Jun waklesink paab’aal, xb’aan laj Worthington Whittredge

3–9 mayo

Tzol’leb’ ut Sumwank 46–48

“Chesik’ chi anchal eech’ool eb’ li maatan q’axal chaab’il”

Naq nakawil ru Tzol’leb’ ut Sumwank 46–48, li Santil Musiq’ej naru naxch’olob’ xyaalaleb’ li na’leb’ neke’tawman sa’eb’ li tasal a’an. Xtz’iib’ankil ut xnumsinkil wi’chik li musiq’anb’il na’leb’ nakak’ul naru nakatxtenq’a chixtawb’al chan ru xtenq’ankileb’ li komon sa’ li tzoleb’aal chixtawb’aleb’ li na’leb’ a’an.

Tz’iib’a li nakak’oxla

Xkanab’ankileb’ chi wotzok

Naru nak’anjelak wi eb’ li komon sa’ li tzoleb’aal te’xwotz, jo’q’ehaq, chan ru wan xtzolb’aleb’ li loq’laj hu neke’xb’aanu xjuneseb’ ut rik’ineb’ lix junkab’al. Qayehaq, naq jun li komon tixwotz junaq na’leb’ xtaw chiru li xamaan malaj xtaw junaq komon sa’ lix junkab’al, naru taapatz’ re k’a’ru xb’aanu sa’ li tzolok li xk’amok chaq re li na’leb’ a’an.

Xk’utb’al li tzolʼlebʼ

Tzol’leb’ ut Sumwank 46:1–7

Tento te’qak’ul chixjunileb’ li kristiaan sa’ lix Iglees li Jesukristo.

• Choq’ reheb’ naab’al li kristiaan, li k’a’ru te’reek’a sa’eb’ li ch’utam ut chan ru te’reek’a naru tixnimob’resi rajomeb’ chi wank sa’ li Iglees. Lix ch’olob’ahom li Qaawa’ natawman sa’ Tzol’leb’ ut Sumwank 46:1–7 naru naxtenq’aheb’ li komon sa’ li teep re naq te’xyoob’ jun na’ajej b’ar wi sa te’reek’a naq te’loq’oninq a’an ut eb’ li kristiaan neke’wulak chi ula’anink. Eb’ li komon sa’ li tzoleb’aal naru te’rileb’ li raqal a’an re xsik’b’aleb’ li na’leb’ chirix li ch’utlaak sa’ li Iglees, ut te’xtz’iib’a li te’xtaw chiru li pizarron. Naru te’aatinaq chirix chan ru naq nak’anjelaman li junjunq chi na’leb’.

• Chan ru naq lix ch’olob’ahom li Qaawa’ wan sa’ Tzol’leb’ ut Sumwank 46 naxtenq’aheb’ li komon chirilb’aleb’ li ch’utam re li Iglees jo’ jun hoonal re reek’ankil li Santil Musiq’ej? Naru taapatz’ reheb’ li komon naq te’ril Tzol’leb’ ut Sumwank 46:2, ut te’aatinaq chirixeb’ li hoonal b’ar wi’ rilomeb’ laj jolominel ut eb’ laj tzolonel chixb’eresinkileb’ li ch’utam rik’in li Santil Musiq’ej. K’a’ru xk’anjeleb’ li neke’wulak sa’eb’ li ch’utam? Naru taapatz’ reheb’ li komon naq te’aatinaq chirixeb’ hoonal b’ar wi’ xe’reek’a naq li Santil Musiq’ej xtuqub’ ru ut xb’eresi li ch’utam.

• Maare naru taapatz’ re junjunq li komon sa’ li tzoleb’aal chixwotzb’al xnumsihomeb’ naq xe’wulak xb’een wa sa’ junaq li ch’utam re lix Iglees li Jesukristo reheb’ laj Santil Paab’anel sa’ Roso’jikeb’ li Kutan. K’a’ru xtenq’an reheb’ chireek’ankil naq k’ulb’ileb’? K’a’ raj ru li na’leb’ te’xk’e reheb’ jalan chik komon re naq sahaq li wank sa’eb’ li qach’utam sa’ li Iglees? Chan ru naru naqak’anjela li na’leb’ naxk’e li Qaawa’ sa’ Tzol’leb’ ut Sumwank 46:1–7? Kanab’eb’ li komon sa’ li tzoleb’aal chixtzolb’al k’a’ raj ru te’xye re junaq kristiaan li te’ril chi ok sa’ li kapiiy li ink’a’ neke’xnaw ru.

