Independence, Missouri, xb’aan laj Al Rounds

24–30 mayo

Tzol’leb’ ut Sumwank 58–59

“K’eeb’ilaqeb’ rib’ chi anchaleb’ xch’ool sa’ jun chaab’il k’anjel”

Chirix rilb’al ru Tzol’leb’ ut Sumwank 58:59, tz’ileb’ rix li patz’om a’in: K’a’ru nakaweek’a naq taawotz rik’ineb’ li komon? K’a’ru nakawaj naq te’xtaw? Chan ru taatenqʼahebʼ chixtawbʼaleb’ li k’a’aq re ru a’an?

Tz’iib’a li nakak’oxla

Xkanab’ankileb’ chi wotzok

Re xwaklesinkileb’ xch’ool li komon chixwotzb’al li xe’xtzol sa’eb’ li loq’laj hu, naru taatz’iib’aheb’ li patz’om a’in chiru li pizarron: K’a’ru xqatzol? Chan ru taqayu’ami li xqatzol? Eb’ li komon naru te’xtz’iib’a li na’leb’ xe’xtaw sa’ Tzol’leb’ ut Sumwank 58–59 rub’el li xb’een patz’om. Chirix a’an naru te’aatinaq chiru wiib’ oxib’ k’asal chirix chan ru xyu’aminkil li na’leb’ a’an, ut te’xtz’iib’a a’an rub’el li xkab’ patz’om.

Xk’utb’al li tzolʼlebʼ

Tzol’leb’ ut Sumwank 58:1–5, 26–33

Eb’ li osob’tesihom neke’k’ulun a’ yaal lix hoonal li Dios ut lix yalb’al qaq’e.

• Sa’ Tzol’leb’ ut Sumwank 58 k’utb’ileb’ li yaal li naru neke’xk’e qatuqtuukilal sa’eb’ li hoonal re yale’k. Eb’ li komon maare xe’xtaw junjunqeb’ re li yaal a’an naq xe’tzolok sa’ li tasal. Kanab’eb’ chixwotzb’al li xex’taw. Malaj naru neke’ril ruheb’ li raqal 1–5, 26–33 sa’ li tzoleb’aal sa’ junjunqal malaj sa’ ch’uut re te’xsik’ k’a’ruhaq naru nak’anjelak re anihaq li wan xch’a’ajkilal malaj li naroyb’eni junaq osob’tesihom yeechi’inb’il. Chirix naq te’xwotz li te’xtaw, maare junjunqeb’ li komon te’ruuq chixwotzb’al xnumsihomeb’ malaj jalaneb’ chik raqal reheb’ li loq’laj hu li neke’xk’ut xyaalalileb’ li yaal wankeb’ sa’eb’ li raqal a’an.

• Jo’ xkomon li aatinak chirix li na’leb’ a’in, naru teeril li video “Quiero que sepa que lo pasamos muy mal” (ChurchofJesusChrist.org) ut tex’aatinaq chirix k’a’ raj ru naru naqab’aanu re xtenq’ankileb’ li wankeb’ sa’ ch’a’ajkil hoonal. Li raatin li Hermana Linda S. Reeves, li wan sa’ “Xkomon chik li k’anjeleb’aal” naru ajwi’ nak’anjelak sa’ li aatinak. Chan ru naq li raatin li Hermana Reeves nokoxtenq’a chirilb’aleb’ chi jalan chik lix yalb’al qix?

Tzol’leb’ ut Sumwank 58:26–29

Naru “naqak’e chi uxliik naab’al li tiikilal” “chi yal ajb’il qab’aan.”

• K’a’ru xe’xtzol li komon naq xe’ril Tzol’leb’ ut Sumwank 58:26–29 chiru li xamaan a’in? Maare naru taak’eheb’ li komon sa’ kok’ ch’uut ut taakanab’eb’ chi aatinak chirixeb’ li ch’ol aatin wan xyaalal choq’ reheb’ sa’ li raqal a’an. Chan ru naq eb’ li raqal a’an nokoxmusiq’a “chixk’eeb’al chi uxliik naab’al li tiikilal”? (raqal 27). K’a’ut naq li Qaawa’ ink’a’ naraj naq “minb’ilaq qu sa’ chixjunil”? (raqal 26). K’a’ru neke’xye li raqal a’an chirix li k’a’ru naraj li Qaawa’ naq toowulaq wi’?

Tzol’leb’ ut Sumwank 59:9–19

Li hilob’aal kutan a’an xkutankil li Qaawa’.

