iTikotiko nei Pita Witima, mai vei Al Rounds

1–7 ni Maji

Vunau kei na Veiyalayalati 20–22

“Na Tubu Mai ni Lotu i Karisito”

Vola na nomu veivakauqeti vakayalo ena nomu vulica na Vunau kei na Veiyalayalati 20–22. Eso vei ira na veivakauqeti oqo ena rawa ni muataki iko ki na veivakasama eso ka na vukei iko ni o veivakavulici.

Vola na Veika o Vakauqeti Kina

Sureta na Veiwasei

Ena gauna ni nodra vuli e vale, o ira na lewe ni kalasi era sa na rawata beka eso na raititobu me baleta na veivakalougatataki ni kena tiko na Lotu dina e vuravura. Sureti ira me ra wasea e dua na malanivosa mai na vei iwase oqo ka vakaraitaka na vuni nodra vakavinavinakataka na kena vakalesuitale mai na Lotu.

Vakavulica na iVunau

Vunau kei na Veiyalayalati 20–21

Sa Vakalesui Tale Mai na Lotu i Jisu Karisito

• Era na vukei na lewe ni kalasi ena nodra vulica na veika eso erau tautauvata kina na Lotu i Jisu Karisito ni Yalododonu Edaidai kei na Lotu a tauyavutaka o Karisito ena gauna e liu. E rawa ni o droinitaka ena papa ni volavola e dua na ivolakabi ka va na kena iyatu me Vunau, Cakacaka tabu vakalotu, Kaukauwa ni Matabete, kei na Ira na Parofita. Sa rawa ni ko vakarautaka na vei tiki ni ivolanikalou oqo me baleta na Lotu i Karisito ena gauna makawa: Maciu 16:15–19; Joni 7:16–17; Efeso 2:19–22; 3 Nifai 11:23–26; Moronai 4–5. E rawa ni ra raica na lewe ni kalasi na ka e vakavulica tiko na veitikina vakayadua oqo me baleta na Lotu i Karisito ka volai ira ena iyatu e veiganiti kaya ena papa ni volavola. (Eso na vei tiki ni ivolanikalou ena rawa ni vakacurumi kina sivia e dua na iyatu.) Era rawa ni ra cakava vakakina ki na vei tiki ni ivolanikalou oqo me baleta na vakalesui mai ni Lotu i Karisito: Vunau kei na Veiyalayalati 20:17–25, 60, 72–79; 21:1–2. Na cava o vulica me baleta na Vakalesui mai ni Lotu i Karisito mai na veivakatauvatani oqo?

Vunau kei na Veiyalayalati 20:37, 75–79; 22

Na veicakacaka tabu vakalotu era vukei keda meda ucuya na iVakabula.

• Solia vei ira na lewe ni kalasi na gauna mera vulica na veika e lavaki me baleta na papitaiso ka ra vakamacalataki tiko ena Vunau kei na Veiyalayalati 20:37, ka kerei ira mera vakasamataka vakatitobu na veitaro vakaoqo: Ena veivuke vakacava na veika e lavaki oqo ena noda vakavakarau meda papitaisotaki ki na Lotu ni Turaga? Na cava na ibalebale ni noda taura matua na yaca i Karisito ena noda bula? (raica na Mosaia 5:5–12). Na cava sa vukei iko mo maroroya tiko na nomu “yalodina ni qaravi [Jisu Karisito] me yacova na ivakataotioti”?

• Na cava e vakavulica na wase e 22 me baleta na papitaiso? Kerei ira na lewe ni kalasi me ra raitayaloyalotaka e dua na nodra itokani ka sa papitaiso ki na dua tale na Lotu. Sa rawa mera wilika na iwase oqo me kunei kina na ivakasala me vukei kina na nodra itokani mera kila kina vakavinaka na cava na vuna e gadrevi kina na papitaisotaki ki na nona Lotu vakalesui mai na iVakabula. E rawa ni ra vakatasuasuataka na lewe ni kalasi na iyaloyalo oqo va–kalasi, se vakaisa.

• Wilika vata na Vunau kei na Veiyalayalati 20:75–79 ka sureti ira na lewe ni kalasi mera vakasamataka na cava era vakavulica na veitikina oqo me baleta na iVakabula kei na Nona kaukauwa ena noda bula. Na veivosa se malanivosa cava e lauti keda ni da wilika na masu ni sakaramede ena sala vataoqo? Na cava na vuna e bibi kina meda vakaivotavota ena sakaramede ena veimacawa?

