Na Gauna ni Tatamusuki e Varanise, mai vei James Taylor Harwood

18–24 ni Janueri

Vunau kei na Veiyalayalati 3–5

“Noqu Cakacaka Ena Vakayacori Ga”

Na vulici taumada ni Vunau kei na Veiyalayalati 3–5 ni bera ni ko raicalesu na veivakasama ena ituvatuva oqo ena vukei iko mo ciqoma na veidusimaki mai vua na Yalo Tabu. Na ituvatuva ena macawa oqo ena Lako Mai, Mo Muri Au—Me Baleta Ira na Tamata Yadua kei na Matavuvale ena rawa ni vukei iko mo kila vinaka na itukutuku makawa ka yaco kina na vei ivakatakila ka volai tu ena iwase oqo.

Vola na Veika o Vakauqeti Kina

Sureta na Veiwasei

Solia vei ira na lewe ni kalasi e vica na miniti me ra railesuva na ivolanikalou era sa wilika mai vale ka mera vakaraica e dua na malanivosa ka vakaibalebale vei ira. Qai sureti ira mera wasea na veika era vulica ki vua e dua tale na lewe ni kalasi.

Vakavulica na iVunau

Vunau kei na Veiyalayalati 3:1–15

Sa dodonu meda vakararavi vua na Kalou ka kua ni rerevaka na tamata.

• Me vakataki Josefa Simici, eda sa sotava oti na noda cakava e dua na ka eda kila ni cala ni da vakasosataki mai vei ira na tamata. Na dina cava so eda sa vulica mai na Vunau kei na Veiyalayalati 3:1–15 ka rawa ni vukei keda meda yalodina tikoga vua na Kalou ena ituvaki vakaoqo?

• E gadrevi me cudruvi ko Josefa Simici baleta na nona rerevaka vakalevu cake na tamata mai vua na Kalou, ia e dodonu talega me vakayaloqaqataki. Sureti ira na lewe ni kalasi mera raica na wase 3 ena ivalavala ruarua ni nona veicudruvi ka veivakayaloqaqataki na Turaga vei Josefa. Me kena ivakaraitaki, sa rawa mera vola ena vava ni volavola na veimalanivosa mai na tikina e 1–15 ka tiko kina na cudru ni Turaga kei na veimalanivosa tale eso e tiko kina na nona veivakauqeti ki na veivutuni ka yalodina tiko ga. Na cava e vakavulica vei keda na ka a sotava o Josefa me baleta na sala e dau vukei keda kina na iVakabula meda rawa na noda malumalumu?

Vunau kei na Veiyalayalati 4

E kerei keda tiko na Turaga meda qaravi koya ena yaloda taucoko.

• Na ivakarau ka vakamacalataki tiko kina o ira na italai ni Turaga ka sa tuvai tu ena Vunau kei na Veiyalayalati 4:5–6 era sa ivakarau i Jisu Karisito. Mera vukei na lewe ni kalasi mera vulica e levu tale na ka, e rawa ni o sureti ira mera digitaka e dua na ivakarau ka vaqara na kena ibalebale se laurai eso tale na veitikina mai na ivolanikalou me vukei ira mera kila vakavinaka cake na ivakarau o ya (raica, me kena ivakaraitaki, na vosa nei Sisita Elaine S. Dalton ena “iKuri ni iVurevure”). Sa rawa mo kerei ira na lewe ni kalasi me ra wasea na veika era sa kunea. E rawa talega ni ra wasea na vuna e gadrevi kina na ivakarau era digitaka ena veiqaravi ena matanitu ni Kalou. Rawa vakacava ni da taracake tale ivakarau oqo? (raica na tikina e 7).

