5–11 ni Epereli

Vunau kei na Veiyalayalati 30–36

“O Sa Kacivi Mo Vunautaka na Noqu Kosipeli”

Ni o wilika na Vunau kei na Veiyalayalati 30–36, na itukutuku cava so o vakila ni yaga vei ira o vakavulica tiko? Na cava ena veivuke me vakauqeti ira mera wasea na Kosipeli vei ira na tani?

Vola na Veika o Vakauqeti Kina

Sureta na Veiwasei

Ena rairai rawa beka vei ira na lewe ni kalasi mera wasea e dua na ka era a wilika ena Vunau kei na Veiyalayalati, 30–36. ka a vakauqeti ira me ra wasea na kosipeli.

Vakavulica na iVunau

Vunau kei na Veiyalayalati 30–36

Eda sa kacivi meda vunautaka na kosipeli i Jisu Karisito.

• Na ituvatuva ena macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale e vakatututaka me vakasaqarai e na Vunau kei na Veiyalayalati, 30–36. na cava e kerea na Turaga vei ira na Nona daukaulotu kei na nona yalayala vei ira. Mera qai wasea na lewe ni kalasi na veika era sa kunea rawa. (Raica, me ivakaraitaki na, Vunau kei na Veiyalayalati 30:8; 31:3–5; 32:1, 5; 35:24.) E rairai ena rawa mo sureti ira mera volavola vua e dua e veiqaravi tiko ena gauna oqo se vakavakarau tiko me laki kaulotu ka okata kina eso na ivakaro kei na yalayala ni Turaga.

• O vakavulici ira tiko beka na itabagone era vakavakarau tiko me ra laki veiqaravi vakadaukaulotu? Ke sa vakakina, e rawa ni o sureti ira yadua na lewe ni kalasi me ra vakasaqara e dua na wase mai na Vunau kei na Veiyalayalati 30–36 ka vakaraica e dua na ka e vakauqeti ira me ra veiqaravi. Ena rawa mo dusimaka ni o ira na daukaulotu ka vakamacalataki tiko ena iwase oqo era curu vou ka se bera ni matua ena Lotu. Na cava era vakadonui kina me ra wasea na kosipeli? Sa rawa talega mo vakaraitaka e dua na vidio e vakaturi tiko ena “iKuri ni iVurevure.” Na cava era vakatura tiko na vei vidio oqo me baleta na vuna e dodonu me da veiqaravi kina vakadaukaulotu kei na sala cava eda rawa ni vakarautaki keda kina?

• Sega ni o keda kece ena donui keda na madigi me da veiqaravi vakadaukaulotu tudei, ia eda rawa kece ni sureti ira na tani mera lako mai vei Karisito ka mai rogoca na itukutuku ni Veivakalesui mai. O ira na lewe ni kalasi e rawa ni ra tuva na sala duidui eso era rawa “ni dolava kina [na] gusudra” (Vunau kei na Veiyalayalati 33: 8 – 10). Na cava soti eso na madigi rawarawa sara me da wasea kina na noda vakabauta vei ira na tani? Na ivakasala cava ena Vunau kei na Veiyalayalati, 30–36. e baleta tiko na wasei ni kosipeli ena veisala eso oqo? Mo nanuma mo kerei ira e vica na lewe ni kalasi ka ra sota kaya na veika vinaka ena nodra wasea na kosipeli me ra wasea na nodra vakasama ka sauma na taro mai vei ira na lewe ni kalasi.

• Sa yalataka na Turaga vei Esera Tea kei Northrop Sweet ni kevaka erau na dolava na gusudrau me rau wasea na kosipeli, erau na “vakataki Nifai ena gauna e liu” (Vunau kei na Veiyalayalati 33:8). Na itovo cava e a tiko vei Nifai ka veisemati kei na kena wasei na kosipeli? (raica, me ivakaraitaki, 1 Nifai 3:7; 4:6; 10:17; 17:15; 2 Nifai 1:27–28). Ena vukei keda vakacava na vei itovo vakaoqo ena noda sasaga meda wasea na kosipeli?

