19–25 abril

Tzolʼlebʼ ut Sumwank 41–44

“Inchaq’rab’ re xjolominkil lin iglees”

Moko taaruuq ta tat-aatinaq chirix chixjunileb’ li na’leb’ neke’k’utman sa’ Tzolʼlebʼ ut Sumwank 41–44. Sik’ aamusiq’ankil re tatxtenq’a chixsik’b’al ruheb’ li na’leb’ li jwal aajelaq ru choq’ reheb’ li komon.

Tz’iib’a li nakak’oxla

Xkanab’ankileb’ chi wotzok

Naq ke’puktesiman li k’utb’esinb’il na’leb’ wan sa’ li tasal 42, laj Jose Smith kixtz’iib’a naq eb’ laj santil paab’anel “ke’xk’ul rik’in sahil ch’oolejil” (“Letter to Martin Harris”, 22 febrero, 1831, josephsmithpapers.org) Waklesi xch’ooleb’ li komon sa’ li tzoleb’aal chixwotzb’al k’a’ruhaq xe’xk’ul rik’in sahil ch’oolejil sa’ li tzolok sa’ junesal malaj jo’ junkab’al chiru li xamaan a’in.

Xk’utb’al li tzolʼlebʼ

Tzolʼlebʼ ut Sumwank 41–44

Eb’ lix chaq’rab’ li Dios neke’xjolomi lix Iglees ut naru ajwi’ neke’xjolomi li qayu’am.

• Sa’ Tzolʼlebʼ ut Sumwank 41–44 li Qaawa’ kixtenq’aheb’ laj santil paab’anel chixkawresinkileb’ rib’ re xk’ulb’al lix chaq’rab’, li kixk’utb’esi wiib’ oxib’ kutan chik moqon (chi’ilmanq li tasal 42). Chan raj ru naq li k’utb’esinb’il na’leb’ wan sa’ li tasal 41 kixtenq’aheb’ laj santil paab’anel chixk’ulb’al lix chaq’rab’ li Dios? Re xtenq’ankileb’ li komon sa’ li tzoleb’aal chixsumenkil li patz’om a’an, naru nakakanab’eb’ chirilb’al ru Tzolʼlebʼ ut Sumwank 41:1–6 ut te’xtaw li na’leb’ naru nokohe’xtenq’a chixk’ulb’al lix chaq’rab’ li Dios. Chan ru naru naqoksiheb’ li na’leb’ a’an rajlal sut naq wan qahoonal re xk’ulb’al qana’leb’ rik’in li Qaawa’?

• Sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al nayeeman naq naru najachman ru li tasal 42 sa’ oob’ ch’uut chi raqal, b’ar wi’ neke’tawman junjunq li na’leb’ aajel ru re li evangelio. Eb’ li ch’uut a’an naru nakate’xtenq’a chi aatinak chirix li tasal a’an jo’ tzoleb’aal. Qayehaq, naru taatz’iib’aheb’ li raqal sa’ li pizarron ut taakanab’ li junjunq komon sa’ li tzoleb’aal naq tixsik’ ru jun li ch’uut. Kanab’eb’ li komon sa’ li tzoleb’aal chirilb’aleb’ ru lix raqaleb’ ut te’xsik’ k’a’ruhaq neke’xk’oxla naq aajel ru choq’ qe anajwan. Chirix a’an naru te’xwotz k’a’aq re ru xe’xk’ul sa’ xyu’ameb’ li neke’xk’ut chan ru naq osob’tesinb’ilo naq naqajolomi li qayu’am rik’ineb’ li chaq’rab’ a’an.

Tzolʼlebʼ ut Sumwank 41:9–11

Li Qaawa’ naxpatz’ reheb’ lix moos naq te’mayejaq.

• Laj Edward Partridge, li kiwan jo’ xb’een obiisp re li Iglees k’ojob’anb’il wi’chik, kitaqlaak chixkanab’ankil lix trab’aaj ut “chiroksinkil chixjunil lix hoonal” chi k’anjelak sa’ lix b’oqb’il k’anjel. Us ta ink’a’ patz’b’il qe a’an, k’a’ru naqataw sa’eb’ li raqal a’an li naru naqoksi sa’ li qak’anjel chiru li Dios? (Re xtawb’al xkomon li esil chirix laj Edward Partridge, chi’ilmanq “Un obispo de mi iglesia”, Revelaciones en contexto, 82–88.)

Tzolʼlebʼ ut Sumwank 42:61, 65–68; 43:1–7.

Li k’utb’esinb’il na’leb’ naxk’am chaq tuqtuukilal, sahil ch’oolejil, ut li junelik yu’am.

• Jo’eb’ ajwi’ li xb’eenil aj jolominel sa’ li Iglees, eb’ li komon sa’ li tzoleb’aal naru neke’wan xpatz’om li chanchan naq “muqmuukil na’leb’ ” xb’aan naq neke’raj ru lix b’eresihom li Qaawa’. Naru taawaklesi xch’ooleb’ chixtz’iib’ankil jun xpatz’omeb’ malaj junaq ch’a’ajkilal li neke’raj wi’ ru xk’ulb’al li k’utb’esinb’il na’leb’ re junesal. K’a’ru naqataw sa’ Tzolʼlebʼ ut Sumwank 42:61, 65–68 li naru nokoxtenq’a naq naqasik’ li k’utb’esinb’il na’leb’?

