8–14 marzo

Tzolʼlebʼ ut Sumwank 23–26

“Xk’eeb’al xkawilal li Iglees”

Rub’elaj naq taawil ru li tusleb’ aatin a’in, il ru Tzolʼlebʼ ut Sumwank 23–26, ut k’oxlan chirixeb’ li na’leb’ nakaweek’a naq te’xkawob’resi li komon sa’ li tzoleb’aal. Chirix a’an k’e reetaleb’ li k’anjeleb’aal tate’xtenq’a chi k’utuk, jo’ ajwi’ li wankeb’ sa’ li tusleb’ aatin a’in.

Tz’iib’a li nakak’oxla

Xkanab’ankileb’ chi wotzok

K’a’ru li osob’tesihom qak’ulum xb’aan naq “naqaq’axtesi li qakutan choq’ re xtzolb’aleb’ li loq’laj hu”? (Tzolʼlebʼ ut Sumwank 26:1). Chan ru naq qeek’ahom li Musiq’ej sa’ li qajunkab’al? Maare eb’ li komon sa’ li tzoleb’aal naru neke’aatinak chirix chan ru neke’xnumsi li ramleb’ malaj li k’a’ru neke’jalb’ehin xk’a’uxl re xk’eeb’al xhoonaleb’ chirilb’aleb’ ru li loq’laj hu sa’ junesal ut jo’ junkab’al.

Xk’utb’al li tzolʼlebʼ

Tzolʼlebʼ ut Sumwank 23–26

Chiqajunil naru naqakawob’resi li Iglees.

• Naru taasik’ rochb’eeneb’ li komon sa’ li tzoleb’aal k’a’ru naraj naxye “xwaklesinkil xch’ool li Iglees” (Tzolʼlebʼ ut Sumwank 25:7). Maare junaq naraj xwotzb’aleb’ xch’olob’ankil li ch’ol aatin waklesink ch’oolej natawman sa’ tusleb’ aatin, malaj reetalileb’ li waklesink ch’oolej rilom. B’ar wankeb’ li hoonal wankeb’ qe laa’o re xwaklesinkil qach’ool chiqib’il qib’? Chan ru naq a’an naxkawob’resi li Iglees? K’a’ chik ru naqatzol sa’ Tzolʼlebʼ ut Sumwank 23–26 li naru chiqatenq’ankil chixkawob’resinkil li Iglees? Naru ajwi’ nekex’aatinak chirix chan ru naq eb’ li na’leb’ a’in neke’k’anjelak re xkawob’resinkileb’ li qajunkab’al. Re xk’anjelankileb’ li na’leb’ a’in sa’ xyalb’al qaq’e chirilb’aleb’ li komon, naru nekeril ru xcha’al li raatin li Hermana Bonnie H. Cordon, “Wulak chi wank jo’ jun aj ilol karneer” (Jolomil ch’utub’aj-ib’ re octubre 2018).

Tzolʼlebʼ ut Sumwank 24

Li Kolonel naru “nokoxwaklesi chaq sa’eb’ li qach’a’ajkilal.”

• Li k’utb’esinb’il na’leb’ natawman sa’ Tzolʼlebʼ ut Sumwank 24 kik’ehe re laj Jose ut laj Oliver re “xk’eeb’al xkawilaleb’, re xwaklesinkileb’ xch’ool, ut re xtzolb’aleb’ ” chiruheb’ li kutan re ch’a’ajkilal (Tzolʼlebʼ ut Sumwank 24, xjolomil; chi’ilmanq ajwi’ Santos, 1:96–97). Naru taakanab’eb’ li komon chixsikb’al sa’ li tasal a’in reetalil naq li Qaawa’ kixk’aak’ale laj Jose ut li k’a’ru kik’ulman rik’in. Chan ru naq li Qaawa’ kixtenq’a laj Jose sa’ li raajelil ru? Chan ru naq naxb’aanu ajwi’ a’an qik’in laa’o sa’eb’ li kutan a’in? K’oxla xkanab’ankileb’ li komon sa’ li tzoleb’aal chixwotzb’al xnumsihomeb’ b’ar wi’ xe’reek’a naq yookeb’ chi tenq’aak ut chi waklesiik chaq sa’ lix ch’a’ajkilaleb’ xb’aan li Qaawa’.

  

  Kixk’irtesi naab’aleb’, k’iila paay ruheb’ lix yajel, xb’aan laj J. Kirk Richards

Tzolʼlebʼ ut Sumwank 25

Li xEmma Smith a’an “jun Qana’ sik’b’il ru.”

• Re xtenq’ankileb’ li komon sa’ li tzoleb’aal chixtawb’al lix aajelil ru li k’utb’esinb’il na’leb kixk’e li Qaawa’ re li xEmma Smith, k’oxla xb’aanunkil li ch’ina k’anjel a’in: Kanab’ xyijach li tzoleb’aal chixtzolb’al li tasal 25 re xsik’b’al li k’a’aq re ru kixpatz’ li Qaawa’ re li xEmma naq tixb’aanu, ut li jun jachal chik te’xsik’ li k’a’aq re ru kixyeechi’i re wi tixb’aanu li kixpatz’ re. Kanab’eb’ chixyiib’ankil jun xtusulal li neke’xtaw ut te’xwotz chirib’ileb’ rib’. Junjunqeb’ li komon sa’ li tzoleb’aal naru te’xwotz li na’leb’ wan xyaalal choq’ reheb’ a’an.

