Agosto 14–20

Mga Taga-Roma 7–16

“Dag-a ang Daotan pinaagi sa Maayo”

Samtang imong basahon ang Mga Taga-Roma 7–16, irekord ang bisan unsa nga mga impresyon nga imong madawat kon unsaon nimo pagtudlo ang mga bata sa mga kamatuoran niini nga mga kapitulo.

Dapita ang Pagpaambit

Pipila ka adlaw sa dili pa ang klase, dapita daan ang usa o daghan pa nga mga bata sa pagpangita og usa ka bersikulo diha sa Mga Taga-Roma 7–16 nga ilang ikapaambit sa klase. Mahimo nimong dapiton ang ilang mga ginikanan sa pagtabang kon gikinahanglan.

Itudlo ang Doktrina: Mas Gagmay nga mga Bata

Mga Taga-Roma 8:35–39

Ang akong Langitnong Amahan nahigugma kanako.

Unsaon nimo paggamit ang mga pulong ni Pablo aron sa pagtudlo sa mga bata nga ang Langitnong Amahan kanunay nga mohigugma kanila?

Posible nga mga Kalihokan

• Tabangi ang mga bata sa pagsag-ulo sa pulongan nga “[Walay] makapahimulag kanato gikan sa gugma sa Dios” (Mga Taga-Roma 8:39). Paghunahuna og usa ka paagi sa paghulagway niini nga kamatuoran. Sama pananglit, mahimo kang magdala og duha ka tabla nga imong gilansang sa usag usa, ang usa gisulatan og “kita” ug ang lain “ang gugma sa Dios.” Pasulaya ang mga bata kon mabulag ba nila ang duha ka tabla.

• Ipakita ang usa ka hulagway sa adlaw, o dapita ang mga bata nga molantaw sa gawas sa bentana ug tan-awon ang sidlak sa adlaw. Sa unsang paagi ang adlaw sama sa gugma sa Langitnong Amahan? Tabangi ang mga bata nga makasabot nga bisan og ang adlaw layo ra, makatabang kini kanato nga mobati og kainit. Atong mabati ang gugma sa Langitnong Amahan sa tanang panahon, bisan og dili nato Siya kauban sa pisikal nga paagi. Kantaha og dungan ang usa ka awit mahitungod sa gugma sa Langitnong Amahan, sama sa “Gihigugma Ako sa Langitnong Amahan” (Songbook sa mga Bata, 16–17).

Ang mga bata makatabang sa uban nga makat-on mahitungod sa Manluluwas ug magbaton og hugot nga pagtuo Kaniya. Storytime in Galilee [Panahon sa Pagsugilon og Istorya diha sa Galilea], ni Del Parson

Mga Taga-Roma 10:17

Moabot ang hugot nga pagtuo pinaagi sa pagpaminaw sa pulong sa Dios.

Samtang makadungog ang mga bata sa pulong sa Dios ug maminaw og maayo niini, ang ilang hugot nga pagtuo sa Dios molambo.

Posible nga mga Kalihokan

• Basaha ang Mga Taga-Roma 10:17 ngadto sa mga bata, ug pakit-a sila og mga hulagway sa mga sitwasyon diin makadungog sila sa pulong sa Dios (sama sa pamilya nga pagtuon sa kasulatan, mga klase sa simbahan, o kinatibuk-ang komperensiya; tan-awa ang pahina sa kalihokan niini nga semana). Pangutan-a ang mga bata kon kanus-a sila nakadungog sa pulong sa Dios.

• Isaysay ang istorya mahitungod sa usa ka bata nga naminaw sa pulong sa Dios sa lainlaing paagi. Samtang imong isaysay ang istorya, paburota sa hinay-hinay ang usa ka balloon aron sa pagrepresentar kon sa unsang paagi molambo ang hugot nga pagtuo sa usa ka bata sa matag higayon nga makadungog siya sa pulong sa Dios.

