Independence, Missouri, mai vei Al Rounds

24–30 ni Me.

Vunau kei na Veiyalayalati 58–59

“Gumatua ena Cakacaka Vinaka”

Ni oti na kena wiliki na Vunau kei na Veiyalayalati 58 – 59, me raici mada na veitaro oqo: Na cava beka o vakauqeti mo wasea vei ira na nomu kalasi? Na cava beka o nuitaka era na raica? O na vukei ira vakacava mera kila na ka oqo?

Vola na Veika o Vakauqeti Kina

Sureta na Veiwasei

Mera vakauqeti na lewe ni kalasi me ra wasea na veika era sa vulica ena nodra vulica na ivolanikalou, sa rawa mo vola na taro eso oqo ena papa ni volavola: Na cava eda sa vulica? Eda na bulataka vakacava na veika eda sa vulica? Sa rawa mera vola na lewe ni kalasi ena ruku ni imatai ni taro na dina era sa kunea ena Vunau kei na Veiyalayalati 58–59. Mera qai veivosakitaka ena vica na miniti na veivakasama mera bulataka kina na dina oqori ka vola na nodra nanuma ena ruku ni ikarua ni taro.

Vakavulica na iVunau

Vunau kei na Veiyalayalati 58:1–5, 26–33

Na veivakalougatataki e yaco mai me vaka ena gauna ga ni Kalou kei na noda gugumatua.

• NaVunau kei na Veiyalayalati 58 e vakavuvulitaka na dina ena rawa me kauta mai na vakacegu ena gauna ni veivakatovolei. Era sa rairai kunea beka na lewe ni kalasi eso na dina oqori ni ra vulica tiko na wase oqo; mo qai sureti ira mera wasea na veika era sa kunea. Se mera vakasaqaqara vakakalasi, ira yadudua se vakailawalawa ena tikina e 1–5, 26–33 baleta e dua na ka e rawa ni veivuke vua e dua sa sotava tiko na veika dredre se vua e dua e waraka tiko e dua na veivakalougatataki sa yalataki tu. Ni oti nodra wasea na veika era sa kunea, sa rawa eso mera wasea na veika era sa sotava se ivolanikalou eso sa vakadeitaki mai kina na dina ena veitikina oqo.

• Me tiki ni nomuni veivosakitaka na ivakavuvuli oqo, sa rawa mo vakaraitaka na vidio “Hope Ya Know, We Had a Hard Time” (ChurchofJesusChrist.org) ka veivosakitaka na cava e rawa ni da cakava meda vukei ira era sa sotava tiko na veigauna dredre. Na qaqanivosa nei Sisita Linda S. Reeves ena “iKuri ni iVurevure” ena rawa me vukea talega na nomuni veivosaki. Ena veivakayadrati vakacava na vosa nei Sisita Reeves ena sala eda raica kina na noda vakatovolei?

Vunau kei na Veiyalayalati 58:26–29

Eda rawa ni da “vakayacora na veika dodonu” ena nodra “kila ga vakataki ira.”

• Na cava era sa kila na lewe ni kalasi mai na nodra vulica na Vunau kei na Veiyalayalati 58:26–29 ena macawa oqo? Sa rawa mo wasea vakailawalawa na kalasi ka sureti ira na lewe ni kalasi me ra veivosakitaka ena nodra ilawalawa na veimalanivosa era kunea ni vakaibalebale vakalevu ena veitikina oqo. E vakauqeti keda vakacava na veitikina oqo meda “vakayacora na veika dodonu”? (tikina e 27). Na cava na vuna e vinakata kina na Turaga meda kakua ni “vakaroti tiko ena ka kecega”? (tikina e 26). Na cava era sa vakatura na veitikina oqo me baleta na veika e gadreva na Turaga meda vakataka?

Vunau kei na Veiyalayalati 59:9–19

Na Siga ni Vakacecegu e siga ni Turaga.

