Ecce Homo [Raica na Tamata], mai vei Antonio Ciseri

19–25 ni June

Maciu 27; Marika 15; Luke 23; Joni 19

“Sa oti”

Tekivuna na nomu vakavakarau ena wiliki ni Maciu 27; Marika 15; Luke 23; kei na Joni 19. Segata ena yalomasumasu mo kila na nodra gagadre na gone.

Sureta na Veiwasei

Me ra veivukevuke na gone yadua ni taura nai yaloyalo mai na ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale. Ni tauri tu nai yaloyalo, me qai wasea na gone yadua e dua na ka e raica rawa ena i yaloyalo.

Vakavulica na iVunau: Gone Sobu

Maciu 27:11–66; Luke 23; Joni 19

Baleta ni a mate o Jisu ena vukuqu, au sa rawa ni tucake tale.

Era na rairai lomabibi na gone lalai ena i talanoa ni nona Vakamatei o Jisu. “Wase e 52: Na Veilewai i Jisu” kei na “Wase e 53: Vakoti ki na Kauveilatai o Jisu” (e Na iTukuni ena Veiyalayalati Vou, 133–38, se na kena vidio ena ChurchofJesusChrist.org) e vakarautaka e dua na iwalewale vinaka ni nomu rawa ni wasea kina vakadodonu na italanoa oqo vei ira.

iTaviqaravi e Rawa ni Caka

• Vakaraitaka nai yaloyalo ena ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale ni o tukuna na veilewai, Vakamatei, kei na bulu i Jisu (raica talega na iVola ni Yaloyalo Vakosipeli, naba 57–58). Sureti ira na gone me ra wasea na ka era kila tu baleta na veika a yaco oqo. Vakabibitaka ni a tucake tale o Jisu enai katolu ni siga. Dua tale na kena itukutukuni, a lesu bula tale mai o Koya.

• Kerei ira na gone me ra vakayacana eso na ka era dau cakava ena vukudra na nodra itubutubu ka ra sega ni rawa ni cakava vakai ira. Vakaraitaka e dua nai yaloyalo ni iVakabula. Vakamacalataka ni sa rawa ni da tucake tale ena vuku i Jisu—e dua na ka eda sega ni rawa ni cakava vakai keda.

• Vakaraitaka na kena i yaloyalo e dua o kila ni sa mate. Wasea na nomu ivakadinadina ni na bula tale na tamata oya ena dua na siga ena vuku i Jisu.

Na Veibulu, mai vei Carl Heinrich Bloch

Maciu 27:26–37; Luke 23:34

Au rawa ni vosoti ira na tani me vakataki Jisu.

O na vukei ira vakacava na gone me ra kila matua na sala me ra vosoti ira kina na yaloca, me vakataki Jisu?

iTaviqaravi e Rawa ni Caka

• Vakamacalataka na sala era a yaloca kina na sotia vei Jisu (raica na Maciu 27:26–37), qai wilika na Luke 23:34. Vakamacalataka ni gauna eda vosoti ira kina na tani, eda sa sega tale ni qai cudruvi ira ka da vakaraitaka na loloma kivei ira.

• Wasea na ivakaraitaki eso a yaloca kina e dua na tamata ena vosa se ivalavala. Sureti ira na gone me ra veivosakitaka na sala era rawa ni vakaraitaka kina na veivosoti ena veigauna vakaoqo.

• Lagata vata e dua na sere me baleta na veivosoti, vaka na “Ni Vukei Au Mai Noqu Kalou” (iVolanisere ni Gonelalai, 52). Taroga na taro eso e saumi ena sere, me vaka “O cei me da vosota?” se “O cei e rawa ni vukei keda ni sa dredre na veivosoti?”

• Vaqara e dua na lavelave ni iTokani walega oqo mo raica kina na talanoa ni dua na gone ka a vosota e dua na tamata. Wasea nai talanoa oqo vata kei ira na gone.

Luke 23:32–33, 39–43

Baleta ni a vakararawataki ka mate o Jisu ena vukuqu, au sa rawa ni veivutuni ka vosoti tu.

Dina ga ni se bera ni yalomatua na gone bera ni yabaki walu, sa ka bibi vei ira me ra sa tekivu vulica tiko oqo na sala me ra veivutunitaka kina na digidigi cala era cakava.

iTaviqaravi e Rawa ni Caka

• Vakalekalekataka na Luke 23:32–33, 39–43, ka vukei ira na gone ni raici rau na daubutako ena i yaloyalo 57 ena iVola ni Yaloyalo Vakosipeli. Vakamacalataka ni gauna a vakalialiai Jisu kina nai matai ni daubutako, a tusanaka nai karua ni daubutako ni a cakava e dua na cala—sa tekivu tiko me veivutuni o koya.

• Wilika vei ira na gone na Vunau kei na Veiyalayalati 19:16. Cava na vuna a vakararawataki kina o Jisu ena vukuda?

• Vakaraitaka na vidio “The Shiny Bicycle” (ChurchofJesusChrist.org). Vakamacalataka ni rawa ni da masu vua na Tamada Vakalomalagi ka na vukei keda o Koya me da walia na noda ivalavala ca kei na cala eso ka ciqoma na veivosoti.

• Me ra caka maka ni joke ena papa ni volavola na gone me matataka na digidigi cala eso. Qai kerei ira me ra bokoca me matataka na veivutuni. Vakaraitaka e dua nai yaloyalo ni iVakabula, ka vakadinadinataka ni rawa ni da veivutuni ena Vukuna.