• Aron matabangan ang mga bata nga makasabot nga mahimong molambo ang ilang hugot nga pagtuo, tabangi sila sa pagkanta sa “Hugot nga Pagtuo” (Songbook sa mga Bata, 50–51). Samtang manganta sila, hangyoa sila nga magpakaaron-ingnon nga mga liso pinaagi sa paghupo. Sa matag higayon nga ilang kantahon ang pulong nga hugot nga pagtuo, pabaroga sila og gamay sama sa usa ka nagtubo nga tanom.

• Tagoi diha sa lawak klasehanan ang usa ka hugpong sa mga kasulatan, usa ka hulagway sa Presidente sa Simbahan, ug usa ka kopya sa Higala nga magasin. Hangyoa ang mga bata sa pagpangita niini nga mga butang ug sa pagpaambit kon sa unsang paagi ang matag usa naghimong posible alang kanato nga makadungog sa pulong sa Dios.

Mga Taga-Roma 16:1–4

Makapasalamat ako niadtong motabang kanako.

Mapasalamaton si Pablo alang sa mga tawo nga mitabang kaniya. Matabangan nimo ang mga bata nga makamatikod sa mabination nga mga butang nga gibuhat sa uban alang kanila ug mahinumdom sa pagpasalamat kanila.

Posible nga mga Kalihokan

• Ipasabot nga si Pablo mapasalamaton sa tabang nga iyang nadawat gikan sa usa ka babaye nga ginganlan og Phoebe ug sa magtiayon nga ginganlan og Priscila ug Aquila (tan-awa sa Mga Taga-Roma 16:1–4). Hangyoa ang mga bata sa pagdrowing og mga hulagway ni Pablo ug niining tulo ka tawo samtang basahon nimo kini nga mga bersikulo.

• Dapita ang matag bata sa pagpaambit og usa ka maayo nga butang nga bag-o lang gibuhat sa usa ka tawo alang kaniya. Tabangi ang mga bata sa paghimo og mga kard sa pasalamat alang niadto nga mga tawo.

• Tabangi ang mga bata nga makakat-on unsaon sa pagsulti og salamat sa lainlaing pinulongan. Ang awit nga “Mga Bata sa Tibuok Kalib[o]tan” (Songbook sa mga Bata, 4–5) makatabang.

Itudlo ang Doktrina: Mas Magulang nga mga Bata

Mga Taga-Roma 8:16–18

Gusto sa Langitnong Amahan nga mangandam ko sa pagdawat sa tanan nga anaa Kaniya.

Ang plano sa Langitnong Amahan naghimong posible alang kanato nga mahimong sama Kaniya ug makapanunod sa tanan nga anaa Kaniya. Kini nga kamatuoran makadasig sa mga bata nga imong gitudloan nga mas magmatinud-anon sa pagsunod sa ebanghelyo.

Posible nga mga Kalihokan

• Basaha og dungan ang Mga Taga-Roma 8:16–18. Unsa ang atong makat-onan gikan niini nga mga bersikulo kon si kinsa kita ug si kinsa kita nga mamahimo? Ipasabot nga ang usa ka “manununod” mao ang usa ka tawo kinsa makapanunod, o makadawat, sa unsay anaa sa iyang mga ginikanan. Isulat diha sa pisara ang Unsay kinahanglan natong buhaton aron makapanunod sa tanan nga anaa sa atong Amahan sa Langit? Kantaha og dungan ang usa ka awit mahitungod sa pagkamasulundon, sama sa “Sundon Ko ang Plano sa Dios” (Songbook sa mga Bata, 86–87), nga mangita sa mga tubag. Unsa pa nga mga tubag ang mahunahunaan sa mga bata?

• Hangyoa ang mga bata sa paghunahuna kabahin sa usa ka hari kinsa gusto nga ang iyang mga anak maoy magmando sa iyang gingharian sa umaabot. Ipasabot nga ang Langitnong Amahan sama sa usa ka hari, ug kita ang Iyang harianon nga mga anak. Mahimo nimong ipaambit ang istorya sa anak nga lalaki ni Haring Louis XVI sa France, nga makita diha sa pakigpulong ni Sister Elaine S. Dalton nga “Hinumd[o]mi kon Kinsa Kamo!” (Liahona, Mayo 2010, 121). Nganong importante man nga makahinumdom nga kita mga anak sa Langitnong Amahan ug gipakatawo nga mahimong sama Kaniya ugma damlag? Sa unsang paagi nga kini nga kamatuoran makaapekto sa mga pagpili nga atong himoon dinhi sa yuta?

