Lix ch’och’ laj Martin Harris, xb’aan laj Al Rounds

22–28 febrero

Tzolʼlebʼ ut Sumwank 18–19

“Nim lix loq’aleb’ li aamej”

Li raam junaq kristiaan ka’ajwi’ naru najala rik’in li Santil Musiq’ej. Li Awa’b’ej Henry B. Eyring kixk’ut: “Wi laa’ex nekek’uteb’ li na’leb’ re tzol’leb’, taachalq li Santil Musiq’ej” (“Preguntas y respuestas: élder Scott y élder Eyring” [Transmisión de la capacitación del Sistema Educativo de la Iglesia, 11 agosto, 2003]).

Tz’iib’a li nakak’oxla

Xkanab’ankileb’ chi wotzok

Re xtenq’ankileb’ li komon sa’ li tzoleb’aal chixwotzb’al lix numsihomeb’ rik’ineb’ li loq’laj hu, ilomaq ru sa’ komonil Tzolʼlebʼ ut Sumwank 18:34–36. Chirix a’an kanab’eb’ chixwotzb’al junaq li raqal xe’ril ru chiru li xamaan b’ar wi’ xe’xk’e reetal xyaab’ xkux li Qaawa’.

Xk’utb’al li tzolʼlebʼ

Tzolʼlebʼ ut Sumwank 18:10–16; 19:15–20, 39–41

Li Qaawa’ nasaho’ xch’ool naq naqajal qak’a’uxl.

• Naab’aleb’ li kristiaan neke’xk’oxla naq li jalb’a-k’a’uxlej a’aneb’ li yib’ aj eek’ahom. Chan ru naq li raatin li Qaawa’ natawman sa’ Tzolʼlebʼ ut Sumwank 18 ut 19 naru naxtenq’aheb’ li komon sa’ li tzoleb’aal chirilb’al li jalb’a-k’a’uxlej jo’ jun aj k’amol chaq re li sahil ch’oolejil? Naru taatz’iib’a sa’ li pizarron Li jalb’a-k’a’uxlej a’an  ut taapatz’ reheb’ naq te’xye chan ru naru natz’aqob’resiman ru li ch’ol aatin a’an rik’in roksinkil li xe’ril ru sa’eb’ li tasal 18 ut 19. (K’oxla rilb’al wi’chik ru Tzolʼlebʼ ut Sumwank 18:10–16; 19:15–20, 39–41 sa’ li tzoleb’aal.)

• K’a’ru naraj naxye “xyaab’asinkil li jalb’a-k’a’uxlej”? (Tzolʼlebʼ ut Sumwank 18:14). Maare eb’ li komon sa’ li tzoleb’aal naru te’xk’oxla li patz’om a’in naq yooqeb’ chirilb’al ru Tzolʼlebʼ ut Sumwank 18:10–16. K’a’ut naq wan sut naq eb’ li kristiaan neke’xsik’ ru naq ink’a’ te’xjal xk’a’uxl? Chan ru naru naqamusiq’aheb’ li kristiaan naqaraheb’ chixsik’b’al li Kolonel ut chixk’ulb’al xkuyb’al xmaakeb’? Waklesi xch’ooleb’ li komon sa’ li tzoleb’aal chixsik’b’al junaq na’leb’ sa’ Tzolʼlebʼ ut Sumwank 18:10–16 malaj 19:15–20 li naru natenq’an.

Tzolʼlebʼ ut Sumwank 18:10–16

“Nim lix loqʼalebʼ li aamej saʼ rilobʼaal li Dios.”

• Chan ru naru nakatenq’aheb’ li komon sa’ li tzoleb’aal chixtawb’al ru xnimal qaloq’al laa’o sa’ rilob’aal li Dios? Maare naru te’ril ru Tzolʼlebʼ ut Sumwank 18:10–16 ut te’xwotz xnumsihomeb’ b’ar wi’ xe’xtaw ru xnimal xloq’aleb’ sa’ rilob’aal li Dios. Chan ru neke’tenq’an li raqal a’an chirix chan ru neke’ril rib’ a’an malaj eb’ li ras riitz’in? Chan ru naq li Dios naxk’ut chiqu naq nim qaloq’al sa’ rilob’aal a’an?

  

  Lix loq’al jun aamej, xb’aan li xLiz Lemon Swindle

Tzolʼlebʼ ut Sumwank 19:15–19

Li Jesukristo kixk’ul li rahilal choq’ re chixjunil li winqilal.

