3–9 Avril.

Pak

Pak: “O, Tonbo! Kote Viktwa Ou?”

Itilize tan w ap pase avèk timoun yo pou ede yo wè Pak kòm yon sezon pou yo rejwi nan Sovè a ak pou apwonfondi rekonesans yo pou sakrifis Li a. Ou ka adapte ide yo bay yo nan plan leson sa a pou ede w anseye timoun nenpòt laj.

Envite Pataj

Montre foto Sovè a nan Jetsemani, sou kwa a, ak apre Rezirèksyon L lan (gade foto ki nan plan leson semèn sa a nan Vini, Suiv Mwen—Pou Moun yo ak Fanmi yo ak nan Liv Ilistrasyon Levanjil la, nos. 56–60). Mande timoun yo pou yo pataje sa yo konnen sou evenman ki nan foto yo.

Anseye Doktrin nan: Timoun Ki Pi Piti yo

Jezikri se Sovè mwen.

Pandan w ap li sou Sakrifis Ekspyatwa Jezikri a, reflechi sou fason w ka ede timoun yo santi konbyen Jezi renmen yo.

Aktivite Posib

• Kenbe yon foto Jezi, epi mande timoun yo pou yo pataje sa yo konnen sou sa L te fè pou nou. Rann temwayaj ou sou lanmou Sovè a ak pouvwa L pou sove nou anba peche. Kenbe yon glas, epi fè timoun yo gade ladan youn apre lòt. Pandan chak timoun ap fè sa, di: “Jezi renmen [non timoun nan], epi li ka ede [non timoun nan] al viv avèk Pè Selès la ankò.”

• Montre foto Jezi k ap priye nan Jetsemani an (Liv Ilistrasyon Levanjil la, no.56) pandan w ap rakonte istwa soufrans Jezi nan Jetsemani pou peche mond lan (gade Matye 26:36–46; Lik 22:39–44). Temwaye ke, gras ak soufrans Li yo, nou ka jwenn padon lè nou fè yon move chwa. Epitou, ou ka itilize “Chapit 51: Jezi soufri nan Jaden Jetsemani an” (nan Istwa Nouvo Testaman yo, 129–32, oubyen videyo korespondan an nan ChurchofJesusChrist.org).

• Chante ansanm yon chan sou lanmou Jezi pou nou, tankou “Je ressens son amour” (Chants pour les enfants, 42–43). Epitou, montre yo mo nan chante a ki dekri lanmou Sovè a. Kisa ki ka ede yo santi lanmou Li? Kijan nou ka ede lòt moun santi lanmou Li?

Li resisite, tablo Greg Olsen

Paske Jezi te mouri epi L te resisite, m ap viv ankò.

Kijan w ka ede timoun yo konprann ke, gras ak Rezirèksyon Jezikri a, noumenm ak moun ki chè pou nou yo ap resisite yon jou?

Aktivite Posib

• Anseye timoun yo istwa Pak la pandan w ap itilize foto Kris la nan Jetsemani, sou kwa a, ak apre Rezirèksyon L lan (gade Liv Ilistrasyon Levanjil la, nos. 56–60 ak foto grandè paj la ki nan plan leson semèn sa a nan Vini Suiv Mwen—Pou Moun yo ak Fanmi yoa). Fè timoun yo kenbe foto yo pandan w ap rakonte istwa a. Pale timoun yo de kèk moun ki te wè Jezi apre L te fin resisite, tankou Mari (gade Jan 20:1–18) oubyen Toma (gade Jan 20:24–29).

• Mande yo poukisa nou selebre Pak. Eksplike yo ke pou Pak, nou selebre jou ki pi enpòtan nan listwa a—jou Jezikri te resisite a. Mande si gen timoun ki ta renmen rakonte sa fanmi yo fè pou yo sonje Rezirèksyon Jezikri a.

• Eksplike yo ke resisite vle di viv ankò apre nou fin mouri. Rann temwayaj ou ke, gras ak Jezikri, nou tout ap resisite—nou pral viv ankò apre nou fin mouri, epi nou pap janm mouri ankò.

