10–16 ni Me.

Vunau kei na Veiyalayalati 49–50

“Na Veika sa Vu mai Vua na Kalou e Veivakararamataki”

Ni gadrevi mo “vunautaka na vosa ni dina ena nona kaukauwa na Dauveivakacegui” (Vunau kei na Veiyalayalati 50:17), vakasaqara na veivakauqeti vakalou ni ko vakasamataka vakatitobu na Vunau kei na Veiyalayalati 49–50. Mo qai dolava na yalomu ki na veidusimaki ni Kalou ni ko veivakavulici.

Vola na Veika o Vakauqeti Kina

Sureta na Veiwasei

Me ikuri ni wasei ni veivakararamataki era a ciqoma ni ra vulica na ivolanikalou, ena yaga vei ira na lewe ni kalasi mera veivosakitaka na sala ni kena yaco mai na veivakararamataki oqo. Sa rawa mo sureti ira na lewe ni kalasi mera veiwaseitaka vakai ira na veivakararamataki eso me baleta e dua na tikina ena Vunau kei na Veiyalayalati 49–50 ka veivosakitaka na cava a muataki ira ki na veivakararamataki oqo.

Vakavulica na iVunau

Vunau kei na Veiyalayalati 49; 50:1–36

Na dina ni kosipeli ena rawa ni vukei au meu kila kina na ivakavuvuli lasu.

• A soli naWase 49 me vakadeitaka na dina ni ivunau me vakadodonutaka na veika era vakavulica tiko eso (raica na ituvatuva ena macawa oqo ena Mo Lako Mai, Mo Muri Au—Baleta na Tamata Yadua kei na Matavuvale me baleta na itukutuku makawa eso). Me vukei ira na lewe ni kalasi mera vakadikeva na wase oqo, sa rawa mo wasewasei ira vakailawalawa na lewe ni kalasi ka lesia ki na ilawalawa yadua e dua na ulutaga vakaivunau sa vulici oti (me vaka e volai tu ena ulutaga ni iwase 49). Na ilawalawa e rawa ni ra veivosakitaka na taro eso oqo: Na dina cava a vakavuvulitaka na Turaga me baleta na ulutaga oqo ena wase 49? Na cava era vakabauta tiko na tamata nikua baleta na ulutaga oqo? Na ikuri ni dina cava sa vakavulica na Turaga me baleta oqo mai vei ira na noda parofita edaidai? Solia na madigi vei ira na lewe ni kalasi mera wasea na nodra vakavinavinaka me baleta na dina sa vakatakilai mai ena noda siga oqo.

• Me vakataki ira na italatala qase mai Kirtland era sa “sega ni kila na ivakaraitaki ni veiyalo duidui eso” (Vunau kei na Veiyalayalati 50, ulutaga ni iwase), ena so na gauna eda dau vakataroga kevaka e dua na ka eda vakila se raica sa mai vua na Yalo se mai na dua tale na veivakauqeti. Na cava e rawa ni da vulica mai na Vunau kei na Veiyalayalati 50:1–36 me vukei keda meda kila rawa na veivakauqeti ni Yalo? Sa rawa mera digitaka na lewe ni kalasi yadua eso na tikina mera vulica ka kerei ira na lewe ni kalasi mera wasea na veika era sa kunea.

Vunau kei na Veiyalayalati 49:15–17

Na nodrau vakamau na tagane kei yalewa sa yaga bibi ki na ituvatuva ni Kalou.

• Me baleta ga ni vakamau sa ka bibi sara ki na ituvatuva nei Tamada Vakalomalagi, e gadreva sara o Setani me vakavurea kina na veilecayaki. Ena yaga sara ki na nomu kalasi mera vola ena papa ni volavola na dina sa vakatakila mai na Turaga me baleta na vakamau. Me ivakaraitaki, na dina cava me baleta na vakamau eda vulica mai na Vunau kei na Veiyalayalati 49:15–17? Na veivolanikalou e veivuke e oka kina na Nai Vakatekivu 2:20–24; 1 Korinica 11:11; se ira tale eso era kune ena “Marriage,Marry” ena iDusidusi ki na iVolanikalou (scriptures. ChurchofJesusChrist.org). E rawa ni ra kunea talega na lewe ni kalasi na dina e tiko ena “Na Matavuvale: Ai Vakaro ki Vuravura Raraba.” Mai na veika eda sa vulica mai na ivurevure oqo, na cava na vuna e bibi sara kina na vakamau ni dua na tagane kei na dua na yalewa ki na ituvatuva ni Kalou? (raica na “iKuri ni iVurevure”).

