Eprōļ 3–9

Ijtō

“O mej, Ewi Am̧ Anjo̧?

Kōjerbal iien eo am̧ ippān ajri ro n̄an jipan̄ er lo Ijtō āinwōt juon jijen n̄an m̧ōņōņō kōn Rilo̧mo̧o̧r im aer kam̧m̧oolol eļap kōn en̄taan eo An. Ļōmņak in ilo laajrak in emaron̄ em̧m̧anļo̧k n̄an jipan̄ ajri ro kwoj katakin ilo jabdewōt iiō.

Kajjitōk bwe ren Kwaļo̧k

Kwaļo̧k pija in Rilo̧mo̧o̧r ilo Getsemane, ioon dōbwāāl eo, im ālkin An Jerkakpeje (lale pija in ilo laajrak eo an wiik in ilo Itok, Ļoor Eō—N̄an Kajjojo Armej im Baam̧le Ko im Gospel Art Book, nos. 56–60). Kajjitōk ippān ajri n̄an kwaļo̧k ta eo rejeļā kake kōn m̧akūtkūt ko ilo pija eo.

Katakin Katak eo: Ajri ro Reddikļo̧k

Jisōs Kraist ej aō Rilo̧mo̧o̧r.

Ilo ami riit kōn Pinmuur eo an Jisōs Kraist, kōļmenļo̧kjeņ elmen am̧ maron̄ jipan̄ ajri ro en̄jake ewi jon̄an an Jisōs iakwe er.

M̧akūtkūt ko Maron̄ Kōm̧m̧ani

• Kotak juon pija in Jisōs, im kajjitōk ippān ajri ro n̄an kwaļo̧k ta eo rejeļā kōn ta eo Ekar kōm̧m̧ane n̄an kōj. Kwaļo̧k naan in kam̧ool eo am̧ kōn iakwe eo an Rilo̧mo̧o̧r im An kajoor n̄an lo̧mo̧o̧ren kōj jān jerawiwi. Kotak juon kūlaaj, im kōm̧m̧an bwe ajri ro rej bōk kuņaer kalimjeke. Ilo an kajjojo ajri kōm̧m̧ane, ba, “Jisōs ej iakwe [etan ajri eo], im E emaron̄ jipan̄ [etan ajri eo] bar mour ippān Jemedwōj Ilan̄.”

• Kwaļo̧k pijain Jisōs Jar ilo Getsemane (Gospel Art Book, no. 56) ilo am̧ kwaļo̧k bwebwenato eo kōn en̄taan eo an Jisōs ilo Getsemane kōn jerawiwi ko an laļin (lale Matu 26:36–46; Luk 22:39–44). Kam̧ool bwe kōn wōt en̄taan eo An, jemaron̄ bar jeo̧rļo̧k bōd n̄e jej kōm̧m̧ane juon kāālet ebōd. Kwomaron̄ bar kōjerbal “Jebta 51: Jesus Suffers in the Garden of Gethsemane” (ilo Bwebwenato ko ilo Kalim̧m̧ur Ekāāl, 129–32, ak bitio eo ilo ChurchofJesusChrist.org).

• Al ippān doon juon al kōn iakwe, eo āinwōt “I Feel My Savior’s Love” (Children’s Songbook,, 74–75). Jipan̄ ajri ro kwaļo̧k naan ko ilo al eo me ej kōmeļeļeik iakwe an Rilo̧mo̧o̧r. Ta eo emaron̄ jipan̄ kōj en̄jake iakwe eo An? Elmen ad maron̄ jipan̄ ro jet en̄jake iakwe eo An?

E em̧ōj an Jerkak,, jān Greg Olsen

Kōnke Jisōs ekar mej im kar jerkakpeje, Inaaj bar mour.

Elmen am̧ maron̄ jipan̄ ajri ro meļeļe bwe kōn Jisōs Kraist, kōj im ro jej iakwe er renaaj bar jerkakpeje juon raan?

M̧akūtkūt ko Maron̄ Kōm̧m̧ani

• Katakin ajri ro kōn bwebwenato in Ijtō kōjerbal pija in Kraist ilo Getsemane, ioon dōbwāāl eo, im ālkin An jerkakpeje (lale Gospel Art Book, nos. 56–60 im aolepen peij in pija eo ilo laajrak eo an wiik in ilo Itok, Ļoor Eō—N̄an Kajjojo Armej im Baam̧le Ko). Kōtļo̧k an jejjo̧ ajri kotak pija ko ilo am̧ kwaļo̧k bwebwenato eo. Kwaļo̧k n̄an ajri ro jejjo̧ armej ro me rekar lo Jisōs ālkin An kar jerkakpeje, āinwōt Meri (lale Jon 20:1–18) ak Thomas (lale Jon 20:24–29).

• Kajjitōk ippān ajri ro etke jej keememej Ijtō. Kōmeļeļeiki bwe ilo Ijtō jej keememej raan eo Jisōs Kraist ekar jerkakpeje. Kajjitōk ippān jabdewōt ajri n̄e rekōņaan kwaļo̧k ta eo baam̧le eo aer rekar kōm̧m̧ane n̄an keememej Jerkakpeje eo an Jisōs Kraist.

• Kōmeļeiki bwe jerkakpeje meļeļein bar mour ālkin ad mej. Kwaļo̧k am̧ naan in kam̧ool bwe kōn wōt Jisōs Kraist,, jenaaj bar jerkakpeje—jenaaj bar mour ālkin ad mej, im jeban bar mej.

