28 ni Tiseba–3 ni Janueri

Vunau kei na Veiyalayalati 1

“Dou Vakatudaliga, Oi Kemudou”

Ni o wilika na Vunau kei na Veiyalayalati 1, vakasamataka na veitikina cava o na vakanamata kina ena kalasi, ka na rawa vakacava mo vukei ira na lewe ni kalasi mera vuli mai na veitikina oqo.

Vola na Veika o Vakauqeti Kina

Sureta na Veiwasei

E rawa ni o tekivuna na nomu vuli ni kalasi ni Vunau kei na Veiyalayalati ena nomu taroga na lewe ni kalasi ena veika era vakila me baleta na vulici ni ivolanikalou qo ena yabaki oqo. Na veitikina cava mai na wase 1 ena vukei ira mera marautaka sara me ra wilika na Vunau kei na Veiyalayalati? Ena rairai rawa beka mo kerei ira me ra vakasaqaqara ena wase 1 me dua na tikina e rawa me ra wasea kevaka era a saga tiko mera vakauqeta e dua me wilika na iVola Tabu oqo.

Vakavulica na iVunau

Vunau kei na Veiyalayalati 1

Sureti keda na Turaga meda “vakasaqara na ivakaro oqo”

• Ni ko ni veitalanoataka na nona “ikau ni vola” na Turaga ena Vunau kei na Veiyalayalati (tikina e 6.), e rawa ni veivuke ke dua ena kalasi me vakamacalataka na cava na ikau ni vola kei na inaki e qarava ena dua na ivola. E rawa ni qai veivosakitaka na kalasi se rawata vakacava na i naki oya ena wase 1 me baleta na Vunau kei na Veiyalayalati. Me kena ivakaraitaki, na ulutaga cava e vakamacalataka na wase 1 me baleta na ivola? Na cava beka eso na inaki ni ivola ? Na cava eda kunea ena iwase oqo ka na rawa ni veiuqeti ena sala eda wilika kina na Vunau kei na Veiyalayalati ena yabaki oqo?

• Na ituvatuva ena macawa oqo ena Lako Mai, Mo Muri Au—Me Baleta Ira na Tamata Yadua kei na Matavuvale e sureti keda meda vakasamataka na iwalewale ni noda na cakava nona ivakaro na Turaga meda “vakasaqara na ivakaro oqo” (tikina e 37). Ke rawa, mera wasea na lewe ni kalasi na cava era sa tuvanaka mera cakava me vakaibalebale kina na nodra vulica na Vunau kei na Veiyalayalati ena yabaki oqo. Na cava era na vakasaqara? E duidui vakacava na vakasaqaqara mai na wilika walega? Na iwalewale cava eso ni vuli era kunea ni veivuke vakalevu?

Vunau kei na Veiyalayalati 1:1–6, 23–24, 37–39

Na Kalou e vosa mai vei ira na Nona italai, ka na vakayacori na na Nona vosa.

• E vuqa vei keda e tiko eso na lewe ni matavuvale, itokani, kei na noda icaba e sega ni tautauvata na noda vakabauta me baleta na parofita bula. Ena rawa beka mera wasea na lewe ni kalasi na dina era kunea ena wase 1 ka rawa mera vakayagataka me sauma vua e dua ka taroga na nodra vakabauta me baleta na parofita. Ko ni vakatututaka beka mera rai vakatabakidua ena tikina e 1–6 kei na 37–39. Na cava era vakavulica na veitikina oqo baleta na Turaga kei ira na Nona parofita?

• Ena vinakati beka me ra vulica na lewe ni kalasi ni dua na gauna a kaciva kina e dua na bose ko Josefa Simici me veivosakitaki na tabaki ni nona ivakatakila na Parofita, eso na lewe ni matabose era a saqata na vakasama oya. Era maduataka ni malumalumu ena volavola ko Josefa, ka ra lomaleqataka ni tabaki ni ivakatakila e rawa ni vakavuna na leqa levu vei ira na Yalododonu (raica na Yalododonu, 1: 140–43). E walia vakacava na wase 1 na kauwai eso oqo? (raica, me kena ivakaraitaki, tikina e 6, 24, 38).

