28 diciembre–3 enero

Tzolʼlebʼ ut Sumwank 1

“Chex’ab’inq, ex tenamit”

Naq yooqat chirilb’al ru Tzol’leb’ ut Sumwank 1, k’oxlaheb’ li raqal li naru taajayali wi’ aawib’ sa’ li tzoleb’aal ut chan ru naru nakatenq’aheb’ li komon chi tzolok sa’eb’ li raqal a’an.

Tz’iib’a li nakak’oxla

Xkanab’ankileb’ chi wotzok

Sa’ li tzoleb’aal naru nakatikib’ xtzolb’al li Tzol’leb’ ut Sumwank rik’in xpatz’b’al reheb’ li komon k’a’ru neke’reek’a chirix xtzolb’al li hu a’in chiru li chihab’ a’in. B’ar wankeb’ re li raqal sa’ li tasal 1 neke’xtenq’aheb’ chireek’ankil rajomeb’ re rilb’al ru li Tzol’leb’ ut Sumwank? Maare naru nakakanab’eb’ chixtz’ilb’al rix li tasal 1 re xsik’b’al junaq raqal li naru neke’xwotz wi yooqeb’ raj chixk’eeb’al xb’oqb’al anihaq chirilb’al ru li loq’laj hu a’in.

Xk’utb’al li tzolʼlebʼ

Tzolʼlebʼ ut Sumwank 1

Li Qaawa’ nokoxb’oq “chixtz’ilb’aleb’ rix li taqlahom a’in.”

• Naq yooqex chi aatinak chirix li raatin li Qaawa’ re “xtikib’ankil” li Tzol’leb’ ut Sumwank (raqal 6), maare us raj naq anihaq naxch’olob’ k’a’ru naraj naxye xtikib’ankil ut k’a’ru aj-e sa’ jun li hu. Chirix a’an naru te’aatinaq chirix chan ru naq li tasal 1 nak’anjelak chi jo’kan sa’ li Tzol’leb’ ut Sumwank. Qayehaq, k’a’ruheb’ li na’leb’ natikla wi’ li tasal 1? K’a’ruheb’ li ajom wankeb’ sa’ li hu? K’a’ru naqataw sa’ li tasal a’in li naru nokoxtenq’a chirix chan ru naqil ru li Tzol’leb’ ut Sumwank chiru li chihab’ a’in?

• Li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al nokoxb’oq chixk’oxlankil chan ru taqak’ulub’a lix taqlahom li Qaawa’ re “xtz’ilb’aleb’ rix li taqlahom a’in” (raqal 37). Maare te’raj raj aatinak li komon chirix li neke’xk’oxla xb’aanunkil chiru li chihab’ a’in re naq li xtzolb’al li Tzol’leb’ ut Sumwank wanq xyaalal choq’ reheb’. K’a’ru te’xsik’? K’a’ru xjalanil li tz’ilok-ix rik’in ka’ajwi’ rilb’al ru? K’a’ru li na’leb’ re tzolok chaab’il choq’ reheb’?

Tzolʼlebʼ ut Sumwank 1:1–6, 23–24, 37–39

Li Dios na’aatinak rik’ineb’ xtz’uumal re lix moos, ut eb’ li raatin te’tz’aqloq ru.

• Naab’al qe laa’o wankeb’ qajunkab’al, qamiiw, ut kristiaan neke’qanaw ru li ink’a’ neke’xwotz li qapaab’aal chirixeb’ li yo’yookil profeet. Maare te’raj raj li komon sa’ li tzoleb’aal xwotzb’aleb’ li yaal neke’xtaw sa’ li tasal 1 li naru neke’roksi re xsumenkil anihaq li taapatz’oq chirix lix paab’aaleb’ chirix li profeet. Naru nakaye reheb’ naq te’sik’oq sa’eb’ li raqal 1–6 ut 37–39. K’a’ru neke’xk’ut li raqal a’in chirix li Qaawa’ ut eb’ lix profeet?

• Maare te’raj raj xnawb’al li komon sa’ li tzoleb’aal naq jun li ch’uut k’uub’anb’il xb’aan laj Jose Smith ke’aatinak chirix xpuktsinkil lix k’utb’esinb’il na’leb’ li profeet, ut junjunqeb’ li komon sa’ li ch’uut ink’a’ ke’xk’ulub’a. Ke’xutaanak xb’aan lix paaltil laj Jose re tz’iib’ak, ut ke’xk’oxla naq li xpuktesinkil li k’utb’esinb’il na’leb’ tixk’am chaq xkomon xch’a’ajkilaleb’ laj santil paab’anel (chi’ilmanq Santos, 1:143–146). Chan ru naq li tasal 1 na’aatinak chirixeb’ li na’leb’ a’an? (che’ilmanq, jo’ eetalil, li raqal 6, 24, 38).