• Vunau kei na Veiyalayalati 4 a volai ki vei Josefa Simici Levu., ka a vinakata me kila na sala e rawa ni veivuke kina ena cakacaka ni Turaga. Na iwase oqo e rawa talega ni vukea e dua ga vei keda ka gadreva me qarava na Turaga. Oqo e dua na sala me vulici kina na wase oqo: o ira na lewe ni kalasi era rawa ni cakacaka vaka iwasewase lalai me ra vola e dua na ivakamacala ni nodra cakacaka na italai ni Kalou, ka vakayagataka na wase e 4 me idusidusi. E duidui vakacava nai vakamacala ni cakacaka oqo mai na kena tale eso? Na cava era ka bibi kina na ivakarau vakaoqo ena qaravi ni cakacaka ni Kalou? Na vosa nei Elder David A. Bednar ena “iKuri ni iVurevure” ena rawa ni vukei ira na lewe ni kalasi mera kila vakavinaka na bibi ni kena vakatorocaketaki na vei ivakarau oqo.

Vunau kei na Veiyalayalati 5

E dua na ivakadinadina ni ka dina e yaco mai vei ira era sa yalomalumalumu ka vakabauta.

• Kevaka era a vakaraitaki na peleti koula me raica ko vuravura, era na vakadinata beka kina na tamata kecega ni sa dina na iVola i Momani? Na cava na vuna e rawa kina se sega ni rawa? (raica na Vunau kei na Veiyalayalati 5:7). Ena rawa beka vei ira na lewe ni kalasi mera vakasaqara ena wase e 5 na vei raititobu eso ka na rawa ni vukei ira ena saumi ni nona taro edua ka taroga me baleta na ivakadinadina se dina na iVola i Momani. Na cava a vakavulica na Turaga vei Josefa Simici kei Matini Erisi ka na rawa ni vukei keda meda rawata vakaikeda na ivakadinadina ni dina ni kosipeli?

  

  Matin Erisi, mai vei Lewis A. Ramsey

iKuri ni iVurevure

Bula dodonu e kena ibalebale na kaukauwa.

A solia ko Sister Elaine S. Dalton na ivakamacala oqo me baleta na: “Bula dodonu e dua na vosa eda sa sega ni rogoca vakalevu ena veitikotiko raraba ni gauna oqo, ia ena vosa vaka-Latina virtus e kena ibalebale na kaukauwa. Na marama kei na turaga bula dodonu era taukena e dua na ivakarau ni bula dokai sega ni dau kilai kei na kaukauwa e loma. Era yalodei baleta ni ra sa kilikili kaya na veituberi ni Yalo Tabu” (“Na Lesu ki na Bula Dodonu, ” Ensign se Liaona, Nove. 2008, 79).

Yaco mo daukaulotu.

E kaya o Elder David A. Bednar: “Na ituvatuva mo ni daukaulotu e sega ni gadrevi kina vua e dua na cauravou me daramaka e dua na sote vulavula kei na neketai ki koronivuli ena veisiga, se me vakamuria na idusidusi ni daukaulotu me baleta na gauna ni moce kei na yadra.… Ia sa rawa mo vakalevutaka na nomu gagadre mo qarava na Kalou [raica na Vunau kei na Veiyalayalati 4:3], ka sa rawa mo tekivu vakasama vakadaukaulotu, wilika na veika era dau wilika na daukaulotu mo masu me vakataki ira ka vakila na ka era dau vakila na daukaulotu. Sa rawa mo levea na veitemaki vakavuravura e dau vakavuna me vakasuka na Yalo Tabu, mo nuidei ena nomu kila ka vakayacora na veivakauqeti vakayalo” (“Yaco mo Daukaulotu,” Ensign se Liaona, Nov. 2005, 45 – 46).

Vakatorocaketaki Noda Veivakavulici

Taroga na taro e vakauqeta na veivosaki e vakaibalebale cake. Na taro ka dau levu na kena isau dodonu e sureti ira na vakavulici mera sauma na taro ka yavutaki ena nodra vakanananu vakayadua, na ka era vakila, kei na veika era sa sotava oti. Me kena ivakaraitaki, e rawa mo taroga, “O na kila vakacava ni sa vosa tiko vei iko na Kalou?” (Raica na Veivakavulici ena iVakarau ni iVakabula, 33.)