8–14 ni Feperueri

Vunau kei na Veiyalayalati 12–13; Josefa Simici—Ai Tukutuku1:66-75

“Veikemuni na Noqu iTokani Dauveiqaravi”

Me vaka ga e a vakararamataka na ivolanikalou ki na vakasama nei Josefa Simici kei Oliva Kaudari na Yalo Tabu, E rawa me vakauqeti iko ena nomu vulica ena masumasu na Vunau kei na Veiyalayalati 12–13 kei na Josefa Simici—Ai Tukutuku1:66-75.

Vola na Veika o Vakauqeti Kina

Sureta na Veiwasei

E dua na sala me vakauqeta na veiwasei sai koya me ra tarogi na lewe ni kalasi ena i walewale ni nodra vulica na ivolanikalou. Na cava era a cakava mera kunea eso na raititobu ena ivolanikalou ena macawa oqo?

Vakavulica na iVunau

Vunau kei na Veiyalayalati 13

Sa vakalesui tale mai na Matabete i Eroni mai vei Joni na Dauveipapitaiso.

• E dua na sala me veivosakitaki kina na dina era tiko ena Vunau kei na Veiyalayalati 13 sai koya mera veitalanoataka na lewe ni kalasi, se na veivuke vakacava na wase oqo vei ira na itabagone me ra kila vakavinaka cake kina na Matabete i Eroni. Na cava e vakavulica na wase e 13 me baleta na Matabete i Eroni ka dodonu mera kila vakavinaka sara na cauravou kei na goneyalewa? Me soli vei ira e dua na madigi me ra na vakaitavi kece, sa rawa mo kerei ira na lewe ni kalasi me ra veivosakitaka na taro oqo mera veisasa, ka wasea na veika era sa vulica mai vakataki ira ki vei ira na lewe ni kalasi.

• Na ituvatuva ni macawa oqo ena Lako Mai, Mo Muri Au—Me Baleta Ira na Tamata Yadua kei na Matavuvale e vakatututaka eso na ivurevure ka vukea na kena vakamacalataki eso na malanivosa e tiko ena Vunau kei na Veiyalayalati 13. Sa rawa mo kerei ira na lewe ni kalasi mera wasea na veika era sa vulica, mai na kena vakayagataki na ivurevure eso oqo. Me vakauqeti e dua na veivosaki me baleta na idola ka ra tukuni tiko ena wase oqo, sa rawa mo vakaraitaka e dua na itui ki ka sureti ira na lewe ni kalasi mera veivosakitaka se cava e rawa ni ra vakatara na ki meda cakava? Na ivakamacala mai vei Sisita Ruth kei Elder Dale G. Renlund ena “Ikuri ni iVurevure” sa rawa talega ni veivuke. Na veivakalougatataki cava e rawa ni da tadolova ena vakayagataki ni idola ni Matabete i Eroni? Ena duidui vakacava na noda bula ni ra yali na veivakalougatataki eso oqo?

• E tiki totoka ni kosipeli vakalesui mai na noda rawa ni vakaitavitaki keda ena cakacaka vata ga ka ra a cakava na tagane kei na yalewa ena ivolanikalou: tarai cake na matanitu ni Kalou e vuravura. Oqo e na dusimaki keda, ena dua na kena vakasama, meda “itokani dauveiqaravi” vata kei ira. Na cava na kena ibalebale meda dua na itokani dauveiqaravi ena cakacaka ni Turaga? Maciu 3:13–17; Luke 1:13–17; 3:2–20 e rawa ni vukei ira na lewe ni kalasi mera kila vakavinaka cake na cakacaka a cakava o Joni na Dauveipapitaiso.

  

  Josefa Simici sa papitaisotaki Oliva Kaudari tiko, mai vei Del Parson

Josefa Simici—Ai Tukutuku 1:66–75

Na Cakacakatabu vakalotu e vakatara vei keda meda tadolova rawa na kaukauwa ni Kalou.

