Droini sokumuni mai vei Eric Johnsen: Na Matabose Cecere, mai vei Robert T. Barrett; isoso kalokalo iloloma ni European Space Agency

11–17 ni Tiseba

Ai Vakatakila 6–14

“Era sa Rawai … ena vuku ni Dra ni Lami”

Ni o wilika na Ai Vakatakila 6–14, vakasamataki ira na gone o vakavulica. E rawa ni vukei iko na Yalo Tabu mo kila na dina ena yaga vei ira.

Sureta na Veiwasei

Vakaraitaka eso nai yaloyalo ena vukei ira na gone me ra nanuma na veika era se qai vulica oti ga mai vale se ena Lalai. Kerei ira na gone mera wasea na veika era kila me baleta nai yaloyalo oqori.

Vakavulica na iVunau: Gone Sobu

Ai Vakatakila 7:9, 13–14

Sa vukei au o Jisu Karisito meu savasava.

A raica o Joni e vuqa na tamata ka vakaisulu ena icurucuru balavu “sa … vakavulavulataki ena dra ni Lami” (tikina e 14). Vakasamataka na sala e rawa ni vukei ira kina na gone na raivotu oqo me ra kila na bibi ni noda savai ena Veisorovaki i Jisu Karisito.

iTaviqaravi e Rawa ni Caka

• Vakaraitaka vei ira na gone eso na isulu vulavula (se dua na yaloyalo ni so) kei na dua na yaloyalo i Jisu. Wilika na Ai Vakatakila 7:9, 13–14 vei ira na gone, ka kerei ira me ra dusia nai yaloyalo kei na isulu ena veigauna era rogoca kina na vosa vulavula. Vakamacalataka ni sulu vulavula e matataka na savasava ka vakananuma vei keda ni o Jisu Karisito e rawa ni savai keda mai na noda cakacala.

• Vakaraitaka vei ira na gone e dua na tiki ni sulu vulavula se tiki ni pepa, ka me ra vakadukara ena nodra vakavola ena peni se boroya kina na duka. Vakamacalataka ni gauna eda talaidredre kina ki nai vunau, ena rawa ni vaka na duka ena noda isulu. Vakaraitaka e dua nai yaloyalo kei Jisu e Kecisemani (me vaka na iVola ni Yaloyalo Vakosipeli, naba 56), biuta tani na isulu se pepa duka, ka vakaraitaka vei ira e dua na ka savasava. Vakadinadinataka ni o Jisu Karisito e rawa ni vukei keda me da savasava.

• Lagata e dua na sere baleta na papitaiso, me vaka na “Vaqara Drodrolagi Ni Bula Vesu No” (Volanisere ni Gonelalai, 53), ka vakadinadinataka ni sa vukei keda o Jisu me da savasava ni da papitaiso tu.

Ai Vakatakila 12:7–11

Au a vakaraitaka na noqu vakabauti Jisu Karisito ena bula taumada.

Ena iValu mai Lomalagi, era a rawai Setani na luvena yalodina na Kalou ena “vosa era sa tusanaka” kei na vakaraitaki ni nodra vakabauti Jisu Karisito (Ai Vakatakila 12:11). Era se tomana tikoga nikua.

iTaviqaravi e Rawa ni Caka

• Me vukei ira na gone ni kila na ibalebale ni kena muri na nona ivakaraitaki e dua, digitaka e dua na gone me “iliuliu,” ka kerei ira na kena vo me ra muri koya ena nodra cakava na ka e cakava o koya. Qai raica me ra iliuliu na vo ni gone. Wilika na iVakatakila 12:7–11 vei ira na gone ka vakamacalataka ni se bera ni da sucu mai, eda sa digitaka me da muri Jisu ka sega ni o Setani.

• Lagata vata e dua na sere baleta na bula taumada, me vaka na “Mai Lomalagi” se “Meu Muria Nona Lewa” (Volanisere ni Gonelalai, 141, 86). Taroga na taro me vaka, “Na cava a yaco mai lomalagi ni bera ni da sucu mai?” kei “Na cava eda a digitaka meda cakava?” (Raica talega na “iVakamacala Taumada: Na iTuvatuva ni Tamada Vakalomalagi” e Na iTukuni ena Veiyalayalati Vou, 1-5, se na kena vidio ena ChurchofJesusChrist.org.)

Ai Vakatakila 14:6–7

Sa vakalesuimai na kosipeli ena noda gauna.

A vola o Joni me baleta e dua na agilosi ka na kauta mai “na itukutuku‑vinaka e sega ni oti rawa” (Ai Vakatakila 14:6). Na veivosakitaki ni Ai Vakatakila 14:6–7 e vakarautaka e dua na madigi vei iko mo vakadinadinataka na Vakalesuimai ni kosipeli i Jisu Karisito ena noda gauna oqo.

iTaviqaravi e Rawa ni Caka

• Vakaraitaka vei ira na gone e dua nai yaloyalo kei Moronai ni vosa tiko vei Josefa Simici ni o wilika na Ai Vakatakila 14:6 (raica na iVola ni Yaloyalo Vakosipeli, naba 91). Kerei ira na gone me ra dusia na agilosi ena i yaloyalo. Wasea vei ira na itukutuku ni veisiko i Moronai (raica na “Wase e 3: Na Agilosi o Moronai kei na Peleti Koula,” ena iTukuni mai na Vunau kei na Veiyalayalati, 13–17, se na kena vidio ena ChurchofJesusChrist.org).

