Na Soqoni ena Keba, mai vei Worthington Whittredge

3–9 ni Me.

Vunau kei na Veiyalayalati 46–48

“Dou Vakasaqara Vagumatua na iSolisoli Uasivi Duadua”

Ni o wilika na Vunau kei na Veiyalayalati 46–48, ena rawa vua na Yalo Tabu me vakadinadinataka vei iko me baleta na dina e tiko ena iwase oqo. Vola ka raicalesu na veivakauqeti e rawa ni vukei iko mo kunea na sala mera vukei kina na lewe ni kalasi mera kunea na dina vata oqo.

Vola na Veika o Vakauqeti Kina

Sureta na Veiwasei

E rawa ni veivuke vei ira na lewe ni kalasi me ra wasea ena veigauna eso, sa vakacava tiko na nodra dui vulica tiko vakai ira yadua se vakamatavuvale na ivolanikalou. Me ivakaraitaki, ena gauna era wasea kina na kalasi e dua na ka era sa kunea se o ira nodra lewe ni vuvale ena macawa oqo, sa rawa mo taroga na cava era a cakava tiko ena nodra vuli e vakauqeta kina na veivakararamataki oqori.

Vakavulica na iVunau

Vunau kei na Veiyalayalati 46:1–7

Sa dodonu meda kidavaka na tamata kecega ki na Lotu i Jisu Karisito.

• E vuqa na tamata, na sala kei na cava era a vakila ena gauna ni soqoni ni Lotu e rawa ni vakauqeta vakabibi na nodra itaviqaravi ena loma ni Lotu. Na ivakaro ni Turaga ena Vunau kei na Veiyalayalati 46:1–7 ena rawa ni vukei ira na nomu lewe ni tabanalevu mera tauyavutaka vakalevu na veigauna ni sokalou e veikidavaki, me vakaibalebale cake vei ira kei ira na vulagi. Sa rawa ki na lewe ni kalasi mera vakasaqara ena veitikina oqo, na ivakavuvuli e baleta na soqoni ni Lotu ka vola ena papa ni volavola na veika era sa kunea. Me baleta na veika yadua sa volai, mera qai veivosakitaka na kalasi na irairai ni ivakavuvuli o ya ni vakayacori.

• Ena rawa vakacava ki na ivakaro ni Turaga ena Vunau kei na Veiyalayalati 46 me vukei ira na lewe ni kalasi mera raica na veisoqoni vaka-Lotu me dua na madigi me ra vakila kina na Yalo Tabu? Sa rawa mo sureti ira na lewe ni kalasi me ra vakasaqaqara ena Vunau kei na Veiyalayalati 46: 2 ka veivosakitaka na gauna era sa raici ira kina na iliuliu kei na qasenivuli mera liutaka na veisoqoni ena Yalo Tabu. Na cava e nodra itavi o ira era tiko ena soqoni? Sa rawa mo sureti ira na lewe ni kalasi mera wasea na gauna era a vakila kina e dua na soqoni a veidusimaki ka veituberi kina na Yalo Tabu.

• De rawa mo sureta e vica na lewe ni kalasi me ra wasea na veika era a sotava ena imatai ni gauna era a tiko kina ena dua na soqoni ni Lotu i Jisu Karisito ni Yalododonu Edaidai. Na cava a vukei ira mera vakila ni ra a taleitaki? Na cava era na vakasalataki ira kina na lewenilotu tale eso me vukea me taleitaki cake kina na noda soqoni ni Lotu? Meda na bulataka vakacava na ivakasala ni Turaga e tiko ena Vunau kei na Veiyalayalati 46:1–7? Mera vakatovotovotaka na lewe ni kalasi na veika mera na kaya ke ra raica e dua na vulagi sa curu mai ki valenilotu ena imatai ni gauna.

• Me vaka e dua na serenilotu “’Kamica ni Da Sere Tu” (sere ni Lotu, naba 102 se Serenilotu Vakavalagi 177) e rawa me veivuke mera vakasamataka ka veivosakitaka na lewe ni kalasi na sala me taleitaki ka veilaveti cake na noda soqoni ni Lotu. Sa rawa vei ira na lewe ni kalasi mera lagata vata na sere ka wasea na vakasama mai na qaqana me baleta na sala mera vukei eso mera vakila kina na loloma ni Kalou ena gauna ni Lotu.

  

  E vakavuvulitaka na Turaga o keda kece eda sa taleitaki ena Nona Lotu.

Vunau kei na Veiyalayalati 46:7–33

Sa solia na Tamada Vakalomalagi na isolisoli vakayalo me yaga vei ira na Luvena.

• Era vakadinata vakaidina na Yalododonu taumada na veivakatakilai ni Yalo Tabu. Ena rawa vakacava mo vukei ira kina na lewe ni nomu kalasi mera tara cake na nodra vakabauta ni veiisolisoli oqo e rawa me ra vakatakilai mai ena noda bula nikua? Sa rawa mo tekivu ena nomu sureti ira na lewe ni kalasi me ra wilika vaka-veisasa se vakailawalawa lalai na Vunau kei na Veiyalayalati 46:7–33 . Kerei ira me ra vakaraica mada ga e lima na isolisoli vakayalo ka veivosakitaki na sala era sa raica kina na vakatakilai ni isolisoli oqori ena nodra bula se na bula ni dua era kila—oka kina o ira na lewe ni kalasi. Na cava era raica ni rawa ni ra wasea ki na kalasi me ra tara cake nodra vakabauta na isolisoli oqo?

• E kaya na Turaga ni isolisoli ni Yalotabu e yaga vei ira era sa yalodina tiko ka “sega ni kerea e dua na ivakatakilakila” (tikina e 9). De rawa ni ra veivosakitaka na lewe ni kalasi na yaga ni isolisoli vakayalo vei ira na yalodina. Era na veivuke vakacava na isolisoli oqo vei ira era vinakata me ra rawata se vakaqaqacotaka kina na nodra ivakadinadina me baleta na kosipeli?

• Eso na tamata era lomana na Kalou ka saga mera talairawarawa ki na Nona ivakaro ia era nanuma ni sega vei ira e dua na isolisoli ni Yalo. Ena rawa vakacava na ivakasala oqo ena Vunau kei na Veiyalayalati 46:7–33 me veivukei?

Vunau kei na Veiyalayalati 47

Sa rawa me dusimaki keda na Yalo Tabu ni da vakayacora na noda veikacivi.

• E vuqa na tamata e rawa ni ra nanuma lesu na veika a vakila o John Whitmer ena gauna a vinakata kina na veivakadeitaki ni nona veikacivi a solia mai na Kalou. Sa rawa vei ira na lewe ni kalasi mera wasea na veika vata ga vakaoqo era sa sotava oti. Na cava eda kunea ena Vunau kei na Veiyalayalati 47 a rawa ni yalonuidei kina o John Whitmer ena nona ilesilesi?

Vakatorocaketaki Noda Veivakavulici

Na nomu itavi vaka-qasenivuli. Na veituberi e sega walega ni vakaraitaki na itukutuku o sa vakarautaka. Ena maliwa ni veika tale eso, sa okati kina na kena tauyavutaki e dua na ituvaki vinaka mera na vulica ka kunea kina vakai ira na lewe ni kalasi na dina ka wasea na veika era sa vulica vata kei ira tale eso. Me ivakaraitaki, ena gauna taucoko ni lesoni, mo tarogi ira na lewe ni kalasi baleta na veika era sa sotava ena nodra vulica tiko na ivolanikalou mai vale.