NaiMatai ni Yatu, mai vei James Taylor Harwood

17–23 ni Me.

Vunau kei na Veiyalayalati 51–57

“Sa Yalodina, ka Dodonu, ka Dauveiqaravi Vakavuku”

Ena so na gauna na veivakauqeti me baleta na veika me vakavulici ena rawa ni yaco mai ni veitalanoataki na ivolanikalou vata kei na dua na lewe ni matavuvale se itokani.

Vola na Veika o Vakauqeti Kina

Sureta na Veiwasei

Sa rawa mo wasea na vosa oqo nei Elder Quentin L. Cook: “Sa noqu vakanuinui me da raica tale mada vakaikeda yadudua ka vakamatavuvale na noda dui cakacaka ni ivakatawa ni sa noda itavi ka da na soli itukutuku kina” (“Na Cakacaka ni iVakatawa — E Dua na Veivakabauti Tabu,” Ensign se Liaona, Nove. 2009, 94). Sa rawa mo qai tarogi ira na lewe ni kalasi ena veika era sa vulica mai na wase 51 – 57 me baleta na nodra veiqaravi.

Vakavulica na iVunau

Vunau kei na Veiyalayalati 51:9, 15–20

Na Turaga e vinakata meda dauveiqaravi yalodina, dodonu, ka vuku.

• O na vukei ira vakacava na lewe ni kalasi mera vakasamataka na sala e yaga kina vei ira na vosa ni Turaga ena wase 51 ? E rawa mo vola ena papa ni volavola Na cava sa nuitaki au tiko kina na Turaga? ka sureti ira na lewe ni kalasi mera vola na nodra isau ni taro (raica na “iKuri ni iVurevure” me baleta na vakasama). Me ra qai vakasaqara na ivakavuvuli ena tikina e 9, 15–20 e vakavulici ira ena sala mera ivakatawa vinaka cake ena veika era sa vola. Se rawa mo vakanamata ki na vosa “yalodina,” “dodonu” ka “vakavuku” ena tikina e 19, ka veivosakitaka na sala e rawa ki na veivosa yadua oqo mera dusimaki keda meda vakayacora rawa na noda veiqaravi. Kevaka e gadrevi, mo ni railesuva vata na ibalebale ni “iVakatawa, Veiqaravi” ena iDusidusi ki na iVolanikalou (scriptures.ChurchofJesusChrist.org).

Era solia na lewenilotu era bulataka tiko na lawa ni isolisoli na nodra veika kecega ki na Lotu.

Vunau kei na Veiyalayalati 52:10; 53:3; 55:1–3

Na isolisoli ni Yalo Tabu e dau soli mai na veitabaki ni liga.

• E vakamacalataka e vuqa na tikina ena ivakatakila eso oqo na ciqomi ni Yalo Tabu mai na veitabaki ni liga. Kevaka e dua na veivosaki ena iulutaga oqo sa yaga vakalevu sara ki na nomu kalasi, mo tarogi ira na lewe ni kalasi na cava era sa vulica mai na Vunau kei na Veiyalayalati 52:10; 53: 3; 55:1–3 me baleta na isolisoli ni Yalo Tabu. Me baleta na ikuri ni ulutaga oqo, raica na Cakacaka 8:14–17; 19:1–6. Sa rawa ki na lewe ni kalasi mera tukuna na veika era sotava ena nodra ciqoma na isolisoli ni Yalo Tabu se na cava e rawa ni ra cakava mera tomana tikoga nodra ciqoma na Nona veivakauqeti ena nodra bula.

Vunau kei na Veiyalayalati 52:9–11, 22–27

Eda rawa ni wasea na kosipeli ena vanua cava ga eda tiko kina.

• Ni sa tala na Turaga e vica na iliuliu ni Lotu ki Misuri, a tukuna vei ira me ra vakayagataka na gauna era lako tiko mera “vunau voli” kina (tikina e 25 – 27). Na wiliki ni Vunau kei na Veiyalayalati 52: 9–11, 22–27 e rawa me veivosakitaki kina na sala eda rawa ni da wasea “voli” kina na kosipeli se ena gauna cava ga ni noda bula. Sa rawa vei ira na lewe ni kalasi mera veivosakitaka na sala era sa cakava kina na nodra wasea na kosipeli me sa tiki tu ni nodra bula.

