8–14 ni Me

Maciu 19–20; Marika 10; Luke 18

“A Cava Tale Sa Vo Vei Au?”

Wilika na Maciu 19–20; Marika 10; kei na Luke 18, ka nanumi ira tiko na gone o vakavulica. Vola na veivakauqeti cava ga o ciqoma. Na nomu vakavakarau ena vukei iko mo vakavulici ira na gone ena veika era gadreva me ra kila mai na veiwase oqo.

Sureta na Veiwasei

Sureti ira na gone mera wasea e dua ga na ka era nanuma rawa mai na lesoni ni macawa sa oti. Vakaraitaka nai yaloyalo eso me vukei ira ni nanuma.

Vakavulica na iVunau: Gone Sobu

Marika 10:6–8

E vinakata na Tamada Vakalomalagi me da vakamau ena valetabu ka me da matavuvale tawamudu.

Ena yaga vakacava vei ira na gone o vakavulica na vulici ni vunau ni vakamau tawamudu? Ena rawa ni veivuke vei iko mo railesuva na dina eso me baleta na vakamau e “Na Matavuvale: Ai Vakaro ki Vuravura Raraba” (ChurchofJesusChrist.org).

iTaviqaravi e Rawa ni Caka

• Wilika na Marika 10:6–8 vei ira na gone, ka vakaraitaka nai yaloyalo ni dua na veiwatini. Kerei ira na gone me ra dusia na tagane kei na yalewa ni ra rogoca ni o wilika na vosa tagane kei na yalewa. Vakamacalataka ni sa vinakata na Tamada Vakalomalagi me rau vakamau vata na tagane kei na yalewa (raica na iVakatekivu 1:27–28).

• Vakaraitaka nai yaloyalo ni dua na matavuvale kei na valetabu. Kerei ira na gone me ra tukuna na ka era raica ena iyaloyalo. Vakamacalataka ni vinakata na Tamada Vakalomalagi me da vauci ki na noda matavuvale ena valetabu me rawa ni da tiko vata kaya me tawamudu. Nanumi ira tiko na gone era se bera ni vauci vata na nodra itubutubu.

• Lagata vata e dua na sere me baleta na matavuvale, vaka na “Sa Neitou na Mamarau” (iVolanisere ni Gonelalai, 104). Vakasamataka mo lagata vakavica na sere. Sureti ira na gone me ra wasea na veika lasa era sa cakava vata kei na nodra matavuvale. Cava na vuna era vakavinavinakataka kina na nodra matavuvale?

• Lagata e dua na sere me baleta na valetabu, me vaka na “Raica na Valetabu” se “Matavuvale me Tawamudu Tu” (iVolanisere ni Gonelalai, 99, 98). Me ra taura tu na gone nai yaloyalo ni valetabu se matavuvale, ka sureti ira me ra dulaka cake nodra i yaloyalo ni ra lagata na “valetabu” se “matavuvale.” Vukei ira na gone me ra vakasamataka na vuna e bibi kina na vakamau ena valetabu.

Sa lomani ira na gone o Jisu, ni “sa vakataki ira na lewe ni matanitu ni Kalou” (Marika 10:14).

Marika 10:13–16

E vinakata o Jisu me ra lako mai Vua na gonelalai me rawa ni vakalougatataki ira.

Na italanoa oqo e vakarautaka e dua na madigi me vukea nodra vakila na gone na levu ni nona lomani ira o Jisu.

iTaviqaravi e Rawa ni Caka

• Ena nomu vosa ga, wasea na italanoa ena Marika 10:13–16. Ko na rairai vakaraitaka talega na vidio “Suffer the Little Children to Come unto Me” (ChurchofJesusChrist.org). Vukei ira na gone me ra vakasamataka na gauna eso era a vakila kina na loloma i Jisu me baleti ira. Wasea na nomu ivakadinadina vei ira na gone ni lomani ira o Jisu ka vinakata me vakalougatataki ira.

• Vakaraitaka na iyaloyalo Ko Karisito kei Ira na Gone (iVola ni iYaloyalo Vakosipeli, naba 47). Vukei ira na gone me ra raitayaloyalotaka se na vaka tu evei ke ra a dua vei ira na gone ka dabe tikivi Jisu tiko ena i yaloyalo. Sureti ira na gone me ra wasea na lomadra me baleti Jisu.

• Me ra droinitaka na gone na kedra i yaloyalo ni ra vakalougatataki tiko mai vei Jisu (raica na Marika 10:16 kei na tabana ni itaviqaravi ni macawa oqo).

Marika 10:17–22

Keu sa talairawarawa ki na ivunau, au sa rawa ni ciqoma na bula tawamudu.