Mga Taga-Roma 10:17

Moabot ang hugot nga pagtuo pinaagi sa pagpaminaw sa pulong sa Dios.

Ang mga bata adunay daghang oportunidad sa pagpaminaw sa pulong sa Dios. Tabangi sila nga makakita kon sa unsang paagi nga ang pagpaminaw sa pulong sa Dios makapalig-on sa ilang hugot nga pagtuo.

Posible nga mga Kalihokan

• Isulat ang mosunod nga kapahayag diha sa pisara: Ang naggikan sa , ug ang naggikan sa . Hangyoa ang mga bata nga sulatan og tubag ang mga blangko human mabasa ang Mga Taga-Roma 10:17. Pagpaambit og panahon sa dihang ang usa ka tawo mitudlo og kamatuoran sa ebanghelyo nga nakatabang sa paglig-on sa imong hugot nga pagtuo—tingali mahimo ka nga mopaambit og paborito nga kasulatan o kinutlo gikan sa kinatibuk-ang komperensiya. Dapita ang mga bata sa pagpaambit sa ilang kaugalingon nga mga kasinatian.

• Hatagi ang usa ka bata og hulagway sa Manluluwas nga nag-ayo sa usa ka tawo ug sultihi siya nga dili patan-awon ang ubang mga bata sa hulagway. Hangyoa ang bata sa paghatag og mga timailhan aron matabangan ang ubang mga bata sa pagtag-an kon unsa ang gipakita sa hulagway. Unsaon nato nga matabangan ang uban nga magkat-on mahitungod sa Manluluwas aron makabaton sila og hugot nga pagtuo diha Kaniya?

Mga Taga-Roma 14:10, 13

“Dili na kita maghukom sa usa ug usa.”

Kon ang mga bata makighalubilo sa uban nga mohimo og lahi nga mga pagpili kay kanila, tingali matintal sila nga manghukom. Ikonsiderar kon sa unsang paagi ang tambag ni Pablo ngadto sa mga taga-Roma makatabang kanila nga makalikay niana nga pagpanghukom.

Posible nga mga Kalihokan

• Dapita ang usa ka bata sa pagbasa sa Mga Taga-Roma 14:10, 13. Hangyoa ang mga bata sa pag-ihap kon kapila gigamit ni Pablo ang pulong nga hukom. Unsa ang gipasabot sa paghukom sa usa ka tawo? Nganong kinahanglan man natong likayan ang pagpanghukom sa uban?

• Ipakita ang hulagway sa usa ka tawo, ug pangutan-a ang mga bata kon unsay atong mahibaloan niini nga tawo pinaagi lamang sa pagtan-aw sa hulagway. Unsa ang pipila ka butang nga wala nato mahibaloi mahitungod kaniya? Nganong ang Ginoo man ang labing maayo nga makahukom niini nga tawo? (tan-awa sa 1 Samuel 16:7).

Awhaga ang Pagkat-on diha sa Panimalay

Hangyoa ang mga bata sa pagpili og usa ka kalihokan nga inyong gibuhat isip tibuok klase ug sa pagbuhat niini uban sa ilang mga pamilya. Sultihi sila nga sa sunod semana mahimo nilang mapaambit kon unsay ilang gibuhat.

Pagpalambo sa Atong Pagtudlo

Hatagi ang mga bata og mga oportunidad nga molihok. Kasagaran lisod alang sa mga bata nga maglingkod nga maminaw og maayo sulod sa taas nga panahon. Matag karon ug unya, dapita ang mga bata sa pagbarog alang sa usa ka bahin sa klase o sa paglingkod diha sa salog kay sa diha sa ilang mga lingkoranan.