A sikovi Paula e valeniveivesu na iVakabula sa tucaketale (raica na Cakacaka 23:11). Sa rawa ni sereki keda o Jisu Karisito mai na “ivua me da bobula kina” (Kalatia 5:1).

25 ni Sepiteba–1 ni Okotova

Kalatia

“Dou Lako Voli ena Yalo Tabu”

Ni o wilika na Kalatia, na cava e votu mai me baleta na ka era gadreva na gone ena nomu kalasi me ra vulica?

Sureta na Veiwasei

Solia vei ira na gone e vica na miniti me ra droinitaka e dua na ka era a vulica ena dua na veitalanaoa vakosipeli mai vale se ena lotu. Mera qai wasea na gone se cava e matataka na droini yadua.

Vakavulica na iVunau: Gone Sobu

Kalatia 5:22–23

Na Yalo Tabu e dau vukei au meu vakila na loloma, reki kei na vakacegu.

Era rawa ni vakila na gone sobu na vua ni Yalotabu. Oqo ena vakarautaki ira me ra dau vaqara na veivakayarayarataki ni Yalo Tabu ena nodra bula taucoko.

iTaviqaravi e Rawa ni Caka

• Vakaraitaka na iyaloyalo ni vica na mataqali vuanikau, ka kerei ira na gone me ra vakamacalataka se vakacava tu na ikanakana ni vuanikau yadua. Vakamacalataka me vaka ni duidui na ikanakana ni vuanikau, e rawa ni da vakila na Yalo Tabu ena veisala duidui, me vaka na loloma kei na vakacegu. Vakamacalataka eso na sala o sa vakila kina na Yalo Tabu ena nomu bula, ka me ra qai wasea na gone na ivakarau era vakila kina na Yalo Tabu.

E rawa ni ra vakila na gone ena veitabayabaki kece na “vua ni Yalotabu.”

• Wilika na Kalatia 5:22–23 vata kei ira na gone, ka vakamacalataka na vosa eso ena sega ni matau vei ira. Sureti ira yadua na gone me ra digitaka e dua na vua ni Yalotabu ka tukuni tiko ena veitikina oqo, ka vukei ira me ra vakasamataka e dua na gauna era a sotava kina. Sureti ira na gone me ra droinitaka na iyaloyalo rawarawa eso ni veika era sotava.

Kalatia 6:2

O Jisu Karisito e vinakata meu vukei ira na vakaleqai.

Na idusidusi ena Kalatia 6:2 e tautauvata kei na ivakavuvuli nei Alama ena Mosaia 18:8 vei ira na tamata era a vakarau papitaiso tiko. Taura na madigi oqo mo vukei ira na gone me ra vakavakarau ki na veiyalayalati ni papitaiso.

iTaviqaravi e Rawa ni Caka

• Vakaraitaka na iyaloyalo ni dua na gone e papitaiso tiko (me vaka na iVola ni iYaloyalo Vakosipeli, naba 104). Tarogi ira na gone se cava e cakava tiko na gone oya. Vakamacalataka ni gauna eda papitaiso kina, eda sa caka veiyalayalati, se yalayala. Wilika na Kalatia 6:2 se Mosaia 18:8 me vukea nodra vulica na gone e dua na ka eda yalataka me da cakava: me da colata vata na noda icolacola. Sureti ira na gone me ra droinitaka na iyaloyalo ni sala eso e rawa ni ra vukei ira kina era vakaicolacola voli.

• Wilika vei ira na gone na malanivosa oqo mai na Kalatia 6:2: “Dou veivuke ni colata na nomudou icolacola.” Me vakaraitaki na kena ibalebale oqo, solia vua e dua na gone e dua na ka bibi me colata. Qai kerea e dua me bole me vukea na gone oya ni colata na iyaya oya. Vakamacalataka vei ira na gone ni levu na ka e rawa ni vaka na icolacola, me vaka na tauvimate se yalorarawa se galili. Na cava eda rawa ni cakava me vukea e dua ena mataqali icolacola vaqo?

Kalatia 6:7–9

Na noda ivalavala, se vinaka se ca, e tiko na kena isau.

Ena kena vakavulici ni da tamusuka na veika eda kaburaka, me vaka e vakamacalataki ena Kalatia 6:7–9, e rawa ni o vakavulici ira na gone me ra vakasamataka na isau ni nodra ivalavala.

iTaviqaravi e Rawa ni Caka

• Vakaraitaka e dua na sorenikau kei na dua na kakana draudrau. Wilika na Kalatia 6:7–9 vei ira na gone. Kerei ira na gone me ra vakatayaloyalotaka ni ra tea e dua na sorenikau ni ra rogoca na vosa kaburaka. Kerei ira me ra vakatayaloyalotaka ni ra betia e dua na kakana draudrau mai vuna ni ra rogoca na vosa tamusuka.

• Vakaraitaka vei ira na gone e vica na mataqali kakana draudrau, ka vukei ira me ra vaqara kina na sorena. Biuta na sorenikau ena dua na bilo, me ra qai veivukevuke na gone me ra tomika e dua ka tukuna se kakana draudrau cava ena tubu mai kina ni ra tea. Vukei ira me ra raica me vaka ga ni na vakatau ena sorenikau eda tea na kakana draudrau eda na tauca, na digidigi eda cakava ena vakatautaka na isau kei na veivakalougatataki eda na qai ciqoma.

