25–31 ni Janueri

Vunau kei na Veiyalayalati 6–9

“Oqo na Yalo ni ivakatakila”

Vunau kei na Veiyalayalati 6 – 9 e vakavulica na vei ivakavuvuli yaga sara me baleta na kena ciqomi na ivakatakila. Vakayagataka na ivakavuvuli oqo ena nomu vakasaqara na ivakatakila ena sala mera vukei kina na kalasi mera vuli mai na vei wase oqo.

Vola na Veika o Vakauqeti Kina

Sureta na Veiwasei

Me ra vakayaloqaqataki na lewe ni kalasi me ra wasea na veika era sotava ena nodra vulica na Vunau kei na Veiyalayalati 6–9, o rawa ni sureti ira mera veivosakitaka, ke gadrevi, na veiuqeti vakayalo era ciqoma ena nodra vuli. Na itukutuku cava e a tiko vua na Turaga me nodra?

Vakavulica na iVunau

Vunau kei na Veiyalayalati 6; 8–9

Sa vosa vei au na Tamada Vakalomalagi ena “Yalo ni dina.”

• Sa tu vua na Turaga e vuqa na ka me vakavulici keda kina me baleta na ivakatakila ki na tamata yadua ena vei wase oqo, ka na sega beka ni rawa mo kovuta kece ena loma ni dua ga na kalasi. E rawa ni veivuke ke wasei na kalasi vaka tolu, ka kerea na veiwasewase yadua mera vakasaqaqara ena wase 6, 8, se 9, ka vaqara na isau ni taro vaka oqo: E vosa vakacava vei keda na Yalo Tabu? Eda na kila vakacava na ivakatakila me baleti keda? E rawa vakacava me da vakarautaki keda me da ciqoma na ivakatakila? Me qai dua mai na vei ilawalawa yadua me wasea na veika eratou sa kunea na nona ilawalawa. E rawa talega ni o vakauqeti ira na lewe ni kalasi me ra wasea na veika era dui sotava mera kila kina na nodra ivakatakila. Me vaka beka oqo, e tiko beka e dua na ka ena Vunau kei na Veiyalayalati 6:22–24 ka vakananumi keda ena veika eda sa sotava oti?

• Na veivosakitaki ni ivakatakila ki na tamata yadua e rawa ni veivakayalolailaitaki vei ira na lewe ni kalasi era kerea na veidusimaki ia era sega ni vakila ni ra sa ciqoma edua. Ena rawa ni veivuke vei ira mera kila ni ko Oliva Kaudari a sotava na vakanananu vata ga oqori ni a sega ni rawa ni vakavakadewa vakarawarawa me vaka a nuitaka tiko o koya. E rairai ena rawa beka ni o sureti ira na lewe ni kalasi me ra vakasaqara na ivakasala ni Turaga vei Oliva ena wase e 9. Na itukutuku cava soti e tiko ena wase oqo e rawa ni vukei ira era vakila ni sega ni sauma na nodra masu na Turaga? Na veimalanivosa ena “iKuri ni iVurevure” ena rawa talega ni veivuke.

  

  Oliva Kaudari, mai vei Lewis A. Ramsey

Vunau kei na Veiyalayalati 6–7

“Me vaka ko sa gadreva mai vei au e sa na vaka dina kina.”

• Na ituvatuva ena macawa oqo ena Lako Mai, Mo Muri Au—Baleta Ira na Tamata Yadua kei na Matavuvale e vakatututaka na raici ni vakayagataki ni vosa me vaka na gagadre ena wase 6–7. De na vinaka beka mera wasea na lewe ni kalasi na veika era vulica mai na vakatovotovo oya, se mo qarava vata sara ga kei ira. Na cava e vakavulica vei keda noda itovo ni veisiga me baleta na noda gagadre? Ena vukei keda vakacava na Turaga me veisautaka na noda gagadre?

