Li junjunq xb’een aqej taab’asmanq, xb’aan laj J. Kirk Richards.

22–28 marzo

Tzolʼlebʼ ut Sumwank 29

Li Jesukristo tixch’utub’ lix tenamit

Jun chaab’il na’leb’ re xkawresinkil xk’utb’al Tzolʼlebʼ ut Sumwank 29 a’an xtzolb’al rik’in tijok ut xsik’b’al xb’eresihom li Musiq’ej. K’oxla chan raj chik ru taab’oq li Musiq’ej sa’ laa yu’am, jo’ rik’in li kuyuk sa’, xik’ sa’ li santil ochoch, malaj k’anjelak chiruheb’ laa was aawiitz’in.

Tz’iib’a li nakak’oxla

Xkanab’ankileb’ chi wotzok

Sa’ Tzolʼlebʼ ut Sumwank 29:5 li Qaawa’ naxye reheb’ laj santil paab’anel: “Waklesihomaq eech’ool ut chisaho’q sa’ eech’ool.” Naru taakanab’eb’ li komon sa’ li tzoleb’aal chixwotzb’al k’a’ruhaq xe’xtzol sa’ li tzolok sa’ junesal ut jo’ junkab’al li “naxwaklesi xch’ooleb’ ut naxk’e chi saho’k sa’ xch’ooleb’.”

Xk’utb’al li tzolʼlebʼ

Tzolʼlebʼ ut Sumwank 29

Li qaChoxahil Yuwaʼ kixkʼuubʼ jun naʼlebʼ re toowulaq sa’ li taqenaqil loq’al.

• Jun na’leb’ re waklesink ch’oolej chi tzolok sa’ kab’l a’an roksinkileb’ li kok’ k’anjel neke’tawman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al. Qayehaq, naru taayib’ jun xtusulal xcha’alil li k’uub’anb’il na’leb’ re li kolb’a-ib’ chiru li pizarron, jo’ li yu’am naq maji’ nokoyo’la, li yo’ob’tesink, lix tojb’al rix li maak xb’aan li Jesukristo, ut wan chik xkomon. Eb’ li komon sa’ li tzoleb’aal naru te’xwotz li xe’xtzol sa’ Tzolʼlebʼ ut Sumwank 29 chirixeb’ xcha’alil li k’uub’anb’il na’leb’. Naru ajwi’ nakakanab’eb’ chixwotzb’al li te’xk’ut raj chiru anihaq li ink’a’ naxnaw ru lix k’uub’anb’il na’leb’ li Dios.

Tzolʼlebʼ ut Sumwank 29:1–8, 14–21

Li Jesukristo tixch’utub’eb’ lix tenamit rub’elaj li xkab’ xk’ulunik.

• Re xtenq’ankileb’ li komon sa’ li tzoleb’al chixtawb’al ru k’a’ut naq li Jesukristo naxch’utub’eb’ lix tenamit, naru taakanab’eb’ chirilb’aleb’ ru li raqal 1–8 ut te’aatinaq chirixeb’ li patz’om chirix li ch’utub’ank, jo’: Chan ru naqeek’a naq li Kristo nokoxch’utub’ ut naxkol qix, jo’ jun xan kaxlan naxch’utub’eb’ lix kok’ kaxlan? Chan ru naq naqach’utub’ qib’ rik’in li Kolonel? (chi’ilmanq, jo’ eetalil, li raqal 2). Eb’ li komon sa’ li tzoleb’aal naru te’aatinaq chirix chan ru osob’tesinb’ileb’ naq neke’xch’utub’ rib’ ut neke’loq’onin rochb’eeneb’ li komon sa’ li Iglees?

  

  Jarub’aq sut, xb’aan xLiz Lemon Swindle

• Re xtenq’ankileb’ li komon sa’ li tzoleb’aal chixk’oxlankil li teneb’ahom wan sa’ xb’eeneb’ re xtenq’ankil li qaChoxahil Yuwa’ chixch’utub’ankileb’ li ralal xk’ajol, naru taaawotz li raatin li Awa’b’ej Russell M. Nelson li natawman sa’ “Xkomon chik li k’anjeleb’aal.” Malaj ut naru taak’ut li video “Un testigo de Dios” (ChurchofJesusChrist.org). K’a’ru naqatzol chirix li ch’utub’ank sa’eb’ li aatin a’in? Chan ru naq eb’ li aatin a’in neke’xtz’aqob’resi ru li naxye li Qaawa’ sa’ Tzol’leb’ ut Sumwank 29:1–8?

