17–23 Jiyè.

Travay 10–15

“Pawòl Bondye a Te Simaye epi l Te Miltipliye”

Etidye Travay 10–15 nan yon espri lapriyè, pandan w ap panse a timoun yo ki nan klas ou a. Ki verite w jwenn nan chapit sa yo ke w santi w enspire pou w anseye timoun yo?

Envite Pataj

Pou ede timoun yo pataje sa y ap aprann ak sa y ap fè eksperyans yo, ou gen dwa mande yo pou yo di kisa yo fè pou yo montre ke yo kwè nan Jezikri.

Anseye Doktrin nan: Timoun Ki Pi Piti yo

Travay 10:34–35

Papa nou ki nan syèl la renmen tout pitit Li.

Yon doktrin fondamantal ke menm timoun piti yo ka konprann sèke nou chak se yon pitit Bondye epi Li renmen tout pitit Li.

Aktivite Posib

• Montre foto Kris la avèk timoun ki soti toupatou nan mond lan (Liv Ilistrasyon Levanjil la, no.116) pandan w ap li Travay 10:34–35. Eksplike ke nan epòk Pyè a, gen kèk moun ki te panse ke benediksyon levanjil yo se pa t pou tout moun. Men Pyè te aprann ke Bondye renmen tout pitit Li epi Li vle pou yo tout aprann levanjil la.

• Envite timoun yo desine yon foto tèt yo. Pandan y ap pataje foto yo, pale de yon bagay ou renmen nan chak timoun yo. Pataje temwayaj ou ke Pè Selès la renmen yo chak ak tout pitit Li, kèlkeswa sa yo sanble oubyen ki kote yo soti.

• Chante avèk timoun yo yon chan sou renmen lòt moun—paregzanp “Je viens vers toi” (Chants pour les enfants, 78). Envite yo pou yo di ki fason yo ka montre lanmou pou tout moun, jan Jezi te fè a.

• Lonje dwèt sou chak timoun youn pa youn pandan w ap di, “Pè Selès la renmen [non timoun nan].” Fè timoun yo pran tan pou youn lonje dwèt sou lòt pandan y ap repete fraz sa a.

Travay 11:26

Mwen se yon kretyen paske m kwè nan Jezikri epi m ap suiv Li.

Kijan w ka ede timoun yo konprann kisa Kretyen vle di?

Aktivite Posib

• Li Travay 11:26 pou yo, epi envite yo pou yo kanpe lè yo tande w di mo Kretyenan. Mande yo selon yomenm, kisa sa vledi pou yon moun se yon Kretyen. Eksplike ke yon moun ki kwè nan Jezikri epi ki suiv Li, yo rele l Kretyen, pa konsekan, nou se Kretyen.

• Chante avèk timoun yo yon chan sou Jezikri, tankou “Je ressens son amour” (Chants pour les enfants, 42–43). Kijan nou ka montre ke nou se moun k ap suiv Jezikri epi nou se manm Legliz Li a? Ede timoun yo panse a kèk bagay senp yo kapab fè pou suiv Jezi lakay yo, nan lekòl yo, ak nan lòt kote.

Pè Selès la renmen nou epi Li reponn priyè nou.

Travay 12:1–17

Pè Selès la tande nou epi Li reponn priyè nou.

Istwa zanj lan k ap libere Pyè nan prizon an anseye avèk puisans ke Pè Selès la reponn priyè.

Aktivite posib

• Envite timoun yo pou yo jwe wòl istwa Pyè y ap libere nan prizon an ki nan Travay 12:1–17 la pandan w ap fè yon rezime sou istwa a. Kijan Pè Selès la te reponn priyè moun ki t ap priye pou Pyè yo?

• Chante yon kantik sou lapriyè—paregzanp, “Le front baissé” (Chants pour les enfants, 25)—epi sigjere kèk jès ki ale avèk pawòl yo pou ede timoun yo aprann kijan pou yo priye. Envite timoun yo pou yo pataje egzanp sou kèk bagay yo ka remèsye Pè Selès la pou yo ak kèk bagay yo ka mande Li nan lapriyè.

• Montre foto moun k ap priye, (gade, paregzanp, Liv Ilistrasyon Levanjil la, nos.111–12) pandan w ap pataje yon eksperyans kote Pè Selès la te reponn priyè w.

Anseye Doktrin nan: Timoun Ki Pi Gran yo

Travay 10:34–35; 15:6–11

”Bondye pa rejte pèsonn.”