• Mera vukei na kalasi mera vakadikeva na ka e vakavulica na Turaga vei ira na Yalododonu taumada mai Misuri me baleta na Siga ni Vakacecegu, sa rawa mo sureti ira mera vakasaqaqara ena Vunau kei na Veiyalayalati 59:9–19 ka vola ena papa ni volavola na cava e vakavulica vei keda na veitiki yadua me baleta na siga ni Vakacecegu. Sa rawa ki na lewe ni kalasi mera wasea talega na kena sa tubu na nodra ivakadinadina baleta na Siga ni Vakacecegu ni ra sa vakatabuya tiko na Siga ni Vakacecegu. Ena Sabbath.ChurchofJesusChrist.org era tiko kina eso na vidio ena vukea me tekivutaki e dua na veivosaki.

• Ena Vunau kei na Veiyalayalati 59, a vakavuvulitaka kina na Turaga na veika e baleta na siga ni Vakacecegu ka vakayagataka kina na vosa “yalomarau,” “yaloreki” kei na “matamarau” (tikina e 14–15). Sa rawa mera vakasaqara na lewe ni kalasi na vosa vakaoqo ena tikina e 9–19. Sa rawa mera qai wasea na lewe ni kalasi na cava mera cakava me ka rekitaki kina na Siga ni Vakacecegu. Eda na vakayagataka vakacava na veitikina oqo me ra vakavulici kina eso na vuna eda rokova kina na Siga ni Vakacecegu?

• Na veivosaki oqo e rawa talega ni madigi vei ira na lewe ni kalasi me ra wasea na veivakasama ena sala mera vakayagataka kina o ira kei na nodra vuvale na Siga ni Vakacecegu me yaco na nodra itikotiko me vanua ni nodra vulica na kosipeli. Sureti ira mera wasea na sala e dau vukei ira tikoga kina na nodra sasaga me ra “qarauni ira vakavinaka … mai na duka ni ka vakavuravura” (tikina e 9).

  

  Na sakaramede sa dua na tiki bibi ni kena rokovi na Siga ni Vakacecegu.

iKuri ni iVurevure

Na noda sotava na veika dredre ena rawa me dusimaki keda yani vua na iVakabula.

E vakavulica o Linda S. Reeves, na lewe taumada ni Mataveiliutaki Raraba ni iSoqosoqo ni Veivukei:

“E dau vakatara na Turaga me da yavalati ka vakatovolei, ena so na gauna ena kena ivakatagedegede duadua e cake. Eda sa dau raica na kena vaka me kamayavu vakadua na nona bula e dua na noda daulomani—ka vakatale madaga kina na noda sara ga vakaikeda—ka vakataroga se cava na vuna e vakatara kina na Tamada Vakalomalagi sa dauloloma ka dauveikaroni me yaco na veika oqo. Ia e sega ni laivi keda tu ga ena dravusa; e tucake tu o Koya ka dodoka tu mai na ligana, ka sureti keda tiko me da lako mai Vua. …

“… O koya e gadreva me vukei keda, me vakacegui keda, ka vakamamadataka na noda mosi ni da vakararavi ki na kaukauwa ni Veisorovaki ka rokova na noda veiyalayalati. Na veivakatovolei kei na dredre eda sotava kina na veika sara ga e dusimaki keda meda lako yani Vua ka kukube toka ena noda veiyalayalati me rawa ni da lesu tale ki na Nona iserau ka ciqoma kece na veika e tu vei Tamana”(“Ciqoma na Veivakalougatataki ni Nomu Veiyalayalati,” Ensign se Liaona, Nove. 2013, 119 – 20).

Vakatorocaketaki Noda Veivakavulici

Vakadeitaka ni ko sa vakavulica tiko na vunau dina. “Mo tarogi iko tiko e veigauna ‘Na sala cava era na vukei kina na noqu lewe ni kalasi mai na veika au sa vakavulici ira tiko kina me ra tara cake na nodra vakabauti Karisito, mera veivutuni, mera cakava eso na veiyalayalati ka muria tiko nodra veiyalayalati kei na Kalou, ka ciqoma na Yalo Tabu?’” (Veivakavulici ena iVakarau ni iVakabula,20).