Vanua ni Teitei nei Matini Erisi, mai vei Al Rounds

22–28 ni Feperueri

Vunau kei na Veiyalayalati 18–19

“Sa Ka Talei na Yalo ni Tamata”

Ena Yalo Tabu duaduaga ena veisau rawa kina na yalo ni dua na tamata. E vakavulica o Peresitedi Henry B. Eyring, “Kevaka o vakavulica tiko na ivakavuvuli vakaivunau, na Yalo Tabu ena lako mai” (“Na Veivosaki vata kei Elder Richard G. Scott kei Elder Henry B. Eyring,” [iVakarau ni Vuli ni Lotu veituberi kaburaki ena setelaite, 11 ni Okos., 2003]).

Vola na Veika o Vakauqeti Kina

Sureta na Veiwasei

Me vakauqeti ira na lewe ni kalasi me ra wasea na veika era sotava vata kei na ivolanikalou, wilika vata na Vunau kei na Veiyalayalati 18:34–36. Qai kerei ira na lewe ni kalasi me ra wasea e dua na tikina era sa wilika ena macawa oqo ka ra kila kina na domo ni Turaga.

Vakavulica na iVunau

Vunau kei na Veiyalayalati 18:10–16; 19:15–20, 39–41

E reki na Turaga ni da veivutuni.

• E vuqa na tamata era raica na veivutuni me dua na ka e sega ni taleitaki. Ena rawa vakacava ni veivuke na vosa ni Turaga ena Vunau kei na Veiyalayalati 18 kei na 19 mera raica kina na lewe ni kalasi ni veivutuni e dua na ka rekitaki? E rawa mo vola ena vava ni volavola Na Veivutuni e  ka kerei ira na lewe ni kalasi me ra vakatura eso na sala me vakaoti kina na iyatuvosa oqo, ka yavutaki ena ka era sa wilika mai na wase e 18 kei na 19. (Sa rawa mo raica lesu na Vunau kei na Veiyalayalati 18:10–16; 19:15–20, 39–41 ena kalasi.)

• Na cava e kena ibalebale mo “vunautaka na veivutuni”? (Vunau kei na Veiyalayalati 18:14). Ena rawa vei ira na lewe ni kalasi mera vakasamataka na taro oqo ni ra wilika tiko na Vunau kei na Veiyalayalati 18:10–16. Na cava na vuna era dau digitaka kina na tamata ena so na gauna mera kakua ni veivutuni? Eda na rawa ni vakauqeti ira vakacava o ira eda lomana me ra lako mai vua na iVakabula ka ciqoma na veivosoti? Vakayaloqaqataki ira na lewe ni kalasi mera vakaraica e dua na ka ena Vunau kei na Veiyalayalati 18:10–16 se 19:15–20 ka rawa ni veivuke.

Vunau kei na Veiyalayalati 18:10–16

“Raica sa ka talei ena mata ni Kalou na tamata kecega.”

• E na rawa vakacava ni o vukei ira na lewe ni kalasi me ra kila deivaki ni o keda yadua eda sa ka talei sara ena mata ni Kalou? E na rawa beka ni ra wilika na Vunau kei na Veiyalayalati 18:10–16 ka wasea na veika era sa sotava ka ra mai kila kina ni ra sa ka talei vua na Kalou. E veisautaka vakacava na veitikina oqo na noda raici keda vakataki keda? kei ira na tani? E vakaraitaka vakacava vei keda na Kalou ni da sa ka talei sara ki vei Koya?

  

  Na Talei ni dua na Yalo, mai vei Liz Lemon Swindle

Vunau kei na Veiyalayalati 19:15–19

E a vakararawataki o Jisu Karisito e vukudra na tamata kecega.

