M̧aaj 27–Eprōļ 2

Matu 14; Mark 6; Jon 5–6

“Kom̧win Jab Abwinmake”

Ilo am̧ kōppopo n̄an katakin jān Matu 14; Mark 6; im Jon 5–6, kappukot enaan ko me ewōr tokjeer n̄an mour ko an ajri ro kwoj katakin. Ta am̧ ļōmņak enaaj jipan̄ er meļeļe ennaan kein? Laajrak in emaron̄ lewaj jet ļōmņak ko.

Kajjitōk bwe ren Kwaļo̧k

Kwaļo̧k juon pija in an Jisōs etetal ioon dān (lale laajrak eo an wiik in ilo Itok, Ļoor Eō—N̄an Kajjojo Armej im Baam̧le Ko ak Gospel Art Book, no. 43), im kajjitōk ippān ajri ro n̄an kwaļo̧k ta eo rejeļā kōn bwebwenato in.

Katakin Katak eo: Ajri ro Reddikļo̧k

Jon 5:1–9

Jisōs Kraist ejeļā ta eo ij aikuji im maron̄ jipan̄ eō.

Kōļmenļo̧kjeņ kōn bwebwenato in an Jisōs kōmour em̧m̧aan eo ilo Betesda. Elmen am maron̄ jipan̄ ajri ro lo ta bwebwenato eo je kwaļo̧k kōn an Jisōs jouj, iakwe, im m̧wiļ ko jet?

M̧akūtkūt ko Maron̄ Kōm̧m̧ani

• Kōjerbal pija in Christ Healing the Sick at Bethesda (Gospel Art Book, no. 42) n̄an kwaļo̧k n̄an ajri ro bwebwenato eo ilo Jon 5:1–9. Ak kwaļo̧k pija in alooj eo “Jesus Heals a Man on the Sabbath” (ChurchofJesusChrist.org). Kajjitōk ippān ajri n̄an antoone n̄e en kar er armej eo Jisōs ekar kōmouri. Elmen aer kar en̄jake n̄e Jisōs ekar kōmour er?

• Kajjitōk ippān ajri ro n̄an ņaetan men ko me repen n̄an er ak ekōm̧an bwe ren būrom̧ōj. Kwaļo̧k n̄an er kōn juon tōre ilo mour eo am̧ ke kwaar bōk jipan̄ jān Rilo̧mo̧o̧r ilo juon tōre epen. Kam̧ool bwe Jisōs ejeļā kōn aolep inepata ko ad im kōņaan jipan̄ kōj.

Matu 14:13–21

Ij ļoor waanjon̄ak eo an Jisōs n̄e ij jouj n̄an ro jet.

Juon wāween Jisōs ekar kwaļo̧k iakwe ekar najdik rikaļoor ro An ke rekar kwole. Elmen am̧ maron̄ jipan̄ ajri ro jerbal in jipan̄ ro jet āinwōt kar Jisōs?

M̧akūtkūt ko Maron̄ Kōm̧m̧ani

• Kwaļo̧k n̄an ajri ro juon nine im jet pilawe ilo am̧ kwaļo̧k bwebwenato eo ilo Matu 14:13–21. Kōmeļeļeiki bwe men̄e Jisōs ekar kajjieon̄ in pukōt juon jikin bwe en makeļo̧k, armej ro rekar kōņaan bwe en epake E. Kwaļo̧k aolepen bwebwenato in n̄an ajri ro, im kajjitōk ippāer n̄an ron̄jake ta eo Jisōs ekar kōm̧m̧ane n̄an kwaļo̧k jouj im iakwe n̄an armej ro.

• Kajjitōk ippān ajri ro n̄an kwaļo̧k wāween ko me raar jouj n̄an er. Innām jipan̄ er ļōmņaki men ko remaron̄ kōm̧m̧ani wiik in n̄an jouj n̄an ro jet. Bwe aolep uwaak ko rej kwaļo̧ki, jin̄aiki juon pilawe ak juon ek ioon bo̧o̧t eo. Kwaļo̧k n̄an ajri ro bwe n̄e rej kōm̧m̧ani men kein, rej ļoor waanjon̄ak eo an Jisōs ke E ekar najdik ļalem taujin armej ro rekar kwole.