• Na qaqa ni serenilotu “Mai Rogoca na Domo ni Parofita” (Serenilotu, naba.12) e vakavulica eso na dina vata ga ka vakavulici ena wase 1. E rawa beka moni lagata se wilika vata na sere ni lotu ka qai sureti ira na lewe ni kalasi me ra vaqara na matavosa ena sere kei na tikina ena wase 1 ka tautauvata na ka erau vakavulica.

  

  Na Kalou e vosa vei keda mai vei ira na Nona italai.

Vunau kei na Veiyalayalati 1:12–30,35–36

Sa vakalesuya mai na Turaga na nona kosipeli me vukea na noda sotava na bolebole ni ivakataotioti ni veisiga.

• Na vakasama cava soti e basika vei ira na lewe ni kalasi ni ra wilika na ivakamacala me baleta na veisiga mai muri ena tikina e 13–16? Na cava e yaco tiko e vuravura nikua ka vakavotukanataki tiko kina na ivakamacala ni veika ka parofisaitaki tiko oqo? Vakayaloqaqataki ira na lewe ni kalasi me ra wasea edua na ka era kunea ena wase 1 ka vukei ira mera vakila na vakacegu kei na yalodei se mani vakacava sara na bolebole ni noda gauna oqo.

• Me ra vukei na lewe ni kalasi mera vakasamataka vakatitobu na veivakalougatataki e noda baleta ni sa vakalesui mai na kosipeli, e rawa mo vola ena papa ni volavola Na cava e vakavulica na tikina e 17–23 me baleta na vuni nona vakalesuya tale mai na Turaga na nona kosipeli? O ira na lewe ni kalasi e rawa ni ra vakasaqara na veitikina eso oqo ka veiwaseitaka na nodra vakasama. Me kena ivakaraitaki, sa vukei keda vakacava na dina eso ka a vakalesui mai vei Josefa Simici me vakalevutaka na noda vakabauta? (raica na tikina e 21).

Vunau kei na Veiyalayalati 1:19–28

E dau vakayagataka na Turaga “ko ira na malumalumu kei ira na tamata wale” me vakayacora kina na Nona cakacaka.

• Edua na ulutaga bibi ni Vunau kei na Veiyalayalati 1 sai koya na nodra itavi “na malumalumu kei ira na tamata wale” ena cakacaka cecere ni Turaga edaidai (tikina e 23). Sureti ira na lewe ni kalasi mera vakasaqara ena tikina e 19–28 mera vulica kina na kena rawa ni vakayagataki na vosa “malumalumu” kei na “tamata wale” vei keda ni da sa italai ni Turaga. Ni ra wasea na veika era kunea, e rawa ni veivosakitaki na taro eso vakaoqo: Na cava na ivakarau ni bula e vinakata na Turaga me tiko vei ira na nona italai? Na cava ena rawa ni rawata na Turaga mai vei ira na nona italai ena iotioti ni gauna? E sa vakayacori tiko vakacava na veiparofisai ena veitikina oqo e vuravura raraba kei na noda dui bula vakayadua?

Vakatorocaketaki ni Noda Veivakavulici

Vukei ira na vuli me ra vakatauvatana na ivolanikalou vei ira. Na dina vata ga ka a vakauqeti ira na Yalododonu taumada ena rawa ni vukei keda meda sotava na noda bolebole nikua. Ni ko vakavulica na Vunau kei na Veiyalayalati, vukei ira na lewe ni kalasi mera semata vata na nona itukutuku na Turaga vei Josefa Simici kei na cava e rawa ni tukuna na Turaga vei ira vakayadua na lewe ni kalasi. (Raica na Veivakavulici ena iVakarau ni iVakabula, 21.)