19–25 ni Epereli

Vunau kei na Veiyalayalati 41–44

“Na Noqu Lawa me Cicivaki kina na Noqu Lotu”

Ena sega ni rawa ni veitalanoataki taucoko va–kalasi na vei dina e vakavulici ena Vunau kei na Veiyalayalati 41–44. Vaqara na veivakauqeti vakalou me vukea na nomu digitaka na vei dina ka na yaga sara ki na nomu kalasi.

Vola na Veika o Vakauqeti Kina

Sureta na Veiwasei

Ni sa tabaki na vei ivakatakila ena wase e 42 e vola o Josefa Simici “ ni ra sa ciqoma ena marau na Yalododonu” (“iVola vei Matini Erisi,” 22 ni Fepe.1831, josephsmithpapers.org). Vakayaloqaqataki ira na lewe ni kalasi me ra wasea e dua na ka era ciqoma ena marau mai na nodra vuli taudua se vakamatavuvale ena macawa oqo.

Vakavulica na iVunau

Vunau kei na Veiyalayalati 41–42

Na lawa ni Kalou e cicivaka na Nona Lotu ka rawa ni cicivaka na noda bula.

• Ena Vunau kei na Veiyalayalati 41, na Turaga e a vukei ira na Yalododonu mera vakarautaki ira mera ciqoma na Nona Lawa, ka na vakatakila mai o koya ni oti e vica na siga (raica na wase e 42). Ena rawa vakacava kina ivakatakila ena wase e 41 me na vukei ira na Yalododonu me ra ciqoma na lawa ni Kalou? Me vukei ira na lewe ni kalasi mera sauma na taro oqo, o na rawa ni sureti ira me ra wilika na Vunau kei na Veiyalayalati 41:1–6 ka vaqara eso na dina ka rawa ni vukei keda me da ciqoma na lawa ni Kalou. Eda na vakayagataka vakacava na vei dina oqo ni yaco vei keda na madigi meda ciqoma na ivakasala mai vua na Turaga?

• Na ituvatuva ena macawa oqo ena Lako Mai, Mo Muri Au—Baleta Ira na Tamata Yadua kei na Matavuvale e vakatututaka na kena wasei na wase e 42 me tauya lima na tikina ena dua na iwasewase, ka ra dui vakatakila e dua na dina bibi ni kosipeli. Na vei iwasewase oqo ena rawa ni vakarawarawataka vei iko na kena veivosakitaki na iwase oqo va–kalasi. Me vaka beka oqo, o rawa ni o vola ena vava ni volavola na veitikina eso ka sureti ira yadua na lewe ni kalasi mera digitaka e dua na iwasewase. Kerei ira na lewe ni kalasi me ra wilika na nodra tikina ka tomika mai kina e dua na ka era vakila ni bibi vei keda ena gauna oqo. Qai rawa mera veiwaseitaka na ivakaraitaki eso mai na nodra bula me vakaraitaka na noda sa vakalougatataki ni da cicivaka na noda bula ena veilawa oqo.

Vunau kei na Veiyalayalati 41:9–11.

Na Turaga e kerei ira Nona italai me ra solibula.

• Ko Etuwate Patereji, na imatai ni bisopi ni Lotu vakalesuimai, sa vakaroti me biuta na nona bisinisi ka qarava na cakacaka ni kaulotu ena “vo ni nona bula” E dina ni sega ni gadrevi oqo vei keda, na cava eda kunea ena veitikina oqo ka na rawa ni vakayacori ena noda veiqaravi vua na Kalou? (Me so tale na itukutuku baleti Etuwate Patereji, raica na “E dua na Bisopi ki na Lotu,” Veisemati ni iVakatakila 77 – 83)

Vunau kei na Veiyalayalati 42: 61, 65–68; 43:1–7

Na ivakatakila e kauta mai na vakacegu, reki, kei na bula tawamudu.

• Me vakataki ira na iliuliu taumada ni Lotu, o ira na lewe ni nomu kalasi ena tiko beka vei ira na taro e vaka na “veika vuni” baleta ni ra vinakata na veidusimaki mai vua na Turaga. Sa rawa ni o vakayaloqaqataki ira me ra vola e dua na taro e tiko se dua na leqa era gadreva kina na ivakatakila vei ira vakayadua. Na cava eda na kunea ena Vunau kei na Veiyalayalati 42:61, 65–68 ka na rawa me vukei keda ena noda vakasaqara na ivakatakila?

