15–21 ni Maji

Vunau kei na Veiyalayalati 27–28

“Na Veika Kecega Ena Vakayacori Me Vaka na Kena iVakarau”

E dina ga ni a yaco na veika era vakauqeti kina na ivakatakila ena Vunau kei na Veiyalayalati 27–28 ena dua tale na gauna kei na vanua, na dina e vakavuvulitaki ena veiwase oqo sa yaga nikua. Na dina cava beka ena vakalougatataki ira na lewe ni nomu kalasi ena veika era sotava tiko?

Vola na Veika o Vakauqeti Kina

Sureta na Veiwasei

Solia vei ira na lewe ni kalasi e vica na miniti me ra railesuva na Vunau kei na Veiyalayalati 27–28 ka vakaraica kina e dua na tikina se dua na malanivosa era kunea ni vakaibalebale vakalevu. Me soli vei ira kece e dua na madigi ni veiwasei, e rawa ni o wasei ira na lewe ni kalasi mera veisasa mera wasea na veika era sa kunea.

Vakavulica na iVunau

Vunau kei na Veiyalayalati 27:1–2

Me da vakayagataka na sakaramede ena mata sa vakatabakidua ki na lagilagi ni Kalou.

• Me vakauqeta na veivosaki me baleta na Vunau kei na Veiyalayalati 27:1–2, vakasamataka mo vola e dua na taro me vaka oqo ena vava ni volavola: Na cava e vakavulica vei keda na iVakabula me baleta na inaki ni sakaramede? Rawa mera vakasaqara na lewe ni kalasi na malanivosa eso ena veitikina oqo ka na vukei ira mera sauma na taro. Era rawa ni ra wasea na vakasama era sa ciqoma me baleta na iwalewale ni nodra rawata e dua na gauna vakatabui ena nodra vakaivotavota ena sakaramede.

  O ira na lewe ni kalasi era rawa ni raica eso na ikuri ni rai titobu ena nodra wilika na ka e kaya na iVakabula ni a tutaka na sakaramede (raica na Luke 22:19–20; 3 Nifai 18:1–11; raica talega na vidio “Na iOtioti ni Kanavata” ena ChurchofJesusChrist.org). Kevaka e tiko ena noda soqoni ni sakaramede na iVakabula, na cava eso na ka ena duidui na noda cakava?

  

  Na sakaramede e ologi koto kina eso na ivakatakarakara ni nona isoro na iVakabula.

Vunau kei na Veiyalayalati 27:15–18

Na iyaragi ni Kalou ena vukei keda meda vorata na ca.

• E rawa vakacava mo vukei ira na lewe ni kalasi mera kila vakavinaka na kena vakayagataki na iyaragi ni Kalou me ra vorata rawa na veika ca ena noda gauna oqo? Sa rawa mo kerea e dua me droinitaka ena vava ni volavola na iyaragi e tukuni tiko ena tikina e 15–18. O ira na lewe ni kalasi mera qai wasea eso na raititobu era sa kunea ena nodra vuli vaka i ira me baleta na veitiki ni iyaragi eso. Se sa rawa me wilika na kalasi na Vunau kei na Veiyalayalati 27:15–18 ka volai na veitiki ni iyaragi ena vava ni volavola kei na veitiki ni yago cava ka ra taqomaka. Na cava na ibalebale ni noda tokara nai yaragi ni Kalou? O ira na lewe ni kalasi e rawa mera veitalanoataka na nona dau taqomaki keda na Turaga mai na veika ca ni da tokara na iyaragi ni Kalou.