Tzol’leb’ ut Sumwank 46:7–33

Li qaChoxahil Yuwa’ naxk’eheb’ li musiq’ejil maatan choq’ re xchaab’ilaleb’ li ralal xk’ajol.

• Eb’ laj santil paab’anel sa’ xtiklajik li Iglees ke’xpaab’ chi ancheleb’ xch’ool lix k’utb’esihom li Santil Musiq’ej. Chan ru naru nakatenq’aheb’ li komon chixch’olaninkil lix paab’aaleb’ re naq eb’ li maatan a’an te’xk’utb’esi rib’ sa’ li qayu’am sa’eb’ li kutan a’in? Naru nakatikib’ rik’in xkanab’ankileb’ li komon chirilb’al ru Tzol’leb’ ut Sumwank 46:7–33 sa’ kok’ ch’uut malaj sa’ ka’kab’il. Patz’ reheb’ naq te’xsik’ oob’ li musiq’ejil maatan ut te’aatinaq chirix chan ru rilomeb’ chixk’utb’esinkil rib’ li maatan a’an sa’ xyu’ameb’ malaj sa’ xyu’am junaq kristiaan neke’xnaw ru—sa’ xyu’ameb’ ajwi’ li komon sa’ li tzoleb’aal. K’a’ru xe’xtaw li naru neke’xwotz sa’ li tzoleb’aal re xch’olaninkil lix paab’aaleb’ chirixeb’ li maatan a’an?

• Li Qaawa’ kixye naq eb’ li maatan re li Musiq’ej neke’rosob’tesiheb’ li tiikeb’ chi paab’ank li “ink’a’ neke’xtz’aama jun eetalil” (raqal 9). Eb’ li komon maare naru te’aatinaq chirix chan ru naq eb’ li musiq’ejil maatan a’an neke’rosob’tesiheb’ li tiikeb’ chi paab’ank. Chan ru naq eb’ li maatan a’an naru te’xtenq’aheb’ li neke’raj xk’ulb’al malaj xkawob’resinkil xnawom xch’ooleb’ chirix li evangelio?

• Junjunqeb’ li kristiaan neke’xra li Dios ut neke’xyal xpaab’ankileb’ lix taqlahom, a’b’an ink’a’ neke’reek’a naq xnawomeb’ ru junaq reheb’ li maatan re li Musiq’ej. Chan ru naru nak’anjelak li na’leb’ k’eeb’il sa’ Tzol’leb’ ut Sumwank 46:7–33?

Tzolʼlebʼ ut Sumwank 47

Li Santil Musiq’ej naru nokoxb’eresi naq nokok’anjelak sa’eb’ li qab’oqb’il k’anjel.

• Naab’aleb’ li kristiaan naru neke’reek’a li kireek’a laj John Whitmer naq kiraj xnawb’al naq lix b’oqb’al nachal chaq rik’in li Dios. Eb’ li komon maare naru te’xwotz junaq xnumsihomeb’ chanchan a’an. K’a’ru naqil sa’ Tzol’leb’ ut Sumwank 47 li maare kixkawob’resi xch’ool laj John Whitmer sa’ lix k’anjel?

Xchaab’ilob’resinkil li qak’utum

Laa k’anjel jo’ aj k’utunel. Li k’utuk moko ka’ajwi’ ta a’an xwotzb’al junjunq esil xakawresi. Naraj ajwi’ naxye xyoob’ankil junaq sutam b’ar wi’ eb’ li komon te’ruuq chixtzolb’aleb’ ut chixtawb’al li yaal xjuneseb’ rib’, jo’ ajwi’ xwotzb’al li xe’xtzol rik’ineb’ li komon. Qayehaq, sa’ xhoonalil li tzolok, naru nakapatz’ reheb’ li komon naq te’xwotz xnumsihomeb’ naq xe’tzoleb’ li loq’laj hu sa’ kab’l.