• Kōjerbal juon kūļōb n̄an katakin ajri ro bwe ewōr juon ānbwinnid (eo ej pinej jenkwan kūļōb eo) im jetōb (ej pinej jenkwan peid). N̄e jej mej, jetōb ko ad im ānbwinnid rej jepel. Jetōb ko ad rej mour wōt, ak ānbwinnid ejjab. N̄e jej jerkakpeje, jetōbb ko ad im āinbwinnid rej bar koba ippān doon. Kōtļo̧k bwe ajri ro ren bōk kūņaer kōņak kūļōb eo im bar tum̧wi.

• Al juon al in Ijtō ippān doon, āinwōt “Did Jesus Really Live Again?” ak “Jesus Has Risen” (Children’s Songbook, 64, 70), im kwaļo̧k n̄an ajri ro pijain Jisōs ālkin An jerkakpeje (lale Gospel Art Book, nos. 59–61).

• Kwaļo̧k pijain juon eo kwojeļā em̧ōj an kar mej. Kwaļo̧k naan in kam̧ool eo am bwe e enaaj bar jerkakpeje kōn wōt Pinmuur im Jerkakpeje eo an Jisōs Kraist.

• Alooje bitioo eo “Jesus Is Resurrected” ak “The Risen Lord Appears to the Apostles” (ChurchofJesusChrist.org). Ak kwaļo̧k pija in aloojIjtō eo ilo Easter.ComeuntoChrist.org.

Katakin Katak eo: Ajri ro Rerūttoļo̧k

Jisōs ekar en̄taan kōn n̄a ilo Getsemane im ioon dōbwāāl.

Ilo am̧ ekkatak kōn jeje ko rekwojarjar ilo wiik in, ļōmņak kōn wāween am̧ maron̄ jipan̄ ajri ro kalōk aer tōmak ilo Jisōs Kraist im Pinmuur eo An.

M̧akūtkūt ko Maron̄ Kōm̧m̧ani

• Riit ippān ajri ro Luk 22:39–44 im eoon ko kar kāleti jān Matu 27:29–50. Kajjitōk ippān ajri ro n̄an lali naan ko me ejipan̄ er meļeļe ta eo Rilo̧mo̧o̧r eaar en̄jake ilo Getsemane im ioon dōbwāāl.

• Jipan̄ ajri ro kakilōklōke laajrak in tōmak kein kajilu. Kwaļo̧k am̧ naan in kam̧ool bwe Jisōs Kraist ewōr an kajoor n̄an lo̧mo̧o̧ren kōj jān jerawiwi im jān mej.

• Jipan̄ ajri ro kōpooj jidik katak kōn Pinmuur eo an Jisōs Kraist me remaron̄ kwaļo̧k n̄an doon. Rōjan̄ er n̄an kobaiki juon eoon im aer naan in kamool ilo katak ko aer. N̄e rej aikuj jipan̄, remaron̄ lale “Atone, Atonement” ilo Unin Tōl eo n̄an Jeje ko Rekwojarjar (scriptures.ChurchofJesusChrist.org).

Kōnke Jisōs ekar mej im kar jerkakpeje, Inaaj bar mour.

Ajri ro kwoj katakin naaj juon raan naaj ioon mej an juon eo ejitenbōro n̄e rejjan̄in kar. Jipan̄ er jeļā bwe kōnke Jisōs Kraist ekar jerkakpeje, jenaaj aolep jerkakpeje.

M̧akūtkūt ko Maron̄ Kōm̧m̧ani

• Kwaļo̧k pija ko nos. 57–59 ilo Gospel Art Book, im kajjitōk ippān ajri ro n̄an kōmāājeji pija ko ippān eoon kein ilaļ: Matu 27:29–38, 59–60; Jon 20:10–18.

• Kajjitōk ippān ajri ro n̄an riiti “Jerkakpeje” ilo Unin Tōl n̄an Jeje ko Rekwojarjar (scriptures.ChurchofJesusChrist.org) im pukōt men ko remaron̄ kōņaan katakin baam̧le ko aer. Leļo̧k n̄an ajri ro iien n̄an kwaļo̧k ta eo rej loe.

• Jipan̄ ajri ro lale topics index ilo Children’s Songbook n̄an pukōt juon al em̧m̧an n̄an al kake kōn Jisōs Kraist ak Jerkakpeje. Al ippān doon, im kajjitōk ippān ajri ro ta eo rekar ekkatak jān al in.

• Kwaļo̧k bitio eo “Jesus Is Resurrected” (ChurchofJesusChrist.org), im kajjitōk ippān ajri ro n̄an kwaļo̧k naan in kam̧ool ko aer kōn Pinmuur eo an Rilo̧mo̧o̧r im Jerkakpeje. (Kwomaron̄ kajjitōk ippān ajri rein n̄an kōm̧m̧an menin jejjo̧ raan m̧okta jān kūlaaj bwe ren pojak.) Kajjitōk ippāer n̄an je naan in kam̧ool ko aer n̄an kwaļo̧ke ilo m̧weo .

Kōketak Ekkatak ilo M̧weo

N̄an jipan̄ ajri ro kwaļo̧k ta eo rekar ekkatak n̄an baam̧le ko aer, rōjan̄ er n̄an al juon al kōn Jisōs Kraist ilo m̧weo wiik in.

Kōkm̧anm̧anļo̧k Ad Katakin

Ajri ro rej jeraam̧m̧an jān bar āliji. Jab mijak n̄an bar ālij m̧akūtkūt ko elōn̄ alen, eļaptata ippān ajri ro reddikļo̧k. Āliji menin enaaj jipan̄ ajri ro keememej ta eo kwoj katakin.