Na Veikau Tabu, mai vei Greg K. Olsen

4–10 ni Janueri

Josefa Simici—Ai Tukutuku1:1–26

“Au sa Raica e dua na Duru Bukawaqa”

Nanuma tiko ni nomu vakavakarau bibi duadua sai koya na nomu vulica na ivolanikalou ka bulataka na veika o sa vulica. Na Yalo Tabu ena rawa ni vukei iko mo kila na veika mo vakanamata kina ena kalasi.

Vola na Veika o Vakauqeti Kina

Sureta na Veiwasei

Na raititobu cava soti era sa rawata na lewe ni kalasi ni ra vulica tiko na Josefa Simici—Ai Tukutuku1:1–26 ena macawa oqo? Ena rawa ni o vakaraitaka e dua na i taba kei Josefa Simici se nai matai ni raivotu ka sureti ira na lewe ni kalasi me ra vola ena vava ni volavola eso na raititobu mai na nodra vuli, kei na veitikina era laurai mai kina. E rawa talega mera wasea na tubu ni nodra ivakadinadina me baleti Josefa Simici kei na nona ilesilesi ni ra vulica tiko na veika me baleti koya ena macawa oqo.

Vakavulica na iVunau

Josefa Simici—Ai Tukutuku 1:5–18

Kevaka eda kerekere ena vakabauta, ena qai sauma mai na Kalou.

• O ira na lewe ni nomu kalasi era na rawa ni semati ira ki na gagadre nei Josefa me vakasaqara na dina ena dua na vuravura ka sa vakavulici tiko kina e vuqa na veisaqasaqa ni vakasama. E tautauvata vakacava na veilecayaki ka tiko ena noda gauna oqo kei na veika e a sotava? Me ra vukei na lewe ni kalasi mera raica na sala meda na kunea kina na isau ni noda taro, e rawa mo sureti ira mera vola ena vava ni volavola na vei sala duidui eso era vakasaqara kina na dina na tamata. Mera qai raicalesuva na Josefa Simici—Ai Tukutuku 1:5–18 ka vakuria ki na veika era sa vola me baleta na ka a vakayacora o Josefa Simici me kunea kina na isau ni nona taro.

• O ira na lewe ni kalasi e rawa ni ra wasea na iwalewale ni nodra vakamuria na ivakaraitaki nei Josefa Simici ena nodra vakasaqara na dina kei na sala sa veisotavi kina vei ira na Kalou. Na itukutuku nei Peresitedi Russell M. Nelson ena “iKuri ni iVurevure” e vakatura eso na sala e rawa ni da vakasaqara kina na dina mai vua na Kalou.

  

  Na Masu e vakatara vei keda meda veitaratara kina vata kei na Kalou.

Josefa Simici—Ai Tukutuku1:15–20

O Josefa Simici a raica na Kalou na Tamada kei Na Luvena, o Jisu Karisito.

• Na imatai ni raivotu e vakatakila e vica na dina me baleta na Kalou me vakalasuya na veika era vakabauta e vuqa ena gauna nei Josefa. Era rawa ni wilika na lewe ni kalasi na Josefa Simici—Ai Tukutuku 1:15-20 ka vakaraica e dua na ka era sa vulica me baleta na Kalou. Na cava e bibi kina meda kila na veika oqo baleti Koya?

• Kevaka me a sikova mai na noda kalasi o Josefa Simici, na cava beka eda na taroga vua me baleta na veika a sotava? Na vidio “Taroga na Kalou: iMatai ni Raivotu nei Josefa Simici” (ChurchofJesusChrist.org) e rawa ni vakuria na nodra raititobu na lewe ni kalasi me baleta na iMatai ni Raivotu nei Josefa Simici (raica tale ga na “Ikuri ni iVurevure”). Ena rawa tale beka ga vei ira mera vakasamataka vakatitobu na sala mera vakacavara kina e dua na iyatuvosa me vaka na kena oqo: “Baleta ni a yaco na iMatai ni Raivotu, au sa kila ni …” Na veivakalougatataki cava sa yaco mai ki na noda bula ena vuku ni iMatai ni Raivotu?