• Junjunq reheb’ li k’a’ru taak’ulmanq sa’ roso’jikeb’ li kutan li neke’ch’olob’aman sa’ Tzolʼlebʼ ut Sumwank 29:14–21 naru neke’xxib’esiheb’ li komon sa’ li tzoleb’aal. Kanab’eb’ chixwotzb’al li k’a’ru neke’reek’a. K’a’ut naq nokoxtij li Qaawa’ chirix li te’k’ulmanq? K’a’ruheb’ li yaal neke’sahob’resin ch’oolej naqatzol chirix li Kolonel ut li ch’utub’ank sa’eb’ li raqal 1–8? Chan ru naq li ch’utub’ank nokoxtenq’a chiroyb’eninkil li taak’ulmanq rik’in paab’aal sa’ xna’aj li xuwak? Jo’ xcha’al li aatinak, naru teeb’icha junaq li b’ich chirix li ch’utub’ank, jo’ “Ex aj Israel, ab’ihomaq” (Eb’ li B’ich, 6), ut tex’aatinaq chirix li naxk’ut li b’ich chirix lix ch’utub’ankil Israel.

Tzolʼlebʼ ut Sumwank 29:34–35

Chixjunil lix taqlahom li Qaawa’ a’an musiq’ejil.

• Us ta naq maare junjunqeb’ li taqlahom chanchan naq yal re li yu’am a’in, choq’ re li Qaawa’ chixjunileb’ musiq’ejileb’. Re naq te’xtaw ru li yaal a’in, eb’ li komon sa’ li tzoleb’aal naru te’ril ru sa’ komonil eb’ li raqal 34–35 ut te’xyiib’ junaq xtusulaleb’ junjunq li taqlahom sa’ li pizarron, rochb’eeneb’ li na’leb’ ut eb’ li musiq’ejil osob’tesihom wankeb’ rilom rik’ineb’ a’an. Naru te’xwotz eetalil reheb’ lix yu’am malaj reheb’ li loq’laj hu, li xe’tenq’ank reheb’ chirilb’al xmusiq’ejileb’ lix taqlahom li Dios. Chan ru nak’anjelak li ch’ina k’anjel a’in chirix chan ru naqileb’ li taqlahom?

Xkomon chik li k’anjeleb’aal

Tzolʼlebʼ ut Sumwank 29

Tz’aqonk sa’ xch’utub’ankil Israel.

Li Awa’b’ej Russell M. Nelson kixk’ut:

“Relik chi yaal naq a’aneb’ a’in li roso’jikeb’ li kutan, ut li Qaawa’ yoo chixseeb’ob’resinkil lix k’anjel re xch’utub’ankil Israel. Li ch’utub’ank a’an li k’anjel q’axal aajel ru li yoo chi k’ulmank sa’ li ruchich’och’ anajwan. Maak’a’ chik naru xjuntaq’eetankil rik’in lix nimal ru, rik’in lix aajelil ru, rik’in lix loq’alil. Ut wi nakasik’ ru, wi nakawaj, naru naq nimaq laa tz’aqonik sa’ li k’anjel a’an. Naru naq nimaq aatz’aqonik rik’in li k’a’ru nim, li k’a’ru chaq’al ru, li k’a’ru loq’!

“Naq noko’aatinak chirix li ch’utub’ank, ka’ajwi’ yooko chixyeeb’al li yaalil na’leb’ a’in: chixjunileb’ li ralal xk’ajol li qaChoxahil Yuwa’, sa’ xka’pak’alil li tz’apleb’ t’ikr, xk’ulub’eb’ re rab’inkil li esil chirix lix evangelio li Jesukristo k’ojob’anb’il wi’chik. Xjuneseb’ rib’ neke’xsik’ ru ma te’raj xnawb’al xkomon. …

“Li qaChoxahil Yuwa’ ak xsik’ chaq ru naab’aleb’ re lix tuulan aj musiq’ej— maare naru naqaye naq a’an lix chaab’il ch’uut—choq’ re li roso’jik kutan a’in. Eb’ li q’un aj musiq’ej a’an—eb’ li chaab’il aj b’atz’unel, eb’ li héroe a’an—a’anex laa’ex!” (“Juventud de Israel” [ch’utam choq’ reheb’ li saaj sa’ chixjunil li ruchich’och’, 3 junio, 2018], ChurchofJesusChrist.org).

Xchaab’ilob’resinkil li qak’utum

K’utun chi saqen ru ut chi ink’a’ cha’aj. Sa’ xna’aj rajsinkileb’ ru li yookeb’ chi tzolok, k’ut li tzol’leb’ chi saqen ru ut chi ink’a’ ch’a’aj. Chijultiko’q aawe naq “lix chaab’ilal raatin li Dios” “k’a’jo’ wi’chik xwankil sa’ xb’een xk’a’uxleb’ li tenamit chiru li yok’leb’ ch’iich’ malaj k’a’aq chik ru li na’uxman reheb’ ” (Alma 31:5).