Era Toki ki Katiladi na Yalododonu, mai vei Sam Lawlor

12–18 ni Epereli

Vunau kei na Veiyalayalati 37–40

“Ia Kevaka Dou Sa Sega ni Duavata, Dou Sa Sega ni Noqu”

Ni bera ni tuvalaki na veika mo na cakava ena kalasi, vulica ena masumasu na Vunau kei na Veiyalayalati 37– 40. Ko na rawa ni ciqoma na veidusimaki vakayalo ena nomu vakavakarau mo veivakatavulici kevaka mo ilovi iko taumada ena vei ivolanikalou oqo.

Vola na Veika o Vakauqeti Kina

Sureta na Veiwasei

Vakasamataka mo vola ena vava ni volavola, Niu wilika na Vunau kei na Veiyalayalati 37–40, au vakila ni Turaga e tukuna tiko vei au . O ira na lewe ni kalasi e rawa me ra wasea na sala mera vakacavara kina na iyatuvosa. Vakayaloqaqataki ira me ra wasea na veitikina eso mai na nodra wiliwili me tiki ni nodra isau ni taro.

Vakavulica na iVunau

Vunau kei na Veiyalayalati 37–38

Na Kalou e vakasoqoni keda vata me vakalougatataki keda.

• Ena so na gauna e dau rawarawa cake meda vuli mai na vei ivakatakila ena Vunau kei na Veiyalayalati ni da biuti keda ena nodra itutu o ira na tamata ka a soli taumada vei ira. Me vukei ira na lewe ni kalasi mera cakava vakaoqo ena wase e 37–38, o rawa ni sureti ira me ra raitayaloyalotaka ni ra bula tiko e Fayette, New York, ena 1831. Rawa ni dua na lewe ni kalasi me taura na i tutu nei Josefa Simici ka wilika na wase e 37 vei ira. Ena vakabeka evei na noda i tovo ni vakanananu ki na ivakaro oqo? Era rairai rawa ni ra raitayaloyalotaka beka na lewe ni kalasi ni dua nodra itokani e sega ni vinakata me soqoni vata ki Ohio; e rawa ni ra vakasaqara ena wase e 38 mera kunea kina eso na dina ena rawa ni vakayaloqaqataki ira na nodra itokani me ra yalodina ki na ivakaro ni vakasoqoni vata. (Kevaka e gadrevi, e rawa mo dusimaki ira vakatabakidua ki na vei tikina e 1–4, 11–12, 17–22, kei 27–33.) Sa na rawa talega ni lomasoli na lewe ni kalasi era rawa me ra wasea na dina ka tautauvata kei na kena oqo ka sa vukei ira oti ena nodra gadreva me ra talairawarawa ki na dua na ivakaro ka rairai dredre.

• Era sa sega tale ni vakaroti na Yalododonu Edaidai me ra soqoni vata ena nodra toki ki na dua na vanua, ia eda sa vakasoqoni vata tiko vaka matavuvale, ena veitabanalevu kei na vei iteki. Me veivosakitaki na sala e vakalougatataki keda kina na soqonivata vakaoqo nikua, e rawa mo wasea na kalasi me rua na ilawalawa. Kerea e dua na ilawalawa mera vakasaqara na Vunau kei na Veiyalayalati 38:31–33 ka vakaraica na veivakalougatataki e baleta na vakasoqoni vata vakamatavuvale, ka kerea na ikarua ni ilawalawa me ra vakasaqara tale ga ena veitikina vata oqo na veivakalougatataki e baleta na soqonivata vaka tabanalevu kei na iteki. Me ra na wasea ki na kalasi na nodra nanuma. Eda sa vakalougatataki vakacava ena noda vakasoqoni vata me vaka e dua na kalasi ni Matawilivola ni Sigatabu?

Vunau kei na Veiyalayalati 38: 24–37

E dodonu mera duabau na tamata ni Kalou.

