pagpamatuod nga ang gahom ni Jesus makaayo, makapanalangin, ug makahupay kanato.

Mateo 8; Marcos 2–3; Lucas 7

Makapakita ako og gugma sa uban sama sa gibuhat ni Jesus.

Mipakita si Jesus og dakong gugma pinaagi sa pag-ayo sa mga masakiton ug may balatian. Pamalandongi kon unsaon nimo sa pagtudlo ang mga bata aron makapakita og pagkamabination ngadto sa mga tawo nga nanginahanglan.

Posible nga mga Kalihokan

• Pagpili og usa o dugang pa nga mga istorya ni Jesus nga nagpakita og gugma ngadto sa usa ka tawo nga nanginahanglan, sama niadtong anaa sa Mateo 8:1–4, 5–13, 14–15; Marcos 2:1–12; 3:1–5; Lucas 7:11–16. Pagpaambit og usa ka higayon sa dihang adunay tawo nga nagpakita og gugma alang kanimo atol sa panahon sa panginahanglan ug unsa ang imong gibati. Dapita ang mga bata sa pagpaambit sa ilang mga kasinatian.

• Kantaha ang usa ka awit mahitungod sa pagpakita og gugma ug pagkamabination ngadto sa uban, sama sa “Pagkamabination Magsugod Kanako” (Songbook sa mga Bata, 83).

From Fear to Faith [Gikan sa Kahadlok ngadto sa Hugot nga Pagtuo], ni Howard Lyon

Marcos 4:35–41

Kon mahadlok ako o anaa sa peligro, si Jesus makatabang kanako nga mobati og kalinaw.

Ang istorya ni Jesus nga nagpahunong sa unos makatabang sa mga bata nga masayod nga makahatag Siya kanila og kalinaw kon mobati sila og kahadlok.

Posible nga mga Kalihokan

• Tabangi ang mga bata nga maghanduraw nga anaa sila sa sakayan samtang imong basahon ang Marcos 4:35–41. (Tan-awa usab sa “Kapitulo 21: [Si] Jesus Mimando sa mga Hangin ug sa mga Bal[o]d,” diha sa Mga Istorya sa Bag-ong Tugon, 53.) Hangyoa ang mga bata sa paghulagway kon unsa kaha ang ilang gibati kon didto pa sila. Kanus-a man nahadlok ang mga bata? Giunsa nila pagkakita og kahupayan?

• Dapita ang mga bata sa paghimo sa mga tingog sa unos ug sa paghunong kon adunay moingon og “[Kalinaw, hunong.]” Pagpamatuod nga sama nga si Jesus makahatag kanato og kalinaw kon adunay unos sa gawas, Siya makahatag kanato og kalinaw sa atong mga kasingkasing kon dili maayo ang atong gibati.

• Tudloi ang mga bata og mga aksiyon nga mosabay sa ikatulo nga bersikulo sa “Suginli Ko sa mga Kaagi ni Jesus” (Songbook sa mga Bata, 36), ug kantaha og dungan ang bersikulo samtang buhaton ang mga aksiyon.

Itudlo ang Doktrina: Mas Magulang nga mga Bata

Mateo 8; Marcos 2–3; Lucas 7

Si Jesus makahimo og mga milagro sa akong kinabuhi kon ako adunay hugot nga pagtuo diha Kaniya.

Si Jesus mihimo og daghang milagro atol sa Iyang mortal nga pangalagad. Unsaon nimo pagtabang ang mga bata nga makaamgo nga ang mga milagro mahitabo karon?

Posible nga mga Kalihokan

• Hangyoa ang mga bata sa pagpili og usa sa mosunod nga mga milagro aron basahon ug drowingon: Mateo 8:1–4, 5–13, 14–15; Marcos 2:1–12; 3:1–5; Lucas 7:11–16. Dapita ang mga bata sa pagpasabot sa ilang mga drowing ngadto sa klase. Unsay atong makat-onan mahitungod ni Jesus gikan niini nga mga istorya?

• Hangyoa ang mga bata nga i-aksiyon ang ilang bation kon sila masakit, maguol, mahadlok, o mabalaka. Sa unsang paagi makatabang si Jesus kanato kon aduna kita niini nga mga pagbati? Pagpamatuod nga si Jesus makatabang sa mga bata sa tanan niini nga mga sitwasyon.