• Ena rawa vakacava ni o vukei ira na lewe ni kalasi mera vakila na ivakadinadina ni Yalo Tabu ni ra vakananuma vakatitobu na nona ivakamacala na iVakabula me baleta na rarawa ni nona Veisorovaki? (Vunau kei na Veiyalayalati 19:15–19). Ena rawa beka ni o sureta e dua me lagata e dua na serenilotu taleitaki me baleta na iVakabula. Ena rawa talega ni o vakaraitaka e dua na iyaloyalo ni iVakabula ka sureti ira na lewe ni kalasi mera wilika na tikina e 15–19; ka mera qai ra vola na nodra nanuma kei ka era era vakila. (Na vosa nei elder D. Todd Christofferson ena “Ikuri ni iVurevure” e rawa talega me vakatitobutaka na nodra vakavinavinaka na lewe ni kalasi ena nona a vakararawataki na iVakabula.) E dua na iyatuvosa vakaoqo ena vavanivolavola ena rawa ni vukei ira na lewe ni kalasi mera vakanananu vakatitobu: Au vakavinavinakataka na Veisorovaki i Jisu Karisito baleta … E so na lewe ni kalasi era na via wasea na ka era vola ka solia nodra ivakadinadina baleti Jisu Karisito.

Vunau kei na Veiyalayalati 19:16–26, 34–41

Na vakayacori ni loma ni Kalou ena dau gadrevi kina na solibula.

• Ni ra sotava na lewe ni kalasi eso na draki ni bula ni solibula ena vuku ni kosipeli, ena rawa ni veivakauqeti vei ira me ra vulica na solibula a cakava o Matini Erisi me rawa ni tabaki kina na iVola i Momani. E na rawa beka mo sureta e dua me lako mai ki na kalasi ka sa vakarau tu me tukuna na vakatulewa nei Matini me mokiti na nona qele ni teitei me saumi kina na kena tabaki na iVola i Momani (raica na Yalododonu, 1:76–78). Na veitikina cava mai na wase e 19 a vukei koya ena nona vakatulewa? Sa rawa mo sureti ira na lewe ni kalasi me ra wasea na sala cava sa vakalougatataki ira kina na iVola i Momani kei na nodra vakavinavinakataka na solibula nei Matini Erisi, kei ira na tani me rawa ni tabaki kina na ivola.

• Ena rawa beka vua edua ena kalasi me wasea e dua na solibula era sa cakava vua na Turaga. Oqo ena rawa ni muataki ira na lewe ni kalasi me ra vakasamataka na nodra lomasoli me ra solibula. Vakayaloqaqataki ira me ra wasea na veika era sa raica mai na Vunau kei na Veiyalayalati 19 e vakauqeti ira me ra solibula mera cakava kina na loma ni Kalou (raica vakatabakidua na tikina e 16–26, 34–41).

iKuri ni iVurevure

Na isau ni loloma ni Kalou.

Ni vosa tiko mai na Vunau kei na Veiyalayalati 19:18, e kaya o Elder D. Todd Christofferson : “Meda vakasamataka mada na isau ni loloma talei ni Kalou. … Na Nona vakararawataki mai Kecisemani vakakina ena kauveilatai sa uabaleta na kaukauwa e rawata rawa e dua na tamata ena vuravura oqo. Ia, ena vuku ni nona loloma vua na Tamana kei keda, A vosota, me rawa kina, ni solia vei keda na tawa mate rawa kei na bula tawamudu” (“Tiko Ga e na Noqu Loloma,” Ensign or Liaona, Nov. 2016, 50).

Vakatorocaketaki Noda Veivakavulici

Vakavurea e dua na ituvaki ni veiyaloni ka na sureta na Yalotabu Era vuqa tu na sala e rawa mo sureta kina na Yalotabu ki na nomu kalasi. Na idola sere i ivakatagi e rawa ni vakauqeta na yalo ni veirokovi. iVakaraitaki ni loloma kei na ivakadinadina e rawa ni vakavurea e dua na ituvaki ni veilomani, ka vakayalo. (Raica na Veivakavulici ena iVakarau ni iVakabula, 15.)