• Cakava e dua na laini ena fuloa mai na tepi. Biuta e dua na mata mamarau kei na dua na mata rarawa ena mua ni laini veibasai. Sureta e dua na gone me tucake ena lomadonu ni laini, ka vukei ira na vo ni gone me ra vakasamataka na digidigi eso ena veimuataki ki na marau se rarawa. Ena vei digidigi yadua, kerea na gone e lomadonu me kalawa yani ki na yasana ni marau se na yasana ni rarawa. Cakava vakavica na itaviqaravi oqo, me ra qai veivukevuke na gone me ra tucake ena tepi.

Vakavulica na iVunau: Gone Qase Cake

Kalatia 3:26–28

Na noda papitaiso e vakavuna meda “sa dua bauga ena vuku i Karisito.”

E vakavuvulitaka o Paula vei ira na Yalododonu e Kalatia ni gauna era papitaiso kina era na yaco me ra “sa dua bauga ena vuku i Karisito Jisu.” O na vukei ira vakacava na gone me ra segata na duavata e vakamacalataki ena Kalatia 3:26–28?

iTaviqaravi e Rawa ni Caka

• Sureti ira na gone me ra wilika na Kalatia 3:26–28 ka vakasamataka tiko na taro oqo: Na cava ena yaco ni’u sa papitaiso? O na vinakata beka mo vakanamata ena malanivosa me vaka “sa i Karisito dou sa vakasulumi kina” se “sa dua bauga ena vuku i Karisito.” Na cava beka na kedrau ibalebale na malanivosa oqo? E tautauvata vakacava na “sa i Karisito dou sa vakasulumi kina” kei na noda taura vei keda na Yacana? (raica na Vunau kei na Veiyalayalati 20:75–79). Na cava eda rawa ni cakava meda vakaraitaka kina vei ira na tani ni da sa taura vei keda na Yacana?

• Wilika vata na Kalatia 3:28, ka vakatakila eso na sala era a vakatakilai ira kina na tamata ni ra a papitaiso ena gauna nei Paula. Vukei ira na gone me ra cavuta eso na sala era vakatakilai ira kina nikua. Na cava e saga tiko o Paula me vakavulica vei keda me baleta na sala meda veiraici kina vakaikeda ni da sa papitaiso?

Kalatia 5:16, 22–23

Kevaka me’u “lako voli ena Yalo Tabu,” au na ciqoma na “vua ni Yalo Tabu.”

Ni da sa papitaiso ka ciqoma na isolisoli ni Yalo Tabu, eda na rawa ni ciqoma vakalevu cake na vua ni Yalotabu ena noda bula. O na vukei ira vakacava na gone me ra kila na vua oqo ena nodra bula?

iTaviqaravi e Rawa ni Caka

• Solia vei ira yadua na gone e dua na tikini pepa (mo kotiva tu me vaka na vuanikau eso), ka kerei ira me ra vaqara e dua na “vua ni Yalo Tabu” ka volai tu ena Kalatia 5:22–23. Sureti ira me ra vola e dua na vuana ena dua na yasa ni pepa kei na kena vosa veibasai ena yasana kadua. (Vukei ira me ra kila na vosa e sega ni matau vei ira.) Sureti ira mera wasea na nodra vuana eso ki na kalasi. Na cava eda rawa ni cakava me tiko ga kina kei keda na Yalo Tabu?

• Sureti ira na gone me ra wilika baleta na vua ni Yalo Tabu ena Kalatia 5:22–23 ka vola se droinitaka na iyaloyalo ni dua na gauna era a vakila kina e dua vei ira na vuana oya. Kerei ira me ra wasea na nodra italanoa se iyaloyalo kei na dua tale ena kalasi. Na cava na vuna e dua kina na sala vinaka na vuanikau me vukei keda ni kila na ivakarau e dau vakayarayarataki keda kina na Yalo Tabu?

Kalatia 6:7–9

Na noda ivalavala, se vinaka se ca, e tiko na kena isau.

Vukea me ra kila na gone ni isau ni noda itovo ena so na gauna dau yaco mai ena gauna vata ga ka so tale na gauna ena yaco mai “ena kena yabaki” (tikina e 9).

iTaviqaravi e Rawa ni Caka

• Wilika vata na Kalatia 6:7–9. Vakarautaka e dua na lisi ni cakacaka (se sorenikau eda “kaburaka”) kei na kena isau (se na vuana eda “tamusuka”). Kerei ira na gone me ra vakasotara vata na cakacaka ki na kena isau.

• Sureti ira na gone me ra vola eso na veivakalougatataki era nuitaka me ra ciqoma mai vua na Tamada Vakalomalagi. Vukei ira me ra vakasamataka na “sorenikau” me ra na kaburaka me rawa ni ra “tamusuka” kina na veivakalougatataki oqori.

Vakauqeta na Vuli e Vale

Vukei ira na gone me ra vakaraica na sala eso e tutaki kina na dina era sa vulica nikua ki na nodra bula e veisiga. Me ivakaraitaki, e rawa ni o sureti ira me ra vakaraica toka na kena isau vinaka, se “vuana,” e yaco mai ena vuku ni vakatulewa vinaka era cakava.

Vakatorocaketaki Noda Veivakavulici

Moica na itaviqaravi me ganita nodra yabaki na gone. Solia vei ira na gone na madigi me ra vakaitavi, ia nanuma tiko ni na duidui na ka era rawata me vaka na nodra dui yabaki kei na yalomatua. O ira na gone sobu era na gadreva vakalevu cake beka na veituberi kei na veidusimaki. Ni ra sa matua mai, sa rawa ni ra cau vakalevu na gone ka rawa ni vinaka sara ni wasea na nodra vakasama. (Raica na Veivakavulici ena iVakarau ni iVakabula,, 25–26.)