Mo Dou Vakananumi Au, mai vei Walter Rane

29 ni Me–4 ni Jiune

Maciu 26; Marika 14; Joni 13

“Mo Dou Vakananumi”

Ni o wilika na Maciu 26; Marika 14; kei na Joni 13, vakaraica na ivakavuvuli o nanuma ena vakalougatataki ira na gone o vakavulica.

Sureta na Veiwasei

Vakaraitaka na iyaloyalo ni veika a yaco ena veiwase eso oqo, vaka na iVola ni iYaloyalo Vakosipeli, naba 54–55, ka sureti ira na gone me ra tukuna na ka e yaco tiko ena iyaloyalo.

Vakavulica na iVunau: Gone Sobu

Maciu 26:26–29; Marika 14:22–24

Na sakaramede e vukei au meu vakananumi Jisu.

Vukei ira na gone me ra kila ni kena tauri na sakaramede sa dua na gauna me da nanuma kina na veika sa cakava vei keda o Jisu.

iTaviqaravi e Rawa ni Caka

• Vakalekalekataka na italanoa kei Jisu ni vakarautaka voli na sakaramede. E rawa ni o vakayagataka na “Wase e 49: Na iMatai ni Sakaramede” (e Na iTukuni ena Veiyalayalati Vou, 124–26, se na kena vidio ena ChurchofJesusChrist.org), se na vidio “Sacrament” (ChurchofJesusChrist.org). Na cava eda taura kina na sakaramede? Vukei ira na gone mera kila ni da dau nanumi Jisu ena gauna ni sakaramede.

• Vakaraitaka vei ira na gone e dua na tiki ni madrai kei na dua na bilo wai. Tarogi ira na gone ke ra kila se cava e matataka na madrai kei na wai ni sakaramede. Vakamacalataka ni ivakananumi oqo e vukei keda me da nanuma ni a mate ena vukuda ka tucake tale mai na mate o Jisu.

• Kerei ira na gone me ra bobo ka vakasamataka e dua era dau lomana, ka qai sureti ira me ra tukuna mai vei iko me baleta na tamata oya. Kerei ira me ra bobo tale, vakananuma na iVakabula, ka qai wasea na veika era kila me baleti Koya. Vakauqeti ira me ra dau vakasamataki Jisu ena gauna ni sakaramede e veimacawa.

• Sureti ira na gone me ra vakaraitaka mai na ka era rawa ni cakava me ra nanumi Jisu kina ka vakarokoroko ena gauna ni sakaramede. Vukei ira na gone me ra cakava na ivolalailai e vakamacalataki tiko ena tabana ni itaviqaravi ni macawa oqo ka vakayagataka me vukei ira me ra vakasamataki Jisu ena gauna ni sakaramede. Se vukei ira me ra vaqara eso na mekesini ni Lotu me baleta na iyaloyalo kei Jisu ka cakava e dua na ivolayaloyalo era rawa ni raica toka ena gauna ni sakaramede.

Joni 13:34–35

Au rawa ni lomani ira na tani me vakataki Jisu.

A vakaraitaka o Jisu na Nona loloma ena nona lomani ira era tu wavoliti Koya. Na madigi cava soti e tu vei ira na gone o vakavulica me ra vakaraitaka kina na nodra loloma vei ira na tani?

iTaviqaravi e Rawa ni Caka

• Vakaraitaka na iyaloyalo ni italanoa eso era sa vulica na gone ena yabaki oqo ni a vakaraitaka kina o Jisu na Nona loloma vei ira na tani (raica na ituvatuva eso sa oti ena Lako Mai, Mo Muri Au—Me Baleti Ira na Tamata Yadua kei na Matavuvale). Wilika na Joni 13:34–35, ka vukei ira na gone me ra tokaruataka na malanivosa “Me vaka ka’u sa lomani kemudou, … dou veilomani talega vakakina.” Eda na vakaraitaka beka vakacava na noda loloma ki na noda matavuvale kei ira na itokani?

• Sureta e dua na gone me taura cake e dua na iyaloyalo ni iVakabula ni lagata tiko na kalasi e dua na sere me baleta na loloma ni iVakabula, me vaka na “Dou Veilomani” (iVolanisere ni Gonelalai, 74). Solia vei ira na gone eso na ate pepa ka sureti ira me ra droinitaka e dua na kedra iyaloyalo ni ra cakava tiko e dua na ka me vakaraitaka na nodra lomana e dua tale na tamata.

Vakavulica na iVunau: Gone Qase Cake

Maciu 26:26–29; Marika 14:22–24

E dau vukei au na sakaramede meu nanumi Jisu Karisito kei na Nona solibula ena vukuqu.

O na rawa ni vukei ira vakacava na gone mera vakila e dua na sakaramede vakaibalebale cake?

iTaviqaravi e Rawa ni Caka

• Sureti ira na gone me ra veivukevuketaka na wiliki ni veitikina ena Maciu 26:26–29 se na Marika 14:22–24 (raica talega na iVakadewa nei Josefa Simici, Marika 14:20–24 [ena iDusidusi ki na iVolanikalou]) kei na Vunau kei na Veiyalayalati 20:75–79. Na vosa kei na vakasama cava soti era tautauvata ena rua na malanivosa oqo?