Vunau kei na Veiyalayalati 6:29–37

Kevaka eda vakanamata vua na Turaga, e na vukei keda o Koya meda rawa na vakatitiqa kei na rere.

• Na cava na vuna eda dau “rere … ni kitaka na ka vinaka” ena so na gauna”? (tikina e 33). De rawa mera vakatututaka mai na lewe ni kalasi eso na vuna, vata kei na so na vakanananu mai na Vunau kei na Veiyalayalati 6:29–37 ka veivakayaloqaqataki vei ira me ra kitaka na ka vinaka.

• Me tekivutaki na veivosaki me baleta na nona vukei keda ko Jisu Karisito meda “kakua ni vakatitiqa, kakua ni rere” (tikina e 36), e rawa mo kerei ira na lewe ni kalasi me ra vola ena tiki ni pepa eso na ka era dau rerevaka na tamata. (A solia o Elder Ronald A. Rasband eso na ivakaraitaki ena nona vosa “Dou Kakua Ni Rarawa” [Ensign se Liaona, Nove. 2018, 18].) Sa rawa ni o qai wilika i cake e vica vei ira na pepa oqo ka veivosakitaka ni iVakabula kei na Nona kaukauwa ni veisorovaki ena rawa ni vukei keda ena gauna eda rere kina. Vunau kei na Veiyalayalati 6:29–37 e tiko kina eso na rai titobu (raica talega na 1 Joni 4:18). Na cava na kena ibalebale me da “vakararavi tiko vei [Karisito] ena vakasama kece”? (tikina e 36). E vukei keda vakacava na noda vakanamata vua na iVakabula ena gauna eda sota kaya kina na vakatitiqa se rere?

iKuri ni iVurevure

Na noda kila vakamatata na sala ni nona dau sauma na masu na Tamada Vakalomalagi.

“Ena noqu bula au sa vulica ni so na gauna au na sega ni ciqoma na isau ni noqu masu baleta ni kila tiko na Kalou niu se bera ni vakarau. Ia, ni sa sauma mai o Koya, e dau vakavuqa me ‘vakalailai eke ka vakalailai mai kea’ [2 Nephi 28:30] baleta ni o ya sara ga na ka au rawa ni ciqoma se na ka au lomasoli kina meu cakava” (Robert D. Hales, “Waraka Na Turaga: Me Yaco Ga na Nomuni Lewa,” Ensign or Liaona, Nov. 2011, 73).

“Na cava o cakava ena gauna o sa vakavakarautaki iko tu kina vakavinaka, o sa masumasu vakaukauwa, waraka ena dua na gauna vinaka me baleta na kena saumi mai, ka se sega tiko ni vakila e dua na kena isau ? E rawa beka mo vakaraitaka na nomu vakavinavinaka ena gauna oqori, baleta ni sai koya e dua na ivakadinadina ni nomu vakabauta. Ena nomu bula kilikili tiko kei na nomu digidigi e salavata tiko na ivakavuvuli ni iVakabula kei na kena gadrevi mo cakacakataka, toso vata tiko kei na vakabauta. … Ena nomu bula vakadodonu tiko kei na nomu cakacaka tiko ena vakabauta, ena sega ni vakalaiva na Kalou mo toso vakayawa sara ki liu ka sega ni veivakasalataki ena veiuqeti ke o a vakayacora e dua na digidigi cala” (Richard G. Scott, “Vakayagataki ni iSolisoli Cecere ni Masumasu,” Ensign se Liaona, Me 2007, 10).

Vakatorocaketaki Noda Veivakavulici

Vakaraitaka na yalodei ena kaukauwa ni nodra vuli. Eso ena nomu kalasi era dau sega ni lomadei ena nodra sasaga me ra vulica na kosipeli. Mo vakananuma eso na sala mo vakadeitaki ira kina ni kevaka era sasaga mera vuli vaka i ira, ena qai vakavulici ira na Yalo Tabu. (Raica na Veivakavulici ena iVakarau ni iVakabula, 29.)