• Kevaka o vakavulici ira na itabagone, sa rawa mo semata na Vunau kei na Veiyalayalati 27:15–18 kei na ivakatagedegede ena Me iSakisaki ni iTabagone. Me kena ivakaraitaki, na lewe ni kalasi era rawa ni wilika na veitikina ka veivosakitaka na vuna eda gadreva kina na iyaragi ni Kalou. Era qai rawa ni cakacaka vakaisa ka railesuva e dua na ivakatagedegede ena Me iSakisaki ni iTabagone. Na cava eda vulica mai vei ira na vei ivurevure oqo me baleta na ravuravu nei Setani vei keda? Ena vukei keda vakacava nai yaragi ni Kalou meda vorata rawa kina na ravuravu oqo? Ena rawa vakacava meda tokara na Nona iyaragi?

Vunau kei na Veiyalayalati 28

Na parofita bula e ciqoma na ivakatakila me baleta na nona Lotu na Turaga.

• Me vukei ira na lewe ni kalasi mera vulica na nona itavi na parofita, e rawa ni o railesuva na veika a sotava o Josefa Simici ka tuberi kina me masu ka ciqoma na wase e 28 (raica na ulutaga ni iwase), ka qai rawa mo wilika na tikina e 2–3, 6–7, 11–13. E tovolea vakacava o Setani me vakauqeti keda meda muri ira era sa sega ni lesi mai vua na Turaga? O na rawa ni sureti ira na lewe ni kalasi me ra wasea na veika era sotava ka sa vaqaqacotaka nodra ivakadinadina ni parofita e ciqoma na ivakatakila me baleta na Lotu.

• E dua na sala era rawa ni railesuva kina na lewe ni kalasi na Vunau kei na Veiyalayalati 28 sai koya me ra raitayaloyalotaka ni ra kila e dua e sa qai ciqoma wale ga e dua na ilesilesi vou ena Lotu. Na cava eda rawa ni wasea mai na Vunau kei na Veiyalayalati 28:1–6, 13–16 me na vukea na tagane se yalewa oya e na nona ilesilesi vou? Na vosacavuti ena “iKuri ni iVurevure” e rawa ni vakuria na raititobu ki na veivosaki.

iKuri ni iVurevure

iVakasala me baleta na ivakatakila kina tamata yadua.

O Peresitedi Josefa F. Simici kei rau na nona daunivakasala ena Mataveiliutaki Taumada eratou vakavulica:

“Ena raivotu, tadra, vosa, parofisai, veivakauqeti se dua na isolisoli vakasakiti se veiceguvi, ka vakadewataki mai kina e dua na ka ka sega ni sema vata kei na ivakatakila sa ciqomi me baleta na Lotu se veisaqasaqa kei na vakatulewa vei ira na kena ivakailesilesi, mera kila na Yalododonu Edaidai ni sa sega ni mai vua na Kalou, se mani vakacava na totoka ni kena irairai. … Ena veika vakayago ka vakakina vakayalo, o ira na Yalododonu era rawa ni ciqoma na veidusimaki Vakalou kei na ivakatakila me baleti ira yadua, ia oqo e sega ni tiko kina na dodonu mera dusimaki ira tale eso. …

“Na itukutuku ni ivolatukutuku ni Lotu e katona e vuqa na ivakatakila lasu ka vu mai vei ira na dauveidabui se lomakatakata ka ra vakabauta na veivakatakila oya mera tuberi kina eso na tamata mera ciqoma,ka laurai ena veigauna kece, e tini ena druka, rarawa kei na leqa ” ( Joseph F. Smith, Anthon H. Lund, Charles W. Penrose, “A domo ni Vakasala” Improvement Era, Sepi. 1913, 1148 – 49).

Vakatorocaketaki Noda Veivakavulici

Vakanamata ki na ivakavuvuli dina. E vakavuvulitaka o Peresitedi Boyd K. Packer, “Na ivakavuvuli dina, ni kilai vinaka, ena veisautaka nai vakarau kei na itovo” (“Kakua ni rere,” Ensign se Liaona, Me 2004, 79). Ni da veivakavulici, me da na raicamatua na ivakavuvuli i Jisu Karisito kevaka eda vinakata meda veivuke ena nodra kau mai na yalo kivei Koya.