Timoun w ap anseye yo bezwen konprann ke Pè Selès la renmen tout pitit Li, kèlkeswa sa yo sanble, kèlkeswa ki kote yo soti, oubyen chwa yo fè.

Aktivite posib

• Mande timoun yo si yo ka di kiyès yon moun ye nan senpleman gade l oubyen devine ki kote l soti. Selon Travay 10:35, kijan Bondye detèmine si yon moun “akseptab pou Li”?

• Li Travay 10:34–35; 15:6–11 avèk timoun yo. Eksplike ke nan epòk Pyè a, Juif yo te panse Bondye pa t aksepte moun ki pa t Juif (yo te rele moun sa yo Janti). Men Bondye te anseye Pyè ke Bondye renmen tout pitit Li, ni Juif ni Janti. Chante ansanm “Je suis enfant de Dieu” (Chants pour les enfants, 2–3). Envite timoun yo pou yo mete non yo chak lè yo tande je oubyen moi.

• Envite yo pou yo pataje yon bagay unique sou yon lòt moun nan klas la. Eksplike yo ke deklarasyon: “Bondye pa rejte pèsonn” nan vledi Pè Selès la renmen tout pitit Li, epi, paske L renmen yo, Li vle yo tout tande levanjil la.

Travay 11:26

Yon Kretyen se yon moun ki kwè nan Jezikri epi ki suiv Li.

Kijan w ka ede timoun yo konprann ke pawòl yo ak aksyon yo montre ke yo se Kretyen?

Aktivite posib

• Envite timoun yo pou yo li Travay 11:26; 3 Nefi 27:3–8; ak Doktrin ak Alyans 115:4. Ekri mo Kretyen an sou tablo a epi souliyen pati ki di “Kris” la. Mande yo selon yomenm, kisa sa vledi pou yon moun se yon kretyen.

• Mande yo pou yo di non kèk diferan gwoup yo fè pati, tankou fanmi yo oubyen peyi yo. Envite yo pou yo di ki rezon k fè yo rekonesan dèske yo se yon Kretyen epi yo fè pati Legliz Jezikri pou Sen Dènye Jou yo. Kijan nou ka montre lòt moun ke nou se Kretyen?

• Montre plizyè objè oswa foto ke reprezante verite ki unique a Legliz Jezikri a, tankou yon foto retablisman prètriz la (gade Liv Ilistrasyon Levanjil la, nos 93–94). Mande yon timoun pou l chwazi youn nan objè oswa foto sa yo epi dekri kijan l se yon benediksyon nan Legliz nou an. Di yo byenke Kretyen toupatou nan mond lan apatni a plizyè legliz diferan, noumenm nou fè pati menm Legliz Jezikri te etabli sou tè a.

• Pase videyo “True Christianity (vrè Krisyanite” a nan (ChurchofJesusChrist.org). Envite yo pou yo desine kèk bagay yo ka fè pou yo ka vrè Kretyen.

Travay 12:1–17

Lè m priye ak lafwa, Pè Selès la ap reponn.

Medite sou moman kote Pè Selès la te reponn priyè w. Kijan w ka itilize eksperyans sa yo pou anseye timoun yo ke Pè Selès la ap tande priyè yo epi L ap reponn yo nan moman pa L ak nan tan pa L.

Aktivite posib

• Envite yo pou yo jwe wòl istwa zanj lan k ap delivre Pyè nan prizon an nan Travay 12:1–17la pandan yon lòt timoun ap li istwa a.

• Mande yo sa yo panse fraz “priyè te fèt san rete” a vledi (Travay 12:5). Nan ki fason priyè moun yo te jwenn repons? Envite timoun yo pou yo pataje eksperyans kote Pè Selès la te reponn priyè pèsonèl yo oubyen priyè yon manm fanmi yo. Ou ta gen dwa pataje yon eksperyans kote L te reponn priyè w tou. Ou ta gen dwa enkli eksperyans kote repons lan te vini nan yon fason w pa t atann. Temwaye ke Bondye renmen nou, epi L ap reponn priyè nou nan fason ak nan moman ki pi bon pou nou an.

Ankouraje Aprantisaj Lakay

Envite timoun yo pou yo fè yon bagay ki raple yo sa yo te aprann jodia, tankou yon rapèl pou priye.

Amelyore Ansèyman Nou

Temwaye konsènan benediksyon yo pwomèt yo. Lè w mande timoun Primè yo pou yo respekte yon prensip, di yo ki pwomès Bondye fè moun ki respekte prensip sa a. Paregzanp, ou ka rann temwayaj sou benediksyon te resevwa lè w te priye ak lafwa.