Vunau kei na Veiyalayalati 52:14–19

Sa solia mai na Kalou e dua na ivakarau me levei kina na ivadi ca.

• Me vakatakilai na ivakarau sa vakatakila mai na Turaga ena Vunau kei na Veiyalayalati 52:14–19, sa rawa mo wasea na ivakaraitaki ni so tale na ivakarau era kila tu beka na kalasi, me vakataka na ivakarau ni kedra buli na veika eso se ivakarau ni itovo. Era rawa ni ra wasea ga na lewe ni kalasi na nodra dui ivakaraitaki. Na cava era ka bibi kina na ivakarau? Eda na vakayagataka vakacava na ivakarau era tiko ena tikina e 14–19 mo levei kina na ivadi ca eda raica e vuravura nikua?

Vunau kei na Veiyalayalati 54

Au rawa ni gole vua na Turaga ena gauna au vakaleqai kina ena nodra digidigi eso.

• E vuqa vei keda sa sotava oti na rarawa ni dua eda sa vakanuinui tiko kina a sega ni maroroya na nona yalayala. A yaco oqo vei ira na Yalododonu mai Kolosivili, New York, era a namaka mera laki vakaitikotiko ena vanua nei Limeni Kopeli mai Ohio. Me ivakavuli na ka a sotavi oqo, mera railesuva na lewe ni kalasi na ulutaga ni wase 54 (raica talega na Yalododonu, 1:125–28; “E Dua na Bisopi ki na Lotu,” Na iVakatakila ena kena Vakasama, 78 – 79). Era rawa ni raitayalotaka ni tiko e dua na itokani vei ira na Yalododonu ni Kolosivili ka qai kunea na ivakasala ena wase 54 ka rawa ni ra wasea vei nodra itokani. Se e rawa ni ra vakasaqara na ivakatakila me baleta e dua na ka e rawa ni vukea e dua sa vakaleqai tu ena vuku ni digidigi ni dua tale na tamata. (Sa rawa mo vakaraitaka na yalayala ena tikina e 6. vei ira era maroroya tiko na nodra veiyalayalati.)

• E vica na malanivosa enaVunau kei na Veiyalayalati 54: 10 era rawa ni raica na lewe ni kalasi ni vakaibalebale cake, me vaka na “vosota sara na veika rarawa,” “qarai au taudonu”, kei na “vakacegu ni yalodra.” Sa rawa ki na lewe ni kalasi mera digitaka e dua na malanivosa mera vakasamataka vakatitobu ka vulica, ka vakayagataka na ivakamacala e botona se na ivurevure tale eso me ra vakasaqara kina na ivolanikalou veisemati. Mera qai wasea kina na nodra nanuma.

iKuri ni iVurevure

Na noda veiqaravi.

E vakamacalataka o Peresitedi Spencer W. Kimball: “Ena loma ni Lotu na itavi ni veiqaravi tabu vakayalo se vakayago sa nuitaki tiko me na volaitukutukutaki. Baleta ni nona na Turaga na veika kecega, eda sa dauqarava na yagoda, vakasama, matavuvale, kei na iyau. (Raica na Vunau kei na Veiyalayalati 104:11–15.) Na dauveiqaravi yalodina sai koya e dua e vakayagataka na lewa ni ivalavala dodonu, dau raici ira na nona, ka rai yani vei ira na dravudravua kei na vakaloloma” (“Na Veiqaravi ni Welefea: Na Bulataki ni Kosipeli,” Ensign, Nove. 1977, 78).

Vakatorocaketaki Noda Veivakavulici

Vukei ira na vuli tiko mera veitokoni vakai ira. Cakava e dua na ituvaki ni kalasi era na veitokoni ka veivakayaloqaqataki kina vakai ira na vuli tiko. Sureti ira mera wasea na vakasama kei na iwalewale eso mena laveta cake na nodra dui vuli yadua ka vakavuvale. (Raica na Veivakavulici ena iVakarau ni iVakabula,36.)