• Chan ru naru nakatenq’aheb’ li komon sa’ li tzoleb’aal chireek’ankil lix ch’olob’ahom li Santil Musiq’ej naq neke’xtz’il rix li kixch’olob’ li Kolonel chirix li rahilal kixk’ul re xtojb’al rix li maak? (Tzolʼlebʼ ut Sumwank 19:15–19) Maare naru taakanab’ anihaq chixb’ichankil junaq li b’ich nawulak chiru li na’aatinak chirix li Kolonel. Naru ajwi’ taak’ut junaq xjalam-uuch li Kolonel ut takanab’eb’ li komon sa’ li tzoleb’aal chirilb’aleb’ ru li raqal 15–19; chirix a’an naru te’xtz’iib’a lix k’oxlahomeb’ ut reek’ahomeb’. (Li raatin li Elder D. Todd Christofferson li natawman sa’ “Xkomon chik li k’anjeleb’aal” naru ajwi’ naxchamob’resi li b’antioxihom neke’reek’a li komon sa’ li tzoleb’aal chirix lix rahilal li Kolonel). Jun li ch’ol aatin jo’ a’in sa’ li pizarron naru naxtenq’aheb’ li komon sa’ li tzoleb’aal chi k’oxlak: Ninb’antioxi lix tojb’al rix li maak xb’aan li Jesukristo xb’aan naq … Maare junjunqeb’ re a’an te’raj xwotzb’al li xe’xtz’iib’a ut te’xwotz lix nawom xch’ooleb’ chirix li Jesukristo.

Tzolʼlebʼ ut Sumwank 19:16–26, 34–41

Xb’aanunkil li naraj li Dios wan naq mayejak naraj.

• Naq eb’ li komon sa’ li tzoleb’aal te’xnumsi li hoonal b’ar wi’ tento te’mayejaq sa’ xk’ab’a’ li evangelio, naru te’musiq’aaq rik’in xnawb’al li mayejak kixb’aanu laj Martin Harris re naq kiru chi puktesiik lix Hu laj Mormon. Maare naru taak’e xb’oqb’al anihaq chi chalk sa’ li tzoleb’aal chi kawresinb’il re xseraq’inkil chan ru naq laj Martin Harris kixk’e lix ch’och’ jo’ reeqaj tumin re xtojb’al risinkil lix Hu laj Mormon (chi’ilmanq Santos, 1:76–78). B’ar wan li raqal re li tasal 19 maare kitenq’ank re chixb’aanunkil a’an? Naru taakanab’eb’ li komon sa’ li tzoleb’aal chixwotzb’al chan ru naq neke’osob’tesiik xb’aan lix Hu laj Mormon ut li b’antioxihom neke’reek’a xb’aan lix mayej laj Martin Harris ut lix mayejeb’ ajwi’ jalaneb’ chik li kristiaan re naq kiru chi puktesiik li hu.

• Maare anihaq sa’ li tzoleb’aal naru tixwotz junaq mayej xb’aanu sa’ xk’ab’a’ li Qaawa’. A’an naru naxk’ameb’ li komon sa’ li tzoleb’aal chixk’oxlankil ma wankeb’ xch’ool chi mayejak. Waklesi xch’ooleb’ chixwotzb’al li k’a’ru xe’xtaw sa’ Tzolʼlebʼ ut Sumwank 19 li naxmusiq’aheb’ chi mayejak re xb’aanunkil li naraj li Dios (che’ilmanq li raqal 16–26, 34–41).

Xkomon chik li k’anjeleb’aal

Lix tz’aq lix rahom li Dios.

Sa’ aatinak chirix Tzolʼlebʼ ut Sumwank 19:18, li Elder D. Todd Christofferson kixye: “Chiqak’oxla jo’ nimal xtz’aq lix rahom li Dios choq’ qe. … Li rahilal kixk’ul sa’ Getesmani ut chiru li krus kiq’axok re li naru naxkuy junaq winq. A’b’anan, sa’ xk’ab’a’ lix rahom choq’ re lix Yuwa’ ut choq’ qe laa’o, kixkuy xnumsinkil, ut xb’aan a’an naru chixyeechi’inkil qe li wankilal sa’ xb’een li kamk ut li junelik yu’am” (“Texkanaaq sa’ lin rahom,” Jolomil ch’utub’aj-ib’ re octubre 2016).

Xchaab’ilob’resinkil li qak’utum

Kawresi jun na’ajej b’ar wi’ taa’eek’amanq li Musiq’ej. Wan naab’al na’leb’ chan ru naru nakab’oq li Musiq’ej sa’ li tzoleb’aal. Li wajb’ak sa’ xtiklajik naru naxb’oq li oxloq’ink. Li aatin re rahok ut xnawom ch’oolej naru neke’xkawresi jun q’ixil ut musiq’ejil sutam. (Chi’ilmanq Li k’utuk jo’ li Kolonel, 15.)