E Kacivi Au ena Yacaqu, mai vei Michael Malm

11–17 ni Janueri

Vunau kei na Veiyalayalati 2; Josefa Simici—Ai Tukutuku 1:27–65

“Ena Vagolei na Lomadra na Gone vei ira Nodra Qase”

Ni bera ni ko wilika na vakasama ena ituvatuva oqo, vulica na Vunau kei na Veiyalayalati 2 kei na Josefa Simici—Ai Tukutuku 1:27–65, ka vola na veika o vakauqeti kina vakayalo.

Vola na Veika o Vakauqeti Kina

Sureta na Veiwasei

Me ra vakayaloqaqataki na lewe ni kalasi me ra wasea na raititobu kei na veika era sotava ni ra vulica tiko na vei ivolanikalou oqo, e rawa mo na kerei ira me ra wasea e dua na tikina ka vakavuna mera vakasama cake kina vakatitobu. Na cava era vakauqeti kina mai na tikina oya?

Vakavulica na iVunau

Josefa Simici—Ai Tukutuku 1:27–65

A kacivi mai vua na Kalou o Josefa Simici me cakava na Nona cakacaka.

• Ena yaga beka vei ira nomu kalasi mera ra railesuva nai talanoa ena Josefa Simici—Ai Tukutuku 1:27–65? O na rawa ni sureta e dua na lewe ni kalasi me vakamacalataka vakalekaleka, se mera veitalanoataka na lewe ni kalasi na italanoa ni ra wasei mera veisasa se vakailawalawa lalai. Vakayaloqaqataki ira me ra vakacuruma kina e vuqa na veika matailalai era nanuma rawa. E vaqaqacotaka vakacava na noda ivakadinadina na italanoa oqo ena vuku ni ilesilesi vakalou nei Josefa Simici? Na lesoni cava eda vulica mai na italanoa oqo me baleta na sala e dau cakava kina na Kalou na nona cakacaka?

• Sa rawa mo vakaraitaka na iyaya eso se iyaloyalo e semati kina na cakacaka sa kacivi kina ko Josefa Simici, me vaka e dua na iVola i Momani se na iyaloyalo ni dua na valetabu. Era rawa ni vakaraica na lewe ni kalasi eso na veitikina mai na Josefa Simici—Ai Tukutuku 1:33–42 e vakavulica eso na ituvaki ni nona ilesilesi na Parofita. E veisemati vakacava na cakacaka ni Kalou me baleti Josefa Simici kei na nona cakacaka me baleti keda? Na cava era vakavulica vei keda na noda parofita bula me baleta na cakacaka oqo?

Vunau kei na Veiyalayalati 2

A lako mai o Ilaija me vagolea na lomada vei ira na noda qase e liu.

• Ena yaga beka kina nomu kalasi mera veivosakitaka se o cei o Ilaija kei na ka e baleta na kaukauwa ni veivauci a vakalesuya mai? E rawa ni ra wilika na lewe ni kalasi na veika me baleti Ilaija ena Bible Dictionary se iDusidusi ki na ivolanikalou se railesuva e dua na italanoa mai na nona bula (raica na 1 Tui 17–18). Na cava e kuria na itukutuku oqo ki na noda kila vakavinaka na Vunau kei na Veiyalayalati 2? E na rawa talega ni ko veitalanoataka se cava na ibalebale ni kena vauci e dua na ka. E rairai eso na iyaya ena veivuke, me vaka e dua na kakana tawa i tini, e dua na taga palasitika ni mamaroroi ka lokataki ena sipi, se e dua na sitaba ka vakadonui kina edua na itukutuku. Era na veivuke vakacava na vei iyaya vakaoqo meda kila kina vakavinaka na ibalebale ni vauci vata vaka matavuvale? E veivuke vakacava na kaukauwa oqo ena kena vakataucokotaki na inaki ni buli ni vuravura? (raica na Vunau kei na Veiyalayalati 138:47–48 kei na itukutuku mai vei Peresitedi Russell M. Nelson ena “iKuri ni iVurevure”). Me ra vukei na lewe ni kalasi mera raica na kena vakavotukanataki na parofisai ka tiko ena Vunau kei na Veiyalayalati 2 e rawa mo veivosakitaka na Vunau kei na Veiyalayalati 110:13–16.

