25–31 enero

Tzol’leb’ ut Sumwank 6–9

“A’in li musiq’ej re k’utb’esink”

Sa’ Tzol’leb’ ut Sumwank 6–9 neke’k’utman na’leb’ aajeleb’ ru chirix chan ru xk’ulb’al li k’utb’esinb’il na’leb’. Re xk’anjelankileb’ li na’leb’ a’an, sik’ aak’utb’esinb’il na’leb’ chirix chan ru xtenq’ankileb’ li komon sa’ li tzoleb’aal chixtzolb’aleb’ li tasal a’in.

Tz’iib’a li nakak’oxla

Xkanab’ankileb’ chi wotzok

Re xwaklesinkil xch’ooleb’ li komon sa’ li tzoleb’aal chixwotzb’al xnumsihomeb’ naq xe’xtzol Tzol’leb’ ut Sumwank 6–9, naru nakakanab’eb’ chi aatinak, a’ yaal naq us, chirixeb’ li musiq’anb’il na’leb’ xe’xk’ul naq yookeb’ chi tzolok. K’a’ruheb’ li esil li xraj li Qaawa’ xk’eeb’al reheb’?

Xk’utb’al li tzolʼlebʼ

Tzol’leb’ ut Sumwank 6; 8–9

Li qaChoxahil Yuwa’ nikinraatina rik’in li “Musiq’ej re li yaal.”

• Naab’al li k’a’ru naraj xk’utb’al chiqu li Qaawa’ chirix li k’utb’esinb’il na’leb’ sa’eb’ li tasal a’in, ut maare ink’a’ tatruuq chixk’utb’al chixjunil sa’ jun li tzolok. Maare usaq wi taajach ru li tzoleb’aal sa’ oxib’ ch’uut ut taakanab’eb’ li junjunq chi ch’uut chixtz’ilb’aleb’ rix li tasal 6, 8 malaj 9, re xsik’b’al xsumenkileb’ li patz’om jo’eb’ a’in: Chan ru naq nokoraatina li Santil Musiq’ej? Chan ru naru naqak’e reetal li na’leb’ nak’utb’esiman chiqu? Chan ru naru naqakawresi qib’ re xk’ulb’al li k’utb’esinb’il na’leb’? Chirix a’an, jun kristiaan re li junjunq ch’uut taaruuq tixwotz rik’in li tzoleb’aal li xe’xtaw sa’ xch’uuteb’. Naru ajwi’ taawaklesi xch’ooleb’ li komon sa’ li tzoleb’aal chixwotzb’al xnumsihomeb’ naq xe’xk’ul xjuneseb’ li k’utb’esinb’il na’leb’. Qayehaq, ma wan k’a’ruhaq sa’ Tzol’leb’ ut Sumwank 6:22–24 li naxjultika qe li k’a’ru qanumsihom?

• Maare naru naq li aatinak chirix li na’leb’ nak’utb’esiman chiqu naxkub’si xch’ooleb’ li ani neke’tijok re xk’ulb’al xb’eresinkileb’ a’b’an neke’reek’a naq ink’a’ neke’xk’ul. Naru neke’tenq’aak rik’in xnawb’al naq laj Oliver Cowdery kireek’a ajwi’ a’an naq ink’a’ kiru chi jaltesink ru aatin jo’ kiroyb’eni a’an. Maare naru nakak’e xb’oqb’al junaq komon sa’ li tzoleb’aal naq tixtaw li na’leb’ kixk’e li Qaawa’ re laj Oliver sa’ li tasal 9. K’a’ru li aatin sa’ li tasal a’in naru naxtenq’a li ani nareek’a naq li Qaawa’ ink’a’ naxsumeheb’ lix tij? Eb’ li na’leb’ neke’tawman sa’ “Xkomon chik li k’anjeleb’aal” maare te’ruuq ajwi’ chi tenq’ank.

  

  Laj Oliver Cowdery, xb’aan laj Lewis A. Ramsey

Tzol’leb’ ut Sumwank 6–7

“Jo’ chanru ajwi’ nakawaj wik’in, jo’kan taa’uxq aawe.”

• Sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al nayeeman naq teek’e reetal jarub’ sut wan jalan jalanq xtz’iib’ankil li aatin ajok malaj ajom sa’eb’ li tasal 6–7. Eb’ li komon sa’ li tzoleb’aal maare te’ruuq chixwotzb’al li xe’xtzol sa’ li ch’ina k’anjel a’an, malaj ut, naru teeb’aanu li ch’ina k’anjel sa’ komonil jo’ tzoleb’aal. K’a’ru neke’xk’ut chiqu li qab’aanuhom wulaj wulaj chirix li rajom qach’ool? Chan ru naru nokoxtenq’a li Qaawa’ chixjalb’aleb’ li qajom?