• Tarogi ira na gone na cava era dau cakava me vukei ira ni vakasamataki Jisu ena gauna ni sakaramede. Vukei ira me raica na ivolanikalou se vosa eso mai na sere ni sakaramede e rawa ni ra wilika ena gauna ni sakaramede, ka qai volai ira ena dua na kadi era rawa ni raica na gone ena nodra vakayagataka na sakaramede ka tarava. Lagata e vica na sere oqo vata kei ira na gone (raica na Serenilotu,, naba 97–113).

  

  E vukei keda na sakaramede me da nanumi Jisu Karisito kei na Nona solibula ena vukuda.

• Vola ena papa na veimalanivosa bibi mai na masu ni sakaramede, ka vukei ira na gone mera cavuqaqataka. Na cava na ibalebale ni veimalanivosa oqo? Na cava e bibi kina meda vakavouya na noda veiyalayalati ni papitaiso ena veimacawa?

• Sureta e dua na lewe ni Matabete i Eroni me tukuna vei ira na gone na ka e dau sotava ena vakarautaki, masulaki, se veivotayaki ni sakaramede. Na cava e dau vukea na nona vakavakarau me cakava oqo? E vakacava na ivakarau ni yalona ni cakava tiko? E vakananumi koya vakacava baleta na iVakabula na madrai kei na wai?

• Kerei ira na gone ka sa papitaiso me ra wasea na ka era nanuma baleta na nodra papitaiso. E vakacava beka na veika era a vakila? Na veiyalayalati cava era a cakava? (raica na Mosaia 18:8–10). Tukuna vei ira ni veimacawa eda vakayagataka kina na sakaramede, e sa rawa ni vaka ni da papitaiso tale—sa rawa ni da vosoti ena noda ivalavala ca, ka da vakavouia na noda veiyalayalati.

Joni 13:1–17

A vakaraitaka vei au o Jisu Karisito na ivakarau meu qaravi ira kina na tani.

Na itukutuku ni nona savata na yavadra na Nona tisaipeli na iVakabula e rawa ni vakauqeti ira na gone o vakavulica me ra qaravi ira na tamata era tu wavoliti ira ena loloma.

iTaviqaravi e Rawa ni Caka

• Ni vo toka e vica na siga, kerea e dua vei ira na gone me wilika na Joni 13:4–9 ka wasea na itukutuku qori ki na kalasi mai na rai nei Pita. Na cava a saga tiko na iVakabula me vakavulica vei Pita kei ira na iApositolo tale eso? E rawa ni ra veivosakitaka na gone na veika era vulica mai na italanoa oqo me baleti Jisu Karisito. Na cava eda vulica me baleta na qaravi ira na tani?

• Wilika vata na Joni 13:12–17. Kerei ira na gone me ra vola yadua na gauna a qarava kina e dua tale na tamata na iVakabula. Vakauqeti ira me ra okata na veika era vulica mai na Nona ivakaraitaki. Kevaka era gadreva na veivuke, e rawa ni ra vaqara na ivakaraitaki eso ena vidio “Christlike Attributes” (ChurchofJesusChrist.org). Kerei ira me ra wasea na veika era vola ena kalasi.

Joni 13:34–35

O ira na tisaipeli i Jisu Karisito era lomani ira na tani me vakataki Koya.

Ni da sa papitaiso, eda sa cakava na veiyalayalati meda sa tisaipeli i Jisu Karisito. Ena Joni 13:34–35, e vakamacalataka kina na iVakabula na sala eda rawa ni vakaraitaka kina ni da sa Nona tisaipeli.

iTaviqaravi e Rawa ni Caka

• Vola ena papa talega vakakina; me vaka ka’u sa kemudou (Joni 13:34). Kerei ira na gone me ra vakaraica ena ivolanikalou ka vakalewena na veitikina lala. Na cava tale eda rawa ni cakava meda vakaraitaka kina ni da sa tisaipeli i Karisito? Era na vakasamataka beka na gone eso tale na vosa ena vakacavara na yatuvosa ena papa, me vaka na veiqaravi kei na qaravi se veivakavulici kei na vakavulica.

• Sureti ira na gone me ra wilika na Joni 13:35 ka vakasamataki ira na tamata era kila era ivakaraitaki ni tisaipeli i Jisu Karisito. Kerei ira mera wasea na sala era vakaraitaka kina na tamata oqo na nodra lomani ira na tani me vaka a vakayacora na iVakabula.

Vakauqeta na Vuli e Vale

Sureti ira na gone mera wasea kei na nodra matavuvale e dua na ka era na cakava ena vuku ni veika era sa vulica ena kalasi. Me ivakaraitaki, e rawa ni ra wasea na sala era na nanumi Jisu Karisito kina ena gauna ni sakaramede.

Vakatorocaketaki Noda Veivakavulici

Wasea na nomu ivakadinadina ki na kalasi. Na ivakadinadina e rawa ni rawarawa sara me vaka “Au kila ni lomani kemuni yadua na Tamada Vakalomalagi” se “Au vakila na vinaka ni lomaqu ni’u vulica me baleti Jisu Karisito.”