  

  E kerei keda tiko na Turaga meda vunautaka na kosipeli ena noda gauna oqo me vaka ena gauna taumada ni Lotu.

Vunau kei na Veiyalayalati 32–33; 35

Na Turaga ena vakarautaki keda ena vuku ni cakacaka e vinakata o koya meda cakava.

• E sa vukei keda vakacava na Turaga meda vakayacora na nona cakacaka? E dua na veivosaki me baleta na nodra bula na tamata ka vakamacalataki ena Vunau kei na Veiyalayalati, 32–33,35 e rawa ni dua na vanua vinaka me tekivu kina na vakasamataki vakatitobu ni veika e sotavi oqo. Me kena ivakaraitaki, e rawa ni o wasea vata kei na kalasi na itukutuku ni raivotu nei Esera Tea ena “iKuri ni iVurevure” ka mo qai sureti ira na lewe ni kalasi me ra wilika na Vunau kei na Veiyalayalati 33:1–13, edua na tiki ni ivakatakila a soli vei Esera Tea. A vukei Esera vakacava tiko na Turaga me vakarautaki koya ena vuku ni cakacaka a vinakati vua me cakava? (raica na Vunau kei na veiyalayalati 33:2). E rawa tale ga mo kerea e dua na lewe ni kalasi me wasea eso na veivakadidike me baleta na veiwekani ena kedrau maliwa ko Pali P. Pereta kei Sidini Rikitoni (raica na “Na domo ni Veivakalesuitale: Nodra iVakadinadina na Saumaki Taumada” ena Lako Mai, Mo Muri Au—Me Baleta na Tamata Yadua kei na Matavuvale) . Sa vakalougatataka beka vakacava na Lotu na veiwekani oqo? Na ivakadinadina cava eda raica ni a tiko na liga ni Turaga ena nodra bula na tamata oqo? E rairai era rawa ni wasea na lewe ni kalasi na veika era a sotava ka a vukei ira mera raica ni Turaga a kauwaitaki ira tiko ena sala vata oya.

iKuri ni iVurevure

Na raivotu nei Esera Tea.

A vola ko Esera Tea, ena dua na gauna ni bera na nona a papitaisotaki, a raica kina edua na raivotu ka a lako mai kina vua e “dua na tamata ka kauta tiko mai edua na ivivivi pepa ka solia vei au, kei na dua talega na biukila ka kaya vei au meu [vakatagitaka]” Au tukuna vua niu se bera vakadua ni bau [vakatagitaka] e dua ena noqu bula. A kaya o koya o rawa ni [vakatagitaka], tovolea. … E a solia e dua na rorogo totoka kau se qai bau rogoca vakadua” (“Vakatakila, Okotova 1830–B, iVola ni Vakatakila1” na ivakamacala ni kena ivolatukutuku, josephsmithpapers.org). Ni qai mai ciqoma emuri ko Josefa Simici e dua na ivakatakila me baleti Esera Tea kei Northrop Sweet, ka sa vakacurumi me Vunau kei na Veiyalayalati 33, e vakadewataka o Esera ni ivakatakila sai koya na ivivivi pepa ka raica ena raivotu.

Vakatorocaketaki Noda Veivakavulici

Vakayaloqaqataka na yalo ni veidokadokai. “Vukei ira nomu lewe ni kalasi mera kila vinaka ni o ira yadua era vakayaco-ka ki na yalo ni kalasi. Vakayaloqaqataka mera vukea nomu tauyavutaka e dua na ituvaki rawarawa, veilomani, ka veidokai me ra vakila vakayadua ni sa rawa mera wasea na veika era sotava, taro, ka soli ivakadinadina” (Veivakavulici ena iVakarau ni iVakabula,15).