• Me soli vei ira na lewe ni kalasi na gauna me ra veiwasei ivakadinadina kina vaka i ira, ena veivakalougatataki e yaco mai ena kena ciqomi na cakacaka tabu vakalotu ni matabete, o na rawa ni sureti ira me ra railesuva na Josefa Simici—Ai Tukutuku 1: 66–75, oka kina na idusidusi ki na tikina e 71, ni vaqarai na veivakalougatataki erau a ciqoma ko Josefa Simici kei Oliva Kaudari ni oti nodrau papitaiso kei na ciqomi ni cakacakatabu vakalotu ni matabete. Era solia vakacava na kaukauwa vakayalo na cakacakatabu vakalotu? Mera qai wasea o ira na lewe ni kalasi na veika era dui sotava ni ra sa vakila na kaukauwa ni Kalou, e yaco mai ena kena ciqomi na cakacaka tabu vakalotu ni matabete me vaka na papitaiso, sakaramede, se na cakacaka tabu vakalotu ni valetabu. E rawa talega ni o vakaraitaka na vidio “Veivakalougatataki ni Matabete” (ChurchofJesusChrist.org) me tiki ni veivosaki.

• E rawa ni yaga sara vei ira na lewe ni kalasi na kena taraicake e dua na ivolakabi ka vakaraitaka na veivakalougatataki e yaco mai na cakacakatabu vakalotu ni matabete. Me kena ivakaraitaki, e rawa mo vola ena vava ni volavola na ulutaga Cakacakatabu Vakalotu kei na Veivakalougatataki. O ira na lewe ni kalasi e rawa ni ra vakasaqara na ivolanikalou me vaka ka koto oqo mera vakalewena kina na ivolakabi: Joni 14:26; Cakacaka 2:38; Vunau kei na Veiyalayalati 84:19–22; 131:1–4; Josefa Simici —Ai Tukutuku 1:73–74. E rawa talega ni okati kina na veivakalougatataki tale eso era sa ciqoma oti ena vuku ni veicakacakatabu vakalotu oqo. Ena rawa ni ra wasea tale ga na veigauna eso era vakila kina ni a kauta mai ki na nodra bula na kaukauwa ni iVakabula na cakacakatabu vakalotu era sa ciqoma.

iKuri ni iVurevure

Na cava na idola ni matebete?

Erau solia na ivakamacala oqo o Elder Dale G. Renlund kei na watina, o Ruth, me baleta na idola ni matabete.

“Na matavosa idola ni matabete e vakayagataki ena rua na sala duidui. Na kena imatai e cavuti ki na dua na dodonu se galala e soli vei ira kece era ciqoma na Matabete i Eroni se Matabete i Melikiseteki. … Me kena ivakaraitaki, o ira na lewe ni Matabete i Eroni era ciqoma na idola ni nodra veiqaravi na agilosi kei na kosipeli ni vakavakarau ni veivutuni kei na papitaiso ena tabadromuci me bokoci kina na ivalavala ca (raica na Vunau kei na Veiyalayalati 13:1; 84: 26–27). Na lewe ni Matabete i Melikiseteki era ciqoma na idola ni veika vuni ni matanitu, na idola ni nona kilai na Kalou, kei na idola ni veivakalougatataki vakayalo kece sara ni Lotu (raica na Vunau kei na Veiyalayalati 84:19; 107:18). …

“Na ikarua ni sala e vakayagataki kina na matavosa idola ni matabete sa vakaibalebaletaki tiko vei ira na veiliutaki. Na iliuliu ni matabete era ciqoma na ikuri ni idola ni matabete, na dodonu me liutaka e dua na iwasewase ni mataisoqosoqo ni Lotu se e dua na kuoramu. Ena vuku ni ka oqo, na idola ni matabete sai koya na lewa kei na kaukauwa mera dusimaka, liutaka, ka vakatulewa ena Lotu” (Na Matabete i Melikiseteki: Kilai vakamatata ni iVunau, ka Bulataki na iVakavuvuli [2018], 26).

Vakatorocaketaki Noda Veivakavulici

Cavuta vakawasoma na nomu ivakadinadina. “Na nomu ivakadinadina, rawarawa ka dina baleta na dina vakayalo sa rawa me veivakauqeti kaukauwa vei ira o vakavulica. … E sega ni ganiti me ukutaki se me balavu” (Veivakavulici ena iVakarau ni iVakabula, 11). Vakasamataka mo wasea na nomu ivakadinadina vaka i iko me baleta na Matabete i Eroni ena nomuni veivosakitaka na Vunau kei na Veiyalayalati 13.