  

  Na sakaramede sa dua na cakacaka tabu vakalotu.

Vunau kei na Veiyalayalati 20:38–60

Na veiqaravi ni Matabete sa vakalougatataki ira na lewe ni Lotu kei na nodra matavuvale.

• Na ivakamacala me baleta na itavi ni matabete ena Vunau kei na Veiyalayalati 20:38–60 e rawa ni vukei ira na lewe ni nomu kalasi me vakarabailevutaka na nodra kila vakavinaka na veiqaravi ni matabete. E na rawa tale beka ga ni o sureti ira me ra raitayaloyalotaka mada e dua na itokani papitaiso vou se lewe ni matavuvale e sa vakarau me tabaki ki na dua na itutu ni matabete. Era na vakayagataka vakacava na veitikina oqo me vukei koya me kila vinaka na nona itavi? Na vei ivakaraitaki cava so era na wasea me kila kina ni kena vakayacori na vei itavi o ya ena vukei koya me ucui Jisu Karisito vakalevu cake? Ena rawa beka mera matana taka na veitalanoa oqo.

  Me kena ikuri, era na vakayagataka vakacava na veitikina oqo me ra vukea kina e dua na ganedra se qai papitaiso vou me raica na sala e rawa ni vakaitavi kina ena cakacaka ka vakamacalataki tiko eke? (Na itukutuku me “iKuri ni iVurevure” ena rawa ni veivuke.)

Vunau kei na Veiyalayalati 21:4–7

Eda sa vakalougatataki ena noda ciqoma na vosa ni Turaga mai vua na Nona parofita.

• Vunau kei na Veiyalayalati 21 e tiko kina na iyatuvosa mana me baleta na muria na parofita ni Turaga. Mera vukei na lewe ni kalasi mera vakasamataka vakatitobu ka veivosakitaka na vei iyatuvosa oqo, kerei ira me ra vakasaqara ena tikina e 4–7 e dua na malanivosa era gadreva me ra kila vakavinaka cake ka me ra qai vola na malanivosa ena papa ni volavola. Digitaka e vica na veimalanivosa oqo, ka veivosakitaka va-kalasi na kedra ibalebale. Na cava era vakavulica vei keda na veimalanivosa oqori me baleta na muria na parofita ni Turaga?

iKuri ni iVurevure

Eda sa cakacaka tiko ena kaukauwa ni matabete.

“Ko ira na tagane era sa tabaki ki na itutu ni matabete, ia ko ira ruarua na yalewa kei na tagane era sa sureti me ra vakila na kaukauwa kei na veivakalougatataki ni matabete ena nodra bula. …

“… Era vunau ka masu na [marama] ena vei ivavakoso, vakatawana e vica na itutu ni veiliutaki, kei na veiqaravi, vakaitavi ena veimatabose ni matabete ena nodra vanua ka vakakina ena veiqaravi raraba, ka qaravi na ilesilesi bibi ni cakacaka ni kaulotu e vuravura raraba. Ena sala oqo kei na so tale, era vakayagataka na marama na lewa ni matabete e dina ga ni ra sega ni tabaki ki na itutu ni matabete. …

“… Ena veikacivi vakalotu, cakacaka vakalotutabu ni valetabu, na veimaliwai vakamatavuvale, kei na veiqaravi lo, vakayadudua, o ira na yalewa kei na tagane Yalododonu Edaidai era toso ki liu ena kaukauwa kei na lewa ni matabete. Na nodra cakacaka vata na tagane kei na yalewa ena kena vakayacori na cakacaka ni Kalou ena Nona kaukauwa sa iusutu ki na kosipeli i Jisu Karisito” Ulutaga Vakosipeli, “iVakavuvuli nei Josefa Simici me baleta na Matabete, Valetabu, Marama,” topics. ChurchofJesusChrist.org).

Vakatorocaketaki Noda Veivakavulici

Eda sa vuli vata. Ni o dua na qasenivuli, o sa vuli vata tiko kei ira na vo ni nomu kalasi. Vakaraitaka na nomu gadreva mo vuli mai vei ira ena nomu vakarorogo ki na nodra raititobu.