Matu 14:22–33

Tōmak ilo Jisōs Kraist emaron̄ jipan̄ eō jab mijak.

Piter ekar kwaļo̧k tōmak eļap ke ekar etetal ioon dān ļo̧k n̄an ippān Jisōs. Ta katak ko repād ijen n̄an ajri ro ilo bwebwenato in?

M̧akūtkūt ko Maron̄ Kōm̧m̧ani

• Kwaļo̧k pija ko ilo laajrak eo an wiik in ilo Itok, Ļoor Eō—N̄an Kajjojo Armej im Baam̧le Ko (bar lale Gospel Art Book, no. 43) ilo am̧ kwaļo̧k bwebwenato eo jān Matu 14:22–33 jān naan ko am make. Kōjerbal peij in m̧akūtkūt eo an wiik in n̄an jipan̄ ajri ro kwaļo̧k bwebwenato eo n̄an eok. Kwomaron̄ bar bōktok juon bo̧o̧ļ in dān jidikdik im kajjitōk bwe ajri ro ren katen wōt n̄e rej “etetal” peier itōrere in dān do.

• Kwaļo̧k bitio eo “Wherefore Didst Thou Doubt?” (ChurchofJesusChrist.org), im kajjitōk etke Piter ekar mijak. Innām kajjitōk ippāer n̄an kwaļo̧k kōn iien ko ke rekar mijak im kwaļo̧k ta eo ekar jipan̄ er. Jipan̄ er lale n̄e tōmak ilo Jisōs Kraist ejipan̄ kōj anjo̧ jān mijak.

Katakin Katak eo: Ajri ro Rerūttoļo̧k

Jon 5:17–47

Jisōs Kraist ej katakin eō kōn Jemedwōj Ilan̄.

Elmen an katak ko an Jisōs kōn Jemen jipan̄ ajri ro jeļā kōn Jemedwōj Ilan̄?

M̧akūtkūt ko Maron̄ Kōm̧m̧ani

• Kōm̧m̧ane juon jet in kōmāājeej kaat je naan ko me Jisōs ekar katakin kōn Jemen ilo Jon 5, āinwōt iakwe, mour, im jerbal (lale Jon 5:20, 26, 36). Kōpedoiki kaat ko, im kajjitōk ippān ajri ro n̄an kwaļo̧k kaat eo emāāj ippān kaat eo juon ilo juon wōt iien. N̄e emāāj, riiti eoon eo epād ie naan eo, im kajjitōk ippān ajri ro ta eo naan eo ej katakin kōj kōn Jemedwōj Ilan̄.

• Kajjitōk bwe ajri ro ren riiti Jon 5:30 im kadedeļo̧k jentōj in: “ I jab pukōt ankil Aō, ak …” Elmen an Jisōs Kraist kar kōm̧m̧an ankilan Jemen? Elmen ad maron̄ kōm̧m̧an ankilan Jemedwōj Ilan̄?

An Jisōs kabwilōn̄lōn̄ najdik ļalem taujin armej kōn ļalem pilawe im ruo ek.

Jon 6:5–14

Joortak ko aō reddik remaron̄ kōm̧m̧an oktak.

Ekar juon ļaddik jidikdik eo ekar bōktok pilawe im ek eo bwe Jisōs en kōjerbale n̄an najdik ļalem taujin. Elmen am̧ maron̄ jipan̄ ajri ro kwoj katakin lo elmen aer maron̄ leļo̧k n̄an jerbal in an Irooj?

M̧akūtkūt ko Maron̄ Kōm̧m̧ani

• Jipan̄ ajri ro antoone ewi jon̄an ļap in ļalem taujin in armej ro. Elmen jekjek in kar n̄an najdik lōn̄in armej ro kōn wōt ļalem pilawe im ruo ek?

