Na ivakatakarakara ni isevu ni ilavelave ni iVola i Momani.

1–7 ni Feperueri

Vunau kei na Veiyalayalati 10–11

“Me Rawa Ni Nomu Na Qaqa”

Na veivakadeitaki cava e yaco vei iko ni o wilika na Vunau kei na Veiyalayalati 10–11? Na vakanananu cava e yaco mai vei iko me baleta na nodra gagadre na tamata ko vakavulici ira tiko?

Vola na Veika o Vakauqeti Kina

Sureta na Veiwasei

Me soli vei ira na lewe ni kalasi e dua na madigi me ra veitalanoataka kina na veika era sa vulica ena nodra vulica yadua ka vakamatavuvale na ivolanikalou, e rawa mo vola ena vava ni volavola na Vunau kei na Veiyalayalati 10 kei na Vunau kei na Veiyalayalati 11. E vica na lewe ni kalasi era rawa ni vola, ena ruku ni dua ga na ulutaga, na naba ni dua na tikina ka ra kunea kina e dua na dina bibi. Digitaka e vica na vei tikina, ka sureti ira na lewe ni kalasi mera wasea na dina era kunea kina.

Vakavulica na iVunau

Vunau kei na Veiyalayalati 10:1–33

E segata ko Setani me vakarusa na cakacaka ni Kalou.

• Vunau kei na Veiyalayalati 10 e rawa ni vukei ira na lewe ni kalasi mera kila ka vorata na sasaga nei Setani me vakarusa na nodra vakabauta. Me soli eso na itukutuku makawa me baleta na wase oqo, mo na sureta e dua na lewe ni kalasi me na wasea na itukutuku nei Matini Erisi ena nona vakayalia e 116 na draunipepa ni ivakadewa ni iVola i Momani (raica na iulutaga ni wase ni Vunau kei na Veiyalayalati 3 kei na Yalododonu, 1:50–53). Mera qai vakasaqaqara na lewe ni kalasi ena Vunau kei na Veiyalayalati 10:1– 33 me raici kina na nona ituvatuva o Setani me baleta na veidraunipepa ka yali. Na cava eda vulica mai na veitikina oqo me baleta na sala e cakacaka kina o Setani kei na inaki ni nona vakayacora na veika oqo? (raica talega na tikina e 63). E tautauvata vakacava kei na nona cakacaka tiko ena noda gauna? E vukei keda vakacava na Turaga meda rawai Setani ena noda bula?

Vunau kei na Veiyalayalati 10:34–52

Na “yalomatua ni Turaga e uasivia sara na ilawaki qaseqase ni tevoro.”

• Ena gauna eda yalolailai kina ena vuku ni noda ivalavala ca, eda na kunea na inuinui ena noda kila na iwalewale ni nona walia na leqa na Turaga ena vuku ni ivalavala ca nei Josefa Simici kei Matini Erisi ena nodrau talaidredre Vua ena nodrau a vakayalia na 116 na draunipepa ni ivakadewa ni iVola i Momani. Vakasamataka eso na sala e rawa ni o vukei ira kina na lewe ni kalasi mera kunea na inuinui ena itukutuku oqo. Me kena ivakaraitaki, e rawa ni o sureti ira mera wasea na veika era sa vulica me baleta na Turaga mai na Vunau kei na Veiyalayalati 10:34–52 (raica talega na Vunau kei na Veiyalayalati 3:1–3). E rawa ni ra wasea na lewe ni kalasi na sala era sa raica rawa kina ni “yalomatua ni Turaga sa uasivia sara na ilawaki qaseqase ni tevoro.” (Vunau kei na Veiyalayalati 10:43). E vaqaqacotaka vakacava na noda vakabauti Koya na kila-ka oqo?

  

  Sa Vakalailaitaka tiko na Peleti o Momanii mai vei Tom Lovell

Vunau kei na Veiyalayalati 11

Kevaka eda na kerekere vua na Kalou, eda na ciqoma.

