15–21 ni Feperueri

Vunau kei na Veiyalayalati 14–17

“Mo Tu ka iVakadinadina”

Vakasamataka mada na dina kei na veika e vakamacalataki tiko e na Vunau kei na Veiyalayalati 14–17. O na vakauqeti ira vakacava na tamata o vakavulica tiko mera “ivakadinadina ni veika [oqo]”? (Vunau kei na Veiyalayalati14:8).

Vola na Veika o Vakauqeti Kina

Sureta na Veiwasei

Na cava era kunea na lewe ni nomu kalasi ni vakaibalebale ena nodra vulica taudua se vakamatavuvale na ivolanikalou De rawa mo sureta na kalasi me ra wasea e dua na raititobu me baleta na vakaitavi ena cakacaka ni Turaga mai na vei iwase yadua ena Vunau kei na Veiyalayalati 14–17.

Vakavulica na iVunau

Vunau kei na Veiyalayalati 14–16

Na Turaga e sureti keda meda vakaitavi ena Nona cakacaka.

• Na cava era kila na lewe ni kalasi me baleta na matavuvale nei Witima? (raica na Yalododonu, 1: 68–69). E rawa ni veivuke vei ira me ra tuva ena papa ni volavola eso na ka dina me baleti iratou na Witima. E vukei keda vakacava na kila–ka oqo meda kila vakavinaka cake kina na ivakasala ni Turaga vei iratou na Witima ena tabana e 14–16? Me kena ivakaraitaki, na cava beka a vakatauvatana kina na Turaga na Nona cakacaka kei na tatamusuki ena dua na were?

• Me vakatarai vei ira na lewe ni kalasi me ra wasea na nodra nanuma me baleta na vakaitavi ena cakacaka ni Turaga, e rawa mo vola na vei idusidusi oqo ena papa ni volavola: Vunau kei na Veiyalayalati 14:1; 14:2–4; 14:5, 8; 14:6–7; 14:9–11; 15:6. E rawa ni ra wilika vaka–isa na lewe ni kalasi e dua vei ira na veimalanivosa ni ivolanikalou ka veivosakitaka na veika era sa vulica me baleta na cakacaka ni Turaga. Me qai digitaki e vica vei ira na mataveisa oqori mera qai wasea ki na kalasi na veika era sa veivosakitaka.

• Sureti ira na lewe ni kalasi me ra wasea na veika era sotava ena nodra vukei na tani me ra toro voleka yani vua na iVakabula, oka kina vaka-daukaulotu tudei se daukaulotu veiqaravi kei na veiqaravi vei ira na tamata. Era sa raica vakacava na vosa ni Turaga ena Vunau kei na Veiyalayalati 15:6 kei na 16:6 ni vakavotukanataki ena nodra bula? Na cava eda sa vulica mai na vei iwase oqori me na vukea noda wasea na kosipeli?

  

  Kedra ivakaraitaki na dautamusuki witi mai vei Greg Newbold

Vunau kei na Veiyalayalati 17

Eda rawa ni dinata tiko na veika eda sa kila, veitalia ke ra biligi keda na tani.

• Na cava na vuna sa vakarautaka kina na Turaga eso na ivakadinadina ni iVola i Momani? E rawa ni ra wasea na vei vakasama e yaco vei ira na lewe ni kalasi ni ra wilika na Vunau kei na Veiyalayalati 17. Na ikuri ni vakasama e rawa ni kunei mai na ivolanikalou e tukuni tiko ena ikau ni wase 17 se “iVakadinadina ni Lewe Tolu,” ka kunei ena itekivu ni iVola i Momani. Sa vakauqeta vakacava na noda ivakadinadina ni iVola i Momani na nodratou iVakadinadina na Lewe Tolu?

• Kevaka sara mada ga eda se bera ni raici ira na agilosi se tara na peleti koula, eda se rawa tiko ga ni vakadinadinataka na iVola i Momani. Na cava era raica rawa na lewe ni kalasi ena wase e 17 (oka kina na ulutaga ni iwase) ka vakila ni bale tiko vei ira? Kevaka e dua e taroga na cava na vuna eda vakabauta kina ni sa dina na iVola i Momani, na cava eda na kaya? De na rawa beka vei ira na lewe ni kalasi mera vola e dua na kena isau lekaleka, ka rawa me sureti e vica mera wasea na veika era sa vola. Na vosa lavetaki nei Peresitedi Ezra Taft Benson ena “iKuri ni iVurevure” ena rawa ni vakauqeti ira na lewenilotu me ra wasea na nodra ivakadinadina ni iVola i Momani kivei ira tale eso.

• Ena rawa ni veivakauqeti me dua na lewe ni kalasi e wasea na veika era sotava eso tale na ivakadinadina ni peleti koula (raica na “iVakadinadina ni Lewe Walu” ena iVola i Momani kei na veika a sotava o Meri Witima ena Yalododonu, 1:70–71). Na cava eda vulica mai na veika era a sotava o ira na vei ivakadinadina oqo?

• E rawa ni o wasea na veitikina digitaki mai na vidio “A Siga me baleta na veigaunaTawamudu” (ChurchofJesusChrist.org) me tiki ni nomuni veivosaki baleti ira na ivakadinadina ni iVola i Momani (e tekivu na iwase me baleta na Lewe Tolu na ivakadinadina ena rauta na 15:00).

iKuri ni iVurevure

Wasea noda ivakadinadina ni iVola i Momani.

Na veisureti oqo vei ira na lewe ni Lotu ena 1988 a solia o Peresitedi Ezra Taft Benson:

Na iVola i Momani sa iyaya ni cakacaka ni Kalou sa lesia me “lako siviti vuravura na waluvu, mera vakasoqoni mai kina na [Noqu] digitaki.” (Mosese 7:62.) Na ivolanikalou tabu oqo e gadrevi me sa iusutu tiko vakalevu ni noda vunau, noda veivakavulici, kei na noda cakacaka ni kaulotu.

“… Ena gauna oqo ni itukutuku ena mona livaliva kei na veisoliyaki vakayauyau ni vosa tabaki, ena tarogi keda kina na Kalou kevaka eda sega ni vakatetea yani oqo ena sala totolo na iVola i Momani.

“Sa tu vei keda na iVola i Momani, sa tiko vei keda o ira na lewenilotu, sa tiko vei keda o ira na daukaulotu, sa tu vei keda na ivurevure taucoko, ka sa tiko na gagadre vei vuravura. Oqo na kena gauna!

“Oi kemuni na taciqu kei na ganequ, eda se bera ni kila rawa na taucoko ni kaukauwa ni iVola i Momani, se na ilesilesi vakalou me na vakayacora, se na iyalayala ni kena tosoi yani” (Nodra iVakavuvuli na Peresitedi ni Lotu: Ezra Taft Benson [2014], 143 – 44.).

Vakatorocaketaki ni Noda Veivakavulici

Taroga na taro ka sureta na ivakadinadina. Na taro e veivakauqeti e rawa ni sala kaukauwa ni kena sureti na Yalotabu. Me ivakaraitaki, ni vakavulici na Vunau kei na Veiyalayalati 14:9., e rawa ni o taroga na taro vakaoqo “E yaco vakacava mo mai kila ni o JisuKarisito ‘e rarama ka sega ni tabonaki rawa ena butobuto’?” (Raica na Veivakavulici ena iVakarau ni iVakabula, 32.)