• Re xtenq’ankileb’ li komon chixk’eeb’al reetal li kixk’ut li Qaawa’ chirix li hilob’aal kutan reheb’ laj santil paab’anel aj Missouri, naru taakanab’eb’ chirilb’al ru Tzol’leb’ ut Sumwank 59:9–19, ut te’xtz’iib’a chiru li pizarron k’a’ru naxk’ut li junjunq chi raqal chirix li hilob’aal kutan. Eb’ li komon naru ajwi’ te’xwotz chan ru naq nak’i lix nawom xch’ooleb’ chirix li hilob’aal kutan naq neke’xsantob’resi li kutan a’an. Sa’ Sabbath.ChurchofJesusChrist.org wankeb’ junjunq li video li naru neke’tenq’an sa’ li aatinak.

• Sa’ Tzol’leb’ ut Sumwank 59, li Qaawa’ ki’aatinak chirix li hilob’aal kutan rik’in roksinkileb’ aatin jo’ “saho’k ch’oolej” ut “xsahil lee ch’ool” (raqal 14–15). Eb’ li komon naru neke’xsik’ aatin jo’eb’ a’an sa’eb’ li raqal 9–19. Chirix a’an, eb’ li komon naru te’aatinaq chirix k’a’ru neke’xb’aanu sa’ li hilob’aal kutan re naq sahaq kutan. Chan ru naru taqoksi li raqal a’an re xk’utb’al chiruheb’ li qas qiitz’in k’a’ut naq naqoxloq’i li hilob’aal kutan?

• Li aatinak naru na’oksiman jo’ jun hoonal re naq eb’ li komon te’xwotz na’leb’ chirix chan ru naq eb’ a’an ut eb’ lix junkab’al neke’roksi li hilob’aal kutan re naq li rochocheb’ a’anaq jun na’ajej re xtzolb’al li evangelio. Kanab’eb’ chixwotzb’al chan ru naq neke’tenq’aak xb’aan lix yalb’aleb’ xq’e chixk’uulankileb’ rib’ “chi q’axal wi’chik … chi maak’a’ xtz’ajnileb’ xb’aan li ruchich’och’ ” (raqal 9).

  

  Li loq’laj wa’ak a’an aajel ru xcha’alil roxloq’inkil li hilob’aal kutan.

Xkomon chik li k’anjeleb’aal

Eb’ li qach’a’ajkilal naru nokohe’xk’am rik’in li Kolonel.

Li xLinda S. Reeves, li kiwan choq’ komon sa’ li Jolomil Awa’b’ejil re li Komonil re Tenq’ank, kixk’ut:

Ex inraarookil ixq, li Qaawa’ nokoxkanab’ chi yale’k, wan naq chi nim tz’aqal. Qilom xyu’ameb’ li raarookeb’ qab’aan—ut maare ajwi’ li qayu’am laa’o—chi k’ate’k chaq, sa’ jaljookil ru aatin, ut naqapatz’ qib’ k’a’ut naq jun Choxahil Yuwa’b’ej aj rahonel ut aj ilonel naxkanab’ naq te’k’ulmanq li k’a’aq re ru a’an. A’b’an a’an moko nokoxkanab’ ta sa’ li cha; a’an xaqxo chi ye’b’ileb’ xtel ut nokoxb’oq chi chalk rik’in a’an. …

“… A’an naraj qatenq’ankil, xk’ojob’ankil qach’ool, ut xk’irtesinkil li qarahilal naq naqakanab’ qib’ rub’el lix wankil lix tojb’al rix li maak ut naq naqoxloq’iheb’ li qasumwank. Maare a’an lix yalb’al qix ut li qach’a’ajkilal li tz’aqal tooxk’am rik’in a’an re taqachap qib’ rik’ineb’ li qasumwank re naq tooq’ajq rik’in a’an ut taqak’ul chixjunil li k’a’ru wan re li Yuwa’b’ej” (“Reclamen las bendiciones de sus convenios,” Liahona, noviembre 2013, 119–120).

Xchaab’ilob’resinkil li qak’utum

Kʼe reetal naq taakʼut li yaalil tzolʼlebʼ. “Junelik taapatzʼ aawibʼ, “Chan ru naq li kʼaʼru yookin chixkʼutbʼal tixtenqʼahebʼ li komon saʼ lin tzolebʼaal chixnimobʼresinkil lix paabʼaal chirix li Kristo, chixjalbʼalebʼ xkʼaʼuxl, chixbʼaanunkil ut chixpaabʼankil li sumwank rikʼin li Dios, ut chixkʼulbʼal li Santil Musiqʼej?” ” (Li k’utuk jo’ li Kolonel, 20).