• Sureti ira na gone me ra matanataka nai talanoa kei Moronai ena nona sikovi Josefa Simici (raica na Josefa Simici—Ai Tukutuku 1:29–35). Vukei ira me ra cavuta mai eso na veivakalougatataki eda taleitaka baleta ni sa vakalesuimai na kosipeli i Jisu Karisito. Wasea na nomu ivakadinadina me baleta na Veivakalesuimai.

Vakavulica na iVunau: Gone Qase Cake

Ai Vakatakila 9:1–2

Na kosipeli sa rawa ni vukei au meu vorata na veitemaki.

Na kubou ka vakabutobutotaka na macawa ena Ai Vakatakila 9:2 sa rawa ni vakatauvatani ki na veitemaki eso (raica na 1 Nifai 12:17).

iTaviqaravi e Rawa ni Caka

• Droinitaka nai yaloyalo ni dua na matanisiga kei na dua na o loaloa, ka kotivi rau. Sureti ira na gone me ra wilika na Ai Vakatakila 9:2 kei na 1 Nifai 12:17 ka vola ena o loaloa se cava e matataka na kubou se kabu ena veitikina oqo. Biuta na o loaloa ena papa ni volavola, ka sureti ira na gone me ra vola na veitemaki eso era dau sotava na gone era taba vata. Qai biuta na matanisiga ena papa ni volavola ka kerei ira me ra vola na iyaya ni cakacaka eso sa solia vei keda na Tamada Vakalomalagi me da vorata kina na butobuto e vuravura.

• E rawa vakacava ni da vukei ira tale eso ka tu vakayalo ena butobuto? Me vukei ira na gone ni vakasamataka na taro oqo, vakaraitaka e dua na tiki ni vidio “Choose the Light” (ChurchofJesusChrist.org), vakabibi na iotioti ni veimama ni vidio. E rawa vakacava ni da vakataki koya ka vukea na dauvodobasikeli ena qara?

Ai Vakatakila 12:7–11

Au a vakaraitaka na noqu vakabauti Jisu Karisito ena bula taumada.

Era sa tiko e vuravura na gone o vakavulica baleta ni ra a vakabauti Jisu Karisito ena bula taumada ka digitaka me ra muri Koya.

iTaviqaravi e Rawa ni Caka

• Wilika vata na Ai Vakatakila 12:7–11, ka vola ena papa ni volavola na vosa gata levu, iValu mai Lomalagi, biu tani, vosa era tusanaka, kei na Lami. Kerei ira na gone me ra vakalekalekataka na veitikina oqo ena vakayagataki ni vosa oqori ena papa ni volavola. Na cava eda vulica baleti Jisu Karisito (na Lami) mai na veitikina oqo? Na cava eda vulica baleta na digidigi eda a vakayacora ena bula taumada?

• Vola e tolu nai yatu ena papa ni volavola, ka vakayacana ena Bera na bula oqo, Ena bula oqo, kei na Ruarua. Vakarautaka na tikinipepa eso ka tukuna na veika dina baleta na bula taumada kei na bula oqo, me vaka Eda sa vakayago, Eda sega ni vakayago, Eda sa bula ena iserau ni Kalou, Eda sa veivala tiko kei Setani, Eda cakacakataka noda vakabauti Jisu Karisito, kei na Eda sa muria na ituvatuva ni Kalou. Me ra veivukevuke na gone ni digia e dua na tikinipepa ka lewa se i yatu cava e okati kina. Wasea na nomu yalodei ni rawa me ra tomana tikoga na gone na nodra vakabauti Karisito.

Ai Vakatakila 14:6–7

Me tiki ni Veivakalesuimai, ena vunautaki na kosipeli ki vuravura taucoko.

E rawa ni veivuke na gone o vakavulica me ra vunautaka na kosipeli “ki na veimatanitu, veimataqali, dui vosavosa, kei na tamata kecega” (Ai Vakatakila 14:6).

iTaviqaravi e Rawa ni Caka

• Kerei ira na gone me ra wilika na Ai Vakatakila 14:6–7 ka vola ena papa ni volavola na vosa se malanivosa eso mai na veitikina oqo e vakaibalebale vei ira. Kerei ira me ra wasea na vuna era digitaka kina na veivosa se malanivosa oqori. Tukuna na veitikina oqo e vakamacalataka na Vakalesuimai ni kosipeli ena noda gauna. Tarogi ira na sala cava e rawa ni ra vakaitavi kina ena cakacaka ni kena vunautaki na kosipeli ki vuravura.

• Sureti ira na gone me ra wilika na Ai Vakatakila 14:7 ka tukuna ena nodra vosa ga na itukutuku ni agilosi me baleta na vuravura. Se sureti ira me ra droinitaka e dua nai yaloyalo e matataka na itukutuku ni agilosi. Na cava eda rawa ni wasea vei ira na tani me baleta na kosipeli i Jisu Karisito?

Vakauqeta na Vuli e Vale

Vukei ira na gone me ra vola e dua na vosa se malanivosa ena vukei ira ni nanuma e dua na ka era sa vulica ena kalasi nikua. Sureti ira me ra vakaraitaka na ka era sa vola vua e dua e vale ka wasea na ka era sa vulica.

Vakatoroicaketaki Ni Noda Veivakavulici

Vakavulica na ivunau ena sereivakatagi. Na lagasere vata kei ira na gone sa rawa ni vaqaqacotaka na vunau o vakavulica tiko mai na ivolanikalou. Me baleta na vakasama eso, raica na “Vakayagataki ni Sereivakatagi me Vakavulici na iVunau” ena wase ka kena ulutaga “iDusidusi ni Gauna ni Lagasere kei na Vakaitavi ni Gonelalai ena Soqoni ni Sakaramede” ena mua ni ivolavakarau oqo.