• Me kuri na yalo ni nomuni veivosaki, e rawa vei ira na lewe ni kalasi mera wilika se lagata na “Matai ni Masu nei Josefa Simici” (Sere ni Lotu, naba 14). Na cava e vukei keda kina na serenilotu oqo meda kila ka vakila vakavinaka sara na iMatai ni Raivotu? De rawa me ra wasea eso na lewe ni kalasi na ivalavala ni nodra sa mai kila vakataki ira ni o Josefa a raica dina na Kalou na Tamada kei Jisu Karisito ena loma ni veikau tabu. Se rawa mo sureti rau na daukaulotu tudei (se dua e sa qai lesu wale tikoga mai) me sikova mai na kalasi ka talanoataka na sala sa vakauqeti kina na nodra bula o ira era a vakavulici tiko me baleta iMatai ni Raivotu.

Josefa Simici—Ai Tukutuku 1:21–26

Eda rawa ni dinata tikoga na veika eda sa kila, veitalia kevaka era biligi keda na tani.

• O ira na lewe ni kalasi era rawa ni vakatakilakilataki ira vata kei na so na ka e a sotava o Josefa Simici ena gauna sa tekivu me tukuna kina vei ira na tani na nona raivotu (raica Joseph Smith—History 1:21–26). De na vinaka tale ga mera wasea na veitikina eso ka vakauqeti ira ni dua e bolea na nodra vakabauta.

• Kevaka o kila e dua na lewe ni tabanalevu ka ra sa sotava oti na veisaqasaqa baleta ni ra sa lewe ni Lotu, sa rawa mo kerei ira me ra lako mai ki kalasi ka vakavakarau me ra wasea na iwalewale ni nodra maroroya na nodra vakabauta me kaukauwa tiko ga. Na cava eda sa vulica mai na ivakaraitaki nei Joseph Smith ena Josefa Simici—Ai Tukutuku 1:21–26?

iKuri ni iVurevure

Muria na ivakaraitaki nei Josefa

E vakatavulica o Peresitedi Russell M. Nelson:

Na Parofita o Josefa Simici e sa laiva na ituvatuva me da muria me saumi kina noda taro. Ni kuitaki ki na yalayala nei Jemesa ni kevaka e lailai vei keda na vuku me da kerea vua na Kalou [raica na Jemesa 1:5], na gonetagane o Josefa e a kauta vakadodonu nona taro vua na Tamada Vakalomalagi. E vakasaqara na ivakatakila vakai koya, ia na nona vakasaqaqara e dolava na iotioti ni itabagauna.

“Ena ivakaraitaki vata o ya, na cava ena dolava vei iko na nomu vakasaqaqara tiko? Na vuku cava e lailai vei iko? Na cava o vakila ni bibi e gadrevi mo kila ka me macala? Muria na ivakaraitaki ni Parofita ko Josefa. Vaqara e dua na vanua vagagalu ko rawa ni taleva wasoma. Vakamalumalumutaki iko e mata ni Kalou. Talaucaka na lomamu vua na Tamamu Vakalomalagi. Vuki vei Koya ena isau ni vakatataro kei na vakacegu” (“iVakatakila ki na Lotu, iVakatakila ki na Noda Bula,” Ensign se Liaona, Me 2018, 95).

Na iMatai ni Raivotu nei Josefa Simici

Me ra wilika e dua na ivakamacala ni imatai ni raivotu nei Josefa Simici ka tauri mai na vica vata na nona ivolatukutuku , raica na Yalododonu, 1:14 – 16.

Vakatorocaketaki Noda Veivakavulici

Vakasaqara na veika e uqeti iko. Kakua ni raica na veituvatuva oqo me ivakaro e dodonu mo muria ni o veivakavulici. Ia, mo vakayagataka me vakauqeta kina na vakasama ka susuga cake na veivakauqeti ni ko vakasamataka vakatitobu na ivunau ena ivolanikalou kei na nodra gagadre na tamata o vakavulica tiko.