• Re xtenq’ankileb’ li komon chixtawb’al ru chan ru naq li Dios naxk’e li k’utb’esinb’il na’leb’ re xb’eresinkil lix Iglees, naru taakanab’eb’ chirilb’al ru Tzolʼlebʼ ut Sumwank 43:1–7. Naru ajwi’ te’ril li video “Los profetas y la revelación—Escuchar Su voz” (ChurchofJesusChrist.org).

Tzolʼlebʼ ut Sumwank 43:8–10

Nokoch’utla re “xtzolb’al qib’ ut xwaklesinkil qaam chiqib’il qib’.”

• Chan ru naru naqoksi Tzolʼlebʼ ut Sumwank 43:8–10 re xk’utb’al chiru anihaq li nareek’a naq moko aajel ta ru xik sa’eb’ li ch’utam sa’ li Iglees? Li tusulal natawman sa’ “Xkomon chik li k’anjeleb’aal” naru natenq’an chixjayalinkil li aatinak sa’eb’ li choxahil ajom reheb’ li molam re li tijonelil ut li Komonil re Tenq’ank (li tusulal nak’anjelak ajwi’ choq’ re xtzoleb’aaleb’ li Saaj Ixq). Eb’ li komon sa’ li tzoleb’aal naru te’aatinaq chirix chan ru naq neke’osob’tesiik xb’aan lix tz’aqonikeb’ sa’eb’ li molam, li Komonil re Tenq’ank, ut eb’ li tzoleb’aal re li Iglees. K’a’ru neke’xye li raqal 8–10 chirix li k’a’ru tento taqab’aanu re xkawresinkil qib’ ut tz’aqonk sa’eb’ li qach’utam?

  

  Eb’ li ch’utam sa’ li iglees nokohe’xkawresi re naq “taqatzol qib’ ut taqawaklesi qach’ool chiqib’il qib’.”

Xkomon chik li k’anjeleb’aal

Lix yaalalil naq k’uub’anb’ilo sa’ molam ut sa’ Komonil re Tenq’ank.

Li Hermana Julie B. Beck, li kiwan choq’ Awa’b’ej re li Komonil re Tenq’ank, kixch’olob’ lix yaalal naq li Dios naxk’uub’ qu sa’ molam re li tijonelil ut sa’ Komonil re Tenq’ank:

1. “Re qak’uub’ankil rub’el xb’eresihom li tijonelil ut a’ yaal chan ru xtusulal ru li tijonelil.”

2. “Re xjayalinkileb’ li ralal xk’ajol li qaChoxahil Yuwa’ sa’ li k’anjel re li kolb’a-ib’ ut re naq te’tz’aqonq chi sa’. Eb’ li molam re li tijonelil ut eb’ li Komonil re Tenq’ank a’aneb’ ch’uut chi tzolom k’uub’anb’ileb’ rik’in teneb’ahom re tenq’ank sa’ lix k’anjel li qaChoxahil Yuwa’ re xk’eeb’al chi uxmank lix yu’ameb’ chi junelik li ralal xk’ajol.”

3. “Re xtenq’ankileb’ li obiisp chixb’eresinkil rik’in chaab’il na’leb’ lix k’uuleb’aal li Qaawa’. Sa’ lix k’uuleb’aal li Qaawa’ wankeb’ “xhoonaleb’, xseeb’aleb’, xrahomeb’, xk’anjeleb’aaleb’, ut xtumineb’ li komon re li Iglees [Manual 2: Administración de la Iglesia, 6.1.3, ChurchofJesusChrist.org]. Lix seeb’aleb’ laj santil paab’anel tento taa’oksimanq re rilb’aleb’ li neb’a’ ut li wankeb’ rajom ru, ut re xwaklesinkil lix awa’b’ejihom li Qaawa’.”

4. “Re xk’eeb’al xkolb’aleb’ ut xna’ajeb’ li ralal xk’ajol li qaChoxahil Yuwa’ ut eb’ lix junkab’al sa’ roso’jikeb’ li kutan.”

5. ”Re qakawob’resinkil ut qatenq’ankil sa’eb’ li qateneb’ankil sa’ li qajunkab’al ut jo’ ralal ut xrab’in li Dios.” (“Why We Are Organized into Quorums and Relief Societies” [discurso en un devocional de la Universidad Brigham Young, 17 enero, 2012], speeches.byu.edu).

Xchaab’ilob’resinkil li qak’utum

K’e xb’oqb’aleb’. “Sa’ xna’aj xk’eeb’al b’oqom re xb’aanunkil k’a’aq re ru ak ch’olch’o ru, naru nakak’e xb’oqb’aleb’ laj tzolonel chixk’oxlankil chan ru naru neke’xk’anjela li xe’xtzol” (Li k’utuk jo’ li Kolonel, 35).