• Era lako mai na veituvaki ni bula eso o ira na Yalododonu ka ra a soqoni vata ki Ohio, ia na Turaga e vakaroti ira mera rawa na nodra duidui ka “mo dou duavata sara” (tikina e 27). Na cava na vuna eda dau sega soti ni raici ira kina eso tale na tamata meda tautauvata? Vakayaloqaqataki ira na lewe ni kalasi mera vakasamataka vakatitobu na nodra ivalavala vei ira na tani ena nodra wilika na Vunau kei na Veiyalayalati 38:24–27. Na cava na kena ibalebale meda rokovi ira na tacida kei na ganeda me vakataki keda? Na cava na vuna e sega ni rawa vakaidina meda tamata ni Kalou kevaka eda sega ni duavata?

• Na wiliki ni Vunau kei na Veiyalayalati 38:24–27 e rawa ni muataki keda kina dua na veivosaki me baleta na duavata ena noda veimaliwai —vaka lewe ni tabanalevu, matavuvale, kei na so tale. Na vidio “A iTokani vei Ira Kece” se na “Loloma ena Yaloda” ena ChurchofJesusChrist.org ena rawa ni veivuke. Me kena ivakaraitaki, na lewe ni kalasi e ra rawa ni wasea na itukutuku se vakasama mai na vidio ka na vukei ira mera kila vakavinaka cake na dina e tiko ena tikina e 24–27. E rawa talega ni ra vakasamataka vakatitobu ka wasea na nanuma me baleta e dua na taro me vaka na “Na cava meu cakava meu vukea na neitou tabanalevu mera duavata vaka levu cake?”

Vunau kei na Veiyalayalati 38:39; 39–40

E gadreva na Tamada me solia vei keda na iyau ni gauna tawamudu.

• Na kena caka e dua na ivolakabi ena rawa ni vukei ira na lewe ni kalasi mera veivosakitaka na Vunau kei na Veiyalayalati 38: 39.. Ena dua na iyatu, mera qai vola kina na lewe ni kalasi “nai yau kei vuravura” se na veika era okati me yaga eke ia era na sega ni yaco kina bula ka tarava. Ena iyatu tale kadua, sa rawa mera vola kina na “iyau tawamudu” se na veika e talei vua na Kalou ka rawa me tu ka tawamudu. Na veika cava soti beka eda sa sotava sa vakavulica vei keda ni iyau tawamudu era sa talei cake vakalevu mai na iyau kei vuravura?

• E vakataka e levu vei keda, o Jemesa Koveli, a tiko vua eso na gagadre dodonu. Ia na nona sega ni muria na veidusimaki ni Kalou sa dua na domo ni veivakasalataki bibi ki vei keda kece sara. Me vukei ira na lewe ni kalasi mera vuli mai na veika ka a sotava o Koveli, sa rawa mo sureti ira eso mera vakasaqara ena wase e 39. ena veika eso a kerei koya kina na Turaga me cakava. Era rawa ni vakasaqara na kena vo na veivakalougatataki eso e yalataki vua ke talairawarawa. Era rawa talega ni ra vakasaqara na wase e 40 me kila kina se cava na vuna a sega ni ciqoma kina na veivakalougatataki eso oqo o Jemesa Koveli. Ena rawa ni vakayagataki vakacava vei keda na ka a sotava o koya? Na “kauwaitaka na veika vakavuravura” ena dau vakataotaki keda ena so na gauna meda ciqoma na vosa ni Kalou “ena marau”? (Vunau kei na Veiyalayalati 40:2).

Vakatorocaketaki Noda Veivakavulici

Kakua ni saga mo vakaotia taucoko. “E levu sara na ka e tu me veivosakitaki ena veilesoni yadua, ia e sega ni gadrevi me vakaotivi kece ena dua na gauna ni kalasi mena tarai kina na yalona e dua—ena so na gauna, dua se rua na usutu bibi sa na rauta vinaka.” (Veivakavulici ena iVakarau ni iVakabula, 7). Na Yalo Tabu, na vosa eso mai vei ira na lewe ni kalasi, kei na vakasama mai na ituvatuva oqo ena rawa ni vukei iko mo kila na vanua mo vakanamata kina.