A vakavulica na cauravou vutuniyau o Jisu ni kevaka me na rawata na bula tawamudu—na bula vakataka na Tamada Vakalomalagi—sa dodonu me talairawarawa ki na ivunau.

iTaviqaravi e Rawa ni Caka

• Tukuna na kena italanoa na cauravou vutuniyau ena Marika 10:17–22 vei ira na gone. (Raica talega na “Wase e 42: Na Cauravou Vutuniyau,” e Na iTukuni ena Veiyalayalati Vou, 105–6, se na kena vidio ena ChurchofJesusChrist.org.) Kerei ira me ra vakarogoca na ka a tukuna o Jisu vua na cauravou me cakava kei na nona sauma mai na cauravou.

• Tukuna e dua se levu na italanoa era a kere ivakasala se veidusimaki kina na gone vei ira nodra itubutubu ka qai sega ni muria se talairawarawa kina. Na cava eso na ka e kerea vei keda na Tamada Vakalomalagi me da cakava? E vakaevei na ivakarau ni yaloda ni da talairawarawa ki na Nona ivunau?

• Wasea na veika o sotava ena nomu ciqoma na veivakauqeti eso mo cakava e dua na ka mo vinaka cake kina.

Vakavulica na iVunau: Gone Qase Cake

Marika 10:6–8

E vinakata na Tamada Vakalomalagi me da vakamau ena valetabu ka me da matavuvale tawamudu.

Na veika a vakavuvulitaka o Jisu me baleta na vakamau e rawa ni vukei ira na gone ni nanamaki me ra vakamau ena valetabu ka susuga cake e dua na matavuvale tawamudu.

iTaviqaravi e Rawa ni Caka

• Kerea e dua na gone me wilika e cake na Marika 10:6–8. Vakamacalataka ni kabita e kena ibalebale me “kabi ki na” se “taura matua” e dua na ka. Na cava e bibi kina me ra sema vata na veiwatini, veilomani, ka cakacaka vata vakaveitokani?

• Kerei ira na gone me ra vukei iko mo vakasamataka na isaunitaro vaka na “Cava na vuna e bibi kina na matavuvale ena Lotu?” se “Cava na vuna e bibi kina mo vakamau ena valetabu?” Vukei ira me ra kunea na isaunitaro ena ivurevure eso me vaka na Marika 10:6–8; 1 Korinica 11:11; Vunau kei na Veiyalayalati 42:22; 131:1–4; Mosese 3:18, 21–24; kei “Na Matavuvale: Ai Vakaro ki Vuravura Raraba.”

• Lagata vata e dua na sere baleta na matavuvale, me vaka na “Matavuvale me Tawamudu Tu” (iVolanisere ni Gonelalai, 98). Wasea na nomu ivakadinadina ni vakamau tawamudu kei na matavuvale vei ira na gone. Sureti ira me ra wasea talega na nodra ivakadinadina.

Marika 10:17–22

Sa rawa ni vukei au o Jisu ni kila na ka meu cakava meu rawaka kina.

A vakasaqarai Jisu na cauravou vutuniyau ka qai soli vua na idusidusi e baleti koya vakatabakidua. Ena rawa vakacava ni o vakauqeti ira na gone me ra vakasaqara na mataqali veituberi vata oqo ena nodra bula?

iTaviqaravi e Rawa ni Caka

• Kerei ira na gone me ra raica e dua na tikina ena Marika 10:17–22 e vakamacalataka na iyaloyalo ena ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale. Vakamacalataka ni vakasala a solia o Jisu vua na cauravou e sa baleti koya ga, ka da rawa ni ciqoma taucoko na veidusimaki yadua ni Turaga mai vua na Yalotabu.

• Wilika vata na Marika 10:17–22. Sureti ira na gone me ra vola ena papa ni volavola na vunau a tukuna na iVakabula vua na cauravou vutuniyau me muria (raica na tikina e 19). Na cava tale a kerea vua o Jisu me cakava? (raica na tikina e 21). Vakauqeti ira na gone me ra vakasamataka eso na ka era na gadreva ni tekivu cakava se muduka me ra muri Jisu vakavinaka cake kina. Na cava eso na sala eda rawa ni kila kina na ka e vinakata o Jisu me da cakava?

Vakauqeta na Vuli e Vale

Sureta na gone me ra vakaraitaka ki na nodra matavuvale ni ra sa lomani ira, ena volai beka ni dua na ivola se ivakaraitaki vinaka ni veiqaravi.

Vakatorocaketaki Noda Veivakavulici

Dau vakarorogo vei ira na gone. Era sa vakaitavi tiko vakacava na gone ena nomu kalasi ena itaviqaravi vulici eso? Kevaka era sega ni kauwai, sa na rairai kena gauna beka me tovolei kina e dua tale na itaviqaravi se taubale lekaleka, dokai. Ena dua tale na yasana, kevaka o raica ni ra sa vakaitavi ka vuli tiko na gone mai na dua na iwase ni lesoni, kakua ni vakavorakitaki iko mo tomana tikoga mo vakadeitaka kina ni ko sa vakacavara na lesoni taucoko.