• Sa’ raatinul li b’ich “Xyaab’ xkux jun li profeet ab’i” (Eb’ li B’ich, 11) wan junjunq reheb’ li na’leb’ neke’k’utman sa’ li tasal 1. Maare naru teeb’icha malaj teeril ru sa’ komonil li b’ich ut chirix a’an taak’e xb’oqb’aleb’ li komon sa’ li tzoleb’aal naq te’xtaweb’ ch’ol aatin sa’ li b’ich ut sa’eb’ li raqal re li tasal 1 b’ar wi’ juntaq’eet li na’leb’ neke’k’utman.

  

  Li Dios nokoraatina rik’in xtz’uumaleb’ re lix moos.

Tzol’leb’ ut Sumwank 1:12–30, 35–36

Li Qaawa’ kixk’ojob’ wi’chik lix evangelio re qatenq’ankil chixnumsinkileb’ li ch’a’ajkilal re roso’jikeb’ li kutan.

• K’a’ru xe’reek’a li komon sa’ li tzoleb’aal naq xe’ril ru xch’olob’ankil roso’jikeb’ li kutan li natawman sa’ li raqal 13–16? K’a’ru yoo chi k’ulmank sa’ li ruchich’och’ anajwan li naxtz’aqob’resi ru li yeeb’il sa’ li profeetil aatin a’an? Waklesi xch’ooleb’ li komon re li tzoleb’aal chixwotzb’al li xe’xtaw sa’ li tasal 1 li kitenq’ank reheb’ chireek’ankil tuqtuukilal ut kawilal ch’oolej us ta wankeb’ li ch’a’ajkilal sa’eb’ li qakutankil.

• Re xtenq’ankileb’ li komon sa’ li tzoleb’aal chi k’oxlak chirixeb’ li osob’tesihom naqak’ul sa’ xk’ab’a’ naq k’ojob’anb’il wi’chik li evangelio, naru nakatz’iib’a sa’ li pizarron: K’a’ru neke’xk’ut chiqu li raqal 17–23 chirix k’a’ut naq li Qaawa’ kixk’ojob’ wi’chik lix evangelio? Eb’ li komon sa’ li tzoleb’aal naru te’xtz’il rixeb’ li raqal ut te’xwotz k’a’ru neke’xk’oxla chirib’ileb’ rib’. Qayehaq, chan ru naq nokohe’xtenq’a li yaal k’ojob’anb’il wi’chik xb’aan laj Jose Smith chixk’iresinkil li qapaab’aal? (chi’ilmanq li raqal 21).

Tzolʼlebʼ ut Sumwank 1:19–28

Li Qaawa’ naroksiheb’ “li q’uneb’ xmetz’ew ut li moko nim ta xna’leb’eb’ ” re xk’eeb’al chi uxmank lix k’anjel.

• Jun na’leb’ aajel ru sa’ Tzol’leb’ ut Sumwank 1 a’an lix k’anjeleb’ “li q’uneb’ xmetz’ew ut li moko nim ta xna’leb’eb’ ” sa’ lix nimla k’anjel li Qaawa’ sa’ roso’jikeb’ li kutan (raqal 23). Kanab’eb’ li komon sa’ li tzoleb’aal chixtz’ilb’aleb’ rix li raqal 19–28 re xtzolb’al chan ru naq li aatin “q’uneb’ xmetz’ew” ut “moko nim ta xna’leb’eb’ ” wan rilom qik’in jo’ xmoos li Qaawa’. Naq yooqeb’ chixwotzb’al li neke’xtaw, naru tex’aatinaq chirixeb’ li patz’om jo’eb’ a’in: Chan ru naraj li Qaawa’ naq te’wanq lix moos? K’a’ru tixb’aanu li Qaawa’ rik’in ruq’eb’ lix moos sa’ roso’jikeb’ li kutan? Chan ru naq yookeb’ chi tz’aqlok ru li profeetil aatin wankeb’ sa’ li raqal a’in sa’ chixjunil li ruchich’och’ ut sa’ li qayu’am?

Xchaab’ilob’resinkil li qak’utum

Tenq’aheb’ li ani neke’tzolok chixjuntaq’eetankileb’ li loq’laj hu rik’ineb’ a’an. Eb’ li yaal li ke’xmusiq’aheb’ li xb’eenil aj santil paab’anel naru nokohe’xtenq’a chixnumsinkileb’ li qach’a’ajkilal sa’eb’ li kutan a’in. Naq yooqat chixk’utb’al li Tzol’leb’ ut Sumwank, tenq’aheb’ li komon re li tzoleb’aal chixjunajinkil ru li aatin kixye li Qaawa’ re laj Jose Smith ut li k’a’ raj ru tixye li Qaawa’ reheb’ tz’aqal a’an. (Chi’ilmanq Li k’utuk jo’ li Kolonel, 21.)