Tzol’leb’ ut Sumwank 6:29–37

Wi naqasik’ li Qaawa’, a’an naru chiqatenq’ankil chixq’axb’al ru li kab’ rix ch’oolej ut li xiw.

• K’a’ut naq wan hoonal naq “naqaxuwa … xb’aanunkil li chaab’il”? (raqal 33). Maare eb’ li komon sa’ li tzoleb’aal te’ruuq chixyeeb’al junjunqaq li na’leb’, ut li k’a’ru ajwi’ tz’iib’anb’il sa’ Tzol’leb’ ut Sumwank 6:29–37 li neke’xk’e xkawileb’ xch’ool re xb’aanunkil li us.

• Re xtikib’ankil li aatinak chirix chan ru naq li Jesukristo nokoxtenq’a re naq “ink’a’ taawiib’anq qach’ool, ink’a’ tooxuwaq” (raqal 36), naru taakanab’eb’ li komon sa’ li tzoleb’aal chixtz’iib’ankil chiruheb’ kok’ setb’il hu junjunq k’a’aq re ru li naru naxk’eheb’ xxiw li kristiaan. (Li Elder Ronald A. Rasband kixk’e junjunqeb’ li eetalil sa’ li raatin “Minumta eek’a’uxl” [Jolomil ch’utub’aj-ib’ re octubre 2018]). Chirix a’an naru teeril ru chi kaw xyaab’ eekux junjunqeb’ re li kok’ setb’il hu a’an ut tex’aatinaq chirix chan ru naq li Kolonel ut lix wankilal lix tojb’al rix li maak naru nokoxtenq’a sa’eb’ li hoonal re li xiw. Sa’ Tzol’leb’ ut Sumwank 6:29–37 neke’tawman junjunqeb’ li na’leb’ (chi’ilmanq ajwi’ 1 Jwan 4:18). K’a’ru naraj naxye “ilok wan wi’ li Kristo sa’ li junjunq k’oxlahom”? (raqal 36). Chan ru naq xjayalinkil qib’ rik’in li Kolonel nokoxtenq’a sa’eb’ li hoonal re xkab’ rix ch’oolej ut xiw?

Xkomon chik li k’anjeleb’aal

Xtawb’al ru chan ru naq li qaChoxahil Yuwa’ naxsumeheb’ li tij.

“Chiru chixjunil lin yu’am, xintzol naq wan sut naq ink’a’ nink’ul xsumenkil lin tij xb’aan naq li Qaawa’ naxnaw naq maji’ kawresinb’ilin. Ut naq nikinixsume, naab’al sut naq “b’ab’ay arin ut b’ab’ay aran” [2 Nefi 28:30] naxk’e, xb’aan naq a’an chixjunil li naru ninkuy malaj a’an chixjunil li wan inch’ool chixb’aanunkil” (Robert D. Hales, “Esperamos en el Señor: Hágase tu voluntad,” Liahona, noviembre 2011, 73).

“K’a’ru naru nakab’aanu naq xakawresi aawib’ chi us, xattijok chi kaw, ut xawoyb’eni naab’al li hoonal re xk’ulb’al junaq aasumenkil, ut toj maji’ nakaweek’a a’an? Maare taawaj raj xb’antioxinkil naq taak’ulmanq a’an, xb’aan naq a’an jun xk’utb’al li royb’enihom li Dios aawik’in. Naq nakatwan chi k’ulub’ejil ut li k’a’ru nakasik’ ru naxk’am rib’ rik’in lix k’utum li Kolonel ut aajel ru naq taak’anjela a’an, ayu chi uub’ej rik’in kawil ch’oolej. … Naq nakatwan sa’ tiikilal ut nakakanab’ aawib’ chiru li Dios, a’an moko tatxkanab’ ta chi xik chi uub’ej chi najt chi ink’a’ ta raj tixk’e chanaw wi ink’a’ us li b’e xasik’ ” (Richard G. Scott, “Utilizar el don supremo de la oración”, Liahona, mayo re 2007, 10).

Xchaab’ilob’resinkil li qak’utum

Jultika reheb’ li tzolonel lix seeb’aleb’ nakawil. Maare wankeb’ junjunq li komon sa’ laa tzoleb’aal li neke’reek’a naq moko kaweb’ ta xch’ool re xtzolb’al li evangelio. K’oxla chan ru naru taach’olob’ chiruheb’ li komon naq wi neke’xyal xq’e chi tzolok xjuneseb’, li Santil Musiq’ej taatzoloq reheb’. (Chi’ilmanq Li k’utuk jo’ li Kolonel, 29).