• K’a’ru li aatin ut ch’ol aatin re li tasal 25 neke’xaqab’ xyaalalil li raatin li Qaawa’ choq’ re xEmma Smith naq a’an “jun Qana’ sik’b’il ru”? (raqal 3). Eb’ li komon sa’ li tzoleb’aal naru ajwi’ te’aatinaq chirix chan ru naq li xEmma kixyu’ami li na’leb’ sa’ li k’utb’esinb’il na’leb’ a’in. Junjunq li k’anjeleb’aal naru neke’oksiman jo’ li video “Una dama elegida” (ChurchofJesusChrist.org), “Eres una dama elegida” (Revelaciones en contexto, 36–43) y “Eb’ li xyaab’ kuxej re li k’ojob’ank wi’chik” sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al.

• Jo’ naxye Tzolʼlebʼ ut Sumwank 25:11–12, k’a’ru nareek’a li Qaawa’ chirix li loq’laj son? Maare li tzoleb’aal naru te’aatinaq chirix chan ru roksinkileb’ li b’ich re xb’oqb’al li Musiq’ej sa’eb’ li rochoch.

Tzolʼlebʼ ut Sumwank 25:5, 14

Tento taqasik’ “li musiq’ej re tuulanil.”

• Li Qaawa’ kixye re li xEmma naq “chikanaaq sa’ li musiq’ej re tuulanil” (Tzolʼlebʼ ut Sumwank 25:14; chi’ilmanq ajwi’ li raqal 5). Re xsik’b’al k’a’ru naraj naxye a’an, k’oxla xtz’iib’ankil li aatin Tuulanil sa’ li pizarron ut kanab’eb’ li komon sa’ li tzoleb’aal chixtz’iib’ankil chixk’atq a’an li nachal sa’ xk’a’uxleb’ chirix li aatin a’an. Chirix a’an naru te’xtzol li tasal 25 re xsik’b’aleb’ aatin ut ch’ol aatin li neke’xk’oxla naq wankeb’ rilom rik’in li tuulanil, ut chirix a’an xwotzb’al li xe’xtaw. K’oxla xwotzb’al li raatin li Elder David A. Bednar li natawman sa’ “Xkomon chik li k’anjeleb’aal.” K’a’ut naq aajel ru wank chi tuulan?

Tzolʼlebʼ ut Sumwank 25:10, 13

Tento taqasik’ li k’a’aq re ru re jun ruchich’och’ q’axal chaab’il wi’chik.

• Re xtenq’ankileb’ li komon sa’ li tzoleb’aal chiroksinkil lix na’leb’ li Qaawa’ re “xtz’eqb’al chiqix li k’a’aq re ru re li ruchich’och’ a’in, ut xsik’b’al li k’a’ru re jun q’axal chaab’il wi’chik” (Tzolʼlebʼ ut Sumwank 25:10), naru taapatz’ reheb’ naq te’xyiib’ junaq xtusulal li reetalileb’ li “k’a’aq re ru re li ruchich’och’ a’in” ut reetalileb’ “jun ruchich’och’ q’axal chaab’il wi’chik.” Kʼaʼru chi naʼlebʼ naru taqawotz chiqibʼil qibʼ li taatenqʼanq qe chixjayalinkil qib’ rik’ineb’ li k’a’a’q re ru ink’a’ na’oso’? Chan ru naq li na’leb’ natawman sa’ li raqal 13 wan rilom rik’in li jayalihom a’an?

Xkomon chik li k’anjeleb’aal

Li tuulanil a’an kawilal.

Li Elder David A. Bednar kixch’olob’: “Chi kok’ aj xsa’ moko natawman ta ru li na’leb’ aj Kristiano re tuulanil sa’ li qakutan. Li tuulanil a’an kaw rib’, moko q’un ta; nak’anjelak, ink’a’ yal k’anjelanb’il; wan xkawilal xch’ool, ink’a’ naxuwak; naxram rib’; ink’a’ naxnima rib’; ut chaab’il xch’ool, ink’a’ q’etq’et. Junaq li tuulan xch’ool ink’a’ sa’ junpaat najosq’o’, ink’a naxnima rib’, chi moko nataqlan chi numtajenaq ut sa’ junpaat naxk’e reetal lix chaab’ilal li rech aj kristiaanil” (“Tuulan ut kub’enaq xch’ool,” Jolomil ch’utub’aj-ib’ re abril 2018).

Xchaab’ilob’resinkil li qak’utum

Ch’olob’ xyaalaleb’ li osob’tesihom yeechi’inb’il. Naq taak’e xb’oqb’aleb’ li komon sa’ li tzoleb’aal chi wank jo’ chanru yookeb’ chixtzolb’al, ch’olob’ xyaalalileb’ li osob’tesihom xyeechi’ihom li Dios (chi’ilmanq Li k’utuk jo’ li Kolonel, 35).