• Itilize yon gan pou w anseye timoun yo ke nou tout gen yon kò (ke gan an reprezante) ak yon espri (yon men reprezante). Lè nou mouri, espri nou ak kò nou separe. Espri nou kontinye viv, men kò nou pa viv ankò. Lè nou resisite, espri nou ak kò nou reyini ankò. Fè yo chak pran tan pou yo mete gan an epi retire li.

• Chante ansanm kèk chan Pak, tankou “Chantons tous, plein d allégresse?” ou “Jésus est il rescusité” (Chants pour les enfants, 121, 45), epi montre timoun yo foto Jezi apre L te resisite a (gade Liv Ilistrasyon Levanjil la, nos. 59–61).

• Montre foto yon moun ou konnen ki mouri. Pataje temwayaj ou ke moun sa a ap resisite gras ak Sakrifis Ekspyatwa ak Rezirèksyon Jezikri a.

• Gade ansanm videyo “Jezi resisite” a oubyen “Senyè resisite a parèt devan Apot yo” nan (LeglizJezikri.org). Oubyen pase yon lòt video sou Pak w ap jwenn nan Easter.ComeuntoChrist.org.

Anseye Doktrin nan: Timoun Ki Pi Gran yo

Jezi te soufri pou mwen nan Jetsemani ak sou kwa a.

Pandan w ap etidye nesans Jezkiri semèn sa a, reflechi sou fason w ka ede klas ou a fòtifye temwayaj yo konsènan Jezikri ak Sakrifis Ekspyatwa l la.

Aktivite Posib

• Li avèk timoun yo Lik 22:39–44 ak kèk vèsè ou seleksyone nan Matye 27:29–50. Envite yo pou yo chèche mo ki ap ede yo konprann sa Sovè a te santi nan Jetsemani ak sou kwa a.

• Ede timoun yo memorize twazyèm atik lafwa a. Rann temwayaj ou ke Jezikri gen pouvwa pou l sove nou anba peche ak lanmò.

• Ede yo prepare ti diskou piti sou Sakrifis Ekspyatwa Jezikri a ke yo ka pataje avèk lòt moun. Ankouraje yo pou yo enkli yon ekriti ak temwayaj yo nan diskou yo. Si yo bezwen èd adisyonèl, yo ka li “Ekspye, Ekspyasyon” nan Gid Ekriti yo nan (scriptures.ChurchofJesusChrist.org).

Paske Jezi te mouri epi L te resisite, m ap viv ankò.

Timoun w ap anseye yo ap gen pou yo konfwonte ak lanmò yon moun ki chè pou yo yon jou kanmèm, si sa pa fèt deja. Paske Jezikri te resisite, nou menm tou n ap resisite.

Aktivite Posib

• Montre foto nos. 57–59 nan Liv Ilistrasyon Levanjil la, epi mande timoun yo pou yo fè foto yo matche avèk pasaj sa yo: Matye 27:29–38, 59–60; Jan 20:10–18.

• Envite timoun yo pou yo chak li “Rezirèksyon” nan Gid Ekriti yo (scriptures.ChurchofJesusChrist.org) epi pou yo chèche yon bagay yo ta renmen anseye fanmi yo. Envite yo pou pataje sa yo jwenn yo.

• Ede yo gade nan endèks pa sijè a nan liv Chants pour les enfants an pou yo ka chèche yon kantik yo ta renmen aprann sou Jezikri oubyen sou Rezirèksyon an. Chante kantik la ansanm, epi mande yo kisa yo aprann nan kantik sa a.

• Pase video “Jezi Resisite a” (ChurchofJesusChrist.org), epi envite kèk timoun pou pataje temwayaj yo sou Ekspyasyon Sovè a ak sou Rezirèksyon an. (Ou ta gen dwa mande timoun sa yo pou yo fè sa kèlke jou anvan klas la pou yo ka gen tan prepare yo.) Envite yo pou yo ekri temwayaj yo pou yo ka pataje l lakay yo.

Ankouraje Aprantisaj Lakay

Pou ede timoun yo pataje sa yo te aprann yo avèk fanmi yo, ankouraje yo pou yo chante yon kantik sou Jezikri lakay yo semèn sa a.

Amelyore Ansèyman Nou

Timoun benefisye de repetisyon. Pa pè refè aktivite yo plizyè fwa, espesyalman pou timoun ki pi piti yo. Sa ap ede yo sonje sa w anseye yo a