  

  Na nodrau vakamau e dua na tagane kei na dua na yalewa sa ilesilesi ni Kalou.

Vunau kei na Veiyalayalati 50:13–22

Rau sa vakatataki vata o qasenivuli kei gonevuli mai vua na Yalo.

• Na veivakasalataki ni Turaga me baleta na vunautaki kei na kena ciqomi na dina e rawa ni vakarautaka na madigi vinaka me veivosakitaki na wasei ni itavi vaka qasenivuli kei na lewe ni kalasi me susugi cake na vulici ni kosipeli. Sa rawa mo kerei ira na lewe ni kalasi me ra railesuva vata vakaisa na Vunau kei na Veiyalayalati 50:13–22 ka veivosakitaka na itavi ni Yalo, qasenivuli, kei ira na vuli tiko. Me qai vica vei ira na mataveisa oqori mera wasea ki na kalasi na veika era sa veivosakitaka. Na cava “eso tale na sala” eda dau saga meda vakavulica se vulica kina na kosipeli? (tikina e 17). Eda na ciqoma vakavinaka cake kina vakacava ena Yalo? Na cava eda sa vakauqeti kina meda cakava ena noda itikotiko vakakina ena lotu meda vakavulica se vulica kina na kosipeli?

iKuri ni iVurevure

Na vakamau sa yaga bibi sara ki na ituvatuva nei Tamada Vakalomalagi.

E vakamacalataka o Elder David A. Bednar na vuna e yaga bibi sara kina na vakamau ki na ituvatuva ni veivakabulai ni Kalou:

“Sa lewa vakalou, ki na tagane kei na yalewa me rau sa toso vata ki liu ena bula uasivi kei na taucoko ni lagilagi. Me baleta na nodrau ivakarau kei na duidui ni rawa ka, ena kauta mai ki na veimaliwai ni vakamau na tagane kei na yalewa na vei vakasama totoka kei na veika e sotavi. Na tagane kei na yalewa e duidui na nodrau cau ia e tautauvata nodrau duabauga kei na lomavata ka rawa ni rawati ena sega tale ni dua na sala. O tagane ena vakataucokotaka ka vakauasivitaka na yalewa kei yalewa ena vakataucokotaka ka vakauasivitaka na tagane ni rau vuli ka muavata ena veivaqaqacotaki kei na veivakalougatataki vakai rau. …

“E vale ni sa dauloloma ka dina o tagane vakawati kei yalewa vakawati sa yaco me vanua cecere sara mera na susugi kina na gone ena loloma kei na ivalavala dodonu ka me sotavi kina na nodra gagadre vakayalo vakayago na gone. Me vaka ga na kedrau ituvaki cecere o tagane kei yalewa ena cau ki na vakataucokotaki ni dua na veimaliwai ni vakamau, sa yaco kina na ituvaki vata vakaoqo me ka bibi ki na nodra tuberi, susugi cake, ka vakavulici na gone” (“Marriage Is Essential to His Eternal Plan,” Ensign, June 2006, 83 – 84).

Vakatorocaketaki Noda Veivakavulici

Liutaka na veivosaki e veivakauqeti Sa tiko ki na tamata kecega na veika me cau kina, ia eso na gauna e sega ni dau yaco ki na tamata kecega na kena madigi. Ni vakamuri tiko na veivakauqeti ni Yalo, raica na sala eso me vakalevutaki kina na iwiliwili ni lewe ni kalasi e rawa mera wasea na nodra nanuma kei na lomadra.