• Dapita ang mga bata sa pagpaambit og mga kasinatian sa dihang sila o ang ilang kaila nakadawat og panalangin sa pagkapari. Sa unsang paagi kana nga tawo naayo o napanalanginan?

Marcos 2:15–17; Lucas 7:36–50

Si Jesus nahigugma kanato bisan kon kita makasala ug gustong motabang kanato nga maghinulsol.

Ang mga istorya diha sa Marcos 2:15–17 ug Lucas 7:36–50 makatabang sa mga bata nga makasabot nga si Jesukristo nahigugma kanato bisan kon kita makasala. Gusto Siya nga motabang kanato nga maghinulsol ug magpaduol Kaniya.

Posible nga mga Kalihokan

• Isulat sa pisara ang Unsa ang bation ni Jesus mahitungod sa sala? ug Unsa ang bation ni Jesus kanato kon makasala kita?. Hangyoa ang mga bata sa paghunahuna mahitungod niini nga mga pangutana samtang basahon nila og dungan ang Marcos 2:15–17 ug dayon sa pagpaambit sa ilang mga tubag. (Mahimo ninyong basahon og dungan ang “Publikano” diha sa Giya ngadto sa mga Kasulatan [scriptures.ChurchofJesusChrist.org].) Nganong importante nga mahibalo nga si Jesus nahigugma kanato, bisan kon kita dili hingpit? Sa unsang paagi nga ang pagkahibalo niini makatabang kanato kon gikinahanglan nato nga maghinulsol?

• Pipila ka adlaw sa dili pa ang klase, dapita ang usa sa mga bata ug usa ka sakop sa pamilya nga motambong sa klase nga andam sa pagpaambit sa istorya sa Lucas 7:36–50. Mahimo silang magdrowing og mga hulagway nga nagpakita sa mga bahin sa istorya aron ipakita sa klase. Hisgoti uban sa mga bata kon unsa kaha ang gusto sa Ginoo nga makat-onan nato gikan niini nga istorya.

Marcos 4:35–41

Kon mahadlok ako o anaa sa peligro, si Jesus makatabang kanako nga mobati og kalinaw.

Ang mga bata kinahanglang masayod nga ang Manluluwas makahatag kanila og kalinaw kon mag-atubang sila sa mga kalisod sa kinabuhi—karon ug sa umaabot.

Posible nga mga Kalihokan

• Hangyoa ang usa sa mga bata sa paggamit sa Marcos 4:35–41 ug sa hulagway nga [Si] Jesus Mibadlong sa Unos (Libro sa mga Hulagway sa Ebanghelyo, nu. 40) aron sa pagsugilon sa istorya ni Jesus nga mipahunong sa unos. Hangyoa ang mga bata sa paghulagway kon unsa kaha ang ilang gibati kon didto pa sila.

• Dapita ang mga bata sa pagpaambit og mga kasinatian sa dihang mibati sila og kalinaw human mag-ampo alang sa tabang. Pahinumdomi sila nga kini nga kalinaw naggikan sa Manluluwas.

• Hatagi ang matag bata og papel nga giporma og dag-om nga panganod, ug hangyoa sila sa pagsulat diha niini og usa ka pagsulay nga tingali nasinati sa usa ka tawo. Ibutang ang tanang panganod diha sa pisara, nga nagtabon sa hulagway sa Manluluwas. Dapita ang usa ka bata sa pagtangtang sa usa sa mga panganod ug pagsugyot og mga paagi nga makatabang kita og tawo nga aduna niana nga pagsulay aron makakaplag og kalinaw. Kon ang tanan nga panganod natangtang na, pagpamatuod sa gahom sa Manluluwas sa pagpakalma sa mga unos sa atong kinabuhi.

Awhaga ang Pagkat-on diha sa Panimalay

Tabangi ang mga bata sa pagsulat og usa ka buhat sa serbisyo nga ilang buhaton alang sa usa ka tawo karong semanaha.

Pagpalambo sa Atong Pagtudlo

Ang mga bata lihokan [active]. Usahay mahimong bation nimo nga ang enerhiya sa mga bata makabalda sa pagkat-on. Apan magamit nimo ang ilang aktibo nga mga kinaiya pinaagi sa pagdapit kanila sa pagdrama-drama sa usa ka istorya o sa paghimo og mga aksiyon nga mobagay sa mga panghitabo sa usa ka kanta o kasulatan. (Tan-awa sa Pagtudlo Sumala sa Pamaagi sa Manluluwas, 25.)