• Na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale e sureti keda tiko meda wilika na Vunau kei na Veiyalayalati 11 me vaka sara ga e volai tiko vei keda. E rairai ena rawa vei ira na lewe ni kalasi mera lomasoli me wasea na veika eso mai na wase e veiganiti vakabibi vei ira. Era sa lalawataka vakacava mera bulataka na veika era sa vulica?

• E dua na sala me vakauqeta na veivosaki me baleta na Vunau kei na Veiyalayalati 11 sai koya me ra sureti na lewe ni kalasi me ra vakaraica e dua na dina ena iwase ka qai vola e dua na taro. Na taro vakaoqori ena rawa ni oka kina na “Na cava na kena ibalebale mo kabita sara na Karisito ena lomamu taucoko?” (tikina e 19) se “Eda na vulica vakacava na vosa ni Kalou?” (tikina e 21). E rawa ni ra biuta na nodra taro na lewe ni kalasi ena ulu ni dua na tiki ni pepa ka solia wavoki ena loma ni rumu, me tomani mai vei ira na kena vo ena veivakanananu kei na vei isau ni taro eso ka ra taroga. (Sa rawa ni veivuke me wasei taumada na kalasi vaka iwasewase lalai.) Mera veiwaseitaka na lewe ni kalasi ki na kalasi eso na raititobu ka ra a vola eso tale me baleta na nodra taro.

Vunau kei na Veiyalayalati 11:8–26

Na Kalou ena solia vei keda na Nona Yalotabu ni da vakavakarautaki keda ena Nona sala.

• Ena yaga beka vei ira na lewe ni nomu kalasi na nodra veitalanoataka na sala ena kilai rawa kina na ivakatakila ki na tamata yadua mai vua na Yalo? Ke vakakina, o na rairai tekivutaka e dua na veivosaki ena nomu sureti ira me ra raitayaloyalotaka ni ra sa kerei me ra vola eso na dina me baleta na sala ni kena ciqomi na ivakatakila kina tamata yadua. Na cava era rawa ni okata mai na Vunau kei na Veiyalayalati 11:8–26? Me kena ivakaraitaki, na cava era na rawa ni ra vola me baleta na vakavakarau me ciqomi na veidusimaki me baleta na noda bula kei na isau ni taro ki na veika eda taroga? Na cava era rawa ni kaya me baleta na sala e kilai kina na isau ni taro ni ra yaco mai? Sureti ira na lewe ni kalasi me ra vakasamataka vakatitobu na iwalewale ni nodra na bulataka na veika era sa vulica ena nodra segata tiko mera vakasaqara na ivakatakila kina tamata yadua.

  Me tiki ni itaviqaravi oqo, sa rawa mo wasea na itukutuku oqo mai vei Sister Julie B. Beck, na Peresitedi vakacegu ni iSoqosoqo Raraba ni Veivukei: “Na kena rawati, ka ciqomi ka cakacakataki na ivakatakila yadudua sai koya na ka bibi duadua e rawa ni taukeni ena bula oqo” (“Vei Ira Talega na Vada Kau na Sovaraka na Yaloqu ena Gauna Ko ya, ” Ensign se Liaona, Me 2010, 11).

Vakatorocaketaki Noda Veivakavulici

Okati ira era sasaga tiko. Na cava o rawa ni cakava ni rairai sega ni sema tiko mai ki vei ira na vo ni kalasi? Ena so na gauna o koya na tagane se yalewa o ya era gadreva ga me ra kauwaitaki. Vakasamataka mo na kerea na tamata oqo me na vakaitavi ena lesoni ka tarava. Kevaka e sega ni malele mai na tagane se yalewa oya ki na nomu sasaga taumada, tomana tiko ga na ivakaraitaki ni loloma kei na veikauwaitaki. (Raica na Veivakavulici ena iVakarau ni iVakabula, 8–9.)