29 ni Maji–4 ni Epereli.

Siganimate

“Sai Au sa Bula, Sai Au tale ga Ka Vakamatei”

E sega tale ni dua na ka e bibi cake me da kila, na Veisorovaki ga i Jisu Karisito. Vakasamataki ira na tamata era na tiko ena nomu kalasi; na cava ena vukei ira mera vakatitobutaka na nodra vakabauti Jisu Karisito?

Vola na Veika o Vakauqeti Kina

Sureta na Veiwasei

Ni ra sa vulica na lewe ni nomu kalasi na Vunau kei na veiyalayalati ena yabaki oqo, era sa na raica beka na veimalanivosa me baleta na iVakabula ka vakaibalebale vakalevu vei ira. Tekivutaka na kalasi ena nomu solia vei ira na madigi me ra wasea na veimalanivosa oya. Me yacova mai oqo e sa vakatitobutaka beka na nodra vakabauti Jisu Karisito na vulici ni Vunau kei na Veiyalayalati?

Vakavulica na iVunau

O Jisu Karisito sa rawata e dua na “veisorovaki uasivi sara.”

• E baleta ni sa dua na ivunau bibi na Veisorovaki i Jisu Karisito, sa rawa mo solia edua na gauna, me vakadeitaki mera kila na lewe ni kalasi na tikina oya. Me caka oqo, e rawa mo vola ena na vava ni volavola na taro vakaoqo: Na cava na Veisorovaki i Jisu Karisito? E tara vakacava na noqu bula ena veisiga? Ena tara vakacava na noqu na bula tawamudu? Au na ciqoma vakacava na kaukauwa ni veivueti ni iVakabula ki na noqu bula? Solia vei ira na lewe ni kalasi e vica na miniti me ra nanuma vakatitobu na veitaro oqo, ka mera vakasaqarai na ivolanikalou ka na veivuke ena nodra sauma na veitaro oqo. O ira na lewe ni kalasi e rawa me ra vola nodra tiki ni ivolanikalou ena vava ni volavola, ka na rawa ni veitalanoataki vakalasi e vica vei ira oqori. Oqo e so na kena ivakaraitaki: Luke 22:39–44; 1 Joni 1:7; 2 Nifai 2:6–9; Mosaia 3:5–13,17–18; Alama 7:11–14; Moronai 10:32–33; Vunau kei na Veiyalayalati 19:16–19; 45:3–5.

• Ena vakaibalebale cake vei ira na lewe ni kalasi me ra sarava na vidio “Na iVakabula sa Vakararawataki mai Kecisemani” (ChurchofJesusChrist.org) ni bera ni wiliki na nona vosa vakai koya na iVakabula me baleta na Nona Vakararawataki ena Vunau kei na Veiyalayalati 19:16–19. E vakatitobutaka vakacava na veitikina oqo na noda vakavinavinakataka na solibula i Jisu Karisito? Eso tale na vidio ni siganimate o rawa ni wasea e tuvai tu ena “iKuri ni iVurevure”

  

  Na Turaga ni Masu, mai vei Yongsung Kim

Vunau kei na Veiyalayalati 76:11–14, 20–24; 110:1–10

E vakadinadinataka o Josefa Simici na parofita ni bula tiko ko Jisu Karisito.

• Ko Josefa Simici a raica na iVakabula sa vakaturi cake tale ka wasea e dua na ivakadinadina kaukauwa ni ko Jisu Karisito e bula tiko. Me vukei ira na lewe ni kalasi mera vulica na ivakadinadina nei Josefa Simici, o rawa ni wasei ira rua ka lesia ki na ilawalawa yadua mera wilika e dua vei rau na Vunau kei na Veiyalayalati 76:11–14, 20–24 se 110:1–10. Sureti ira yadua na lewe ni kalasi me ra tomika e dua se vica na vosa ena veitikina oqo e vakamacalataka na iVakabula. O ira na lewe ni kalasi e rawa ni ra veivukevuke ena vola na vosa era kunea ena vava ni volavola, ka sa rawa mo vakayagataka na veivosa oqo me dusimaki kina e dua na veivosaki me baleta na ivakarau ni bula kei na kaukauwa ni iVakabula. E vaqaqacotaka vakacava na ivakadinadina nei Josefa Simici na noda vakabauta na bula vakalou kei na ilesilesi i Jisu Karisito?

• Eso na lewe ni kalasi era sa na semata rawa na lesoni ena Vunau kei na veiyalayalati vata kei na vosa kei na dina e tiko ena Serenilotu “Au Sa Kila Ni Bula Tu” (Sere ni Lotu, naba 76; raica na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale). E rairai era sa tu vakarau me ra wasea na veika era sa kunea. E rawa talega moni wilika se lagata vata na sere ni Lotu oqo vaka lewe ni kalasi ka vaqara na nodra veisemati kei ira na ivolanikalou oqo: Vunau kei na Veiyalayalati 6:34; 45:3–5; 84:77; 98:18; 138:23. E yaco vakacava na noda mai kila ni bula tiko na noda Dauveivueti?

Vunau kei na Veiyalayalati 29:26–27; 42:45–46; 63:49; 88:14–17, 27–31; 93:33–34

Ena vuku i Jisu Karisito, eda na tucake tale.

• Me vukea na lewe ni kalasi mera veivosakitaka na cava e vakavulica na Vunau kei na Veiyalayalati me baleta na tucaketale, e rawa mo sureti ira me ra raitayaloyalotaka mada ni ra tarogi mai vua e dua na itokani se na lewe ni matavuvale se cava nai balebale ni tucaketale . Eda na vukea vakacava na tamata oya me kila vakavinaka nai balebale ni tucaketale ? Vakayaloqaqataki ira na lewe ni kalasi me ra vakasaqaqara ena Vunau kei na Veiyalayalati 88:14–17, 27–31 me baleta e dua na ka ena rawa ni veivuke. E oka kina eso tale na veivuke vakaivolanikalou ena Alama 11:40–45 kei Alama 40:21–23. Na cava eda rawa ni wasea me vukea na noda itokani se lewe ni matavuvale me vakila na marau kei na inuinui e vu mai na ivunau ni tucaketale?

• O na vukei ira vakacava na lewe ni kalasi mera vakananuma kina, na nona isolisoli ni tucaketale na iVakabula? E rawa mo vola ena vava ni volavola Ena vuku i Jisu Karisito … ka sureti ira na lewe ni kalasi mera raica mai na veitiki ni vosa, ka rawa ni vakacavara na matavosa oqo: Vunau kei na Veiyalayalati 29:26–27; 42:45–46; 63:49; 93:33–34. Ena tara vakacava na vei dina e kunei ena veitikina oqo na noda rai me baleta na mate? Era na tara vakacava na noda bula e veisiga?

iKuri ni iVurevure

Vidio ni Siganimate ena ChurchofJesusChrist.org.

“Baleta Ni Bula tiko o Koya”

Vakatorocaketaki Noda Veivakavulici

Vukei ira na lewe ni kalasi mera vakasaqaqara ena ivolanikalou. “Dau taroga na taro ka gadrevi kina me ra vakasaqaqara ena ivolanikalou o ira na vuli me ra kunea na kena isau. … Vukei ira me ra raica rawa ni dina ga a volai ena vuqa na yabaki sa oti na ivolanikalou, era tu kina na nona isaunitaro na Turaga ki na leqa eda sotava kece tu” (Veivakavulici ena iVakarau ni iVakabula, 30).