8–14 ni Maji

Vunau kei na Veiyalayalati 23–26

“Vaqaqacotaka na Lotu”

Ni bera ni wiliki na ituvatuva oqo, wilika na Vunau kei na Veiyalayalati 23–26 ka vakananuma vakatitobu na dina ko vakila ni na vaqaqacotaki ira na lewe ni nomu kalasi. Vakasamataka na ivurevure cava beka ena vukei iko mo vakavulica, oka kina na kena e sa vakaturi tiko ena ituvatuva oqo.

Vola na Veika o Vakauqeti Kina

Sureta na Veiwasei

Na veivakalougatataki cava soti eda sotava ni da “solia na nomudou [noda] gauna mo dou vulica kina vagumatua na ivolanikalou”? (Vunau kei na Veiyalayalati 26:1). Eda vakila vakacava na Yalo ena noda itikotiko? Ena rawa beka ni ra wasea na lewe ni kalasi na iwalewale ni nodra vakamalumalumutaka na veivakataotaki se veivakawelei me soli vakatabakidua na gauna kina na kena vulici yadua ka vakamatavuvale na ivolanikalou.

Vakavulica na iVunau

Vunau kei na Veiyalayalati 23–26

Eda rawa kece ni vaqaqacotaka na Lotu.

• Sa rawa mo raica vata kei ira na lewe ni kalasi na cava e kena ibalebale me ra “veivakauqeti vei ira na lewe ni lotu” (Vunau kei na Veiyalayalati 25:7). Ena rawa ni lesi edua me na wasea nai vakamacala ka tauri mai na dikiseniri ena ibalebale ni vosa na veivakauqeti se ivakaraitaki ni veivakauqeti era sa raica. Na madigi cava soti e tu vei keda me da veivakauqeti kina vakaikeda? E vaqaqacotaki kina vakacava na Lotu na veika oqo? Na cava soti tale eda vulica ena Vunau kei na Veiyalayalati 23–26 ka rawa ni vukei keda ena vaqaqacotaki ni Lotu? Sa rawa talega ni veitalanoataka se na rawa vakacava ki na vei dina vakaoqo me vaqaqacotaki kina na noda itikotiko. Me ra vakayagataki na veidina oqo ki na noda sasaga ni veiqaravi, e rawa ni o railesuva eso na mala ni vosa nei Sister Bonnie H. Cordon ena “Mo iVakatawa Mada” (Ensign se Liaona, Nove. 2018, 74–76).

Vunau kei na Veiyalayalati 24

Na iVakabula e rawa ni vueti keda “cake mai na [noda] veivakararawataki.”

• Na ivakatakila ena Vunau kei na Veiyalayalati 24 a soli me “veivakaukauwataki, veivakayaloqaqataki, ka veidusimaki” vei Josefa kei Oliva ena dua na gauna ni veivakatovolei (Vunau kei na Veiyalayalati 24, ulutaga ni iwase; raica tale ga na Yalododonu, 1:94–96). Sa rawa mo sureti ira na kalasi mera vakasaqara eso na ivakadinadina ena wase oqo, ni Turaga sa kilai Josefa tiko kei na veika e sotava tiko. E a sotava beka vakacava na Turaga na gagadre nei Josefa Simici? E vakayacora vakacava vakakina vei keda nikua? Navuca mo tarogi ira na lewe ni kalasi me ra wasea na veika era sotakaya ni ra vakila ni sa kila tiko na nodra dui ituvaki vakayadua na Turaga, ka laveti ira ena gauna ni nodra vakararawataki.

  

  E Vakabula e Vuqa mai na Veimataqali Mate Kecega, mai vei J.Kirk Richards

Vunau kei na Veiyalayalati 25

Ema Simici e “dua na marama digitaki.”

• Me vukei ira na lewe ni kalasi mera raica na kena yaga kina tamata yadua na ivakatakila niTuraga vei Ema Simici, navuca na itaviqaravi oqo: kerea e veimama ni kalasi me ra vakasaqara ena wase e 25 na veika e a kerea na Turaga vei Ema me cakava, ka kerea na ikarua ni veimama mera vakasaqara kina na veika a yalataka o Koya me na vakayacora. Sureti ira mera vola na veika era sa kunea ka veiwaseitaka vakai ira. Eso na lewe ni kalasi era rawa ni wasea na dina eso ka vakaibalebale vakalevu vei ira.