• Kajjitōk ippān juon ajri n̄an kwaļo̧k bwebweanto eo kōn najdik ļalem taujin jān naan ko an make. Kwaļo̧k bwe ekar juon ļaddik edik eo ekar kepooj pilawe im ek bwe Irooj en kar kōm̧m̧an kabwilōn̄lōn̄ in. Elmen ad maron̄ āinwōt ļaddik in kar kwaļo̧k ilo Jon 6:9? Kajjitōk ippān ajri ro n̄an jin̄aiki pilawe ko im ek ko ioon peba eo im je ioer jet men ko remaron̄ leļo̧k n̄an Irooj n̄an jipan̄ jerbal in An.

• Leļo̧k n̄an ajri ro juon bajōļ jidikdik n̄an kadedeļo̧k. Ta eo enaaj waļo̧k n̄e juon iaan m̧ōttan bajōļ eo ejako? Kōmeļeļeiki bwe jej kajjojo m̧ōttan bajōļ eo—jej aolep aorōk, im jej aikuji doon. Jipan̄ ajri ro kwaļo̧k un ko aorōk ippān baam̧le ko aer, kūlaaj in Būraimere eo aer, baam̧le eo an Anij, im kurup ko jet.

Matu 14:22–33

Tōmak ilo Jisōs Kraist emaron̄ jipan̄ eō jab mijak.

Tōmak im mijak rej kwaļo̧k jibadbad ko aer raorōk ilo bwebwenatoin an Jisōs im Piter etetal ioon dān. Ta eo jemaron̄ ekkatak jān bwebwenato in?

M̧akūtkūt ko Maron̄ Kōm̧m̧ani

• Kwaļo̧k pija eo ilo laajrak eo an wiik in ilo Itok, Ļoor Eō—N̄an Kajjojo Armej im Baam̧le Ko (bar lale Gospel Art Book, no. 43). Kajjitōk ippān ajri ro n̄an lale naan ko ilo Matu 14:22–33 me ej kōmeļeļeiki pija eo.

• Kajjitōk ippān ajri ro n̄an pukōt kōkkaļļe ko an tōmak im kōkkaļļe ko an mije ilo aer riiti Matu 14:22–33. Kwomaron̄ bar kwaļo̧k bitio eo “Wherefore Didst Thou Doubt?” (ChurchofJesusChrist.org). Ta meļeļe in n̄an tōmak ilo Jisōs Kraist? Jipan̄ ajri ro ļōmņak kōn jet iien me tōmak eo aer ekar jipan̄ er anjo̧ ioon.

• Kajjitōk ippān ajri ro n̄an antoone n̄e ren kar pād im kar wōr kein pija ke Jisōs im Piter rekar etetal ioon dān. IIen ta eo ren kar kālete n̄an pijaiki im etke? Kwaļo̧k bwe ren lale Matu 14:22–33 n̄an ļōmņak ko. Kajjitōk ippāer n̄an jin̄aik juon pija in iien eo rekar kālete, kwaļo̧k pija ko aer, im kōmeļeļeiki etke rekar kāālet iien eo.

Kōketak Ekkatak ilo M̧weo

N̄e ajri ro rekar kam̧ōj peij in m̧akūtkūt eo an wiik in, kajjitōk ippāer n̄an kōjerbale n̄an katakin baam̧le ko aer ta eo rekar ekkatak ilo kūlaaj. Ak leļo̧k n̄an er juon kape in peij eo n̄an kadedeļo̧k ippān baam̧le ko ilo m̧weo.

Kōkm̧anm̧anļo̧k Ad Katakin

Kajjitōk n̄an Kwaļo̧k Kajjitōk ippān ajri ro kōn ļōmņak ko aer, en̄jake, im imminene ko. Kwonaaj loe bwe ekkā an wōr ippāer kōļmenļo̧kjeņ ko reļem waan em̧ool rekajoor.