Vakavulica na iVunau: Gone Qase Cake

Maciu 27:11–66; Luke 23; Joni 19

A mate o Jisu ena vukuqu baleta ni sa lomani au.

Cava na vuna o vakavinavinakataka kina ni a mate o Jisu Karisito ena vukumu? Vakasamataka na sala o rawa ni vukei ira kina na gone me ra kila matua na bibi ni nona solibula na iVakabula ena vukudra.

iTaviqaravi e Rawa ni Caka

• Vola na veika bibi a yaco ena Maciu 27:11–66 ena so na tiki ni pepa duidui (me vukea ni caka oqo, raica na “Wase e 52: Na Veilewai i Jisu” kei na “Wase e 53: Vakoti ki na Kauveilatai o Jisu,” e Na iTukuni ena Veiyalayalati Vou, 133–38, se na kena vidio ena ChurchofJesusChrist.org). Sureti ira na gone me ra vulica na veitikina oqo ka tuva vakadodonu na veika a yaco.

• Kerea e dua na gone me wilika na Maciu 27:54, ka sureti ira na gone me ra wasea na veika baleti Jisu e vukei ira ni kila ni sa Luve ni Kalou o Koya.

• Tarogi ira na gone na cava era vulica me baleta na Vakoti ki na Kauveilatai ena “Mai Mate Noda Tui Sau” (Sere ni Lotu, naba 108) se dua tale na sere ni sakaramede. Cava na vuna a lomasoli kina o Jisu me mai vakararawataki ena vukuda? (raica na Vunau kei na Veiyalayalati 18:10–11; 19:16).

Maciu 27:26–37; Luke 23:34

Au rawa ni vosoti ira na tani me vakataki Jisu.

E rawa ni dredre me da vosoti ira na tani. Era na vakalougatataki na gone o vakavulica ni ra muria na ivakaraitaki ni iVakabula ka vulica me ra dau veivosoti.

iTaviqaravi e Rawa ni Caka

• Sureti ira na gone me ra veivukevuke ni wilika baleti ira na sotia ka yaloca tu vei Jisu ena Maciu 27:26–37 ka qai vosoti ira o Jisu ena Luke 23:34. (Raica na raititobu vakarautaki mai na iVakadewa i Josefa Simici ena Luke 23:34, ivakamacala e ra c.) Na cava eda vulica mai na ivakaraitaki i Jisu?

• Vola ena papa ni volavola Na cava o rawa ni cakava mo vosota kina e dua ka yaloca vei iko? Me ra veivukevuke na gone ni vola na vakasama eso ena papa ni volavola, me vaka na Masuta mo yalovinaka kivua na tamata oqori se Vakasamataka e dua na ka vinaka baleta na tamata oqori.

Luke 23:32–33, 39–43

Baleta ni a vakararawataki ka mate o Jisu ena vukuqu, au sa rawa ni veivutuni ka vosoti tu.

Na lesoni oqo sa dua na gauna vinaka me vakadinadinataki kina ni sa rawa ni da veivutunitaka na noda ivalavala ca ka vosoti tu ena vuku i Jisu Karisito.

iTaviqaravi e Rawa ni Caka

• Sureta e dua na gone me wilika i cake na Luke 23:32–33, 39–43. Vakamacalataka ni rau sa daubutako na tamata ka vakoti vata tu kei Jisu. A vakaraitaka vakacava e dua vei rau na daubutako ni sa tekivu tu me veivutuni? Na cava eda rawa ni cakava me vakaraitaka ni da sa veivutuni tiko? (Raica na iDusidusi ki na iVolanikalou, “Veivutuni, Na Veivutuni,” scriptures.ChurchofJesusChrist.org.)

• Vola na i yatuvosa oqo ena papa ni volavola, ka vakalala na vanua me biu kina na vosa kala eso: “Sa rawa ni’u vosoti tu ni’u sa veivutuni ena vuku ni Veisorovaki i Jisu Karisito.” Solia vei ira na gone na vakatakilakila eso me vukea nodra vakalewena na vanualala.

• Sureta e dua na gone me taura e dua na katotuberi, ka vakatawana ena vatu ni ra cavuta na vo ni gone na digidigi cala eso e rawa ni cakava e dua. Vukei ira na gone ni vakatauvatana na katotuberi ki na icolacola vakayalo eda colata tu ni da cakacala. E sa vakataka tu vakacava na kau tani ni vatu mai na katotuberi na veivutuni? O rawa ni vakananumi ira na gone ni veivutuni e sega ni dua na ka e yaco vakadua ga ia sa dua na ivakarau ni veisiga.

• Raica ena dua nai lavelave vou ni mekasini na iTokani e dua nai talanoa se i tukutuku baleta na veivutuni, ka wasea vei ira na gone.

Vakauqeta na Vuli e Vale

Vakauqeti ira na gone me ra vakasamataka e dua era gadreva me ra vosota ka navuca e dua na ka era na cakava me vakaraitaka vua na tamata oya ni ra sa vosoti koya.

Vakatorocaketaki Noda Veivakavulici

Vulica mo vakila na ivakatakila. Sa dau yaco mai na ivakatakila ena “vosa ena vosa” (2 Nifai 28:30), sega ni taucoko ena dua ga na gauna. Ni o masuta ka vakasamataka matua na ivolanikalou kei na ituvatuva oqo, o na raica ni sa rawa ni basika na vakasama kei na veivakauqeti eso ena dua ga na gauna kei na vanua cavaga—ni o lako ki cakacaka, cakava na cakacaka ni vale, se veimaliwai kei ira na matavuvale kei na veitokani.