• Na vosa kei na malanivosa cava ena wase e 25 e tokona na ivakaro ni Turaga vei Ema Simici “Ko sa marama digitaki”? (tikina e 3). O ira na lewe ni kalasi e rawa mera veitalanoataka talega na iwalewale ni nona bulataka o Ema na dina ena ivakatakila oqo. Na ivurevure yaga eso e oka kina na vidio “E dua na Marama Digitaki”(ChurchofJesusChrist.org), “Ko sa Marama Digitaki” (iVakamacala dodonu ni iVakatakila, 33–39) kei na “Domo ni Vakalesuitale” ena i tuvatuva ena macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale.

• Me vaka e laurai ena Vunau kei na Veiyalayalati 25:11–12, e vakacava beka na itovo ni yalo ni Turaga me baleta na sere kei na ivakatagi tabu? E rawa ki na kalasi mera veivosakitaka na sala eso mera vakayagataka kina na sere ni Lotu mera sureta na Yalotabu ki na nodra veivale.

Vunau kei na Veiyalayalati 25:5, 14

Sa dodonu me da vakasaqara me tiko vei keda na “yalomalua.”

• Na Turaga e vakasalataki Ema me “toso tikoga ena yalomalua” (Vunau kei na Veiyalayalati 25:14; raica talega na tikina e 5). Me ra vakasaqara se cava e rawa ni ibalebale ni ka oqo, e rawa mo vola na Yalomalua ena vava ni volavola ka sureti ira na lewe ni kalasi me ra vola e yasana na ka e vakavurea na vosa o ya kina nodra vakanananu. Era qai rawa ni vaqara ena wase e 25 na veivosa kei na veimalanivosa era nanuma ni ra veiwekani kei na yalomalua ka wasea na veika era sa raica. Sa rawa mo wasea na vosa nei Elder David A. Bednar ena “iKuri ni iVurevure.” Na cava na vuna e bibi kina me da yalomalua?

Vunau kei na Veiyalayalati 25:10,13

E dodonu meda vakasaqara na iyau mai na dua na vuravura e uasivi cake.

• Me vukea na lewe ni kalasi mera cakava na ivakasala ni Turaga me ra “kakua ni domona na iyau vakavuravura, ia mo vakasaqara na iyau e uasivi cake” (Vunau kei na Veiyalayalati 25:10), e rawa mo kerei ira me ra toqa eso na ivakaraitaki ni “veika ni vuravura oqo” kei na ivakaraitaki ni “yau mai na dua na [vuravura] e uasivi cake.” Na ivakasala cava eda rawa ni veiwaseitaka me vukei keda meda vakanamata kina veika e tawa mudu? E semati vakacava na ivakasala e tiko ena tikina e 13 ki na inakinaki oqo?

iKuri ni iVurevure

Na yalomalua e ivakaraitaki ni kaukauwa.

E vakamacalataka o Elder David A. Bednar: “Nai vakarau va-Karisito ni yalomalua e dau tauri cala tu ena vuravura eda bula tiko kina oqo. Na yalomalua e ivakaraitaki ni kaukauwa, sega ni malumalumu; na cakacakataki ni ka, sega ni ciqoma wale tu ga; qaqa, sega ni vakarerei rawarawa; dau vosota na ka, ka sega ni rawa ni yalana na veika e vakaraitaka; vakarokoroko, sega ni vakalevuilevui koya; ka ivalavala malua, sega ni valavala kaukauwa. E dua na tamata yalomalua e sega ni dau vakacudrui vakarawarawa, veidabui, se vakatulewa kaukauwa ka dau marautaka na nodra rawaka na tani.” (“Yalomalua ka Yalomalumalumu,” Ensign se Liaona, Me 2018, 32).

Vakatorocaketaki Noda Veivakavulici

Vakadinadinataka na veivakalougatataki yalataki. Ni ko suereti ira na lewe ni kalasi me ra cakava na veika era sa vulica, vakadinadinataka na veivakalougatataki sa yalataka na Kalou (raica na Veituberi ena iVakarau ni iVakabula, 35).