Ena Tekiduru na Duru Vakayadua, mai vei J. Kirk Richards

22–28 ni Maji

Vunau kei na Veiyalayalati 29

O Jisu Karisito ena Vakasoqoni Ira Vata na Nona Tamata

Na sala bibi duadua ni vakavakarau me veivakavulici na Vunau kei na Veiyalayalati 29 sai koya mo vulica ena masumasu ka vakasaqara na veidusimaki ni Yalo. Vakasamataka eso tale na sala me na sureta mai na Yalo ki na nomu bula, me vaka na lolo, lako ki na valetabu, se qaravi ira na tani.

Vola na Veika o Vakauqeti Kina

Sureta na Veiwasei

Ena Vunau kei na Veiyalayalati 29:5, e a tukuna kina na Turaga vei ira na Yalododonu, “Dou laveta cake na yalomudou ka marau.” Sa rawa ni ko sureti ira na lewe ni kalasi me ra wasea e dua na ka era sa vulica ena nodra vuli yadudua se vakamatavuvale ka vakavuna me ra “laveta cake na [yalodra] ka marau.”

Vakavulica na iVunau

Vunau kei na Veiyalayalati 29

Sa vakarautaka oti na Tamada Vakalomalagi e dua na ituvatuva ni noda bula vakacerecerei.

• E dua na sala me vakayaloqaqataki kina na vuli e vale sai koya me vakayagataki na itaviqaravi era tiko ena ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale. Me vaka beka oqo, e rawa mo vola e na papa ni volavola na veitiki ni ituvatuva ni veivakabulai, me vakataka na bula taumada, Veibuli, na Veisorovaki i Jisu Karisito, kei na so tale. Era rawa ni ra wasea na lewe ni kalasi na veika era sa vulica mai na Vunau kei na Veiyalayalati 29 me baleta na veitiki ni ituvatuva oqo. Sa rawa sara ga ni ko sureti ira me ra wasea na veika era na veivakavulici kina mai na iwase oqo ki vua e dua ka sega ni kila na ituvatuva ni Kalou.

Vunau kei na Veiyalayalati 29:1–8, 14–21

Ena vakasoqoni ira na nona tamata ko Jisu Karisito ni bera na iKarua ni Nona Lako Mai.

• Me vukei ira na lewe ni kalasi me ra kila deivaki na cava e vakasoqoni ira vata kina na nona tamata o Jisu Karisito, o na rawa ni sureti ira mera wilika na tikina e 1–8 ka veivosakitaka na taro me baleta na vakasoqoni vata, me vaka: Eda sa sotava oti beka vakacava na veivakasoqoni vata kei na veitaqomaki i Karisito vei keda, me vaka na nona vakasoqoni ira vata mai ka taqomaki ira na luvena edua na tina ni toa? Eda na vakasoqoni vata vakacava ki vua na iVakabula? (raica, me kena ivakaraitaki na, tikina e 2). E rawa vei ira na lewe ni kalasi mera wasea na nodra sa vakalougatataki ena nodra soqoni mai ka sokalou vata kei ira na lewe ni Lotu tale eso.

  

  Me Vakavica Vata, mai vei Liz Lemon Swindle

• Me vukei ira na lewe ni kalasi mera vakananuma na nodra itavi mera veivuke vua na Tamada Vakalomalagi me vakasoqoni ira na luvena, sa rawa mo wasea na vosa nei Peresitedi Russell M. Nelson ena “Ikuri ni iVurevure.” Se e rawa ni o vakaraitaka na vidio “E Dua Na iVakadinadina ni Kalou” (ChurchofJesusChrist.org). Na cava eda sa vulica baleta na vakasoqoni vata mai na veitikina oqo? E tokona vakacava na vei itukutuku oqo na veika e tukuna na Turaga ena Vunau kei na Veiyalayalati 29:1–8?

• Eso na ituvaki ni noda gauna ka volai tu ena Vunau kei na Veiyalayalati 29:14–21 e rawa ni vakavurea na nuiqawaqawa vei ira na lewe ni kalasi. Laivi ira me ra wasea na veika era vakila. Na cava na vuna e vakasalataki keda kina na Turaga ena vei ituvaki oqo. Na dina veivakadeitaki cava eso eda vulica me baleta na iVakabula kei na vakasoqoni vata ena tikina e 1–8? E vukei keda vakacava na vakasoqoni vata ena noda vakanamata ki na vei ituvaki vaka oqo ena vakabauta ka sega ena rere? Me tiki ni nomuni veivosaki, sa rawa ni lagati e dua na serenilotu me baleta na vakasoqoni vata, me vaka na “Isireli Bau Rogoca” (Serenilotu, naba 6), ka veitalanoataka na veika e vakavuvulitaka na serenilotu me baleta na vakasoqoni vata nei Isireli.

Vunau kei na Veiyalayalati 29:34–35

Sa vakayalo na ivakaro kece sara ni Turaga.

• E dina ga ni so na ivakaro e rairai vakayago, sa vakayalo vua na Turaga na ivakaro kece sara. Me ra kila vinaka na dina oqo, mera qai wilika vata na lewe ni kalasi na tikina e 34–35 ka qai vola eso na ivakaro ena vava ni volavola, vata kei na ivakavuvuli vakayalo kei na veivakalougatataki e salavata kaya. Sa rawa ni ra wasea eso na ivakaraitaki mai na nodra bula, se mai na ivolanikalou ka sa vukei ira mera raica na ituvaki vakayalo ni ivakaro ni Kalou. E vukica vakacava na itaviqaravi oqo na noda rai me baleta na ivakaro?

iKuri ni iVurevure

Vunau kei na Veiyalayalati 29

Noda vakaitavi ena Vakasoqoni vata nei Isireli.

E vakatavulica o Peresitedi Russell M. Nelson:

“Oqo dina na iotioti ni gauna, ka sa maqusataka tiko na Turaga na Nona sokumuni o Isireli. Na vasokumuni oqo sa ka bibi duadua e yaco tiko e vuravura nikua. E sega tale ni vakatauvatani rawa na kena cecere, na kena sa rui bibi, ka sega ni vakatauvatani rawa na kena qaqa. Ke o sa digitaka, se o sa vinakata, sa rawa mo tiki ni cakacaka oqo. Sa rawa mo mai tiki ni dua na ka levu, dua na ka cecere, dua na ka vakaturaga!

“Ni da kaya tiko na vakasoqoni vata, eda sa kaya tiko na ka dina oqo: o ira yadua na luvena na Tamada Vakalomalagi, ena yasa ruarua ni ilati, e yaga mera na rogoca na itukutuku ni kosipeli vakalesui mai i Jisu Karisito. Era lewa ga vakai ira ke ra gadreva mera via kila eso tale na ka. …

Na Tamada Vakalomalagi sa maroroi ira tu mai na Nona tamata yalo vakaturaga—Au rawa ni kaya, ira na Nona timi uasivi duadua—ki na iotioti ni cakacaka. O ira na yalo vakaturaga oya—o ira na dauqito uasivi duadua, o ira na qaqa—sai kemuni!” (“Nuinui nei Isireli” [lotu e vuravura raraba ni itabagone, 3 ni June, 2018], ChurchofJesusChrist.org).

Vakatorocaketaki Noda Veivakavulici

Veivakavulici vakamatata ka vakarawarawa. Vakavulica vakamatata ka vakarawarawa na ivunau, ka kua ni saga mo vakamarautaki ira walega na nomu kalasi. E rawa ni o nuitaka na “mana ni vosa ni Kalou” ena “kaukauwa sara … ki na nodra vakanananu na tamata … se dua tale na ka” (Alama 31:5).