• E rairai beka ni noda vulica “na yalayala a caka vei ira noda qase” (Vunau kei na Veiyalayalati 2:2) ena vukei ira o vakavulica mera kila vakavinaka na kaukauwa ni matabete ka a talai mai kina o Ilaija me vakalesuya mai. O cei o ira “na qase”? (raica na Vunau kei na Veiyalayalati 27: 9–10). Na yalayala cava a cakava na Turaga vei Eparaama, Aisake, kei Jekope? (raica na iVakatekivu 17:1–8; 22:16–18; 26:1–5, 24.; 28:11–15; Eparaama 2:8–11). Na cava na kena ibalebale me “tei” na veiyalayala oqo ki na lomada? Ena vukei keda vakacava na ka oqo meda vagolea na lomada vei ira na noda qase e liu?

Valetabu e Palmyra Niu Ioka

• Me vakauqeti na lewe ni kalasi me ra vagolea na yalodra kivei ira na nodra qase e liu, e rawa mo sureta e vica na lewe ni kalasi mera liutaka e dua na veivosaki ena ulutaga oqo. Nanuma me na tiko kina o daunivakasala ni tuva kawa ni valetabu ni tabanalevu. Sa rawa ni o tekivu ni wiliki na Vunau kei na Veiyalayalati 2:2–3 ka sureti o ira na iliuliu ni veivosaki me ra wasea na veika era sotava ka a vagolei kina na lomadra vei ira na nodra qase e liu. Na veika cava sa yaco ena nodra bula ka a vukei ira mera vinakata me ra vulica na nodra ituvatuva ni kawa? Na vakatutu cava e rawa ni ra solia me ra vukei kina o ira na vo ni kalasi mera vakaogai ira ena cakacaka ni tuva kawa kei na veiqaravi e valetabu? Na itukutuku nei Peresitedi Dallin H. Oaks ena “iKuri ni iVurevure” kei na vidio “Na Veivakalougatataki Yalataki ni Tuva Kawa” kei na “Kevaka Eda Vakaliuca na Kalou” (ChurchofJesusChrist.org) e na rawa talega ni veivuke ena nodra vakauqeti na lewe ni kalasi. Sa rawa talega mo dusimaki ira ki na FamilySearch.org me vakavure vakasama tale.

iKuri ni iVurevure

Na iNaki ni Veibuli.

E vakatavulica o Peresitedi Russell M. Nelson:

“Na bula tawamudu, ka vakayacori rawa mai na Veisorovaki, e inaki cecere ni veibuli. Me cavuti na malanivosa oya ena kena sala e ca, kevaka me a sega ni vauci na matavuvale ena valetabu savasava, sa na vakarusai sara na vuravura taucoko.

“Na inaki ni Veibuli, na Lutu, kei na Veisorovaki era vakanamata kecega ki na cakacaka tabu e vakayacori ena valetabu ni Lotu i Jisu Karisito ni Yalododonu Edaidai” (“Na Veisorovaki,” Ensign, Nov. 1996, 35). Raica tale ga na Mosese 1:39.

E rawa vei keda yadua meda vakayacora eso na ka.

E vakatavulica o Peresitedi Dallin H. Oaks: “Ena cakacaka ni nodra vueti na mate e tiko e vuqa na itavi me qaravi. … Na noda sasaga e sega ni da vakasaurarataka na tamata yadua mera cakava na ka kecega, ia me vakauqeti keda kece meda cakava e dua na ka” (“Tuva Kawa: Ena Yalomatua kei na iVakarau,” Ensign, June 1989, 6).

Vakatorocaketaki ni Noda Veivakavulici

Okati ira na vuli era sega ni vuli ivolanikalou tiko e vale. Me laurai ni logaloga vinaka na lewe ni kalasi ena nodra vakaitavi ka cau ki na veivosaki, oka kina o ira mada ga era sega ni dau wiliwili mai vale.