• Me vukei ira na lewenilotu mera kila vakavinaka na sala e solia mai kina na Kalou na ivakatakila me liutaki kina na Nona Lotu, o na rawa ni sureti ira me ra wilika na Vunau kei na Veiyalayalati 43:1–7. Era rawa talega ni ra sarava na vidio “O Ira na Parofita kei na iVakatakila—Era Rogoca na Domona” (ChurchofJesusChrist.org).

Vunau kei na Veiyalayalati 86:8–11.

Eda sa soqoni vata meda “veidusimaki ka veivakatataki cake vakataki keda.”

• Eda na vakayagataka vakacava na Vunau kei na Veiyalayalati 43:8–10 me vakavulici kina e dua e vakila ni sega ni dua na betena na lako mai ki na soqoni ni Lotu? Rawa ni veivuke na veika e tuvani tu ena “iKuri ni iVurevure” me vakanamata kina na veivosaki ena inaki vakalou ni kuoramu ni matabete kei na iSoqosoqo ni Veivukei (na ituvatuva sa vakaibalebaletaki talega ki na kalasi ni goneyalewa). O ira na lewe ni kalasi era rawa ni wasea ni ra sa vakalougatataki ena nodra vakaitavi ena vei kuoramu, Soqosoqo ni Veivukei kei na veikalasi ni Lotu. Na cava e cakava na tikina e 8–10 me vakaraitaka na ka meda cakava meda vakavakarau kina ka vakaitavi ena noda veisoqoni?

  

  Na soqoni e valenilotu e dua na sala eda “veidusimaki ka veivakatataki cake kina”

iKuri ni iVurevure

Na vuni noda vakarautaki ki na veikuoramu kei na vei iSoqosoqo ni Veivukei.

E vakamacalataka o Sisita Julie B. Beck, Peresitedi vakacegu ni iSoqosoqo Raraba ni Veivukei, na vuna e vakarautaki keda kina na Kalou ki na veikuoramu ni matabete kei na iSoqosoqo ni Veivukei:

1. “Meda vakarautaki ena ruku ni veiliutaki ni matabete ka salavata kei na ituvatuva ni Matabete”

2. “Me vagolei vakatabakidua ko ira na luvena tagane kei na yalewa na Tamada Vakalomalagi ena cakacaka ni veivakabulai ka vakaitavitaki ira kina. Na veikuoramu kei na iSoqosoqo ni Veivukei era sa tauyavutaki ena bula vakatisaipeli vata kei na itavi me vukea na cakacaka nei Tamada me kau mai na bula tawamudu vei ira na luvena.”

3. “Me vukei ira na bisopi ena vakatulewataki vakavuku ni lololo ni Turaga. Na nona lololo na Turaga e oka kina na ‘gauna, taledi, yalololoma, iyaya, kei na ilavo’ nodra na lewe ni Lotu [iVoladusidusi 2: Veiliutaki ena Lotu, 6.1.3, ChurchofJesusChrist.org]. Na nodra taledi na Yalododonu e vakayagataki me ra vukei kina na dravudravua kei na vakaloloma, ka me tarai cake na matanitu ni Kalou.”

4. “Me vakarautaki edua na idrodro kei na ivakaruru vei ira na luvena na Tamada Vakalomalagi kei na nodra matavuvale ena iotioti ni gauna.”

5. “Meda vaqaqacotaki ka tokoni ena noda itavi kei na ilesilesi ena vuvale me vaka eda sa dua na luvena tagane kei na luvena yalewa na Kalou.” (“Na Vu ni Noda Vakarautaki vaka Kuoramu kei na iSoqosoqo ni Veivukei” [vosa ena lotu ena Brigham Young University, 17 ni Jan. 2012], speeches.byu.edu.)

Vakatorocaketaki Noda Veivakavulici

Veisureti. “Mo kakua ni veisureti tiko ga me caka e dua na ka sa kilai levu tu, nanuma mo sureti ira na vuli mera vakasamataka vaka i ira na sala mera bulataka kina na veika era vulica ” (Veivakavulici ena iVakarau ni iVakabula, 35).